Суаллар гутусу

◼ Јеһованын Шаһидинин һәр һансы дини тәшкилат тәрәфиндән идарә олунан хәстәханада мүалиҹә олунмасы вә ја гоҹалар евиндә јашамасы дүзҝүндүрмү?

Мүхтәлиф дини тәшкилатлар гыса вә узунмүддәтли тибби мүалиҹә тәгдим едән хәстәханалары вә ја гоҹалар евини идарә едир. Үмуми ҝөтүрдүкдә, белә јерләр Бөјүк Бабилин марагларына хидмәт етмәк үчүн тәсис едилмир (Вәһј 18:2, 4). Онларын тәсис едилмәсинин әсас мәгсәди дини тәшкилата ҝәлир ҝәтирмәк ола биләр. Бу ҝүн бәзи хәстәханаларын садәҹә ады динидир, анҹаг диҝәрләриндә исә ишчиләрин бәзиләри һәлә дә руһаниләр олараг галмагдадыр.

Әҝәр Јеһованын Шаһидинә хәстәханада вә ја гоҹалар евиндә галмаг лазым ҝәләрсә, о, дини тәшкилатла ола биләр бағлылығы олан јердә галыб-галмајаҹағына даир өзү гәрар вермәлидир. Биринин виҹданы ора ҝетмәјә јол верә биләр, анҹаг башгасынын виҹданы јох (1 Тим. 1:5). Инсанын гәрарына мүхтәлиф амилләр тәсир ҝөстәрә биләр вә јахшы оларды ки, онлардан бәзиләрини нәзәрдән кечирәк.

Мәсәлән, ола биләр ки, һансыса әразидә тәкҹә бир хәстәхана олсун, о да дини тәшкилатын рәһбәрлији алтында фәалијјәт ҝөстәрсин. Јахуд да јахынлыгда башга хәстәхана олса да, ола биләр, мәһз динлә әлагәси оланда даһа јахшы хидмәт ҝөстәрилсин. Ола биләр, белә хәстәхана һансыса мүалиҹәни тәгдим етмәк үчүн лазыми аваданлыгларла тәҹһиз едилмиш јеҝанә хәстәханадыр, јахуд да һәким вә ја ҹәрраһ сәни јалныз орада мүалиҹә едә биләр. Һәмчинин бәзи өзәл вә дөвләт хәстәханаларында сәнин бир мәсиһчи кими гана даир нөгтеји-нәзәринә һөрмәтлә јанашылмадығы һалда, динлә әлагәси олан хәстәханаларда һөрмәтлә јанашыла биләр. Беләликлә, бунлар һансы хәстәхананын хидмәтләриндән истифадә едәҹәјини гәрара аларкән нәзәрдән кечирмәли олдуғун бәзи амилләрдир.

Динлә әлагәси олан хәстәхана вә ја гоҹалар евинин хидмәтләриндән истифадә етмәк гәрарына ҝәлсән, ола биләр, сән буна ҝөстәрилән хидмәтин әвәзиндә пул өдәмәк кими бахасан. Ола билсин, сән буна дини тәшкилатын ҝәлир мәнбәји кими бахыб дүшүнәсән ки, онларын хидмәтләриндән истифадә етмәк јалан дини дәстәкләмәк үчүн бирбаша көнүллү ианә етмәк демәк дејил, садәҹә алдығын малын вә ја хидмәтин һаггыны өдәјәҹәксән.

Әлбәттә, белә вәзијјәтдә, бир мәсиһчи кими, әмин олмалысан ки, јалан ибадәтдә һеч бир вәҹһлә иштирак етмәјәҹәксән. Бундан башга, орада ишләјәнләрә вә ја баш чәкәнләрә «Ата» вә ја «Баҹы» кими дини титулларла мүраҹиәт етмәјәҹәксән (Мат. 23:9). Сән әмин олмалысан ки, мүалиҹә алдығын вә ја хидмәтиндән истифадә етдијин јер сырф бизнес характери дашыјыр.

Хәстәханаја гәбул едиләркән Јеһованын Шаһиди олдуғуну вә јерли ағсаггалларын сәнә баш чәкмәсини истәдијини билдирә биләрсән. Бунун сајәсиндә сән орада галдығын мүддәт әрзиндә ағсаггаллардан лазыми руһани көмәји ала биләҹәксән (1 Салон. 5:14).

Иманлы аилә үзвләри, јығынҹағын ағсаггаллары вә һәмиманлылар гоҹалар евиндә јашајан јашлы баҹы-гардашларын руһани еһтијаҹларына мәсулијјәтлә јанашмалыдырлар, хүсусилә дә әҝәр һәмин гоҹалар еви дини тәшкилат тәрәфиндән идарә олунурса. Бу саһәдә јашлы баҹы-гардашларымыза ҹан јандырмаг онлары руһландыраҹаг вә көмәк едәҹәк ки, белә јерләрдә кечирилән дини мәрасимләрдә, бајрамларда вә бу кими башга тәдбирләрдә тәсадүфән иштирак етмәсинләр.

Бүтүн бунлары јадда сахлајараг, һәр кәс вәзијјәти һәртәрәфли нәзәрдән кечирмәли, сонра һансы хәстәхана вә ја гоҹалар евиндән истифадә едәҹәјинә даир өзү гәрар чыхармалыдыр (Галат. 6:5).