Узаг дүшсәләр дә, унудулмајыблар

ҺӘВАРИ Павел мәсиһчиләрә нәсиһәт верирди: «Һамыја, хүсусән иманлылар аиләсинә јахшылыг едәк» (Галат. 6:10). Бу ҝүн биз дә Аллаһдан илһам алмыш бу мәсләһәтә әмәл едир вә һәмиманлыларымыза әлимиздән ҝәлдији гәдәр јахшылыг етмәјә чалышырыг. Мәсиһчи јығынҹағынын мәһәббәт долу диггәтинә еһтијаҹ дујан вә буна лајиг оланлар арасында гоҹалар евиндә јашајан әзиз јашлы баҹы-гардашларымыз да вар.

Дүздүр, бәзи јерләрдә гоҹа валидејнләрин гајғысына адәтән евдә галырлар. Анҹаг башга јерләрдә бир чох јашлылар әксәр һалларда гоҹалар евиндә јашамаға мәҹбур олурлар. Бәс гоҹалар евиндә јашајан јашлы мәсиһчиләрин вәзијјәти һагда нә демәк олар? Онлар һансы чәтинликләрлә үзләширләр? Әҝәр аилә үзвләри гајғыларына галмырса, онлар бу вәзијјәтин өһдәсиндән неҹә ҝәлә биләрләр? Мәсиһчи јығынҹағы онлара неҹә көмәк едә биләр? Бәс онлара мүнтәзәм олараг баш чәкмәјин бизә һансы фајдасы вар?

Гоҹалар евиндәки чәтинликләр

Гоҹалар евинә көчән јашлы мәсиһчиләр, ола биләр, танымадыглары башга јығынҹағын әразисинә дүшсүнләр. Белә олан һалда јени јығынҹағын үзвләри онлара тез-тез баш чәкмәји нәзәрдән гачыра биләрләр. Бундан башга, чох еһтимал ки, онлар гоҹалар евиндә мүхтәлиф дини етигадлары олан инсанларын әһатәсинә дүшәҹәкләр. Бу, јашлы һәмиманлыларымыз үчүн чәтинлик јарада биләр.

Мәсәлән, бәзи јерләрдә гоҹалар евиндә дини ҝөрүшләр тәшкил олунур. Бир санитар ишчиси дејир: «Ајдын даныша билмәјән бәзи јашлы Шаһидләри өзләринин фикрини өјрәнмәмиш әлил арабасында дини мәрасимләрә апармышлар». Бундан әлавә, гоҹаларын һәјатыны рәнҝарәнҝ етмәк үчүн оранын ишчиләри тез-тез ад ҝүнләри вә башга бајрамлар кечирирләр. Һәмчинин белә јерләрдә бәзән елә јемәкләр верирләр ки, Шаһидләрин виҹданы ону јемәјә јол вермир (Һәв. иш. 15:29). Биз бу јашлы баҹы-гардашларымыза мүнтәзәм олараг баш чәксәк, онлара белә чәтинликләрин өһдәсиндән ҝәлмәјә көмәк едә биләҹәјик.

Јығынҹағын көмәји

Еркән мәсиһчиләр аиләси олмајан јашлы адамын гајғысына галмаг мәсулијјәтинә ҹидди јанашырдылар (1 Тим. 5:9, 10). Буна бәнзәр тәрздә, бу ҝүн дә нәзарәтчиләр әмин олмалыдырлар ки, онларын јығынҹағынын әразисиндәки гоҹалар евиндә јашајан јашлы мәсиһчи унудулмајыбa. Ағсаггал кими хидмәт едән Роберт гејд едир: «Јахшы оларды ки, мәсиһчи ағсаггал шәхсән өзү гоҹалара баш чәкиб онларын шәраити илә јахындан мараглансын вә онларла бирликдә дуа етсин. Јығынҹаг чох шејдә онларын гајғысына гала биләр». Вахт ајырыб гоҹалара баш чәкмәклә биз еһтијаҹы оланлара көмәк етмәјин Јеһованын ҝөзүндә нә дәрәҹәдә ваҹиб олдуғуну баша дүшдүјүмүзү ҝөстәририк (Јаг. 1:27).

Лазым ҝәлдикдә, ағсаггаллар гоҹалар евиндәки баҹы-гардашлара көмәк ҝөстәрилмәси үчүн тәдбир ҝөрүрләр. Роберт јашлы баҹы-гардашларымыза һансы саһәдә көмәк едә биләҹәјимиз һагда дејир: «Әҝәр ҝәлә биләрләрсә, онлары ҝөрүшләрә ҝәлмәјә тәшвиг етмәлијик». Анҹаг Падшаһлыг Залына ҝәлмәјә ҝүҹү чатмајанлар үчүн ағсаггаллар башга тәдбирләр ҝөрә биләрләр. Остеоартрит хәстәлијиндән әзијјәт чәкән 80 јашларында олан Жаклин ҝөрүшләрә телефонла гулаг асыр. О дејир: «Програма бирбаша гулаг асмаг мәнә бөјүк фајда ҝәтирир. Нә олурса-олсун, мән јығынҹаг ҝөрүшләрини бурахмаг истәмәздим!»

Әҝәр јашлы мәсиһчи програма телефон васитәсилә гулаг аса билмирсә, ағсаггаллар јығынҹаг ҝөрүшләрини касетә вә ја дискә јаздыра биләрләр. Касет вә ја диски гоҹалар евиндәки һәмиманлыја чатдыран мәсиһчи фүрсәтдән истифадә едиб онунла руһландырыҹы сөһбәт едә биләр. Бир нәзарәтчи дејир: «Онлара јығынҹағын үзвләри һаггында данышанда, онлар өзләринин һәлә дә руһани аиләмизин бир үзвү олдугларыны һисс едирләр».

Үнсијјәтдә олун

Ајдындыр ки, бир чохлары гоҹалар евинә көчәндә ҝәрҝинлик кечирир вә чашгынлыг ичиндә олурлар. Нәтиҹәдә бәзиләри өзләринә гапылырлар. Анҹаг јашлы баҹы-гардашларымыз гоҹалар евинә көчәндән дәрһал сонра онлара баш чәксәк вә гајғыларына галдығымызы ҝөстәрсәк, онлара гәлб раһатлығы вә мүәјјән гәдәр севинҹ тапмаға көмәк едәҹәјик (Сүл. мәс. 17:22).

Јашлы баҹы вә ја гардашын әгли вә ешитмә габилијјәти зәифләјәндә, јахуд үнсијјәтә мане олан башга проблемләр јарананда, бәзиләри елә нәтиҹәјә ҝәлә биләрләр ки, онлара баш чәкмәјин фајдасы јохдур. Анҹаг үнсијјәт етмәк нә гәдәр чәтин олурса олсун, онлара мүнтәзәм олараг баш чәкмәјимиз һәмиманлыларымызы ‘һөрмәтдә габагладығымызы’ ҝөстәрир (Ром. 12:10). Әҝәр јахын заманларда баш верән һадисәләр гардашын јадындан чыхмаға башлајырса, биз ону тәшвиг едә биләрик ки, әввәлләр, һәтта ушаглыг илләриндә баш верән һадисәләри вә ја һәгигәтә неҹә ҝәлдијини данышсын. Әҝәр о, мүвафиг сөзләр тапмаға чәтинлик чәкәрсә, нә етмәк олар? Сәбирлә гулаг асын, мүнасиб оларса, ахтардығы сөзләрдән бир-икисини јадына салын вә ја фикирләрини гысаҹа тәкрар едиб ону сөһбәтинә давам етмәјә тәшвиг един. Әҝәр фикри гарышдығы, јахуд дили долашдығы үчүн ону баша дүшмәк чәтиндирсә, сәсинин тонундан нә демәк истәдијини баша дүшмәк олар.

Данышмаг мүмкүн олмајанда, башга үсуллардан истифадә етмәк олар. Пионер кими хидмәт едән Лоренс артыг даныша билмәјән Мадлен адлы 80 јашлы баҹымыза мүнтәзәм олараг баш чәкир. Лоренс онунла неҹә үнсијјәт етдијини изаһ едир: «Мадленлә бирликдә дуа едәндә әлиндән тутурам. О исә әлими јүнҝүлҹә сыхыр вә бу хош дәгигәләрә ҝөрә ҝөзләри илә миннәтдарлығыны билдирир». Јашлы достумузун әлиндән тутмаг вә ја сәмими гуҹагламаг онун үчүн бөјүк тәсәлли ола биләр.

Баш чәкмәјиниз ваҹибдир

Сизин јашлы адама мүнтәзәм баш чәкмәјиниз она даһа јахшы гуллуг едилмәсинә тәсир ҝөстәрә биләр. Тәхминән 20 илдир ки, гоҹалар евиндәки һәмиманлыларына баш чәкән Данјел дејир: «Гоҹалар евинин ишчиләри кимәсә мүнтәзәм олараг баш чәкилдијини ҝөрәндә она даһа јахшы гуллуг едирләр». Јухарыда ады чәкилән Роберт дејир: «Ишчиләр мүнтәзәм олараг баш чәкән адамын сөзүнү даһа чох ешидирләр. Һәрдәнбир баш чәкәнләрә исә ејни һөрмәти ҝөстәрмирләр». Чох вахт гоҹаларын аилә үзвләри ишчиләрә гаршы һәддән артыг тәләбкар олдуглары үчүн, онлар миннәтдарлыг сөзләрини чох гијмәтләндирирләр. Бундан башга, ишчиләрлә јахшы мүнасибәт јаратмаға чалышсаг, онлар јашлы Шаһидләрин етигадларына даһа һөрмәтлә јанашаҹаглар.

Асан ишләрдә көмәјимизи тәклиф етмәклә дә ишчиләрлә јахшы мүнасибәт гура биләрик. Бәзи јерләрдә пешәкар ишчиләр чатышмадығындан јашлылара кифајәт гәдәр јахшы гуллуг ҝөстәрилмир. Санитар ишчиси Ребека мәсләһәт верир: «Јемәк вахты ҝүнүн ән гызғын чағыдыр. Буна ҝөрә дә достларыныза баш чәкиб онлара јемәк јемәјә көмәк етмәк үчүн ән әлверишли вахтдыр». Биз ишчиләрдән онлара нәдә көмәк едә биләҹәјимизи сорушмаға чәкинмәмәлијик.

Биз ејни гоҹалар евинә мүнтәзәм олараг ҝәләндә, гоҹа баҹы вә ја гардашымызын нәјә еһтијаҹ дујдуғуну ҝөрәҹәк вә ишчиләрин иҹазәси илә онун еһтијаҹларыны өдәмәк үчүн тәшәббүсү өз үзәримизә ҝөтүрә биләҹәјик. Мәсәлән, онун отағыны доғмаларынын шәкилләри вә јахуд ушагларын чәкдикләри рәсмләрлә бәзәмәк олар. Биз һәмиманлымыз үчүн исти халат, јахуд бәзи шәхси ҝиҝијена әшјалары ҝәтирә биләрик. Оранын бағчасы варса, ону тәмиз һаваја чыхармаг олар. Јухарыда хатырлатдығымыз Лоренс дејир: «Мадлен һәр һәфтә мәним ҝәлишими ҝөзләјир. Өзүмлә ушаглары да ҝәтирәндә онун үзү ҝүлүр вә севинҹдән ҝөзләри парылдајыр». Бу ҹүр тәшәббүс гоҹалар евиндә јашајанлар үчүн бөјүк әһәмијјәт кәсб едир (Сүл. мәс. 3:27).

Гаршылыглы фајда

Гоҹалара мүнтәзәм олараг баш чәкмәк ‘мәһәббәтимизин һәгигилијини’ имтаһана чәкә биләр (2 Кор. 8:8). Һансы мәнада? Һәмиманлымызын ҝет-ҝедә тагәтдән дүшдүјүнү ҝөрмәк үрәјимизи ағрыда биләр. Лоренс етираф едир: «Илк вахтлар Мадленин вәзијјәти мәнә елә пис тәсир едирди ки, һәр дәфә она баш чәкәндән сонра ағлајырдым. Анҹаг баша дүшдүм ки, Аллаһа үрәкдән дуа етмәк горхуја үстүн ҝәлмәјә вә баш чәкдијим адамы даһа чох руһландырмаға көмәк едәр». Роберт артыг илләрдир ки, Паркинсон хәстәлијиндән (титрәјән ифлиҹ) әзијјәт чәкән Лари адлы гардаша баш чәкир. Роберт дејир: «Ларинин хәстәлији елә шиддәтләниб ки, артыг онун нә дедијини баша дүшә билмирәм. Анҹаг бир јердә дуа едәндә һисс едирәм ки, иманы вар».

Јашлы һәмиманлыларымыза баш чәкәндә тәкҹә онлар дејил, биз өзүмүз дә фајда әлдә едирик. Онларын мүхтәлиф дини етигады олан адамларын арасында јашамаларына бахмајараг, Јеһоваја бағлы галмаг гәтијјәтләри бизә иманда мөһкәм галмағы вә ҹәсарәтли олмағы өјрәдир. Ешитмә вә ҝөрмә габилијјәтләринин зәифләмәсинә бахмајараг, онларын руһани гиданы һәвәслә гәбул етмәләри бир даһа ҝөстәрир ки, «инсан јалныз чөрәклә јашамаз, лакин Аллаһын ағзындан чыхан һәр бир сөзлә јашар» (Мат. 4:4). Ушагларын ҝүлүшү вә ја бирҝә наһар етмәк кими садә шејләрдән севинҹ дујан јашлылар бизә өзүмүздә олан шејләрлә кифајәтләнмәји өјрәдир. Онларын руһани дәјәрләрә олан мәһәббәти өзүмүз үчүн һәјатда ваҹиб олан шејләри мүәјјән етмәјә көмәк едир.

Һәгигәтән дә, јашлылара ҝөстәрдијимиз гајғы сајәсиндә јығынҹағын бүтүн үзвләри фајда әлдә едир. Бу нә үчүн беләдир? Физики ҹәһәтдән зәиф оланлар гардашлыг мәһәббәтиндән даһа чох асылы олдуглары үчүн јығынҹағын даһа чох мәрһәмәт ҝөстәрмәсинә имкан јарадырлар. Буна ҝөрә һәр биримиз, һәтта узун чәксә белә, јашлыларын гајғысына галмаға бир-биримизә хидмәт етмәк имканы кими бахмалыјыг (1 Пет. 4:10, 11). Ағсаггаллар бу ишдә рәһбәрлији өз үзәрләринә ҝөтүрсәләр, јығынҹағын диҝәр үзвләри баша дүшәҹәкләр ки, мәсиһчи фәалијјәтинин бу саһәсинә башдансовду јанашмаг олмаз (Јез. 34:15, 16). Һәвәслә вә севәрәк јашлы һәмиманлыларымызын гајғысына галмагла онлары унудулмадыгларына әмин едирик!

[Һашијә]

[26-ҹы сәһифәдәки шәкилләр]

Сәмими дуаларымыз јашлы һәмиманлымызын гәлб раһатлығы тапмасына көмәк едә биләр

Мәһәббәтимизи ифадә етмәјимиз јашлы һәмиманлыларымызы мөһкәмләндирир

[28-ҹи сәһифәдәки јазы]

«Гоҹалар евинин ишчиләри кимәсә мүнтәзәм олараг баш чәкилдијини ҝөрәндә она даһа јахшы гуллуг едирләр»