“Онларын сәси бүтүн дүнјаја... чатды”

“Бүтүн халглары шаҝирдим един, онлары Ата, Оғул вә Мүгәддәс Руһ наминә вәфтиз един” (МАТТА 28:19).

1, 2. а) Иса шаҝирдләринә һансы тапшырығы верди? б) Биринҹи әсрин мәсиһчиләринин фәалијјәти нәјин сајәсиндә мүвәффәгијјәтлә нәтиҹәләнди?

ҜӨЈӘ галхмаздан бир гәдәр әввәл Иса шаҝирдләринә тапшырыг верди. О бујурду: “Бүтүн халглары шаҝирдим един, онлары Ата, Оғул вә Мүгәддәс Руһ наминә вәфтиз един” (Матта 28:19). Неҹә дә чәтин тапшырыгдыр!

² Ағласыған иш дејил! Ерамызын 33-ҹү илинин Пентикост ҝүнүндә мүгәддәс руһ јалныз 120 шаҝирдә верилди вә онлар башгаларына Исанын вә’д едилмиш Мәсиһ вә Аллаһын хилас үсулу олдуғуну данышараг Исанын вердији тапшырығы јеринә јетирмәјә башладылар (Һәвариләрин ишләри 2:1-36). Белә балаҹа бир груп бу хәбәри ‘бүтүн халглара’ неҹә чатдыра биләрди? Бу, инсан нөгтеји-нәзәриндән гејри-мүмкүн иди, “Аллаһ үчүн исә һәр шеј мүмкүндүр” (Матта 19:26). Еркән мәсиһчиләр Јеһованын мүгәддәс руһунун мүдафиәсинә малик идиләр вә тә’хирәсалынмазлыг һисси дујурдулар (Зәкарја 4:6; 2 Тимотејә 4:2). Буна ҝөрә дә ҹәми бир нечә он илдән сонра һәвари Павел хош хәбәрин “ҝөј алтында олан һәр мәхлуга” бәјан едилдијини сөјләјә билди (Колослулара 1:23).

3. Мәсиһин һәгиги давамчыларыны тәмсил едән ‘буғдалара’ көлҝә салан нә иди?

³ Биринҹи әсрин чох һиссәси әрзиндә һәгиги ибадәт ҝениш јајылмаға давам едирди. Амма Иса габагҹадан билдирмишди ки, Шејтан Мәсиһин һәгиги давамчыларыны тәмсил едән ‘буғдалара’ бичин вахтына гәдәр узун әсрләр әрзиндә көлҝә салан “дәлиҹәләр” сәпәҹәкдир. Һәвариләрин өлүмүндән сонра елә дә олду (Матта 13:24-39).

Бизим ҝүнләрдә баш верән сүр’әтли артым

4, 5. Мәсһ едилмиш мәсиһчиләр 1919-ҹу илдә һансы иши ҝөрмәјә башладылар вә бу иш һансы ҹидди чәтинликләрлә бағлы иди?

⁴ 1919-ҹу илдә, “буғдаларын” “дәлиҹәләрдән” ајрылмаг вахты ҝәлиб чатды. Мәсһ едилмиш мәсиһчиләр Исанын бөјүк тапшырығынын һәлә дә гүввәдә олдуғуну билирдиләр. Онлар “ахыр ҝүнләрдә” јашадыгларына мөһкәм инаныр вә Исанын сөјләдији пејғәмбәрлији билирдиләр: “Падшаһлыг һаггында олан бу Мүждә милләтләрин һамысына шәһадәт олараг бүтүн дүнјада тәблиғ олунаҹагдыр; вә сон о заман ҝәләҹәкдир” (2 Тимотејә 3:1; Матта 24:14, И–93). Онлар баша дүшүрдүләр ки, чох иш ҝөрмәли­дирләр.

⁵ Амма ерамызын 33-ҹү илиндә јашајан шаҝирдләр кими, мәсһ едилмиш бу мәсиһчиләр дә ҹидди чәтинликләрлә гаршылашдылар. Онларын сајы бир нечә өлкәдә ҹәми бир нечә мин тәшкил едирди. Онлар хош хәбәри “бүтүн дүнјада” неҹә тәблиғ едә биләрдиләр? Јада салаг ки, Рома империјасы дөврүндә Јер күрәсиндәки әһалинин сајы, еһтимал ки, 300 милјон тәшкил едирди, Биринҹи Дүнја мүһарибәсиндән сонракы дөврдә исә бу сај тәхминән 2 милјарда чатырды. ХХ әср әрзиндә исә дүнја әһалисинин сајынын сүр’әтли артымыны ҝөрмәк еһтималы варды.

6. Хош хәбәрин јајылмасында 1930-ҹу илләр үчүн һансы наилијјәтләр әлдә едилди?

⁶ Буна бахмајараг, Јеһованын мәсһ едилмиш хидмәтчиләри, I әсрдәки гардашлары кими, онлара һәвалә едилмиш тапшырыға Јеһоваја мөһкәм иман ҝәтирәрәк ҝиришдиләр, Јеһованын руһу да онларла иди. 1930-ҹу илләрин орталарына јахын Мүгәддәс Китаб һәгигәтини 115 өлкәдә тәхминән 56 мин тәблиғчи бәјан едирди. Артыг аз иш ҝөрүлмәмишди, амма ирәлидә даһа чох иш галырды.

7. а) Мәсһ едилмиш мәсиһчиләрин гаршысында һансы јени тапшырыг дурурду? б) “Башга гојунларын” көмәји илә мүасир вахт үчүн бичин ишиндә һансы наилијјәт әлдә едилмишдир?

⁷ Сонра Вәһј 7:9 ајәсиндә хатырланан ‘бөјүк издиһамын’ кимләри тәмсил етдији даһа ајдын олду. Буну билмәләри бир тәрәфдән һәмин зәһмәткеш мәсиһчиләрин ишини артырыр, диҝәр тәрәфдән исә јардым етмәји вә’д едирди. “Һәр милләтдән, бүтүн гәбиләләрдән, халглардан вә дилләрдән” сонсуз сајда “башга гојунлары” — јердә јашамаг үмидинә малик олан иманлылары топламаг лазым иди (Јәһја 10:16). Онлар ‘ҝеҹә-ҝүндүз Јеһоваја хидмәт етмәли’ идиләр (Вәһј 7:15). Бу о демәк иди ки, онлар тәблиғ вә тә’лим ишиндә көмәк едә биләрдиләр (Ишаја 61:5). Нәтиҹә е’тибарилә, Мәсһ едилмиш мәсиһчиләр тәблиғчиләрин сајынын әввәлҹә он минләрә, сонра исә милјонлара чатдығыны һәјәҹанла мүшаһидә едирдиләр. 2003-ҹү илдә тәблиғ ишиндә иштирак едән тәблиғчиләрин јени јүксәк сајы — 6 429 351 нәфәр олмушдур ки, онларын да әксәријјәти бөјүк издиһамын үзвләридирa. Мәсһ едилмиш мәсиһчиләр бу көмәјә ҝөрә миннәтдардырлар, башга гојунлар исә өз нөвбәсиндә мәсһ едилмиш гардашларына јардым етмәји өзләринә шәрәф сајырлар (Матта 25:34-40).

8. Икинҹи Дүнја мүһарибәси илләриндә баш верән сәрт тә’гибләр Јеһованын Шаһидләринә неҹә тә’сир ҝөстәрмишди?

⁸ Јенидән буғда синфи ҝөрүнмәјә башлајанда, Шејтан она гаршы ҝүҹлү мүһарибәјә башлады (Вәһј 12:17). Шејтан бөјүк издиһамын јаранмасына неҹә реаксија ҝөстәрди? Олдугҹа сәрт! Мәҝәр Икинҹи Дүнја мүһарибәси заманы һәр јердә һәгиги ибадәтә гаршы едилән һүҹумларын архасында онун дурдуғуна шүбһә етмәк олармы? Дүшмәнчилик едән һәр ики тәрәф мәсиһчиләрин үзәринә ҝүҹлү тә’гибләр јағдырдылар. Бир чох севимли баҹы вә гардашлар дәһшәтли сынаглара мә’руз галмыш, бә’зиләри исә иманлары уғрунда һәјатларыны белә гурбан вермишләр. Буна бахмајараг, онлар мәзмурчунун сөзләрини тәкрар едирдиләр: “Аллаһа (онун сөзүнү сәна едәрәм), Аллаһа ҝүвәндим, горхмарам; инсан мәнә нә едә биләр?” (Мәзмур 56:4; Матта 10:28). Башга гојунларла бирликдә мәсһ едилмиш мәсиһчиләр Јеһованын руһундан гүввә алараг, мөһкәм дурурдулар (2 Коринфлиләрә 4:7). Нәтиҹәдә “Аллаһын кәламы вүс’әт алырды” (Һәвариләрин ишләри 6:7). 1939-ҹу илдә мүһарибә башлајанда, һесабатлара әсасән тәблиғ ишиндә 72 475 садиг мәсиһчи иштирак едирди. Лакин 1945-ҹи ил үчүн олан натамам һесабатдан ҝөрүндүјү кими, хош хәбәри 156 299 нәфәр фәал Шаһид јајырды. Шејтан там мәғлубијјәтә уғрамышды!

9. Икинҹи Дүнја мүһарибәси әрзиндә һансы јени тә’лим курслары тәшкил едилмишди?

⁹ Икинҹи Дүнја мүһарибәсинин јаратдығы гарма-гарышыглыға бахмајараг, Јеһованын хидмәтчиләри тәблиғ ишинин баша чатаҹағына шүбһә етмәдиләр. Мүһарибәнин ән гызғын чағында, 1943-ҹү илдә ики јени тә’лим курсунун ачылышы е’лан едилди. Һазырда Теократик Хидмәт Мәктәби адланан курслардан бири, һәр бир Шаһидин тәблиғ етмәји вә шаҝирдләр һазырламағы өјрәнмәси үчүн, бүтүн јығынҹагларда кечирилмәли иди. Диҝәри, Ҝөзәтчи Гүлләсинин Мүгәддәс Китаб мәктәби Ҝилеад башга өлкәләрдә тәблиғ ишини ҝенишләндирә билсинләр дејә миссионерләр һазырламаг үчүн тәшкил едилмишди. Беләликлә, нәһајәт мүһарибә баша чатанда, Мәсиһин һәгиги давамчылары јени гүввә илә фәалијјәт ҝөстәрмәјә һазыр идиләр.

10. Јеһованын халгынын сә’ји 2003-ҹү илдә неҹә тәзаһүр олунмушдур?

¹⁰ Мәсиһчиләр неҹә дә тәәҹҹүб доғуран иш ҝөрмүшләр! Теократик Хидмәт Мәктәбинин тәләбәләри — ҝәнҹләр вә јашлылар, валидејнләр вә ушаглар, һәтта сәһһәти зәиф оланлар — Исанын бөјүк тапшырығыны јеринә јетирмиш вә јетирирләр (Мәзмур 148:12, 13; Јоел 2:28, 29). 2003-ҹү илдә 825 185 нәфәр тәблиғ ишинә сә’јлә јанашдыгларыны мүвәггәти вә ја даими олараг пионер хидмәтиндә чалышмагла ҝөстәрмишләр. Елә һәмин ил Јеһованын Шаһидләри Падшаһлыг һаггында олан хош хәбәри башгалары илә бөлүшәрәк башга инсанларла үмуми һесабла 1 234 796 477 саат сөһбәт етмишләр. Шүбһәсиз ки, Јеһова халгынын ҝөстәрдији сә’јдән разыдыр!

Әҹнәбидилли әразиләрдә

11, 12. Һансы нүмунәләр миссионерләрин әмәјинин сәмәрәсинә шаһидлик едир?

¹¹ Узун илләр әрзиндә Ҝилеад мәктәбинин, сон илләрдә исә Хидмәти Тәкмилләшдирмә Мәктәбинин мә’зунлары олдугҹа сәмәрәли фәалијјәт ҝөстәрибләр. Мәсәлән, 1945-ҹи илдә Бразилијаја илк миссионерләр ҝәләндә, орада һеч 400 тәблиғчи јох иди. Һәмин миссионерләр, о ҹүмләдән сонрадан ҝәлән диҝәр миссионерләр Бразилијадан олан чалышган гардашларла јан-јана сә’јлә чалышырдылар, Јеһова исә онларын сә’јинә бол хејир-дуа верди. Һәмин еркән илләри хатырлајан кәсләр 2003-ҹү илдә Бразилијадакы тәблиғчиләрин јени јүксәк сајыны — 607 362 нәфәри ҝөрмәјә неҹә дә севинирләр!

¹² Бәс Јапонија һаггында нә демәк олар? Икинҹи Дүнја мүһарибәсинә гәдәр орада Падшаһлығын јүзә јахын тәблиғчиси варды. Мүһарибә илләри әрзиндә сәрт тә’гибләр уҹбатындан онларын сајы азалды вә мүһарибә баша чатанда руһән вә физики ҹәһәтдән сағ галан Шаһидләрин сајы чох аз иди (Сүлејманын мәсәлләри 14:32). Нөгсансызлыгларыны гејри-ади тәрздә горујуб сахлајан һәмин аз сајлы садиг гардашлар, шүбһәсиз ки, илк 13 миссионерин — Ҝилеад мәктәбинин мә’зунларынын ҝәлишинә севинирдиләр, миссионерләр дә өз чалышган, гонагпәрвәр јапон гардашларына тез исинишдиләр. Үстүндән 50-дән артыг ил кечир вә 2003-ҹү илдә Јапонијада олан тәблиғчиләрин сајы 217 508-ә чатмышдыр! Јеһова бу өлкәдәки халгына һәгигәтән дә бол хејир-дуа верди. Буна бәнзәр нәтиҹәләрә бир чох башга өлкәләрдә дә наил олунмушдур. Әҹнәбидилли әразиләрдә тәблиғ етмәк үчүн јола дүшәнләр хош хәбәрин јајылмасына бөјүк јардым етмишләр, 2003-ҹү илдә исә бу хәбәр дүнјанын 235 өлкәсиндә, адасында вә әразисиндә ешидилмишдир. Һәгигәтән дә, бөјүк издиһам “һәр милләтдән” ҝәлир.

“Бүтүн гәбиләләрдән, халглардан вә дилләрдән”

13, 14. Јеһова хош хәбәри ‘бүтүн дилләрдә’ тәблиғ етмәјин ваҹиблијини неҹә ҝөстәрди?

¹³ Шаҝирдләр ерамызын 33-ҹү илинин Пентикост ҝүнүндә мүгәддәс руһла мәсһ едилдикдән сонра, баш верән илк мө’ҹүзә онларын топлашмыш халгла мүхтәлиф дилләрдә данышмалары олду. Онлары динләјәнләрин һамысы бејнәлхалг дили, еһтимал ки, јунан дилини билирдиләр. “Диндар адамлар” кими онлар һәм дә, ҝөрүнүр ки, мә’бәддә ибрани дилиндә јеринә јетирилән хидмәти баша дүшүрдүләр. Лакин онлар хош хәбәри ушаг чағларындан өјрәндикләри дилдә ешидәндә, неҹә дә марагла гулаг асырдылар! (Һәвариләрин ишләри 2:5, 7-12).

¹⁴ Тәблиғ иши бу ҝүн дә бир чох дилләрдә һәјата кечирилир. Пејғәмбәрлијә әсасән, бөјүк издиһам јалныз милләтләрдән дејил, һәм дә “гәбиләләрдән, халглардан вә дилләрдән” ҝәлди. Бу, Јеһованын Зәкарја васитәсилә дедијинә мүвафиг ҝәлир: “Милләтләрин һәр чешид дилләриндән он адам бир Јәһудинин әтәјинә јапышаҹаглар вә: Сизинлә ҝедирик, чүнки Аллаһын сизинлә бәрабәр олдуғуну ешитдик, дејәрәк јапышаҹаглар” (Зәкарја 8:23). Јеһованын Шаһидләринин башга дилләрдә данышмаг кими фөвгәлтәбии габилијјәтләри олмаса да, онлар дәрк едирләр ки, инсанлары онларын ана дилиндә өјрәтмәк нә гәдәр ваҹибдир.

15, 16. Миссионерләр вә јерли дилләрдә тәблиғ етмәјә чалышан диҝәр тәблиғчиләр һансы чәтинликләрлә гаршылашырлар?

¹⁵ Доғрудур ки, бу ҝүн ҝениш јајылмыш бир нечә дил, мәсәлән, инҝилис, франсыз вә испан дилләри мөвҹуддур. Лакин өз јахынларындан ајрылараг, хариҹдә хидмәт етмәјә ҝедәнләр јерли дилләри өјрәнмәјә чалышырлар ки, хош хәбәр “әбәди һәјата мејлли олан” инсанларын һамысына даһа әлчатан олсун (Һәвариләрин ишләри 13:48, ЈД). Бу һәмишә асан олмур. Сакит океанын ҹәнубунда јерләшән Тувалу адасындакы гардашлара онларын дилиндә әдәбијјатлар лазым оланда, бир миссионер бу иши өз үзәринә ҝөтүрдү. Һеч бир лүғәт олмадығы үчүн о өзү Тувалу дилиндәки сөзләрин лүғәтини јаратмаға башлады. Вахты ҝәләндә бу дилдә “Јер үзүндәки Ҹәннәтдә әбәдијјән јашаја биләрсиниз” адлы китаб дәрҹ олундуb. Миссионерләр Күрасаоја ҝәләндә јерли папјаменто дилиндә нә Мүгәддәс Китаб нәшрләри, нә дә ки, лүғәтләр варды. Һәм дә јазылыш гајдасына даир бөјүк фикир ајрылығы мөвҹуд иди. Буна бахмајараг, илк миссионерләрин ҝәлишиндән ики ил сонра папјаменто дилиндә Мүгәддәс Китаба әсасланан илк трактат дәрҹ олунду. Бу ҝүн папјаменто дили, “Ҝөзәтчи Гүлләси”нин инҝилис бурахылышы илә ејни вахтда дәрҹ олунан 133 дилдән биридир.

¹⁶ Анголаја ҝәлән илк миссионерләр, анголалы Шаһидләр арасында тәрҹүмә ишиндә онлара көмәк едә биләҹәк һеч кәси тапа билмәдиләр. Бундан әлавә јерли дилләрдә, бизим нәшрләрдә ҝениш тәтбиг олунан “камил” кими анлајышлары тәсвир етмәк үчүн лазым олан сөзләр јох иди. Бир миссионер сөјләјир: “Тәрҹүмә етмәк үчүн әсасән Мүгәддәс Китабы өјрәнән мәктәб мүәллимләринин көмәјиндән истифадә едирдим. Онлар һәгигәти јахшы билмәдикләри үчүн, онларын јанында отуруб һәр ҹүмләнин дәгиг тәрҹүмә едилдијинә диггәт јетирмәли олурдум”. Һәр неҹә олса да нәһајәт ки, “Јени дүнјадакы һәјат” трактаты бир нечә Ангола дилинә тәрҹүмә олунду. Бу ҝүн јерли дилләрдән бириндә, умбунду дилиндә “Ҝөзәтчи Гүлләси” инҝилис бурахылышы илә ејни вахтда дәрҹ олунур.

17, 18. Мексикада вә башга өлкәләрдәки гардашлар һансы чәтинликләрин өһдәсиндән ҝәлирләр?

¹⁷ Мексиканын әсас дили испан дилидир. Лакин испанларын ҝәлишинә гәдәр орада бир чох дилләрдә данышырдылар ки, онлардан бә’зиләри индијә гәдәр тәтбиг олунур. Буна ҝөрә дә һал-һазырда Јеһованын Шаһидләринин әдәбијјатлары Мексика дилләриндән једдисиндә, һәм дә Мексика жест дилиндә дәрҹ олунур. Мајја дилиндә дәрҹ олунан “Падшаһлыг Хидмәтимиз”, Америка һиндиләринин дилиндә дәрҹ олунан илк дөври нәшрдир. Мексикада јашајан 572 530 Падшаһлыг тәблиғчиси арасында бир нечә мин мајјалар, астекләр вә диҝәр һиндиләр вар.

¹⁸ Сон илләр әрзиндә милјонларла инсанлар чәтин игтисади вәзијјәт вә ја һансыса фәлакәт уҹбатындан вәтәнләрини тәрк етмишләр. Бу сәбәбдән бир чох өлкәләрдә илк дәфә олараг ҝениш әҹнәбидилли әразиләр јараныб. Јеһованын Шаһидләри ишә севинҹлә ҝиришмишләр. Мәсәлән, Италијада италјан дилиндән башга 22 дилдә јығынҹаг вә груплар тәшкил олунуб. Башга дилләрдә данышан инсанлара тәблиғ едә билсинләр дејә гардашлара көмәк етмәк үчүн, италјан жест дили дә дахил олмагла, 16 дилдә тә’лим курсу тәшкил олунуб. Бир чох башга өлкәләрдәки чохсајлы мүһаҹирләрә тәблиғ етмәк үчүн Јеһованын Шаһидләри буна бәнзәр сә’јләр ҝөстәрирләр. Һәгигәтән дә Јеһованын көмәји сајәсиндә бөјүк издиһам чох-чох дил групларындан ҝәлир.

‘Бүтүн дүнјада’

19, 20. Павелин һансы сөзләри бу ҝүн һејрәт доғуруҹу шәкилдә һәјата кечир? Изаһ един.

¹⁹ Биринҹи әсрдә һәвари Павел јазырды: “Мәҝәр онлар ешитмәдиләрми? Әксинә, “онларын сәси бүтүн дүнјаја, онларын сөзләри јерин уҹларына гәдәр чатды” (Ромалылара 10:18, И–93). Әҝәр биринҹи әсрдә белә идисә, бунун бу ҝүн белә олмасы даһа чох јәгиндир! Милјонларла инсанлар — еһтимал ки, тарихин һансыса дөврүндә олдуғундан даһа чох инсанлар — бу сөзләрә шәрикдирләр: “Һәр заман Рәббә сәна едәҹәјәм; онун тәһлили [һәмди] даима ағзымда олаҹагдыр” (Мәзмур 34:1).

²⁰ Бундан әлавә, тәблиғ иши ләнҝимир. Падшаһлыг тәблиғчиләринин сајы артмаға давам едир. Онлар инсанлара тәблиғ етмәк ишинә даһа чох вахт сәрф едирләр. Милјонларла тәкрар башчәкмәләр едилир вә јүз минләрлә Мүгәддәс Китаб өјрәнмәләри кечирилир. Ҝетдикҹә јени-јени инсанлар һәгигәтә мараг ҝөстәрир. Өтән ил Исанын өлүмүнүн Хатирә Ҝеҹәсинә 16 097 622 нәфәр инсан топлашмышдыр ки, бу да јени јүксәк сајдыр. Ҝөрдүјүмүз кими, һәлә чох иш вар. Ҝүҹлү мүгавимәтләрә таб ҝәтирән гардашларымызын сарсылмазлығыны вә нөгсансызлығыны бундан сонра да тәглид едәк. 1919-ҹу илдән башлајараг өзләрини Јеһоваја хидмәтә һәср едән гардашларымызын ҝөстәрдији кими сә’ј ҝөстәрәк. Ҝәлин һамымыз мәзмурчунун сәсинә һај верәк: “Бүтүн нәфәс саһибләри Рәббә һәмд етсин. Рәббә һәмд един” (Мәзмур 150:6).

[Һашијәләр]

Изаһ едә биләрсинизми?

• 1919-ҹу илдә гардашлар һансы ишә башладылар вә бу иш нәјә ҝөрә чәтин иди?

• Тәблиғ ишини дәстәкләмәк үчүн һансы груп инсанлар топлашдылар?

• Хариҹдә хидмәт едән миссионерләрин вә диҝәр тәблиғчиләрин бәһрәли әмәкләри нә илә нәтиҹәләнди?

• Нәдән ҝөрүнүр ки, бу ҝүн Јеһова Өз халгынын ишинә хејир-дуа верир?

[24-27-ҹи сәһифәләрдәки ҹәдвәл]

2003 ЈЕҺОВАНЫН ШАҺИДЛӘРИНИН ХИДМӘТ ИЛИ ҮЧҮН ҮМУМДҮНЈА ҺЕСАБАТЫ

(Ҹәдвәлә нәшрин өзүндә бахын)

[22 вә 23-ҹү сәһифәләрдәки шәкилләр]

Бөјүк издиһам бүтүн гәбиләләрдән вә дилләрдән ҝәлмәли иди.