Јеһованын Кәламы ҹанлыдыр
«Зәбур» китабынын биринҹи һиссәсиндән диггәтәлајиг фикирләр
ЈАРАДАНЫМЫЗ Јеһова Аллаһа һәср едилмиш һәмд китабына сизҹә, һансы ад јарашарды? Әлбәттә ки, «Зәбур» вә ја һәмд нәғмәләри! Мүгәддәс Јазылара дахил олан китаблар арасында ән бөјүјү олан «Зәбур» китабы Аллаһын ҝөзәл кејфијјәтләриндән, мөһтәшәм ишләриндән бәһс едән, һабелә сајсыз-һесабсыз пејғәмбәрликләрдән ибарәт нәғмәләр топлусудур. Нәғмәләрин әксәријјәти чәтинликләрлә гаршылашан јазычыларын һиссләрини әкс етдирир. Бурада Исраил тарихинин миниллик дөврү — Муса пејғәмбәрин ҝүнләриндән башлајараг Бабил әсарәтиндән сонракы дөвр әһатә едилир. Китабы Муса, Давуд падшаһ вә башгалары јазмышлар. Китабы һазыркы шәкилдә каһин Езра тәртиб етмишдир.
«Зәбур» китабы ән’әнәви олараг 5 топлуја вә ја һиссәјә бөлүнүр: 1) Мәзмур 1-41; 2) Мәзмур 42-72; 3) Мәзмур 73-89; 4) Мәзмур 90-106; вә 5) Мәзмур 107-150. Бу мәгаләдә биринҹи топлу нәзәрдән кечирилир. Биринҹи топлуја дахил олан мәзмурларын үчүнү чыхмаг шәрти илә галан һамысыны Давуд падшаһ јазмышдыр. 1, 10, вә 33-ҹү мәзмурларын јазарлары мә’лум дејил.
«АЛЛАҺЫМ ГАЈАМДЫР»
Биринҹи мәзмур ҝөстәрир ки, Јеһованын ганунундан зөвг алан адам хошбәхтдир, икинҹисиндә исә Падшаһлыгдан бәһс едилирa. Бу мәзмурлар групунун әсасыны Аллаһа јалварышлар тәшкил едир. 3-5, 7, 12, 13 вә 17-ҹи мәзмурларын мөвзусу дүшмәнләрдән хилас олмаг үчүн јалварышлардыр. 8-ҹи мәзмур инсанын кичиклији илә мүгајисәдә Јеһованын бөјүклүјүнү вурғулајыр.
Мәзмурларында Јеһова Аллаһы халгынын Һимајәдары кими тәсвир едән Давуд охујурду: «Аллаһым гајамдыр, Она пәнаһ ҝәтирәҹәјәм» (Мәзмур 18:2). Јеһова 19-ҹу мәзмурда Јарадан вә Ганунвериҹи, 20-дә Хиласкар, 21-дә исә мәсһ етдији Падшаһынын Хиласкары кими тәсвир едилир. О, Бөјүк Чобан кими 23-ҹү, әзәмәтли Падшаһ кими исә 24-ҹү мәзмурда тәсвир едилир.
Мүгәддәс Китаб суалларына ҹаваблар:
2:1, 2 — Милләтләрин дүшүндүјү «бош шејләр» нәдир? «Бош шејләр» дедикдә бәшәри дөвләтләрин һакимијјәти әлдән вермәмәк үчүн чәкдикләри нараһатчылыг нәзәрдә тутулур. Нәјә ҝөрә бу ‘бош шеј’ адланыр? Чүнки онларын нијјәти пуча чыхаҹаг. Доғруданмы үммәтләр ‘Рәббә вә Онун мәсһ етдијинә гаршы бирләшмәклә’ уғур газанаҹагларыны дүшүнүрләр?
2:7 — Сөһбәт Рәббин һансы фәрманындан ҝедир? Фәрман — Јеһова Аллаһын севимли Оғлу Иса Мәсиһлә Падшаһлыг һаггында бағладығы әһддир (Лука 22:28, 29).
2:12, (КМ) — Милләтләрин һөкмдарлары һансы мә’нада ‘Оғулу өпмәлидирләр’? Гәдимдә достлар өз сәдагәтләрини өпүшлә ифадә едирдиләр. Һәмчинин гонаглары да өпүшлә саламлајырдылар. Дүнјанын һөкмдарлары ‘Оғулу өпүн’ әмринә табе олуб, ону Хиласкар Падшаһ кими саламламалы, гәбул етмәлидирләр.
3:ҝириш сөзләр — Бә’зи мәзмурларын әввәлиндә јазылан башлыг вә ја ҝириш сөзләр һансы ролу ојнајыр? Башлыгда адәтән јазычынын ады вә мәзмурун һансы шәраитдә јазылдығы һагда мә’лумат верилир. 3-ҹү мәзмур буна бир мисалдыр. Ҝириш сөзләр, һәмчинин нәғмәнин һансы мусиги аләти үчүн јазылдығыны билдирир (мәзмур 4 вә 5) вә мусигичиләрә ону неҹә ифа етмәләри барәдә ҝөстәришләр верир (мәзмур 6).
3:2 — «Села» нәдир? Елә һесаб олунур ки, бу сөз соло вә ја хор охунанда, һәмчинин мусиги аләтләри чалынанда дүшүнмәк үчүн едилән паузаны билдирир. Сонунҹу фикри даһа да вурғуламаг үчүн паузадан истифадә олунурду. Мәзмурлары уҹадан охујаркән «села» сөзүнү охумаға еһтијаҹ јохдур.
11:3 — Бу ајәдә сөһбәт һансы тәмәлләрин дағыдылмасындан ҝедир? Инсан ҹәмијјәти ашағыдакы тәмәлләр үзәриндә дајаныб: ганун, интизам вә әдаләт мәһкәмәси. Бүтүн бунлар низамсыз һалда оланда ҹәмијјәтдә гатма-гарышыглыг јараныр, һагг-әдаләт јеринә әдаләтсизлик һөкм сүрүр. Белә шәраитдә «салеһләр» Аллаһа бүтүн үрәкләри илә ҝүвәнмәлидирләр (Мәзмур 11:4-7).
21:3 — ‘Саф гызылдан таҹ’ нәји билдирир? Мәзмурда таҹын һәгиги вә ја символик олмасы һагда һеч нә дејилмир. О, Давудун чохсајлы гәләбәләринә ҝөрә газандығы иззәти тәмсил едә биләрди. Һәр неҹә олса да, бу ајә Исанын 1914-ҹү илдә Јеһовадан алдығы падшаһлыг таҹына ишарә едән бир пејғәмбәрлик иди. Таҹын гызылдан олмасы Исанын һакимијјәтинин ән мүкәммәл һакимијјәт олдуғуну билдирир.
22:1, 2 — Давуд нә үчүн Јеһованын ону тәрк етдијини дүшүнүрдү? Дүшмәнләри Давуду о гәдәр сыхышдырырдылар ки, ‘көксүндәки үрәји санки мум кими әријирди’ (Мәзмур 22:14). Ола биләр, она елә ҝәлирди ки, Јеһова ону тәрк едиб. Дирәкдән асылан Иса да ејни һиссләри кечирирди (Матта 27:46). Давудун сөзләри чыхылмаз вәзијјәтә дүшмүш инсанын нормал реаксијасыны әкс етдирир. Мәзмур 22:16-21 ајәләриндә јазылмыш дуадан ҝөрүнүр ки, Давуд Аллаһа инамыны итирмәмишди.
Бизим үчүн ибрәт дәрсләри:
1:1. Јеһованы севмәјәнләрлә сых достлуг әлагәләри гурмагдан өзүмүзү ҝөзләмәлијик (1 Коринфлиләрә 15:33).
1:2. Чалышаг, елә ҝүн олмасын ки, руһани шејләр һаггында дүшүнмәјәк (Матта 4:4).
4:4. Әсәбиләшәндә вә ја аҹыглы оланда, ән јахшысы дилимизи сахламагдыр ки, сонрадан дедијимиз сөзләр үчүн пешманчылыг чәкмәјәк (Ефеслиләрә 4:26).
4:5. Үрәјин нијјәтләри дүз оланда, давраныш Јеһованын тәләбләринә ујғун ҝәләндә, ҝәтирилән руһани гурбанлары «салеһлик гурбанлары» адландырмаг олар.
6:5. Јашамаг үчүн бундан ҝөзәл сәбәб ола биләрми? (Мәзмур 115:17).
9:12, (КМ). Јеһова Аллаһ гатили ҹәзаландырмаг үчүн ‘төкүлмүш ганы арашдырыр’. О, ‘мәзлумларын фәрјадыны унутмур’.
15:2, 3; 24:3-5. Јеһова Аллаһын хидмәтчиләри јалныз һәгигәти сөјләмәли, јалан андлардан, бөһтан вә деди-годулардан узаг дурмалыдырлар.
15:4. Әҝәр вердијимиз вә’д Мүгәддәс Китаб принсипләринә зидд ҝетмирсә, нә гәдәр чәтин олса да, әлимиздән ҝәләни етмәлијик ки, сөзүмүзүн үстүндә дуруб ону јеринә јетирәк.
15:5. Јеһованын хидмәтчиси пулдан пис нијјәтлә истифадә етмәкдән өзүнү ҝөзләмәлидир
17:14, 15, (КМ). Бу дүнјанын адамлары бүтүн һәјатларыны фираван јашамаға, өвладларыны ајаға галдырмаға вә онлара мирас јығмаға һәср едирләр. Давудун исә һәјатда әсас гајғысы Аллаһын ‘үзүнә бахмаг’, јә’ни лүтфүнә саһиб олмаг үчүн, јахшы ад газанмаг иди. «Ојананда», јә’ни Јеһованын шәхсән она вердији вә’дләрини вә мүдафиәсини дүшүнәндә, Давуд Јеһованы ‘ҝөрмәклә дојурду’, јә’ни Аллаһын онунла олдуғуна севинирди. Давуд кими, биз дә үрәјимизи руһани хәзинәләрә бағламалы дејиликми?
19:1-6. Данышыб-дүшүнә билмәјән хилгәт Јеһованы иззәтләндирирсә, ҝөрүн онда һәм даныша, һәм дүшүнә, һәм дә ибадәт едә билән бизләр Јеһованы нә гәдәр иззәтләндирмәлијик! (Вәһј 4:11).
19:7-11. Јеһованын гајда-ганунларынын бизә неҹә дә бөјүк фајдасы вар!
19:12, 13. Сәһвләр вә өзүндән разы һәрәкәтләр ҝүнаһдыр.
19:14. Јалныз әмәлләримизә дејил, сөз вә дүшүнҹәләримизә дә фикир вермәлијик.
«[«Нөгсансызлығыма ҝөрә», ЈД] мәндән мөһкәм јапышдын»
Бу топлуја дахил олан мәзмурларда Давуд Јеһованын гаршысында нөгсансызлығыны горумағы чох истәдијини вә бунун үчүн нә гәдәр сә’ј ҝөстәрдији һагда охујур: «Мән исә... [«нөгсансызлығымда», ЈД] ҝәзирәм» (Мәзмур 26:11). Ҝүнаһларына ҝөрә әфв олунмаг үчүн дуа едәркән о дејирди: «Е’тираф етмәјәндә бүтүн ҝүн налә чәкмәкдән сүмүкләрим тагәтдән дүшдү» (Мәзмур 32:3). Јеһова Аллаһа садиг оланлара Давуд бу сөзләри үнванлајыр: «Рәббин ҝөзү салеһләрин үзәриндәдир, гулаглары онларын фәрјадларына ачыгдыр» (Мәзмур 34:15).
37-ҹи мәзмурдакы мәсләһәтләрин исраиллиләрә чох фајдасы олмушду. Бу системин ‘ахыр ҝүнләриндә’ јашајан мүасир мәсиһчиләр үчүн дә һәмин мәсләһәтләрин фајдасы чохдур (2 Тимотејә 3:1-5). Иса Мәсиһ һагда пејғәмбәрлик едән Мәзмур 40:7, 8 ајәләриндә јазылыб: «Будур, ҝәлмишәм, Сәнин тумарында мәндән јазылыб. Еј Аллаһым, Сәнин истәјинә әмәл етмәк мәнә зөвг верир, ганунун гәлбимдәдир». Биринҹи топлуја дахил олан сонунҹу мәзмур, Бат-Шева илә ҝүнаһындан сонракы ағыр илләрдә Давудун Јеһовадан көмәк диләмәси һаггындадыр. Давуд охујур: «[«Нөгсансызлығыма ҝөрә», ЈД] мәндән мөһкәм јапышдын» (Мәзмур 41:12).
Мүгәддәс Китаб суалларына ҹаваблар:
26:6 — Давуд кими биз дә, мәҹази дилдә десәк, Јеһованын гурбанҝаһынын башына неҹә долана биләрик? Гурбанҝаһ Јеһованын, бәшәријјәти ҝүнаһдан тәмизләмәк үчүн Иса Мәсиһин өдәдији фидијә гурбанлығыны мәмнунијјәтлә гәбул етмәсинин рәмзидир (Ибраниләрә 8:5; 10:5-10). Бу гурбанлыға иман ҝәтирмәклә Јеһованын гурбанҝаһынын башына доланмыш олуруг.
29:3-9 — Јеһованын сәсинин инсаны ләрзәјә салан туфана бәнзәдилмәси нәји ифадә едир? Јеһованын дәһшәт доғуран ҝүҹүнү!
31:23 — Тәкәббүрлү инсан һансы мә’нада лајиг олдуғуну алыр? ‘Лајиг олдуғуну алмаг’ ҹәза алмаг демәкдир. Салеһ инсан билмәдән етдији сәһвинә ҝөрә ҹәзаны Јеһовадан өјүд-нәсиһәт формасында алыр. Сәһв јолдан дөнмәјән тәкәббүрлү инсан исә ‘лајиг олдуғуну’, јә’ни ҹидди ҹәзаны артыгламасы илә алыр (Сүлејманын мәсәлләри 11:31; 1 Петер 4:18).
33:6, (КМ) — Јеһованын ‘ағзынын нәфәси’ ифадәси нә демәкдир? Нәфәс Аллаһын фәал гүввәсинә вә ја мүгәддәс руһуна ишарәдир. Физики сәманы јаратмаг үчүн Аллаһ бу гүввәдән истифадә етмишдир (Јарадылыш 1:1, 2). Гүввәтлә үфүрүлән нәфәс тәк, Аллаһ Өз мүгәддәс руһуну мүәјјән ишләри ҝөрмәк үчүн узаг мәсафәјә ҝөндәрә биләр.
35:19 — Давудун ‘гојма мәнә наһагдан нифрәт едәнләр бир-биринә ҝөз вурсун’ хаһиши нә демәкдир? Дүшмәнләрин бир-биринә ҝөз вурмасы, Давуда гаршы гурдуглары мәкрли планларынын һәјата кечмәсиндән ләззәт алмаларына ишарәдир. Давуд Аллаһдан хаһиш едирди ки, бу баш вермәсин.
Бизим үчүн ибрәт дәрсләри:
26:4. Бизим тәрәфимиздән мүдрик һәрәкәт оларды ки, интернет сөһбәт отагларында өз кимлијини ҝизләдәнләрлә, мәктәбдә, јахуд да иш јериндә јаландан бизим достумуз олдугларыны дејәнләрлә, үздән сәмими ҝөрүнән дөнүкләрлә вә икили һәјат тәрзи сүрәнләрлә јахын әлагә гурмајаг.
26:7, 12; 35:18; 40:9. Мәсиһчи јығынҹаг ҝөрүшләриндә Јеһова Аллаһа һәмд етмәлијик.
26:8; 27:4. Мәсиһчи ҝөрүшләринә ҝәлмәји севирикми?
26:11. Нөгсансызлыг јолунда јеримәкдә там гәтијјәтли олдуғуну билдирән Давуд, гуртулушу, јә’ни сатын алынмасы үчүн дә Аллаһа дуа едирди. Гејри-камиллијә бахмајараг, һәр бир инсан Аллаһ гаршысында нөгсансызлығыны горуја биләр.
29:10. «Дашан сулар» үзәриндә отуран Јеһова Аллаһ Өз ҝүҹүнү мүкәммәл шәкилдә идарә едир.
30:5. Јеһова Аллаһын башлыҹа кејфијјәти гәзәб јох, мәһәббәтдир.
32:9. Јеһова Аллаһ истәмир ки, биз ҹилов вә гамчы илә идарә олунан гатыра вә ја узунгулаға бәнзәјәк. Әксинә, истәјир ки, ирадәсини дәрк едәрәк Она табе олаг.
33:17-19. Нә гәдәр гүдрәтли олса да, инсан тәрәфиндән јарадылмыш һеч бир систем бәшәријјәти хилас едә билмәз. Бизим үмидимиз Јеһоваја вә Онун Падшаһлығына олмалыдыр.
34:10. Бу ајә Падшаһлығын марагларыны һәјатда биринҹи јерә гојанлар үчүн ҝүҹ мәнбәјидир.
39:1, 2. Пис нијјәтли адам һәмиманлыларымыза зәрәр јетирмәк үчүн биздән мә’лумат алмаг истәсә, ‘дилимизи јүјәнләјиб динмәмәк’ һәр ҹәһәтдән мүдрик һәрәкәт олар.
40:1, 2. Јеһоваја үмид етмәјимиз руһ дүшкүнлүјү илә мүбаризәдә бизә ҝүҹ верәҹәк, ‘чамырлы гујудан, лилли батаглыгдан чыхмағымыза’ көмәк едәҹәк.
40:5, 12. Әҝәр хејир-дуаларын башымыза ҝәлән бәлалардан, шәхси зәифликләримиздән гат-гат артыг, әслиндә сајсыз-һесабсыз олдуғуну унутмуругса, бизи һеч нә әзә билмәјәҹәк.
‘Алгыш олсун Рәббә’
Мәзмурларын биринҹи топлусуна дахил олан 41 һәмд нәғмәси инсаны неҹә дә руһландырыр, она нә гәдәр тәсәлли верир! Ола биләр, сиз сынагларла гаршылашырсыныз вә ја виҹдан әзабы чәкирсиниз. Инанын, Аллаһын гүдрәтли Кәламынын бир һиссәси олан «Зәбур» китабы сизи мөһкәмләндирмәјә вә руһландырмаға гадирдир (Ибраниләрә 4:12). Бу мәзмурлар һәјат үчүн е’тибарлы рәһбәрлик мәнбәјидир. Онлары охудугҹа әмин олуруг ки, дүшдүјүмүз чәтинликләрә бахмајараг, Јеһова бизи һеч вахт тәрк етмәјәҹәк.
Мәзмурларын биринҹи топлусу бу сөзләрлә битир: «Алгыш олсун Исраилин Аллаһы Рәббә әзәлдән сонсуза гәдәр! Амин! Амин!» (Мәзмур 41:13). Бу мәзмурларын үзәриндә дәриндән дүшүндүкдән сонра үрәјимиздә Јеһоваја даһа чох һәмд етмәк арзусу јаранмадымы?
[Һашијә]
a 2-ҹи мәзмурда јазылмыш пејғәмбәрликләр биринҹи дәфә Давудун ҝүнләриндә јеринә јетмишди.
[9-ҹу сәһифәдәки шәрһ]
Данышыб-дүшүнә билмәјән хилгәт Јеһованы иззәтләндирирсә, онда биз Јеһованы нә гәдәр иззәтләндирмәлијик!
[7-ҹи сәһифәдәки шәкил]
Биринҹи топлуја дахил олан 41 мәзмурдан чохуну Давуд јазмышдыр.
[8-ҹи сәһифәдәки шәкил]
Јеһова Аллаһын һансы мәзмурда Даһи Чобан кими тәсвир едилдијини билирсинизми?
[10-ҹу сәһифәдәки шәкил]
Чалышын, елә ҝүн олмасын ки, руһани шејләр һаггында дүшүнмәјәсиниз.
[Иҹазә илә]
Stars: Courtesy United States Naval Observatory
[Иҹазә илә]
Stars, pages 18 and 19: Courtesy United States Naval Observatory
[Иҹазә илә]
Stars: Courtesy United States Naval Observatory