Биз әбәдијјән Јеһованын исмилә јеријәҹәјик!
“Биз... даима вә әбәдијјән Аллаһымыз Рәббин [“Јеһованын”, ЈД] исмилә јеријәҹәјик” (МИКА 4:5).
1. “Мика” китабынын 3-дән 5-ә кими фәсилләриндә һансы фикирләр вурғуланыр?
ЈЕҺОВАНЫН Өз халгына демәјә сөзү вар вә О, халгына пејғәмбәри Миканын васитәсилә мүраҹиәт едир. Аллаһ ганунсузларын әлејһинә чыхмаг нијјәтиндәдир. О, Исраил халгыны дөнүк чыхдыгларына ҝөрә ҹәзаландырмаға һазырлашыр. Ејни заманда, Јеһова Онун исми илә јеријәнләрә хејир-дуа верәҹәк. Бу фикирләр Миканын пејғәмбәрлијинин 3-дән 5-ә кими фәсилләриндә ајдын сәсләнир.
2, 3. а) Исраил рәһбәрләри һансы кејфијјәти әкс етдирмәлидирләр, лакин әслиндә нә илә мәшғулдурлар? б) Мика 3:2, 3 ајәләриндә тәтбиг олунан мәҹази дили неҹә изаһ едәрдиниз?
2 Аллаһын пејғәмбәри бәјан едир: “Динләјин, риҹа едәрәм, еј Јагубун рәисләри вә Исраил евинин һакимләри; һаггы танымаг сизә дүшмәзми?” Бәли, һәгигәти — һаггы онлар танымалыдырлар. Бәс онлар әслиндә нә илә мәшғулдурлар? Мика дејир: “Сизләр ки, јахшыја нифрәт едәрсиниз вә писи севәрсиниз; онларын үзәриндән, дәриләрини вә сүмүкләри үзәриндән әтләрини сојарсыныз. Вә онлар халгымын әтини јејирләр вә үзәрләриндән дәриләрини үзүрләр вә сүмүкләрини гырырлар вә газан үчүнмүш кими вә чөлмә ичиндә олан әт кими онлары доғрајырлар” (Мика 3:1-3).
3 Бир ишә бах, рәһбәрләр фағыр, мүдафиәсиз инсанлары сыхышдырырлар! Бурада тәтбиг олунан мәҹази дил Миканы динләјәнләрә дәрһал ајдын олду. Кәсилмиш гојуну гајнатмаға һазырлајанда, әввәлҹә онун дәрисини чыхарыр, сонра исә парчалајырлар. Бә’зән илији чыхартмаг үчүн сүмүјү сындырырлар. Һәм әти, һәм дә сүмүкләри, Миканын дедијинә охшар тәрздә, ири газанда гајнадырлар (Һезекиел 24:3-5, 10). Бу әјани нүмунә, пис рәһбәрләрин садә инсанларла гәддар давранышыны неҹә дә дәгиг тәсвир едир!
Јеһова бизим әдаләтли олмағымызы ҝөзләјир
4. Јеһова Исраил рәһбәрләриндән нә илә фәргләнир?
4 Исраилин рәһбәрләри мәһәббәтли Чобан олан Јеһовадан олдугҹа фәргләнирләр. Әдаләтлә давранмадыглары үчүн, онлара верилән тапшырыға — сүрүнү горумаг тапшырығына риајәт едә билмирләр. Онлар, Мика 3:10 ајәсиндә гејд олундуғу кими, мәҹази гојунлары әдаләтдән мәһрум едәрәк вә ганларыны ахыдараг онлары худбинликлә истисмар едирләр. Биз бу вәзијјәтдән нә өјрәнә биләрик?
5. Јеһова, Онун халгы арасында үзәринә рәһбәрлик ҝөтүрәнләрдән нә ҝөзләјир?
5 Аллаһ ҝөзләјир ки, Онун халгы арасында үзәринә рәһбәрлик ҝөтүрәнләр әдаләтлә давранаҹаглар. Бу ҝүн Јеһованын хидмәтчиләри арасындакы вәзијјәт дә мәһз бу ҹүрдүр. Бундан әлавә, бу, Ишаја 32:1 ајәсиндә олан сөзләрә дә мүвафиг ҝәлир. Биз охујуруг: “Будур, бир падшаһ доғрулугла падшаһлыг едәҹәк вә рәисләр әдаләтлә һөкм едәҹәкләр”. Бәс Миканын ҝүнләриндәки вәзијјәт неҹәдир? ‘Јахшыја нифрәт едиб, писи севәнләр’ әдаләти виҹдан әзабы чәкмәдән тапдалајырлар.
Аллаһ кимләрин дуасына ҹаваб верир?
6, 7. Мика 3:4 ајәсиндә бизим диггәтимиз нәјә јөнәлдилир?
6 Миканын позғун мүасирләри Јеһованын илтифатына үмид бәсләјә биләрләрми? Әлбәттә ки, јох! Мика 3:4 ајәсиндә дејилир: “Рәббә фәрјад едәҹәкләр, фәгәт онлара ҹаваб вермәјәҹәк; о вахт үзүнү онлардан өртәҹәк, чүнки ишләрини пис етдиләр”. Бурада бизим диггәтимиз чох ваҹиб бир шејә јөнәлдилир.
7 Әҝәр биз ҝүнаһ ишләдириксә, Јеһова дуаларымыза ҹаваб вермәјәҹәк. Бу, бизим ҝүнаһлы һәрәкәтимизи ҝизләдәрәк икили һәјат сүрдүјүмүз вә санки Аллаһа сәдагәтлә хидмәт етдијимизи ҝөстәрдијимиз һаллара аиддир. Мәзмур 26:4 ајәсинә әсасән, Давуд охујурду: “Јаланчы адамларла отурмадым; вә икиүзлүләрлә бәрабәр ҝетмәдим”. Јеһова, хүсусилә дә Онун Кәламыны биләрәкдән зидд даврананларын дуаларына ҹаваб вермәјәҹәк!
Аллаһын руһу гүввәт верир
8. Миканын ҝүнләриндәки јаланчы пејғәмбәрләр һансы хәбәрдарлығы алдылар?
8 Исраилин руһани рәһбәрләри неҹә дә биабырчы әмәлләрлә мәшғулдурлар! Јаланчы пејғәмбәрләрин ҝүнаһы уҹбатындан Аллаһын халгы руһани мә’нада јолуну азмышдыр. Тамаһкар рәһбәрләр, “сүлһ” дејә бағырырлар, әмәлдә исә онларын ағзына бир шеј гојмајан адама гаршы мүһарибә е’лан едирләр. “Онлар үчүн Рәбб белә дејир: Бундан өтрү рө’ја ҝөрмәјәсиниз дејә сизә ҝеҹә олаҹаг; вә фалчылыг етмәјәсиниз дејә сизә гаранлыг олаҹаг; вә пејғәмбәрләр үзәринә ҝүнәш батаҹаг вә үзәрләринә ҝүн гаралаҹаг. Вә Ҝөрәнләр утандырылаҹаг вә фалчыларын үзү гызараҹаг; вә һамысы додагларыны [“бығларыны”, ЈД] өртәҹәкләр” (Мика 3:5-7а).
9, 10. “Бығларыны өртмәк” ифадәси алтында нә нәзәрдә тутулур вә буну етмәјә Миканын нәјә ҝөрә әсасы јохдур?
9 Нәјә ҝөрә “бығларыны өртмәк” лазым ҝәлир? Миканын ҝүнаһлы мүасирләри буну хәҹаләт чәкдикләриндән едирләр. Ганунсуз давранан бу инсанларын хәҹаләт чәкмәјә әсаслары вар. Онлара “Аллаһдан ҹаваб јохдур” (Мика 3:7б). Јеһова ловға ҝүнаһкарларын дуаларына һеч бир диггәт јетирмир.
10 Миканын исә “бығларыны өртмәк” үчүн әсасы јохдур. О хәҹаләт чәкмир. Јеһова онун дуаларына ҹаваб верир. Мика 3:8 ајәсинә диггәт јетирәк. Бу ајәдә садиг пејғәмбәр дејир: “Фәгәт мән... Рәббин Руһу илә гүввәт вә һагг вә ҹәсарәтлә долујам”. Узун мүддәтли вә садиг хидмәти әрзиндә ‘Рәббин Руһу илә гүввәтлә долу олдуғу үчүн’ Мика неҹә дә миннәтдар иди! Бу она “Јагуба ҝүнаһыны вә Исраилә сучуну билдирмәк үчүн” гүввәт верирди.
11. Инсанлар Аллаһдан ҝәлән хәбәрләри бәјан етмәк үчүн һарадан гүввә әлдә едә биләрләр?
11 Аллаһын һөкмләрини бәјан етмәк үчүн Микаја инсан гүввәсиндән үстүн гүввә лазым иди. Она Јеһованын руһу, Онун ҝүҹлү фәал гүввәси ҝәрәк иди. Бәс бизә? Јеһова бизи мүгәддәс руһунун васитәсилә мөһкәмләндирәрсә, тәблиғ етмәк тапшырығыны јеринә јетирә биләрик. Әҝәр ҝүнаһ ишләтмәк биздә вәрдиш һалына кечибсә, тәблиғ етмәк ҹәһдләримизин һамысы боша чыхаҹагдыр. Чүнки белә олан һалда Аллаһ бизим бу иши јеринә јетирмәк үчүн зәрури олан гүввә һаггындакы дуаларымыза ҹаваб верә билмәзди. Биздә исә “Рәббин Руһу” олмаса, сәмави Атамызын һөкмләрини, әлбәттә ки, бәјан едә билмәрик. Амма биз, ешидилән дуаларын вә мүгәддәс руһун сајәсиндә Аллаһын Кәламыны, Мика кими ҹәсарәтлә сөјләмәк игтидарындајыг.
12. Исанын илк шаҝирдләри нәјин сајәсиндә Аллаһын сөзүнү ҹәсарәтлә сөјләјә билирдиләр?
12 Еһтимал ки, Мүгәддәс Китабдан Һәвариләрин ишләри 4:23-31 ајәләрини хатырлајырсан. Тәсәввүр ет ки, сән Исанын илк шаҝирдләриндән бирисән. Фанатик әһвал-руһијјәли тә’гибчиләр Мәсиһин шаҝирдләрини мәҹбурән сусдурмаға чалышырлар. Лакин Аллаһа садиг олан бу адамлар Һагг-Тәала Рәббә үрәкдән дуа едирләр: “Ја Рәбб, онларын тәһдидләринә бах вә Өз гулларына гүввә вер ки, Сәнин сөзүнү там ҹәсарәтлә сөјләсинләр”. Сонра нә баш верир? Онларын јалварышларындан сонра топлашдыглары јер сарсылыр вә һамысы бир нәфәр кими мүгәддәс руһла долур вә Аллаһын сөзүнү ҹәсарәтлә сөјләмәјә башлајырлар. Ҝәлин биз дә хидмәтимизи јеринә јетирәркән дуа васитәсилә Јеһоваја ҝүвәнәк вә Онун мүгәддәс руһунун көмәјинә архаланаг!
13. Јерусәлим вә Самарија илә нә баш верәҹәк вә нәјә ҝөрә?
13 Инди исә јенидән Миканын ҝүнләринә гајыдаг. Мика 3:9-12 ајәләринә әсасән, ган төкүлмәсиндә ҝүнаһкар оланлар рүшвәт алыб һөкм кәсирләр, каһинләр әмәк һаггы алараг өјрәдирләр, јаланчы пејғәмбәрләр исә ҝүмүш алараг ҝәләҹәји сөјләјирләр. Ҝөзләнилдији кими, Аллаһ гәрар чыхарды ки, Јәһудеја падшаһлығынын пајтахты Јерусәлим “даш јығынлары олаҹаг”. Јалан ибадәт вә әхлагсызлыг Исраилдә дә инкишаф етдијинә ҝөрә, Мика илһам алараг белә бир хәбәрдарлыг јазыр ки, Аллаһ Самаријаны “даш јығыны кими” едәҹәкдир (Мика 1:6). Габагҹадан верилән хәбәрдарлыға әсасән б.е.ә. 740-ҹы илдә Самарија шәһәри Ассурија гошунлары тәрәфиндән мәһв едилән заман, пејғәмбәр һәлә јашајырды (2 Краллар 17:5, 6; 25:1-21). Ајдындыр ки, Јерусәлим вә Самаријаја гаршы олан бу кәскин хәбәри јалныз Јеһовадан ҝәлән гүввәнин сајәсиндә бәјан етмәк мүмкүн оларды.
14. Мика 3:12 ајәсиндәки пејғәмбәрлик неҹә јеринә јетди вә бу бизә неҹә тә’сир етмәлидир?
14 Јәһуда падшаһлығы Јеһованын һөкмүндән һеч ҹүр гачыб гуртара билмәјәҹәк. Мика 3:12 ајәсиндә габагҹадан дејилдији кими, Сион “тарла кими сүрүләҹәк”. XXI әсрдә јашајан бизләрә мә’лумдур ки, һәмин пејғәмбәрлик б.е.ә. 607-ҹи илдә бабиллиләр Јәһуда вә Јерусәлими хараба гојдуглары заман јеринә јетди. Бу, Миканын пејғәмбәрлик етдији вахтдан чох илләр сонра баш верди, лакин о, әмин иди ки, дејиләнләр мүтләг јеринә јетәҹәк. Һазырки пис системин һәлакынын габагҹадан дејилдији кими, “Аллаһын Ҝүнүнүн” вахтында баш верәҹәјинә ејни ҹүр әминлији биз дә әкс етдирмәли дејиликми? (2 Петер 3:11, 12).
Јеһова ишләри јербәјер едир
15. Мика 4:1-4 ајәләриндәки пејғәмбәрлији өз сөзләринизлә неҹә тәсвир едәрдиниз?
15 Миканын пејғәмбәрлијинә гајыдараг ҝөрүрүк ки, сонра о, һәјәҹанландырыҹы вә үмидвериҹи сөзләр јазыр. Мика 4:1-4 ајәләриндәки сөзләр неҹә дә үрәјә јатандыр! Мика јазыр: “Сон ҝүнләрдә елә олаҹаг ки, дағларын башында Рәбб евинин дағы мөһкәмләндириләҹәк вә тәпәләрдән јухары јүксәләҹәк; вә халглар она ахышаҹаглар. [...] Вә чох халглар арасында һөкм едәҹәк вә узагда олан гүввәтли милләтләр һаггында гәрар верәҹәк; вә гылынҹларыны котан вә мизрагларыны бағча бычаглары едәҹәкләр; милләт милләтә гаршы гылынҹ галдырмајаҹаг вә артыг ҹәнҝ етмәји өјрәнмәјәҹәкләр. Фәгәт һәр кәс өз асмасы алтында вә өз әнҹир ағаҹы алтында отураҹаг; вә онлары горхудан олмајаҹаг; чүнки буну ордулар Рәббинин ағзы сөјләди”.
16, 17. Мика 4:1-4 ајәләриндәки сөзләр бу ҝүн неҹә јеринә јетир?
16 Пејғәмбәрликдә хатырладылан “чох халглар” вә “гүввәтли милләтләр” кимләри нәзәрдә тутур? Онлар бу дүнјанын милләтләри вә дөвләтләри дејил. Пејғәмбәрлик, Јеһоваја һәгиги ибадәтин дағында иҹра олунан мүгәддәс хидмәтдә бирләшмиш бүтүн халглардан олан ајры-ајры адамлара аиддир.
17 Миканын пејғәмбәрлијинә мүвафиг олараг, Јеһоваја тәмиз ибадәт тезликлә сөзүн һәгиги мә’насында бүтүн јер үзүндә иҹра олунаҹагдыр. Бу ҝүн “әбәди һәјата мејлли оланлара” Јеһованын јолларыны өјрәдирләр (Һәвариләрин ишләри 13:48, ЈД). Јеһова, Онун Падшаһлығынын тәрәфини сахлајанларын рифаһына ‘һөкм едир вә гәрар верир [“ишләри јербәјер едир”, ЈД]’. Онлар ‘бөјүк издиһамын’ бир һиссәси кими, “бөјүк мәшәггәтдән” сағ чыхаҹаглар (Вәһј 7:9, 14). Гылынҹларыны котана чевирмәклә исә онлар артыг бу ҝүн һәм һәмиманлылары олан Јеһованын Шаһидләри илә, һәм дә башгалары илә сүлһдә јашајырлар. Онларын арасында олмаг неҹә дә хошдур!
Јеһованын исми илә јеримәјә гәти гәрарлыјыг
18. Үзүм асмасы вә әнҹир ағаҹы алтында отурмаг нәјин рәмзидир?
18 Бизим ҝүнләрдә, јер үзүнү горху һисси бүрүдүјү бир вахтда, биз чох адамларын Јеһованын јоллары һаггында өјрәндијинә шад олуруг. Биз Аллаһы севән адамларын артыг дөјүшмәји өјрәнмәјәҹәкләри, үзүм асмалары вә әнҹир ағаҹлары алтында отураҹаглары вахты сәбирсизликлә ҝөзләјирик. Һәмин вахт артыг јахындыр. Чох вахт әнҹири “үзүм бағында” әкирдиләр (Лука 13:6, ЈД). Үзүм асмалары вә әнҹир ағаҹлары алтында отурмаг, сүлһ, тәрәгги вә тәһлүкәсизлик рәмзидир. Јеһова илә олан мүнасибәтләримиз артыг бу ҝүн бизә гәлб раһатлығы вә руһани тәһлүкәсизлик бәхш едир. Аллаһын Падшаһлығынын идарә етдији вахтда јухарыда тәсвир олунан шәраитләр реаллыға чевриләндә, бизим горхмаға әсасымыз олмајаҹаг, биз тамамилә тәһлүкәсиз олаҹағыг.
19. Јеһованын исми илә јеримәк нә демәкдир?
19 Аллаһын лүтфүндән вә хејир-дуасындан истифадә етмәк үчүн биз Јеһованын исми илә јеримәлијик. Бу фикир Мика 4:5 ајәсиндә ајдын әкс олунур. Пејғәмбәр орада дејир: “Бүтүн халглар, һәр бири өз илаһисинин исмилә јеријир; биз дә даима вә әбәдијјән Аллаһымыз Рәббин [“Јеһованын”, ЈД] исмилә јеријәҹәјик”. Јеһованын исми илә јеримәк нә демәкдир? Бу садәҹә Онун бизим Аллаһымыз олдуғуну сөјләмәкдән даһа бөјүк мә’на кәсб едир. Бу һәмчинин зәрури олса да, мәсиһчи ҝөрүшләринә ҝәлмәкдән вә Падшаһлыг һаггындакы тәблиғ ишиндә иштирак етмәкдән дә артыг мә’на кәсб едир. Әҝәр биз Јеһованын исми илә јеријириксә, бу о демәкдир ки, биз Она һәср олунмушуг вә Ону бүтүн гәлбдән севәрәк, сәдагәтлә хидмәт етмәк үчүн сә’ј ҝөстәририк (Матта 22:37). Шүбһәсиз ки, биз, Аллаһын хидмәтчиләри кими, Аллаһымыз олан Јеһованын исми илә әбәдијјән јеримәјә гәти гәрарлыјыг.
20. Мика 4:6-13 ајәләриндә габагҹадан нә дејилмишдир?
20 Инди исә Мика 4:6-13 ајәләриндәки пејғәмбәрлик сөзләрини нәзәрдән кечирәк. “Сион гызы” әсир апарылмалы вә “Бабилә гәдәр” ҝетмәлидир. Ерамыздан әввәл ВЫЫ әсрдә Јерусәлимин сакинләри илә мәһз бу һадисә баш верди. Буна бахмајараг, Миканын пејғәмбәрлијинин ҝөстәрдији кими, галыг Јәһудаја гајыдаҹаг вә Сион бәрпа олунан вахт үчүн Јеһова гајғы ҝөстәрәҹәк ки, онун дүшмәнләри мәһв едилсинләр.
21, 22. Мика 5:2 ајәси неҹә јеринә јетди?
21 Миканын 5-ҹи фәслиндә, башга драматик һадисәләр сөјләнилир. Мәсәлән, Мика 5:2-4 ајәләриндә дејиләнләрә диггәт јетирәк. Мика пејғәмбәрлик едир ки, Аллаһын тә’јин етдији, “чыхышы әски вахтдан” олан Һөкмдар Бејтлеһемдә дүнјаја ҝәләҹәкдир. О, чобан кими “Рәббин гүввәти илә” һөкмранлыг едәҹәкдир. Бундан әлавә, бу Һөкмдар јалныз Исраилдә дејил, “јерин уҹларына гәдәр” бөјүк олаҹагдыр. Сөһбәтин кимдән ҝетдијини, еһтимал ки, дүнја анламаса да, бу бизим үчүн сирр дејил.
22 Бејтлеһемдә дүнјаја ҝәлән ән мүһүм шәхс ким иди? Вә ким “јерин уҹларына гәдәр бөјүк” олаҹаг? Бу шәхс Иса Мәсиһ иди! Бөјүк Һирод, Мәсиһин һарада доғулаҹағыны баш каһинләрдән вә дин алимләриндән сорушанда, онлар ҹаваб вердиләр: “Јәһудеја Бејтлеһеминдә”. Онлар һәтта Мика 5:2 ајәсини ситат ҝәтирдиләр (Матта 2:3-6). Буну садә инсанлар да билирдиләр. Јәһја 7:42 ајәсиндә онларын сөзү ситат ҝәтирилир: “Мүгәддәс Јазыларда: “Мәсиһ Давудун нәслиндән, Давудун јашадығы Бејтлеһем кәндиндән ҝәләҹәк”, — дејилмәмишдирми?”
Инсанлар үчүн әсл тәравәт
23. Мика 5:7 ајәсиндәки пејғәмбәрлик бу ҝүн неҹә јеринә јетир?
23 Мика 5:5-15 ајәләриндә гыса мүддәтли мүвәффәгијјәт газанаҹаг Ассурија һүҹуму барәдә данышылыр вә пејғәмбәрлик едилир ки, Аллаһ итаәтсиз халглардан гисас алаҹаг. Мика 5:7 ајәсиндә төвбә едән јәһудиләрин галығынын вәтәнә гајытмасы һаггында вә’д вардыр, лакин бу сөзләр бизим ҝүнләрә дә аиддир. Мика е’лан едир: “Јагубун галығы чох халгларын ортасында, Рәбб тәрәфиндән шеһ кими... от үзәринә дүшән јағмур кими олаҹаг”. Пејғәмбәрлик бу ҹүр ҝөзәл тәсвирин васитәсилә ҝөстәрир ки, руһани Јагубун, јә’ни Исраилин галығы инсанлар үчүн Аллаһдан хејир-дуа олаҹагдыр. Исанын јер үмидинә малик олан “башга гојунлары”, инсанлара руһән тәравәт ҝәтирмәкдә “Аллаһын Исраилинә” көмәк едәрәк онунла әмәкдашлыг етмәјә чох шаддырлар (Јәһја 10:16; Галатијалылара 6:16; Тсефанја 3:9). Бурада үзәриндә дүшүнмәјимиз үчүн ваҹиб бир фикир вар: Падшаһлығын тәблиғчиләри олараг, биз һамымыз инсанлара тәравәт ҝәтирмәк кими надир имканымызы гијмәтләндирмәлијик.
24. Миканын пејғәмбәрлијинин 3-дән 5-ә кими фәсилләриндән һансы фикирләр јадынызда галды?
24 Миканын пејғәмбәрлијинин 3-дән 5-ә кими фәсилләриндән нә өјрәндин? Еһтимал ки, өзүн үчүн нөвбәти фикирләри гејд етмисән: 1. Аллаһ ҝөзләјир ки, Онун халгы арасында үзәринә рәһбәрлик ҝөтүрәнләр әдаләтлә давранаҹаглар. 2. Әҝәр биләрәкдән ҝүнаһ ишләдириксә, Јеһова бизим дуаларымыза ҹаваб вермәјәҹәк. 3. Тәблиғ етмәк тапшырығыны, Аллаһ бизи Өз мүгәддәс руһу илә мөһкәмләндирәрсә јеринә јетирә биләрик. 4. Јеһованын лүтфүндән истифадә едә билмәјимиз үчүн Онун исми илә јеримәлијик. 5. Падшаһлығын тәблиғчиләри олараг инсанлара тәравәт ҝәтирмәк кими надир имканымызы гијмәтләндирмәлијик. Јәгин ки, башга фикирләр дә јадында галды. Мүгәддәс Китабын бу пејғәмбәрлик китабындан даһа нә өјрәнмәк олар? Нөвбәти мәгалә, Миканын пејғәмбәрлијинин мөһкәмләндириҹи сон ики фәслиндән ибрәт дәрси әлдә етмәјимизә көмәк едәҹәк.
Неҹә ҹаваб верәрдиниз?
• Халгы арасында үзәринә рәһбәрлик ҝөтүрәнләрдән Аллаһ нә ҝөзләјир?
• Јеһоваја хидмәтимизлә әлагәдар дуа вә мүгәддәс руһ нәјә ҝөрә ваҹибдир?
• Инсанлар ‘Јеһованын исми илә’ неҹә јеријирләр?
[12-ҹи сәһифәдәки шәкилләр]
Мика кими, хидмәтимизи ҹәсарәтлә јеринә јетиририк.