Јегованын тәшкилаты илә ајаг-ајаға јеријирик
“Сүлһ мәнбәји олан Аллаһ... ирадәсини һәјата кечирмәк үчүн сизи һәр јахшы шејлә тәҹһиз етсин” (ИБРАНИЛӘРӘ 13:20, 21, И-93).
1. Дүнја әһалисинин вә бә’зи динләрә мәхсус олан инсанларын сајы нә гәдәрдир?
ДҮНЈА әһалисинин сајы 1999-ҹу илдә алты милјарда чатды. “Үмумдүнја алманахына” әсасән, Јер күрәсинин 1 165 000 000 сакини мүсәлманлар, 1 030 000 000 католикләр, 762 000 000 һиндулар, 354 000 000 буддистләр, 316 000 000 протестантлар вә 214 000 000 православлардыр.
2. Бу ҝүн мөвҹуд олан дини вәзијјәт һаггында нә демәк олар?
2 Буҝүнкү чохсајлы вә мүхтәлиф динләрә мәхсус олан милјонларла инсанларын, Аллаһын ирадәсинә ујғун даврандыгларыны сөјләмәк олармы? Хејр, чүнки “Аллаһ гарышыглыг дејил, сүлһ Аллаһыдыр” (1 Коринфлиләрә 14:33). Бәс Јегованын хидмәтчиләринин бејнәлхалг гардашлығы барәсиндә нә демәк олар? (1 Петер 2:17). Бу гардашлыға диггәт јетирдикдә әмин олурсан ки, “сүлһ мәнбәји олан Аллаһ... ирадәсини һәјата кечирмәк үчүн... [гардашлығы] һәр јахшы шејлә тәҹһиз” едир (Ибраниләрә 13:20, 21, И—93).
3. Б. е. 33-ҹү илинин Пентикост ҝүнүндә Јерусәлимдә нә баш верди вә нә үчүн?
3 Аллаһын, Јегованын Шаһидләринә илтифат ҝөстәриб ҝөстәрмәмәсини, онларын сајына ҝөрә мүһакимә етмәк олмаз. Аллаһы статистика илә тәәҹҹүбләндирмәк гејри-мүмкүндүр. О, Исраил халгыны, сајҹа “бүтүн халглардан даһа чох” олдуғуна ҝөрә сечмәмишди. Әксинә, Исраил сајҹа “бүтүн халглардан аз иди” (Тәснијә 7:7). Анҹаг Исраил халгы Аллаһа олан сәдагәтини итирдији үчүн, б. е. 33-ҹү илинин Пентикост ҝүнүндән е’тибарән Јегова, Иса Мәсиһин давамчыларындан ибарәт олан јени мәсиһчи јығынҹағына илтифат ҝөстәрмәјә башлады. Онлар Јегованын мүгәддәс руһу илә мәсһ едилмишдиләр, бир гәдәр вахт кечдикдән сонра Аллаһ вә Мәсиһ һаггындакы һәгигәти сә’јлә бәјан етмәјә башладылар (Һәвариләрин ишләри 2:41, 42).
Дурмадан ирәлиләмәк
4. Нәјә ҝөрә дејә биләрик ки, илк мәсиһчи јығынҹағы дурмадан ирәлиләјирди?
4 Биринҹи јүзилликдә мәсиһчи јығынҹағы дурмадан ирәлиләјирди: тәблиғ үчүн јени әразиләр һазырланырды, шаҝирдләрин һазырланмасы давам едирди, Аллаһын нијјәтләри һаггында даһа ҝениш анлајыш әлдә едилирди. Илк мәсиһчиләр, илһамланмыш мәктубларын васитәсилә иҹра олунан руһани маарифләнмә илә “ајаг-ајаға” ҝедирдиләр. Һәвариләрин вә башга гардашларын зијарәтләри, хидмәтләрини баша чатдырмаг үчүн һәмин мәсиһчиләрә ҝүҹ верирди. Бүтүн бунлар һаггында Јунанҹа Мүгәддәс Јазыларда шәһадәт олунур (Һәвариләрин ишләри 10:21, 22; 13:46, 47; 2 Петер 3:17, 18; 2 Тимотејә 1:13; 4:5; Ибраниләрә 6:1—3).
5. Нәјә ҝөрә бу ҝүн Аллаһын тәшкилаты инкишаф едир вә биз нәјә ҝөрә онунла ајаг-ајаға јеримәлијик?
5 Илк мәсиһчиләрин фәалијјәтинин башланғыҹы кими, Јегованын мүасир Шаһидләри дә башланғыҹда кичик бир груп идиләр (Зәкарја 4:8—10). XIX әсрин ахырларындан ајдын олду ки, Јегованын руһу өз тәшкилатынын үзәриндәдир. Инсан ҝүҹүнә дејил, мүгәддәс руһун рәһбәрлијинә ҝүвәндијимиз үчүн, Мүгәддәс Јазылары анламагда вә Аллаһын ирадәсини јеринә јетирмәкдә инкишаф етмәјә давам едирик (Зәкарја 4:6). “Ахыр ҝүнләрдә” јашадығымыз үчүн, Аллаһын ирәлиләјән тәшкилаты илә ајаг-ајаға јеримәјимиз, бу ҝүн ҝөрүнмәјән дәрәҹәдә ваҹибдир (2 Тимотејә 3:1—5). Буну етмәк, үмидимизи ҹанлы сахламаға вә бу әшјалар системинин сон мәһви әрәфәсиндә Аллаһын гурулмуш Падшаһлығы һаггындакы үмумдүнја тәблиғиндә иштирак етмәјә бизә имкан верир (Матта 24:3—14).
6, 7. Јегованын тәшкилатынын ирәлиләјиш етдији һансы үч саһәјә диггәт јетирәҹәјик?
6 Арамызда, Јегованын тәшкилатына 1920-ҹи, 30-ҹу вә 40-ҹы илләрдә гошуланлар вар. О узаг илләрдә бизләрдән һансымыз дүшүнә биләрдик ки, тәшкилат бу ҝүн үчүн бу дәрәҹәдә бөјүјәҹәк вә тәкмилләшәҹәкдир? Мүасир тарихимиз әрзиндә кечилән мәрһәләләри дүшүнүн! Јегованын теократик јолла тәшкил олунан халгынын васитәсилә етдикләри үзәриндә дүшүнмәк, руһани ҹәһәтдән чох мөһкәмләндирир.
7 Јегованын валеһедиҹи ишләри үзәриндә дүшүнмәк Давуду һејрәтләндирирди. О дејирди: “Онлары [Аллаһын ишләрини] е’лан едиб сөјләмәк истәсәм, саја ҝәлмәз” (Мәзмур 40:5). Биз дә Давудун гаршылашдығы чәтинликләрлә гаршылашырыг. Јегованын бизим ҝүнләрдә етдији чохсајлы вә тә’рифә лајиг ишләри барәдә данышмаг игтидарында дејилик. Буна бахмајараг, ҝәлин тәшкилатын хүсуси тәрздә ирәлиләјиш етдији үч саһәјә диггәт јетирәк: 1) тәдриҹән артан руһани маарифләнмә, 2) кејфијјәтин тәкмилләшмәси вә хидмәтин ҝенишләнмәси вә 3) тәшкилатчылыг гајдаларында вахтында едилән дәјишикликләр.
Руһани маарифләнмә үчүн миннәтдарыг
8. Сүлејманын мәсәлләри 4:18 ајәсинә әсасән, руһани маарифләнмә сајәсиндә Падшаһлыгла әлагәдар нәји анладыг?
8 Тәдриҹән артан руһани маарифләнмәјә ҝәлинҹә, бурада Сүлејманын мәсәлләри 4:18-ҹи ајәси јериндә сәсләнәр. Орада дејилир: “Салеһләрин јолу исә, доған ишыг кимидир, там ҝүн олунҹаја гәдәр ҝет-ҝедә парлар”. Даими руһани маарифләнмәмиз үчүн неҹә дә миннәтдарыг! 1919-ҹу илдә Сидар Поинтдә (АБШ, Оһајо штаты) кечирилән конгресдә, әсас диггәт Аллаһын Падшаһлығына јөнәлдилирди. Јегова Падшаһлығын васитәсилә Өз исмини иззәтләндирәҹәк вә һөкмранлығына бәраәт газандыраҹагдыр. Руһани маарифләнмә сајәсиндә анладыг ки, Јегова Оғлунун идарә етдији Падшаһлығын васитәсилә Өз исмини иззәтләндирмәк нијјәти һаггында Мүгәддәс Китабын Тәквиндән Вәһјә гәдәр олан һиссәләриндә шәһадәт едир. Салеһлији севән һәр бир кәсин үмиди буна әсасланыр (Матта 12:18, 21).
9, 10. Мүгәддәс Китабын Тәдгигатчылары Падшаһлыг вә ики гаршы дуран тәшкилат һаггында 1920-ҹи илләрдә нә өјрәндиләр вә бу һансы тәрздә фајдалы олду?
9 Сидар Поинтдә 1922-ҹи илдә кечирилән конгресдә, апарыҹы мә’рузәчи Ҹ. Рутерфорд, Аллаһын халгыны тәшвиг етди: “Падшаһы вә Онун падшаһлығыны е’лан един, е’лан един, е’лан един”. “Ҝөзәтчи Гүлләси”нин 1925-ҹи ил, 1 март (инҝ.) нөмрәсиндә дәрҹ олунмуш “Халгын доғулмасы” адлы мәгаләдә, Аллаһын Падшаһлығынын 1914-ҹү илдә гурулдуғуна ишарә едән пејғәмбәрликләрдәки руһани анлајыша диггәт јетирилирди. Бундан әлавә, 1920-ҹи илләрдә ајдын олду ки, бир-биринә гаршы дуран ики тәшкилат вар: Јегованын тәшкилаты вә Шејтанын тәшкилаты. Онлар арасындакы мүбаризә давам едир вә әҝәр Јегованын тәшкилаты илә ајаг-ајаға јеријәриксә, јалныз о заман галиб ҝәлән тәрәфдә олаҹағыг.
10 Бу руһани маарифләнмә бизә неҹә көмәк етди? Аллаһын Падшаһлығы вә Падшаһ Иса Мәсиһ бу дүнјанын бир һиссәси олмадығы кими, биз дә бу дүнјадан олмамалыјыг. Дүнјадан ајры дурмагла, һәгигәтин тәрәфиндә олдуғумузу ҝөстәрәрик (Јәһја 17:16; 18:37). Бу пис әшјалар системи ҝетдикҹә даһа ҹидди проблемләрә гәрг олур вә елә бу сәбәбдән, Шејтанын тәшкилатына аид олмадығымыз үчүн неҹә дә шадыг! Јегованын тәшкилатында руһани фираванлыға наил олмағымыз һәгигәтән дә бөјүк хејир-дуадыр!
11. Аллаһын халгы 1931-ҹи илдә, Мүгәддәс Јазылар әсасында һансы ады гәбул етди?
11 Колумбусда (АБШ, Оһајо штаты) 1931-ҹи илдә кечирилән конгресдә Ишаја 43:10—12 ајәләри лазыми тәрздә изаһ олунду. Мүгәддәс Китабын Тәдгигатчылары, онлары башгаларындан фәргләндирән, Јегованын Шаһидләри адыны гәбул етдиләр. Башгаларынын да Аллаһы ады илә чағырыб, хилас ола билмәләри үчүн, бу ады бәјан етмәк бизим һамымыз үчүн неҹә дә бөјүк шәрәфдир! (Мәзмур 83:18; Ромалылара 10:13).
12. Бөјүк издиһамла әлагәдар 1935-ҹи илдә һансы суала руһани ајдынлыг ҝәтирилди?
12 Аллаһын халгына мәхсус олан минләрлә инсанлар, 1930-ҹу илләрә гәдәр, ҝәләҹәк һәјата үмидләри илә әлагәдар чашгынлыг ичиндә идиләр. Бә’зиләри, бир тәрәфдән ҝөјләр һәјаты барәсиндә дүшүнүр, диҝәр тәрәфдән исә Мүгәддәс Китабын, јер үзү ҹәннәт һаггындакы тә’лимләринә валеһ олурдулар. 1935-ҹи илдә Вашингтонда кечирилән конгресдә һәјәҹанландырыҹы хәбәр сөјләнди: Вәһј китабынын 7-ҹи фәслиндә хатырладылан бөјүк издиһам, Јер үзүндә јашамаға үмиди олан инсанлардыр. Һәмин вахтдан е’тибарән бөјүк издиһамын јығымы сүр’әтлә артмагда давам едир. Бөјүк издиһамын кимләри тәсвир етмәсинин сирр галмадығы үчүн миннәтдар дејиликми? Бүтүн халглардан, гәбиләләрдән вә дилләрдән олан күлли мигдарда инсанлар ҝөзүмүзүн гаршысында топланырлар. Бу бизи, аддымларымызы сүр’әтләндирмәјә вә Јегованын тәшкилаты илә ајаг-ајаға јеримәјә тәшвиг едир.
13. Сент Луисдә 1941-ҹи илдә кечирилән конгресдә әсас диггәт һансы ваҹиб суала јөнәлдилди?
13 Сент Луисдә (АБШ, Миссури штаты) 1941-ҹи илдә кечирилән конгресдә инсан ҹәмијјәтини нараһат етмәли олан ән ваҹиб суала диггәт јетирилди. Бу, универсал һөкмранлыг, јә’ни али һакимијјәт барәсиндәки суалдыр. Тезликлә бу суал һәлл олунмалыдыр, бунун баш верәҹәји бөјүк вә горхунҹ ҝүн сүр’әтлә јахынлашыр. Һәмчинин 1941-ҹи илдә, инсанларын нөгсансызлығы һаггында суал ортаја гојулду; бу суал, Аллаһын һөкмранлығына мүнасибәтдә һансы мөвгени тутдуғумузу ҝөстәрмәк үчүн бизә имкан верир.
14. Јегованын Шаһидләри, 1950-ҹи илдә кечирилән бејнәлхалг конгресдә Ишаја 32:1, 2-ҹи ајәләриндә хатырладылан рәисләр һаггында нә өјрәндиләр?
14 Нју-Јоркда 1950-ҹи илдә кечирилән бејнәлхалг конгресдә Ишаја 32:1, 2-ҹи ајәләриндәки рәисләрин кимләри тәсвир етдикләри дәгиг ҝөстәрилди. Фредерик Френс гардаш бу мөвзуну ајдынлашдырыб, јени јерин ҝәләҹәк рәисләринин бизим арамызда олдугларыны изаһ едәндә, һамы нәфәс алмадан гулаг асырды. Бу вә нөвбәти конгресләрдә руһани ишығын чохсајлы ишартысы парлајырды (Мәзмур 97:11). Јолумузун “доған ишыг кими” олмасына вә “ҝет-ҝедә парла”масына ҝөрә биз неҹә дә миннәтдарыг!
Хидмтимиздә ирәлиләјирик
15, 16. а) Хидмәтимиздә, 1920-ҹи вә 1930-ҹу илләрдә һансы ирәлиләјишләр олмушдур? б) Сон онилликләр әрзиндә һансы нәшрләр мәсиһчи хидмәтинә тәшвиг етмишдир?
15 Јегованын тәшкилатынын ирәлиләдији икинҹи саһә, бизим башлыҹа фәалијјәтимизлә - Падшаһлыг һаггындакы хәбәрин тәблиғи вә шаҝирдләрин һазырланмасы илә әлагәлидир (Матта 28:19, 20; Марк 13:10). Тәшкилат, бу ишин јеринә јетирилмәси үчүн хидмәтимизи ҝенишләндирмәјин нә гәдәр ваҹиб олдуғуну даима бизә хатырладыр. 1922-ҹи илдә бүтүн мәсиһчиләр тәблиғ етмәјә тәшвиг олунурдулар. Ишығынын парылдамасына имкан вермәји, јә’ни һәгигәт һаггында тәблиғ едиб етмәмәји һәр кәс өзү гәрарлашдырырды (Матта 5:14—16). Һәр базар ҝүнүнү тәблиғ хидмәтинә ајырмаг үчүн 1927-ҹи илдә тәдбирләр ҝөрүлдү. 1940-ҹы илин феврал ајындан башлајараг, Шаһидләрин ишҝүзар рајонларын күчәләриндә “Ҝөзәтчи Гүлләси” вә “Тәсәлли” (инди “Ојанын!” адланыр) журналлары пајладыгларыны тез-тез мүшаһидә етмәк оларды.
16 “Нүмунәви өјрәнмә” адлы балаҹа брошүра чапдан 1937-ҹи илдә чыхды. Бу бурахылышда тәкрар баш чәкмәләрин вә башгаларына Мүгәддәс Китаб һәгигәтләрини өјрәтмәјин ваҹиблији вурғуланырды. Сонракы илләрдә әсас диггәт инсанларла Мүгәддәс Китаб өјрәнмәсинин кечирилмәсинә јөнәлдилди. 1946-ҹы илдә чыхан “Аллаһ һагг олсун” вә 1968-ҹи илдә “Әбәди һәјата апаран һәгигәт” китабларынын бурахылышы, хидмәтин бу нөвүндә иштирак етмәјә тәшвиг етди. Һал-һазырда “Әбәди һәјата апаран билик” китабындан истифадә едирик. Инсанларла бу материалы мүзакирә етмәклә шаҝирдләрин һазырланмасы үчүн, Мүгәддәс Јазылара әсасланан мөһкәм бир тәмәл гојмуш олуруг.
Тәшкилатчылыг гајдаларыны тәкмилләшдирәрәк ирәлиләјирик
17. Ишаја 60:17-ҹи ајәсинә ујғун олараг, Јегованын тәшкилаты неҹә ирәлиләмишдир?
17 Јегованын тәшкилатынын ирәлиләдији үчүнҹү саһә, тәшкилатчылыг гајдаларынын тәкмилләшдирилмәси илә әлагәдардыр. Ишаја 60:17-ҹи ајәсиндә Јегованын вә’ди јазылыб: “Тунҹ јеринә гызыл ҝәтирәҹәјәм вә дәмир јеринә ҝүмүш вә ағаҹ јеринә тунҹ вә даш јеринә дәмир ҝәтирәҹәјәм. Вә мә’мурларыны сүлһ едәҹәјәм, нәзарәтчиләрини дә әдаләт”. Бу пејғәмбәрликлә әлагәдар, Падшаһлыг һаггындакы хәбәрин тәблиғ ишинә ҝөстәрилән рәһбәрлији јахшылашдырмаг вә сүрүјә лазыми тәрздә чобанлыг етмәк саһәсиндә аддымлар атылмышдыр.
18, 19. Илләр әрзиндә тәшкилатчылыг гајдаларында һансы ирәлиләјишләр олмушдур?
18 Тәблиғ хидмәтинин тәшкил олунмасы барәдә көмәк диләјән һәр јығынҹаға, 1919-ҹу илдә хидмәти рәһбәр тә’јин олунду. Бу, тәблиғ хидмәти үчүн тәшвигедиҹи амил олду. Ағсаггалларын вә диаконларын (хидмәтчиләрин) демократик јолла сечилмәсинә 1932-ҹи илдә сон гојулду. 1938-ҹи илдә даһа ваҹиб бир мәрһәлә кечилди; һәмин ил јығынҹагдакы бүтүн хидмәтчиләрин тә’јин олунмасы, илк мәсиһчи јығынҹағында гәбул олунмуш гајда әсасында кечирилмәјә башлады (Һәвариләрин ишләри 14:23; 1 Тимотејә 4:14). 1972-ҹи илдә, илк мәсиһчи јығынҹагларында олдуғу кими, нәзарәтчиләр вә хидмәти көмәкчиләр тә’јин етмәјә башладылар. Јығынҹагдакы нәзарәтчиләрин сајы бир нәфәрлә мәһдудлашмыр, лакин Филипилиләрә 1:1-ҹи ајәсинә вә башга ајәләрә әсасән, Мүгәддәс Китабын нәзарәтчиләр үчүн олан тәләбләрини јеринә јетирән гардашлар, ағсаггаллар шурасыны тәшкил едирләр (Һәвариләрин ишләри 20:28; Ефеслиләрә 4:11, 12).
19 Аллаһын тәшкилатынын үмумдүнја фәалијјәтини, 1975-ҹи илдә, Јегованын Шаһидләринин Рәһбәрлик шурасынын комитәләри идарә етмәјә башладылар. Бундан әлавә, әразиләриндәки фәалијјәтә рәһбәрлик едән, филиалларын Комитәләри тә’јин олунду. О вахтдан е’тибарән “ән үстүн дәјәрләри ајырд едә билмәк” үчүн мәркәзи идарәнин вә Ҝөзәтчи Гүлләси Ҹәмијјәти филиалларынын ишини садәләшдирмәјә чалышырлар (Филипилиләрә 1:9, 10). Мәсиһин рәһбәрлији алтында фәалијјәт ҝөстәрән чобанларын вәзифәсинә, тәблиғ ишиндә рәһбәлији өз үзәрләринә ҝөтүрмәк, јығынҹагда өјрәтмәк вә Аллаһын сүрүсүнү лазыми тәрздә отармаг дахилдир (1 Петер 5:2, 3; 1 Тимотејә 4:16; Ибраниләрә 13:7, 17).
Исанын фәал рәһбәрлији
20. Јегованын тәшкилаты илә ајаг-ајаға јеримәк үчүн, Исанын тутдуғу вәзифә илә әлагәдар нәји гәбул етмәлијик?
20 Јегованын ирәлиләјән тәшкилаты илә ајаг-ајаға јеримәк үчүн, Аллаһ тәрәфиндән “ҹәмијјәтин Башы” тә’јин едилән Иса Мәсиһин ролуну гәбул етмәлијик (Ефеслиләрә 5:22, 23). Ишаја 55:4-ҹү ајәсиндә бизә дејиләнләрә диггәт јетирмәјә дәјәр: “Будур, Мән [Јегова] ону шаһид олараг милләтләрә, рәис вә әмир олараг милләтләрә вердим”. Шүбһәсиз, Иса неҹә рәһбәрлик етмәји билир. Гојунларыны таныјыр вә онларын ишләриндән хәбәрдардыр. О, Кичик Асијадакы једди јығынҹағы јохладығы заман беш дәфә: “Сәнин ишләриндән хәбәрдарам” деди (Вәһј 2:2, 19; 3:1, 8, 15, И—93). Атасы Јегова кими, Иса да бизим еһтијаҹларымыздан хәбәрдардыр. Нүмунәви дуаны сөјләмәздән әввәл, Иса деди: “Атаныз сизин нәләрә еһтијаҹыныз олдуғуну сиз Ондан диләмәздән әввәл билир” (Матта 6:8—13).
21. Мәсиһчи јығынҹағында Исанын рәһбәрлији неҹә һәјата кечирилир?
21 Исанын рәһбәрлији неҹә һәјата кечирилир? Мәсәлән, мәсиһчи нәзарәтчиләринин - “инсанлар тимсалында һәдијјәләр”ин васитәсилә (Ефеслиләрә 4:8, ЈД). Вәһј 1:16 ајәсинә әсасән, мәсһ едилмиш нәзарәтчиләр Мәсиһин сағ әлиндә, јә’ни онун нәзарәти алтындадырлар. Бу ҝүн ҝөјләр вә ја јер үмидләринин олмасындан асылы олмајараг, Иса ағсаггаллары бир груп кими идарә едир. Әввәлки мәгаләдә изаһ олундуғу кими, онлар Мүгәддәс Китабын тәләбләринә ујғун олараг мүгәддәс руһ тәрәфиндән тә’јин олунурлар (1 Тимотејә 3:1—7; Титуса 1:5—9). Биринҹи әсрдә ағсаггаллардан ибарәт олан рәһбәрлик шурасы Јерусәлимдә јерләширди. Бу шура јығынҹаглара вә Падшаһлыг һаггындакы хәбәрин тәблиғ ишинә үмуми рәһбәрлик едирди. Јегованын мүасир тәшкилаты һәмин нүмунәјә риајәт едир.
Ајаг-ајаға јеријирик!
22. Рәһбәрлик шурасы һансы көмәклији ҝөстәрир?
22 Јер үзүндә Падшаһлығын мәнафеји һаггында гајғы ҝөстәрмәк, “садиг вә ағыллы гул”у тәсмил едән Рәһбәрлик шурасына тапшырылмышдыр (Матта 24:45—47). Рәһбәрлик шурасы, мәсиһчи јығынҹағына илк нөвбәдә руһани өјүд вә рәһбәрлик ҝөстәрмәјин гајғысына галыр (Һәвариләрин ишләри 6:1—6). Лакин гардашлар тәбии фәлакәтдән әзијјәт чәкәндә, Рәһбәрлик шурасы ҹәмијјәтин бир вә ја бир нечә һүгуг органындан хаһиш едир ки, зәрәр чәкмиш јашајыш биналарынын вә Падшаһлыг Залларынын тә’миринә вә ја бәрпасына көмәк етмәк үчүн тәдбирләр ҝөрсүнләр. Мәсиһчиләр һарада исә гәддарҹасына давранышлара вә ја тә’гибләрә мә’руз галырларса, онлары руһландырмаг вә руһән мөһкәмләтмәк үчүн тәдбирләр ҝөрүлүр. “Әлверишсиз вахтда” исә, тәблиғ ишинин ирәлиләмәси үчүн һәр ҹүр сә’ј ҝөстәрилир (2 Тимотејә 4:1, 2, ЈД).
23, 24. Халгынын гаршылашдығы чәтинликләрдән асылы олмајараг, Јегова һәмишә нә тәгдим едир вә биз нә етмәјә гәрарлы олмалыјыг?
23 Халгынын гаршылашдығы чәтинликләрә бахмајараг, Јегова руһани гиданы вә лазыми рәһбәрлији һәмишә тәгдим едир. Бундан әлавә, теократик тәшкилатын тәкмилләшмәси вә ирәлиләмәјә давам етмәси үчүн, Аллаһ ҹавабдеһ гардашлары дүшүнҹә вә ҝөзүачыглыгла тә’мин едир (Тәснијә 34:9; Ефеслиләрә 1:16, 17). Шаҝирдләр һазырламаг вә хидмәтимизи бүтүн дүнјада иҹра етмәк үчүн лазым олан һәр шеји Јегова бизә верир (2 Тимотејә 4:5).
24 Сөзсүз әмин ола биләрик ки, Өзүнүн садиг халгыны Јегова һеч заман тәрк етмәјәҹәкдир. Аллаһ онлары гаршыдан ҝәлән “бөјүк мәшәггәтдән” хилас едәҹәкдир (Вәһј 7:9—14; Мәзмур 94:14; 2 Петер 2:9). Башланғыҹда малик олдуғумуз әминлији ахыра гәдәр горујуб сахламаға бүтүн әсасларымыз вардыр (Ибраниләрә 3:14). Белә исә, ҝәлин Јегованын тәшкилаты илә ајаг-ајаға јеримәјә гәрарлы олаг!
Сиз неҹә ҹаваб верәрдиниз?
• Нәјә ҝөрә демәк олар ки, Јегованын тәшкилаты дурмадан ирәлиләјир?
• Аллаһын халгынын даима руһани маарифләнмәсинә нә шәһадәтлик едир?
• Мәсиһчи хидмәти илә әлагәдар һансы ирәлиләјишләр олмушдур?
• Јегованын хидмәтчиләри тәрәфиндән гәбул олунмуш тәшкилатчылыг гајдаларында вахтында олан һансы дәјишикликләр едилмишдир?
[13-ҹү сәһифәдәки шәкил]
Давуд кими, биз дә Јегованын бүтүн мөһтәшәм ишләрини садалаја билмәрик.
[15-ҹи сәһифәдәки шәкил]
Тәшкилатчылыг гајдаларында едилән мүасир дәјишикликләр Аллаһын сүрүсүнүн рифаһына хидмәт етмишдир.