Ән јахшы рәһбәрлик мәнбәји

ҺӘЈАТДА мүвәффәгијјәтли олмаг һамынын арзусудур. Бу асан дејил, амма ики әсас амилин сајәсиндә мүмкүндүр: јахшы рәһбәрлијин вә бу рәһбәрлијә риајәт етмәк истәјинин. Лакин инсанлар мүдрик мәсләһәтә гулаг асмағы һәмишә истәмирләр. Бир чохлары һесаб едирләр ки, һәрә өз ағлы илә јашамалыдыр. Мүгәддәс Китабда дејилдији кими, илк инсанлара сәрбәстлик јолуна гәдәм гојмағы Аллаһын һөкмранлығынын баш дүшмәни Шејтан тәклиф етмишдир. Јарадылыш (МКШ) 3:5 ајәсиндә онун Һәвваја үнванландырдығы сөзләр јазылыб: “Аллаһ билир ки, о мејвәләрдән једијиниз ҝүн ҝөзләриниз ачылаҹаг вә хејирлә шәри биләрәк Аллаһ кими олаҹагсыныз”.

Адәмлә Һәвва јалныз өз шәхси дүшүнҹәләрини рәһбәр тутараг јашадыглары үчүн хошбәхтлик әлдә етдиләрми? Әлбәттә, јох. Онлар мә’јуслуға гапылдылар. Хејирлә шәри ајырд едә биләҹәкләрини гәрара алараг, онлар өзүндән разы олмағын мәнфи нәтиҹәләрини дәрһал өз үзәрләриндә һисс етдиләр. Онлар һаглы олараг Аллаһын наразылығыны газандылар, гејри-камиллик ичиндә кечән һәјат чох үзүҹү иди, нәтиҹәдә исә онлары өлүм ҝөзләјирди (Тәквин 3:16-19, 23). Өлүм һамынын үзәриндә һөкм сүрүр. Мүгәддәс Китабда дејилир: “Неҹә ки, ҝүнаһ тәк бир адам [Адәм] васитәсилә вә өлүм ҝүнаһ васитәсилә дүнјаја ҝирди, еләҹә дә өлүм бүтүн инсанлара кечди; чүнки һамы ҝүнаһ ишләтмишдир” (Ромалылара 5:12).

Адәмлә Һәвванын сечиминин дәһшәтли нәтиҹәләринә бахмајараг, бир чохлары Јараданын рәһбәрлијинин мүдриклијинә һәлә дә шүбһә едирләр. Лакин Мүгәддәс Јазыларда дејилир ки, бу китаб “Аллаһдан илһам алмыш вә ...фајдалыдыр” вә бизә “һәр ҹүр хејирли иш үчүн тәҹһиз” едилмәкдә көмәк едә биләр (2 Тимотејә 3:16, 17). Әҝәр биз Мүгәддәс Китаб нәсиһәтинә риајәт етсәк, сөзсүз ки, чох хошбәхт оларыг. Бу илк нөвбәдә аилә һәјаты үчүн дә тәтбиг едиләндир.

Никаһда сәдагәт

Мүгәддәс Китаба әсасән, Аллаһ никаһын әбәди бир иттифаг олмасыны истәјирди (Тәквин 2:22-24; Матта 19:6). Һәмчинин Мүгәддәс Јазыларда дејилир ки, “кәбин јатағы ләкәсиз” олмалыдыр, јә’ни әрлә арвадын мүнасибәтләри никаһдан кәнар ҹинси әлагә илә ләкәләнмәмәлидир (Ибраниләрә 13:4). Лакин сизин үчүн јәгин сирр дејил ки, бу ҝүн бир чох никаһларда вәзијјәт тамам башга ҹүрдүр. Бә’зиләри өз әмәкдашлары илә ешгбазлыг едирләр. Диҝәрләри мә’шуглары илә вахт кечирмәк үчүн өз һәјат јолдашларыны алдадырлар. Башгалары исә, әввәлки мәгаләдә хатырланан Вероника илә баш вердији кими, өз һәјат јолдашларыны тәрк едиб, ҝәнҹ мә’шуглары илә јашамаға ҝедирләр вә иддиа едирләр ки, онларын јанында өзләрини даһа ҝәнҹ вә хошбәхт һисс едирләр.

Бунунла белә, нәјин баһасына олурса-олсун өзүнү разы салмаг истәји һәгиги хошбәхтлик ҝәтирмәјәҹәк. Роналд буну тәсдиг едә биләр. О, һәјатыны јахшылыға доғру дәјишә биләҹәјинә әмин олараг арвадыны тәрк етди ки, 6 ил әрзиндә ҝизлин олараг ҝөрүшдүјү вә ондан ики ушағы олан гадынла јени аилә гурсун. Лакин арвады илә бошандыгдан гыса мүддәт сонра мә’шугәси ону атды! Ахырда Роналд өз валидејнләрилә јашамалы олду. О өзү вәзијјәтинин дәһшәтли олдуғуну сөјләјир. Бу, нүмунәләрдән јалныз биридир. Бу кими худбин һәрәкәтләр, сајсыз-һесабсыз инсанлара гәм-гүссә ҝәтирән бошанманын артмасына сәбәб олмушдур, бундан јалныз бөјүкләр дејил, һәм дә ушаглар әзијјәт чәкир.

Лакин Мүгәддәс Китаб мәсләһәтләринә риајәт етмәк әсл хошбәхтлик ҝәтирир. Белә бир һадисә Робертонун башына ҝәлмишдир. О дејир: “Мүгәддәс Китабын сајәсиндә өз арвадымы итирмәдим. Кәнарда кимәсә бәнд олмагла һәгиги хошбәхтлик әлдә етмәк мүмкүн дејил, һәтта һәмин адам фүсункар дәрәҹәдә ҝөзәл ҝөрүнсә белә. Мүгәддәс Китаб мәнә бу гәдәр ил әрзиндә һәр заман јанымда олан арвадымы гијмәтләндирмәји өјрәтди”. Мүгәддәс Китабын “ҝәнҹлијинин арвадына хаинлик етмә” мәсләһәти Робертонун һәјатында ваҹиб рол ојнады (Малаки 2:15). Мүгәддәс Китабын мәсләһәти башга неҹә көмәк едә биләр?

Ушагларын тәрбијәси

Бир нечә ониллик бундан әввәл белә бир фикир ҝениш јајылмышды ки, валидејнләр ушагларына һәддиндән артыг мәһдудијјәтләр гојмамалыдырлар. Елә тәәссүрат јаранырды ки, ушаглара истәдикләри кими фикирләшмәк вә јашамаг имканы вермәк вә онларын инкишафынын габағыны алмамаг лазымдыр. Бә’зи јерләрдә һәтта даһа сәрбәст тәһсил системи дахил едилмишди. Һәр шејлә јанашы, мәшғәләләрә ҝәлиб-ҝәлмәмәји, һәмчинин дәрсә вә ја истираһәтә нә гәдәр вахт сәрф едиб-етмәмәји шаҝирдләрин өзләринин сәрбәст олараг мүәјјән етмәләринә имкан верилирди. Белә мәктәбләрдән бириндә “ушаглары мүһакимә етмәдән вә ја бөјүкләрин мүдахиләси олмадан, онлара һиссләрин бүтүн рәнҝарәнҝлијини дадмаға имкан вермәк” кими принсип гүввәдә иди. Бу ҝүн инсан давранышыны өјрәнән бә’зи мүтәхәссисләр мүәјјән ҹәза тәдбирләринин фајдалы олдуғуна һәлә дә шүбһә едирләр, һәтта севән валидејнләр ушағы ҹәзаландырмағы ваҹиб һесаб етсәләр белә.

Бу нәјә ҝәтириб чыхармышдыр? Бир чохлары һесаб едирләр ки, ушагларын тәрбијәсиндә башлы-башыналыға јол верилмәси онлара һәддиндән артыг сәрбәстлик верир вә мәһз башлы-башыналыг ҹинајәткарлығын вә наркоманијанын артмасына сәбәб олмушдур. Бирләшмиш Штатларда кечирилән бир сорғунун иштиракчыларынын тәхминән 70 фаизи һесаб едир ки, ушаглар валидејнләриндән лазыми рәһбәрлик алмырлар. Чохлары зәнн едирләр ки, мәктәбләрдәки атышмаларын вә јенијетмәләрин ишләтдикләри диҝәр дәһшәтли ҹинајәткарлыгларын сәбәби “валидејн нәзарәтинин чатышмамазлығыдыр”. Мәсәлә атышмаја ҝәлиб чатмаса да, һәм ушаглар, һәм дә валидејнләр јанлыш тәрбијәнин аҹы бәһрәләрини дадырлар.

Бунунла әлагәдар Мүгәддәс Китабда нә дејилир? Мүгәддәс Јазылар валидејнләри тәшвиг едир ки, онлар өз рәһбәрликләрини һәм мәһәббәтлә, һәм дә гәтијјәтлә һәјата кечирсинләр. Мүгәддәс Китабда дејилир: “Ағылсызлыг, ушағын үрәјинә бағлыдыр; ону ондан өјүд дәјәнәји узаглашдырар” (Сүлејманын мәсәлләри 22:15). Әлбәттә, верилән һәр бир ҹәза ишләдилән сәһвин ҹиддилијинә мүвафиг олмалыдыр. Лакин сиз һансы ҹәза нөвүнү сечсәниз дә јадда сахламаг лазымдыр ки, һәр заман мүлајим, дәрракәли вә өзүнә һаким олмаг лазымдыр. Мәһәббәт дә елә бундан ибарәтдир. Валидејнләр өз һакимијјәтләрини кобудлугла дејил, мәһәббәтлә тәзаһүр етдирмәлидирләр. Јалныз бу заман ән јахшы нәтиҹәни әлдә етмәк мүмкүндүр.

Бу мәсләһәтин тәтбиг едилмәси јахшы нәтиҹәләр ҝәтирир. Тәзәликҹә евләнән вә Мексикада јашајан 30 јашлы Артуро дејир: “Атам мәнә вә гардашларыма ачыг-ашкар ҝөстәрмишди ки, аиләдә башчы о өзү вә анамыздыр. Лазым ҝәләндә онлар бизи ҹәзаландырырдылар. Амма онларын бизимлә сөһбәт етмәјә һәмишә вахтлары олурду. Инди, бөјүдүкдән сонра, мән һәјатда әминлијимин олдуғуна чох шадам вә мән баша дүшүрәм ки, бу, јахшы тәрбијәнин нәтиҹәсидир”.

Ән е’тибарлы мәсләһәтләрдән јарарланын

Аллаһын Кәламы олан Мүгәддәс Китабда ән е’тибарлы мәсләһәтләр јерләшир. Бу мәсләһәтләр јалныз аилә һәјатына аид дејил. Онлар бир чох ҹәһәтләрдән фајдалыдыр, чүнки бизә, чохларынын ән али һикмәтә малик Оланын мүдриклијини рәһбәр тутмаг истәмәдикләри бир дүнјада неҹә давранмағы өјрәдир.

Инсанларын Јараданы олан Јеһова Аллаһ мәзмурчу Давуд васитәсилә бизи әмин едир: “Сәни тә’лим едәҹәјәм вә ҝедәҹәјин јолу сәнә өјрәдәҹәјәм; сәнә өјүд верәҹәјәм; ҝөзүм сәнин үзәриндә олаҹагдыр” (Мәзмур 32:8). Бунун нә демәк олдуғунун үзәриндә дүшүнүн: бизи тәһлүкәдән горумаг үчүн Јараданын Өзү бизә нәзарәт едир! Лакин бизләрдән һәр биримиз өзүмүздән сорушмалыјыг: “Мән Јеһованын мүдафиәсини вә рәһбәрлијини гәбул едәҹәјәмми?” Аллаһын Кәламында мәһәббәт долу мәсләһәт верилир: “Бүтүн үрәјинлә Рәббә ҝүвән вә өз анлајышына архаланма; бүтүн јолларында ону таны, о да сәнин јолларыны доғрулдар” (Сүлејманын мәсәлләри 3:5, 6).

Јеһованы дәрк етмәк үчүн, сә’ј вә тә’кид ҝөстәрмәк тәләб олунур. Лакин Аллаһы дәрк етмәк мүмкүндүр, буну Мүгәддәс Китабын сајәсиндә етмәк мүмкүндүр. Аллаһын тәклиф етдији һәјат тәрзи “индики вә ҝәләҹәк һәјат үчүн үмид верир”. Бу ҹүр һәјат тәрзинин ҝәтирдији бүтүн фајданы нәзәрә алсаг демәк олар ки, бу, һәгигәтән дә бөјүк наилијјәтдир (1 Тимотејә 4:8; 6:6).

Әҝәр Мүгәддәс Китаб фикирләринин дәринлији вә онун мәсләһәтләринә риајәт етмәјин ҝәтирдији хејир-дуалар хошунуза ҝәлирсә, гој онда Аллаһын Кәламыны охумаг вә үзәриндә дүшүнмәк һәјатынызда әсас јери тутсун. Онда сиз проблемләрин өһдәсиндән һәмишә мүвәффәгијјәтлә ҝәләҹәксиниз. Һәмчинин сиз Аллаһын јени дүнјасында — һамынын Јеһова тәрәфиндән өјрәдиләҹәји вә сүлһ боллуғунун олаҹағы јердә јашамаг үмиди газанаҹагсыныз (Ишаја 54:13).

[5-ҹи сәһифәдәки шәкил]

Мүгәддәс Китаб мәсләһәтләринин көмәјилә никаһ телләрини мөһкәмләндирмәк олар.

[6-ҹы сәһифәдәки шәкилләр]

Мүгәддәс Китаб мәсләһәтләри һәјатда е’тибарлы рәһбәрлик вермәклә бәрабәр, истираһәт үчүн вахт ајырмаға да көмәк едир.

[7-ҹи сәһифәдәки шәкилләр]

Мүгәддәс Китаб мәсләһәтләринә мүвафиг јашајанлар таразлы һәјатдан севинҹ әлдә едирләр.