Јеһованын Кәламы ҹанлыдыр
«Зәбур» китабынын үчүнҹү вә дөрдүнҹү һиссәләриндән диггәтәлајиг фикирләр
АЛЛАҺА дуасында мәзмурчу сорушур: «Мәһәббәтин мәзардамы, сәдагәтин Һәлак јериндәми бәјан олунаҹаг?» (Мәзмур 88:11). Ҹаваб ајдындыр: јох. Һәјатымызы итирсәк, Аллаһа һәмд едә билмәрик. Јеһоваја һәмд етмәк — јашамаг үчүн әсаслы сәбәбдир вә бизә һәјат бәхш етдији үчүн Она һәмд етмәлијик.
«Зәбур» китабынын үчүнҹү вә дөрдүнҹү һиссәләриндә — 73-106-ҹы мәзмурларда Јарадана вә Онун адына һәмд етмәк үчүн чохлу сәбәбләр ҝәтирилир. Бу мәзмурларын үзәриндә дүшүндүкдә ‘Аллаһын кәламына’ ҝөрә миннәтдарлығымыз артыр вә Она даһа да чох вә даһа јахшы мәдһләр сөјләмәјә тәшвиг олунуруг (Ибраниләрә 4:12). Ҝәлин «Зәбур» китабынын үчүнҹү һиссәсини диггәтлә арашдыраг.
«МӘНИМ ҮЧҮН АЛЛАҺА ЈАХЫНЛАШМАГ ЈАХШЫДЫР»
Үчүнҹү һиссәнин илк 11 мәзмуруну ја Асәфин өзү, ја да аилә үзвләриндән кимсә јазмышдыр. 73-ҹү мәзмурда нәјин сајәсиндә Асәфин нөгтеји-нәзәринин дәјишмәси вә јанлыш јола дүшмәмәси изаһ олунур. О, дүзҝүн нәтиҹәјә ҝәлир: «Мәним үчүн Аллаһа јахынлашмаг јахшыдыр» (Мәзмур 73:28). Мәзмурчу 74-ҹү мәзмурда Јерусәлимин дағыдылмасына ҝөрә аһ-зар едир. 75, 76 вә 77-ҹи мәзмурларда Јеһова әдаләтлә һөкм едән, һәлимләри гуртаран вә дуалары ешидән бир шәхс кими тәсвир олунур. 78-ҹи мәзмурда Муса пејғәмбәрин ҝүнләриндән Давудун ҝүнләринәҹән исраиллиләрин тарихи нәзәрдән кечирилир. 79-ҹу мәзмурда мә’бәдин дағылмасына ҝөрә кәдәр ифадә олунур. Нөвбәти мәзмур Аллаһын халгынын бәрпа олунмасы һагда дуадыр. 81-ҹи мәзмур Јеһоваја табе олмаға чағырышдыр. 82-ҹи вә 83-ҹү мәзмурларда сатгын һакимләрә вә дүшмәнләринә әдаләтли һөкм чыхармасы үчүн Аллаһа јалварышдыр.
Гораһ оғуллары охујурлар: «Гәлбим һәјәтинин һәсрәтиндәдир» (Мәзмур 84:2). 85-ҹи мәзмурда мәзмурчу Бабил әсарәтиндән гајыданлара хејир-дуа вермәји Аллаһдан хаһиш едир. Орада руһани хејир-дуаларын ҹисмани хејир-дуалардан нә гәдәр дәјәрли олдуғу гејд олунур. 86-ҹы мәзмурда Давуд Аллаһдан ону горумасыны вә она јол ҝөстәрмәсини хаһиш едир. Сион вә орада доғуланлар барәдә маһны олан 87-ҹи мәзмурдан сонра 88-ҹи мәзмурда Јеһоваја дуа гәләмә алыныб. Давудла бағланан әһддә ифадә олунан Јеһованын севҝи долу хејирхаһлығы 89-ҹу мәзмурда гејд олунур. Бу мәзмуру, Сүлејманын ҝүнләриндәки дөрд мүдрикдән бири олдуғу ҝүман едилән Етан тәртиб етмишдир (1 Падшаһлар 4:31).
Мүгәддәс Китаб суалларына ҹаваблар:
73:9 — Писләр «ағызларыны ҝөјләрин әлејһинә ачырлар, дилләринин сөзләри дүнјаны ҝәзиб-долашыр» нә демәкдир? Писләр нә јердә, нә дә ҝөјдә оланлардан һеч кимә һөрмәт ҝөстәрмәдикләри үчүн ағызлары илә Аллаһа күфр етмәкдән, дилләри илә инсанлара бөһтан атмагдан чәкинмирләр.
74:13, 14 — Јеһова ‘дәниз әждаһаларынын башларыны вә Ливјатанын башларыны’ нә вахт әзди? «Мисир падшаһы фир’он» «өз чајлары ичиндә јатан бөјүк әждаһа» адланыр (Језекел 29:3). Ливјатан, еһтимал ки, фир’онун ҝүҹлү дөјүшчүләрини тәмсил едир. Онларын башларынын әзилмәси, ола билсин ки, Јеһова исраиллиләри Мисир көләлијиндән азад едәркән, фир’он вә ордусунун мәғлубијјәтә уғрадығына ишарә едир.
75:4, 5, 10 — «Бујнуз» нәји тәмсил едир? Һејванларын бујнузу ҝүҹлү силаһдыр. Беләликлә, «бујнуз» мәҹази мә’нада һакимијјәт вә ја гүввә демәкдир. Јеһова Өз халгынын ‘бујнузуну’ дикәлтмәклә ону уҹалдыр, ‘пис адамларын бујнузларыны’ исә ‘гырыр’. Биз ‘бујнуз чыхартмагдан’, јә’ни гүрурлу вә тәкәббүрлү олмагдан гачынмалыјыг. Јүксәлдәнин Јеһова олдуғу үчүн, јығынҹагдакы һәр бир иши Аллаһын тапшырығы кими гәбул етмәлијик (Мәзмур 75:7).
76:10 (КМ) — ‘Инсанын гәзәби’ Јеһоваја неҹә һәмд едәр? Аллаһ Онун хидмәтчиләри олдуғумуз үчүн инсанларын өз гәзәбини үзәримизә төкмәсинә изин верәндә, бу, јахшы нәтиҹә верә биләр. Таб ҝәтирдијимиз чәтинликләр бизи мүәјјән шејләрә өјрәдир. Јеһова изтираблара, онлардан нә исә өјрәнә биләҹәјимиз гәдәр јол верир (1 Петер 5:10). ‘Инсан гәзәбинин артығыны сән бағлајырсан’. Бәс әҝәр әзабларымыз өлүмлә нәтиҹәләнәрсә, онда неҹә? Бу да Аллаһа иззәт ҝәтирәр, чүнки бизим Аллаһа садиглијимизи ҝөрәнләр Ону иззәтләндирмәјә башлаја биләрләр.
78:24, 25 — Нәјә ҝөрә манна ‘ҝөјләрин тахылы’ вә ‘мәләкләрин чөрәји’ адланмышдыр? Бу ифадәләрдән һеч бири маннанын мәләкләрин јемәји олдуғуну билдирмир. О ҝөјдән ҝәлдији үчүн ‘ҝөјләрин тахылы’ адланыр (Мәзмур 105:40). Мәләкләр ҝөјдә јашадыглары үчүн ‘мәләкләрин чөрәји’ ифадәси садәҹә она ишарә едә биләр ки, мәскәни ҝөјләрдә олан Аллаһ ону верирди (Мәзмур 11:4). Еһтимал ки, Јеһова маннаны исраиллиләрә мәләкләр васитәсилә верирди.
82:1, 6 — Кимләр ‘аллаһлар’ вә ‘Һагг-Таала өвладлары’ адландырылырлар? Ифадәләрин һәр икиси Исраилдәки һакимләрә аиддир. Бу мүнасибдир, чүнки онлар Аллаһын нүмајәндәләри вә тәмсилчиләри кими хидмәт едирдиләр (Јәһја 10:33-36).
83:2 — «Әлејһинә галхыр» ифадәси һансы мә’наны дашыјыр? Бу һәрәкәт мүгавимәт ҝөстәрмәк, дөјүшмәк вә сыхышдырмаг мәгсәдилә ҝүҹ тәтбиг етмәјә вә һәрәкәтә һазыр олмаға ишарә едир.
Бизим үчүн ибрәт дәрсләри:
73:2-5, 18-20, 25, 28. Биз писләрин фираванлығына һәсәд апармамалы вә онларын һәјат тәрзини мәнимсәмәмәлијик. Онлар ‘сүрүшкән јердә’ дурурлар. Онларын сону өлүмдүр. Үстәлик, нә гәдәр ки, һакимијјәт гејри-камил инсанларын әлиндәдир, бизим пислијин көкүнү кәсмәк сә’јләримиз боша чыхаҹаг. Әҝәр Асәф кими биз дә ‘Аллаһа јахынлашараг’ вә Онунла достлугдан севинҹ әлдә едәрәк пислијә гаршы дуруругса, мүдрик һәрәкәт едирик.
73:3, 6, 8, 27. Мәғрурлуг, тәкәббүрлүк, башгаларына истеһза етмәк бә’зән сәрфәли ҝөрүнсә белә, биз бу кими хүсусијјәтләрдән узаг олмалыјыг.
73:15-17. Әҝәр һансыса фикирләр бизә раһатлыг вермирсә, өз нараһатчылығымызы һамы илә бөлүшмәли дејилик. Бизим ‘белә данышмағымыз’, садәҹә башгаларыны руһдан салаҹаг. Бизи нараһат едән шејләри сакитҹә ҝөтүр-гој етмәли вә Аллаһын халгы илә үнсијјәт етмәклә өз суалларымыза ҹаваб ахтармалыјыг (Сүлејманын мәсәлләри 18:1).
73:21-24. Писләрин заһирән әмин-аманлыг ичиндә јашадыглары үчүн гәзәбләнмәк һисс вә инстинктлә һәрәкәт едән шүурсуз һејванларын һәрәкәтинә бәнзәјир. Биз исә Јеһованын ‘сағ әлимиздән тутдуғуна’ вә көмәк етдијинә там әмин олараг Онун рәһбәрлијинә риајәт етмәлијик. Бундан әлавә, Јеһова бизи ‘шәрәфә чатдыраҹаг’, јә’ни Онун досту олмағымыза иҹазә верәҹәкдир.
77:6. Руһани һәгигәтләрә сәмими мараг ҝөстәрир вә онлары ахтарырыгса, шәхси өјрәнмәјә вә дүшүнмәјә вахт ајырмаг лазымдыр. Буна ҝөрә дә, бә’зән тәнһа јерә чәкилмәк ваҹибдир.
79:9. Јеһова бизим дуаларымызы, хүсусилә дә Онун адынын мүгәддәс тутулмасы илә бағлы олан дуалары динләјир.
81:13, 16. Јеһованын сәсини динләјәнләр вә Онун јолу илә ҝедәнләр бол-бол хејир-дуалар алаҹаглар (Сүлејманын мәсәлләри 10:22).
82:2, 5. Әдаләтсизлик ‘јерин тәмәлләрини сарсыдыр’ вә ҹәмијјәтин сабитлијини позур.
84:1-4, 10-12. Мәзмурчулар Јеһоваја ибадәт јерини јүксәк гијмәтләндирир вә хидмәтдәки имтијазларындан мәмнунлуг дујурдулар. Бу, бизим үчүн неҹә дә ҝөзәл нүмунәдир!
86:5. Биз Јеһованын бағышламаға һазыр олдуғуна ҝөрә Она неҹә дә миннәтдар олмалыјыг! Аллаһ ҝүнаһкарын һәрәкәтиндә төвбәјә ишарә едән вә бағышламаға әсас верән әламәт ахтарыр.
87:5, 6. Јерүзү Ҹәннәтдә јашајанлар ҝөјләр һәјатына дирилдиләнләрин адларыны биләҹәкләрми? Ајәдән ҝөрүндүјү кими, чох ҝүман ки, бу мүмкүндүр.
88:13, 14. Һәрдән дуаларымыза дәрһал ҹаваб алмырыг. Бә’зи һалларда, ҝөрүнүр, Јеһова бизим Она садиглијимизин сәмимилијини сүбут етмәјимизи истәјир.
«ОНА ШҮКҮР ЕДИН, ИСМИНӘ АЛГЫШ СӨЈЛӘЈИН»
Ҝәлин «Зәбур» китабынын дөрдүнҹү һиссәсини нәзәрдән кечирәк. Бурада да Јеһованы мәдһ етмәјин сәбәбләри ҝәтирилир. Давуд 90-ҹы мәзмурда тез өтүб кечән инсан һәјатыны ‘әсрләрин Һөкмдарынын’ өмрү илә мүгајисә едир (1 Тимотејә 1:17). Мәзмур 91:2 ајәсиндә Муса Јеһованы өз сығынаҹағы, галасы — тәһлүкәсизлик Мәнбәји адландырыр. Нөвбәти мәзмурларда Аллаһын ҝөзәл кејфијјәтләри, јүксәк фикирләри вә мө’ҹүзәли ишләри мәдһ едилир. Мәзмурлардан үчү «Рәбб һөкмранлыг едир» сөзләри илә башлајыр (Мәзмур 93:1; 97:1; 99:1). Мәзмурчу Јеһованы Јараданымыз адландырараг, бизи ‘Она шүкүр етмәјә вә исминә алгыш сөјләмәјә’ тәшвиг едир (Мәзмур 100:4).
Аллаһ горхусу олан һөкмдар ишләри неҹә идарә етмәлидир? Давудун јаздығы 101-ҹи мәзмурда буна ҹаваб верилир. Нөвбәти мәзмурда дејилир ки, Аллаһ «јохсулларын дуасына гулаг асаҹаг, јалварышларына хор бахмајаҹаг» (Мәзмур 102:17). 103-ҹү мәзмурда Јеһованын севҝи долу хејирхаһлығына вә мәрһәмәтинә диггәт јетирилир. Аллаһын чохсајлы мө’ҹүзәли ишләринә ишарә едәрәк мәзмурчу уҹадан дејир: «Ја Рәбб, әмәлләрин чохдур! Һәр бирини мүдрикликлә етмисән» (Мәзмур 104:24). «Зәбур» китабынын дөрдүнҹү һиссәсинин сонунҹу ики мәдһ нәғмәсиндә Јеһоваја мө’ҹүзәли ишләринә ҝөрә шүкүр едилир (Мәзмур 105:2, 5; 106:7, 22).
Мүгәддәс Китаб суалларына ҹаваблар:
91:1, 2 — ‘Һагг-Тааланын пәнаһында јашамаг’ нә демәкдир? ‘Һагг-Тааланын пәнаһы’ — руһани зәрәрдән мүдафиә верән бир вәзијјәтдир, јә’ни руһани ҹәннәтдир. Бу јер Аллаһа ҝүвәнмәјәнләрә мә’лум дејил. Јеһованы өз ‘сығынаҹағымыз вә галамыз’ етдијимиз, Ону Каинатын Һөкмдары кими иззәтләндирдијимиз вә Падшаһлыг һаггындакы хош хәбәри тәблиғ етдијимиз һалда Онун пәнаһында јашамыш олуруг. Биз өзүмүзү тәһлүкәсизликдә һисс едирик, чүнки әминик ки, Јеһова бизә көмәк етмәјә һәмишә һазырдыр (Мәзмур 90:1).
92:12 — Нәјә ҝөрә демәк олар ки, «салеһләр хурма ағаҹытәк чичәкләнәҹәк»? Хурма ағаҹы олдугҹа чох бар ҝәтирән ағаҹдыр. Салеһин хурма ағаҹына бәнзәмәси, Јеһованын ону бәјәндијини вә һәмин адамын јахшы ишләри дә дахил олмагла «јахшы мејвә» вердијини ҝөстәрир (Матта 7:17-20).
Бизим үчүн ибрәт дәрсләри:
90:7, 8, 13, 14. Ҝүнаһ һәмишә һәгиги Аллаһла мүнасибәтләрә хәләл ҝәтирир. ‘Ҝизли ҝүнаһларымызы’ Ондан ҝизләтмәк мүмкүн дејил. Амма әҝәр сәмими гәлбдән төвбә едиб, ҝүнаһлы јолумузу тәрк едәриксә, јенидән Јеһованын хејирхаһлығыны газанаҹағыг вә О ‘бизә дојунҹа мәһәббәт ҝөстәрәҹәк’.
90:10, 12. Һәјат гыса олдуғундан биз ‘ҝүнләримизи сајмалыјыг’ (КМ). Неҹә? ‘Гәлбимизи һикмәтли’ етмәклә, јә’ни ҝүнләримизи әбәс јерә дејил, Јеһованы разы салмаг мәгсәдилә мүдрик јашамагла. Бунун үчүн руһани ишләрә үстүнлүк вермәк вә вахтымыздан мүдрикликлә истифадә етмәк ҝәрәкдир (Ефеслиләрә 5:15, 16; Филипилиләрә 1:10).
90:17. Јеһованын ‘әлләримизин зәһмәтини уғурлу етмәси’ вә хидмәтдә ҝөстәрдијимиз сә’јләрә хејир-дуа вермәси үчүн дуа етмәк мүнасибдир.
92:14, 15. Аллаһын Кәламыны сә’јлә арашдырараг вә Јеһованын халгы илә мүнтәзәм үнсијјәт едәрәк гоҹалар «тәравәтли, јамјашыл», јә’ни руһән гүввәтли галырлар, онлар, һәмчинин јығынҹаг үчүн чох дәјәрлидирләр.
94:19. Дахили нараһатчылыг мүхтәлиф сәбәбләр үзүндән олур. Аллаһын Кәламындакы ‘тәсәллиләр’ һагда охумаг вә үзәриндә дүшүнмәк бизә гәлб раһатлығы ҝәтирәҹәк.
95:7, 8. Мүгәддәс Китаб өјүдләрини динләмәклә, онлара диггәт јетирмәклә вә һәвәслә риајәт етмәклә, үрәјимизин инадҹыл олмасына јол вермәјәҹәјик (Ибраниләрә 3:7, 8).
106:36, 37. Бу ајәләр бүтпәрәстликлә ҹинләрә гурбан ҝәтирмәк арасында бағлылыг олдуғуну ҝөстәрир. Бу она ишарә едир ки, бүтләрә вә ја тәсвирләрә ситајиш едән инсан ҹинләрин тә’сиринә дүшә биләр. Мүгәддәс Китаб бизи тәшвиг едир: «Өвладларым, өзүнүзү бүтләрдән горујун!» (1 Јәһја 5:21).
«Јаһа һәмд един!»
«Зәбур» китабынын дөрдүнҹү һиссәсинин сонунҹу үч нәғмәси «Рәббә [«Јаһа», ЈД] һәмд един!» сөзләри илә битир. Сонунҹу мәзмур исә бу сөзләрлә башлајыр (Мәзмур 104:35; 105:45; 106:1, 48). «Јаһа һәмд един!» ифадәсинә «Зәбур» китабынын дөрдүнҹү һиссәсиндә тез-тез раст ҝәлинир.
Әлбәттә, Јеһоваја һәмд етмәк үчүн бизим сәбәбләримиз чохдур. 73-106-ҹы мәзмурларын үзәриндә дүшүндүкдә үрәјимиз сәмави Атамыза гаршы миннәтдарлыг һисси илә долуб дашыр. Онун бизим үчүн етдикләри вә ҝәләҹәкдә едәҹәкләри үзәриндә дүшүнмәк, сәмими гәлбдән бизи ‘Јаһа һәмд етмәјә’ тәшвиг едир!
[20-ҹи сәһифәдәки шәкил]
Асәф кими, биз дә ‘Аллаһа јахынлашараг’ пислијә гаршы дура биләрик.
[21-ҹи сәһифәдәки шәкил]
Фир’он Гырмызы дәниз јахынлығында мәғлубијјәтә уғрады.
[21-ҹи сәһифәдәки шәкил]
Маннанын нәјә ҝөрә ‘мәләкләрин чөрәји’ адландығыны билирсинизми?
[23-ҹү сәһифәдәки шәкил]
Дахили нараһатчылыгларын өһдәсиндән ҝәлмәкдә бизә нә көмәк едәр?