Ҝет-ҝедә нуру артан јолда јеријирик

«Салеһләрин јолу исә дан јери тәк шәфәг сачар, нуруну артырараг ҝүндүзә говушар» (СҮЛЕЈМАНЫН МӘСӘЛЛӘРИ 4:18).

1, 2. Јеһованын артырараг вердији руһани ишыг сајәсиндә Аллаһын халгы һансы дәјишикликләрин шаһиди олуб?

ДОҒАН ҝүнәш шүаларынын ҝеҹә гаранлығыны удмасыны ишыг Мәнбәји олан Јеһова Аллаһдан башга ким даһа јахшы изаһ едә биләр? (Мәзмур 36:9). Јеһова дејир: ‘Шәфәг јер үзүнүн уҹгарларыны тутанда, торпаг гурулушуну дәјишир, мөһүр вуруланда палчыгда әкси галан кими, либасдакы гырышлар кими ҝөзә ҝөрүнүр’ (Әјјуб 38:12-14). Ҝүнәш ҝет-ҝедә даһа чох ишыг сачаркән, јерин ҝөрүнүшү палчыг үзәриндә галан ајаггабы изләри тәк даһа ајдын ҝөрүнүр.

² Јеһова Аллаһ, һәмчинин руһани ишығын Мәнбәјидир (Мәзмур 43:3). Бүтүн дүнја гаты зүлмәт ичиндә олса да, һәгиги Аллаһ Өз халгы үзәринә ишыг сачмаға давам едир. Бунун сајәсиндә һансы нәтиҹәләр әлдә едилиб? Мүгәддәс Китаб ҹаваб верир: «Салеһләрин јолу исә дан јери тәк шәфәг сачар, нуруну артырараг ҝүндүзә говушар» (Сүлејманын мәсәлләри 4:18). Јеһованын ҝет-ҝедә артырараг вердији нур халгынын јеридији јолу ишыгландырыр, јә’ни тәшкилатыны тәкмилләшдирир, тә’лимләринин изаһына ајдынлыг ҝәтирир вә халгыны әхлаги ҹәһәтдән тәмизләјир.

Руһани ишыг вә тәшкилатын тәкмилләшмәси

3. Јешаја 60:17 ајәсиндә Јеһова нәји вә’д едир?

³ Јеһова Јешаја васитәсилә пејғәмбәрлик етмишди: «Сәнә тунҹ әвәзинә гызыл, дәмир јеринә ҝүмүш, ағаҹ јеринә тунҹ, даш әвәзинә дәмир ҝәтирәҹәјәм» (Јешаја 60:17). Тунҹун гызылла әвәз едилмәси тәкмилләшмәјә ишарә етдији кими, Јеһованын Шаһидләри дә ‘дөврүн сону’ вә ја ‘ахыр ҝүнләр’ бојунҹа тәшкилатларында бир чох мүһүм дәјишикликләрин шаһиди олмушлар (Матта 24:3; 2 Тимотејә 3:1).

4. 1919-ҹу илдә һансы јенилик гүввәјә минди вә јығынҹаглара һансы фајданы ҝәтирди?

⁴ Ахыр ҝүнләр һәлә тәзә-тәзә башлајанда һазырда Јеһованын Шаһидләри адланан Мүгәддәс Китаб Тәдгигатчыларынын јығынҹагларында ағсаггаллар вә јығынҹаг јардымчылары демократик јолла сечилирдиләр. Лакин бә’зи ағсаггалларда һәгиги тәблиғчи руһу јох иди. Онлар нәинки өзләри тәблиғ ишиндә иштирак едир, һәтта башгаларыны да хидмәтин бу нөвүндә иштирак етмәкдән чәкиндирирдиләр. 1919-ҹу илдә јығынҹагларда јенилик гүввәјә минди. Артыг һәр јығынҹағын хидмәти рәһбәри олмалы иди. О, јығынҹаг тәрәфиндән сечилмирди, ону филиал теократик јолла тә’јин едирди. Хидмәти рәһбәрин вәзифәси јығынҹагда тәблиғ ишини тәшкил етмәк, саһәләри бөлүшдүрмәк вә тәблиғчиләри тәблиғ хидмәтиндә фәал иштирак етмәјә тәшвиг етмәк иди. Сонракы илләр әрзиндә Падшаһлығын тәблиғи ишиндә бөјүк ирәлиләјиш гејдә алынмышды.

5. 1920-ҹи илләрдә һансы јенилик гүввәјә минди?

⁵ Мүгәддәс Китаб Тәдгигатчыларынын 1922-ҹи илдә АБШ-ын Оһајо штатынын Сидар Појнт шәһәриндә кечирилән конгресиндә сәсләнән «Падшаһы вә онун Падшаһлығыны е’лан един, е’лан един, е’лан един!» чағырышы јығынҹагларын һамысында тәблиғ ишинә олан һәвәси даһа да ҝүҹләндирди. 1927-ҹи илдә гәрара алынды ки, евдән-евә тәблиғ хидмәти үчүн базар ҝүнләри ән мүнасиб ҝүндүр. Нијә мәһз базар ҝүнү? Чүнки базар ҝүнү инсанларын әксәријјәти ишләмир, евдә олур. Бу ҝүн дә Јеһованын Шаһидләри инсанлары евдә тапмаг үчүн онлара һәфтә сонлары вә ја ахшамлар баш чәкмәјә чалышырлар.

6. 1931-ҹи илдә һансы гәтнамә гәбул едилди вә бу, Падшаһлығын тәблиғи ишинә неҹә тә’сир ҝөстәрди?

⁶ Падшаһлығын тәблиғи ишинә 1931-ҹи ил ијулун 26-сы бөјүк тәкан верилди. Базар ҝүнү АБШ-ын Оһајо штатынын Колумбус шәһәриндә кечирилән конгресдә гәбул едилән гәтнамәни Аллаһын хидмәтчиләринин һамысы шөвглә дәстәкләди. Гәтнамәнин мәтнинин бир һиссәсиндә охујуруг: «Бизә, Јеһова Аллаһын хидмәтчиләринә, Аллаһымызын ады наминә бөјүк ишләр ҝөрмәк һәвалә едилиб. Аллаһын бизә вердији тапшырыға риајәт едәрәк, Иса Мәсиһ һаггында шаһидлик вермәји вә Јеһованын һәгиги вә Һагг-Таала олдуғуну бүтүн инсанлара бәјан етмәји өзүмүзә борҹ билирик. Бу сәбәбдән бөјүк севинҹ һиссилә Рәбб Аллаһымызын ағзындан чыхдығы кими өзүмүзә “Јеһованын Шаһидләри” адыны ҝөтүрмәји бөјүк шәрәф санырыг» (Јешаја 43:10). Бу јени ад, ону дашыјанларын башлыҹа фәалијјәтини неҹә дә ајдын сурәтдә әкс етдирир! Бәли, бу ишдә иштирак етмәк истәјәнләрин һамысы үчүн кифајәт гәдәр иш варды!

7. 1932-ҹи илдә һансы дәјишиклик баш верди вә нә үчүн?

⁷ Ағсаггалларын чоху тәблиғ ишиндә тәвазөкарлыгла чалышырдылар. Бә’зи јерләрдә исә көһнә гајда илә сечилмиш ағсаггаллар јығынҹагларда һамынын тәблиғ етмәсиндә зәрурәт ҝөрмәдикләриндән тәблиғ ишинин ҝедишинә әнҝәл төрәдирдиләр. Буна бахмајараг, гаршыда һәлә диҝәр дәјишикликләр дә ҝөзләнилирди. 1932-ҹи илдә јығынҹаглар «Ҝөзәтчи Гүлләси» журналында верилән ҝөстәришә мүвафиг олараг ағсаггалларла јығынҹаг јардымчыларынын демократик јолла сечилмәсинә сон гојдулар. Бунун әвәзинә онлар тәблиғ хидмәтиндә иштирак едән руһани кишиләрдән ибарәт хидмәти комитә сечмәли идиләр. Јығынҹаға нәзарәт тәблиғдә фәал сурәтдә иштирак едән ағсаггаллара һәвалә олунду вә иш вүс’әт алды.

Ҝет-ҝедә артан ишыг вә нөвбәти дәјишикликләр

8. 1938-ҹи илдә һансы дәјишиклик баш верди?

⁸ ‘Дан јери нуруну артырмаға давам едирди’. 1938-ҹи илдә јығынҹагда сечкиләрә бирдәфәлик сон гојулду. Артыг јығынҹагда бүтүн хидмәтчиләр «садиг вә ағыллы» гулун нәзарәти алтында теократик јолла тә’јин едилирдиләр (Матта 24:45-47). Дәјишиклик, демәк олар ки, Јеһованын Шаһидләринин бүтүн јығынҹаглары тәрәфиндән сөзсүз гәбул едилди. Тәблиғ иши бәһрәләр ҝәтирмәјә давам едирди.

9. 1972-ҹи илдә һансы гурулуш тә’сис едилди вә нәјә ҝөрә ону јахшылыға доғру дәјишиклик адландырмаг олар?

⁹ 1972-ҹи ил октјабрын 1-дән е’тибарән јығынҹаглара нәзарәтлә әлагәдар јени бир гурулуш гүввәјә минди. Бүтүн дүнјада Јеһованын Шаһидләринин јығынҹагларында ағсаггаллар шурасы фәалијјәт ҝөстәрмәјә башлады. Артыг јығынҹаға нәзарәти јалныз јығынҹаг хидмәтчиси вә ја нәзарәтчиси һәјата кечирмирди. Бу јенилик јеткин кишиләри јығынҹагда мәс’улијјәтләрә ҹан атмаға тәшвиг етди (1 Тимотејә 3:1-7). Нәтиҹәдә, чохлу сајда гардашлар јығынҹагдакы вәзифәләрини јеринә јетирмәклә тәҹрүбә топладылар. Һәгигәтә ҝәләнләрә чобанлыг етмәк үчүн бу гардашларын ҝөстәрдикләри зәһмәт әвәзсиздир!

10. 1976-ҹы илдә нә баш верди?

¹⁰ Рәһбәрлик Шурасынын үзвләри алты комитәјә бөлүндүләр. 1976-ҹы ил јанварын 1-дән е’тибарән, тәшкилатын вә јер үзүндә олан јығынҹагларын һамысынын фәалијјәти бу комитәләрин нәзарәти алтына кечди. Доғрудан да, Падшаһлыг ишинә бүтөвлүклә ‘чохсајлы нәсиһәт верәнләрин’ рәһбәрлик етмәси һамыја бөјүк фајда ҝәтирди (Сүлејманын мәсәлләри 15:22; 24:6).

11. 1992-ҹи илдә һансы мүһүм јенилик тәгдим едилди вә нәјә ҝөрә?

¹¹ 1992-ҹи илдә башга бир һадисә баш верди. Бу һадисәни исраиллиләрин Бабил әсарәтиндән гајытмасындан сонра баш верән һадисә илә мүгајисә етмәк олар. О вахтлар мә’бәддә хидмәт етмәк үчүн кифајәт гәдәр Левили олмадығы үчүн, онлара көмәк мәгсәдилә исраилли олмајан Нетинимләрә даһа чох мәс’улијјәт тапшырылмышды. Бизим ҝүнләрдә дә садиг вә ағыллы гул синфинә јер үзүндә мигјасы артан ишдә көмәк етмәк мәгсәдилә, 1992-ҹи илдән башлајараг, ‘башга гојунлардан’ бә’зиләринә хидмәтдә даһа чох мәс’улијјәт һәвалә олунду. Онлардан бә’зиләри Рәһбәрлик Шурасынын комитәләринә көмәкчи кими тә’јин едилдиләр (Јәһја 10:16).

12. Јеһова әмин-аманлығы неҹә башчымыз тә’јин етди?

¹² Бүтүн бу јениликләр һансы бәһрәләри ҝәтирди? Јеһова дејир: «Әмин-аманлығы башчын, салеһлији һөкмдарын тә’јин едәҹәјәм» (Јешаја 60:17). Јеһованын хидмәтчиләри арасында бу ҝүн ‘әмин-аманлыг’ һөкм сүрүр, ‘салеһлијә’ мәһәббәт исә онларын ‘һөкмдары’, јә’ни Аллаһа хидмәт етмәјә онлары тәшвиг едән гүввәдир. Падшаһлыг һаггында тәблиғ вә шаҝирд һазырламаг тапшырығыны јеринә јетирмәк үчүн онлар јахшы тәшкил олунублар (Матта 24:14; 28:19, 20).

Јеһова тә’лимләрин үзәринә бол-бол ишыг сачыр

13. 1920-ҹи илләр әрзиндә Јеһова тә’лимләрә ајдынлыг ҝәтирмәклә халгынын јолуну неҹә ишыгландырды?

¹³ Јеһова, мүәјјән тә’лимләрә јени анлајыш вермәклә халгынын ҝетдији јолу даһа да ишыгландырыр. Вәһј 12:1-9 ајәләрини буна мисал ҝәтирмәк олар. Бу парчада сөһбәт үч символик сурәтдән — һамилә ‘гадындан’, ‘әждаһадан’ вә ‘оғлан ушағындан’ ҝедир. Сурәтләрин кими тәмсил етдијини билирсинизми? Онларын кимлији «Ҝөзәтчи Гүлләси» журналынын 1925-ҹи ил, 1 март (инҝ.) сајында чыхан «Милләтин доғулушу» адлы мәгаләдә изаһ едилирди. Бу мәгаләнин сајәсиндә Аллаһын халгы Падшаһлығын доғулмасы илә әлагәдар пејғәмбәрликләри даһа да ајдын баша дүшдү. Јени анлајышын көмәклији илә әслиндә јер үзүндә ики тәшкилатын — Јеһованын вә Шејтанын тәшкилатынын мөвҹуд олмасы дәрк едилди. 1927-1928-ҹи илләрдә Аллаһын халгы Милад бајрамы вә ад ҝүнү мәрасимләринин Мүгәддәс Китаба әсасланмадығыны баша дүшдү вә онларын гејд олунмасына сон гојулду.

14. 1930-ҹу илләрдә һансы тә’лимләрә ајдынлыг ҝәтирилди?

¹⁴ 1930-ҹу илләрдә үч Мүгәддәс Китаб һәгигәтинә ајдынлыг ҝәтирилди. Узун илләр әрзиндә Мүгәддәс Китаб Тәдгигатчылары Вәһј 7:9-17 ајәләриндәки ‘бөјүк издиһамын’ јер үзүнү Мәсиһлә бәрабәр падшаһ вә каһинләр кими идарә едәҹәк 144 000 нәфәрдән фәргләндијини билирдиләр (Вәһј 5:9, 10; 14:1-5). Бунунла белә, онун кимлији һәлә дә мүәммалы олараг галырды. Ҝет-ҝедә артан ишығын алтында әшјаларын форма вә рәнҝини сезмәк мүмкүн олдуғу кими, 1935-ҹи илдә дә бөјүк издиһамын кимлији билинди. Мә’лум олду ки, онлар ‘бөјүк мәшәггәтдән’ сағ чыхмаға вә јердә әбәди јашамаға үмиди олан инсанлардыр. Елә һәмин ил, амма бир мүддәтдән сонра бир чох өлкәләрдә јашајан мәктәбјашлы Шаһидләрә аид олан бир мәсәләјә ајдынлыг ҝәтирилди. Вәтәнпәрвәрлик руһу бүтүн дүнјада ҹошғунлугла ашыландығындан Шаһидләр бајраға тә’зим етмәнин архасында ади рәсмијјәтчиликдән фәргли бир шејин дурдуғуну анладылар. Нөвбәти ил ајдын олду ки, Иса чармыхын үзәриндә дејил, дирәјин үстүндә өлмүшдү (Һәвариләрин ишләри 10:39, КМ).

15. Ганын мүгәддәслији барәсиндә даһа чох мә’лумат нә вахт вә неҹә верилди?

¹⁵ Икинҹи Дүнја мүһарибәси заманы јаралы әсҝәрләрә ган көчүрмәк ади мүалиҹә үсулу иди. Мәһз һәмин вахт ганын мүгәддәслији тә’лиминә ајдынлыг ҝәтирилди. «Ҝөзәтчи Гүлләси»нин 1 ијул, 1945-ҹи ил сајында (инҝ.) охуҹулара ҝөстәриш верилирди: «Аллаһын јарадаҹағы салеһ јени дүнјада әбәди јашамаға ҹан атан һәр бир кәс ганын мүгәддәслијинә һөрмәт бәсләмәли вә бу мүһүм мәсәләдә Аллаһын ҝөстәришинә әмәл етмәлидир».

16. «Мүгәддәс Јазыларын Јени Дүнја Тәрҹүмәси» нә вахт нәшр едилмишди вә онун һансы ики мүһүм ҹәһәти вар?

¹⁶ 1946-ҹы илдә Мүгәддәс Китабын јени тәрҹүмәсинә еһтијаҹ дујулмаға башлады. Јени тәрҹүмә ән сон тәдгигатлара әсасланмалы, орада Христиан дүнјасынын ән’әнәләри үзәриндә јаранмыш јалан тә’лимләрә јер олмамалы иди. 1947-ҹи илин декабрында белә тәрҹүмәнин үзәриндә ишә башланды. 1950-ҹи илдә инҝилис дилиндә «Јунанҹа Мүгәддәс Јазыларын Јени Дүнја Тәрҹүмәси» ишыг үзү ҝөрдү. Инҝилис дилиндә Ибраниҹә Мүгәддәс Јазылар 1953-ҹү илдән башлајараг бир нечә ил әрзиндә 5 ҹилддә чыхды. Сонунҹу ҹилд 1960-ҹы илдә, тәрҹүмә лајиһәсинин башламасындан дүз 12 ил сонра ишыг үзү ҝөрдү. «Мүгәддәс Јазыларын Јени Дүнја Тәрҹүмәси» 1961-ҹи илдә бир ҹилддә нәшр едилди. Бу ҝүн артыг бир нечә дилдә нәшр едилән бу тәрҹүмәнин бир чох мүсбәт ҹәһәтләри вар. Мәсәлән, бу тәрҹүмәдә Јеһованын ады бәрпа едилиб. Ондан башга, орижинал мәтнин дәгиг тәрҹүмәси Аллаһын Кәламыны дәрк етмәкдә әвәзсиз көмәкдир.

17. 1962-ҹи илдә нә мә’лум олду?

¹⁷ Ромалылара 13:1 ајәсиндәки ‘һәр адамын үзәриндә олан һакимләр’ дејәндә кимин нәзәрдә тутулмасы вә мәсиһчиләрин бу ‘һакимләрә’ нә дәрәҹәдә табе олмасы суалы әтрафлы сурәтдә 1962-ҹи илдә ачыгланды. Ромалылара 13-ҹү фәсил, Титуса 3:1, 2 вә 1 Петер 2:13, 17 ајәләринин дәрин арашдырылмасы сајәсиндә ајдын олду ки, ‘һәр адамын үзәриндә олан һакимләр’ Јеһова Аллаһ вә Иса Мәсиһә дејил, һаким даирәләринә аиддир.

18. 1980-ҹи илләрдә һансы һәгигәтләрә ајдынлыг ҝәтирилди?

¹⁸ Сонракы илләр әрзиндә нур салеһләрин јолуна даһа чох сачырды. 1985-ҹи илдә «јашамаг үчүн» салеһ е’лан едилмәјин вә Аллаһын досту кими салеһ е’лан едилмәјин һансы мә’наны дашымасы ајдын олду (Ромалылара 5:18; Јагуб 2:23). Мәсиһчи Азадлыг илинин мә’насы 1987-ҹи илдә әтрафлы ачыгланды.

19. Сон илләр әрзиндә Јеһова халгынын үзәринә руһани ишығы неҹә әләјиб?

¹⁹ 1995-ҹи илдә гојунларын кечиләрдән ајрылмасы һаггындакы пејғәмбәрлик даһа дәриндән дәрк едилди. 1998-ҹи илдә Језекелин артыг бу ҝүн јеринә јетмәкдә олан мә’бәд һаггында ҝөрүнтүсү, 1999-ҹу илдә исә ‘ијрәнҹ шејин’ нә вахт вә неҹә ‘мүгәддәс јердә дурдуғу’ изаһ едилди (Матта 24:15, 16, И–93; 25:32). Аллаһа ‘руһән вә һәгигәтән ибадәт етмәјин’ нә олдуғуна даир јени изаһат 2002-ҹи илдә верилди (Јәһја 4:24).

20. Аллаһын халгы һансы диҝәр саһәләрдә дәјишикликләр ҝөрүб?

²⁰ Тәшкилатын гурулушунда баш верән дәјишикликләр вә тә’лимләрә ҝәтирилән ачыгламалардан әлавә, мәсиһчиләрин давранышы илә әлагәдар да бир чох јени ҝөстәришләр верилмишдир. Мәсәлән, 1973-ҹү илдә түтүндән истифадәнин ‘бәдән мурдарлығы’ вә ҹидди ҝүнаһ олдуғу баша дүшүлдү (2 Коринфлиләрә 7:1). Он ил сонра «Ҝөзәтчи Гүлләси»нин 1984-ҹү ил 1 феврал нәшриндә (рус.) мәсиһчинин одлу силаһ дашымасына даир мөвгејинә ајдынлыг ҝәтирилди. Бу, Аллаһын бизим ҝүнләрдә јолумузу неҹә ишыгландырмасы илә бағлы бә’зи мисаллардыр.

Нуру артан јолда јеримәјә давам един

21. Һансы мүнасибәт бизә нуру артан јолда јеримәјә көмәк едәҹәк?

²¹ Узун илләр ағсаггал кими хидмәт едән бир мәсиһчи белә дејир: «Дәјишикликләри гәбул етмәк һәмишә асан олмур». Бәс Падшаһлығын тәблиғчиси олдуғу 48 ил әрзиндә о гәдәр дәјишикликләри гәбул етмәјә она нә көмәк едиб? О ҹаваб верир: «Әсас мәсәлә дүзҝүн мүнасибәтдәдир. Һәр һансы бир дәјишиклији гәбул етмәмәк, даима ирәлиләјән тәшкилатдан дала галмаг демәкдир. Һәрдән мүәјјән дәјишикликләри гәбул етмәк чәтин оланда, мән Петерин Исаја дедији сөзләр үзәриндә дүшүнүрәм: “Ја Рәбб, биз кимин јанына ҝедә биләрик? Әбәди һәјатын сөзләри Сәндәдир”. Сонра өзүмдән сорушурам: мән һара ҝедим? Јохса ишыгдан дөнүб дүнјанын зүлмәтинә үз тутум? Бу, мәнә Аллаһын тәшкилатындан бәрк јапышмаға көмәк едир» (Јәһја 6:68).

22. Ишыгда јеримәјин бизә нә фајдасы вар?

²² Сөзсүз ки, бизи әһатә едән дүнја зил гаранлыг ичиндәдир. Јеһова халгынын үзәринә нур әләдикҹә, халгы илә бу дүнја арасындакы учурум даһа да ҝенишләнир. Аллаһ бизә бу ишығы һансы мәгсәдлә верир? Гаранлыг бир јолу фәнәрлә ишыгландырмаг јолдакы чухуру јох етмәдији кими, Аллаһын Кәламындан сачан нур да јолумузда олан тәләләри арадан галдырмыр. Бунунла белә, бу ишыг, нур јолунда јеримәјә давам етмәмиз үчүн тәләләрдән јан кечмәјимизә көмәк едир. Ҝәлин биз дә Јеһованын «гаранлыг јердә ишыг сачан бир чыраға бәнзәјән» пејғәмбәрлик сөзләринә диггәт јетирәк (2 Петер 1:19).

Јадыныздадырмы?

• Јеһованын халгы тәшкилатын гурулушунда баш вермиш һансы дәјишикликләрин шаһиди олмушдур?

• Артан нурун сајәсиндә һансы тә’лимләрлә әлагәдар јени ачыгламалар едилмишдир?

• Шәхсән сән һансы дәјишикликләрин шаһиди олмусан вә онлары гәбул етмәјә сәнә нә көмәк етмишдир?

• Нәјә ҝөрә ҝет-ҝедә нуру артан јолда јеримәјә давам етмәк истәјирсән?

[19-ҹу сәһифәдәки шәкилләр]

1922-ҹи илдә Оһајо штатынын Сидар Појнт шәһәриндә кечирилән конгрес Мүгәддәс Китаб Тәдгигатчыларыны Аллаһын һәвалә етдији иши сә’јлә јеринә јетирмәјә тәшвиг етди.

[21-ҹи сәһифәдәки шәкил]

Нејтан Норр 1950-ҹи илдә ишыг үзү ҝөрән «Јунанҹа Мүгәддәс Јазыларын Јени Дүнја тәрҹүмәси»ни тәгдим едир.

[Иҹазә илә]

© 2003 BiblePlaces.com