Гоҹалар евиндә јашајанлары унутма!
1. Гоҹалар евиндә јашајанлара нә үчүн хош хәбәри чатдырмалыјыг?
1 Гоҹалығын ҝәтирдији проблемләрлә үзләшәнләрин сајы ҝүнбәҝүн артыр (Ваиз 12:1—7). Јашлы нәслин нүмајәндәләриндән бәзиләри гоҹалар евиндә јашадығы үчүн евдән-евә тәблиғ едәркән онлара раст ҝәлмәјә биләрик. Һәтта јашлы валидејнләрин өвладларынын вә ја гоһумларынын јанына көчмәк адәти олан өлкәләрдә дә бу мүшаһидә олунур. Гоҹалар евиндә јашајан јашлылар вә ја башгалары сәрбәст һәрәкәт едә билмәсәләр дә, јахуд јаддашсызлыг проблеми олса да, онлар һәлә дә өјрәнмәк, гаврамаг вә Јеһованы севмәк габилијјәтинә маликдирләр. Бәс биз онлара хош хәбәрин «сәадәт долу [үмидини]» неҹә чатдыра биләрик? (Тит. 2:13).
2. Гоҹалар евинә баш чәкмәк үчүн мәлуматы һарадан тапа биләрик?
2 Башдан башла. Адәтән, гоҹалар евләринин сијаһысыны јерли телефон бәләдчиләриндән «Гоҹалар еви» вә буна бәнзәр башлыглар алтында тапмаг олур. Хидмәт нәзарәтчиси бу кими јерләрә мүвафиг тәблиғчиләрин баш чәкмәсини тәшкил едә биләр. Белә јерләрдә јахшыҹа планлашдырма вә Јеһованын көмәји сајәсиндә, адәтән, груп шәклиндә Мүгәддәс Китаб өјрәнмәсинә башламаг олур (Сүл. мәс. 21:5; 1 Јәһ. 5:14, 15).
3, 4. а) Мүгәддәс Китаб арашдырмасы илә бағлы кимдән иҹазә алмалыјыг? б) Өјрәнмәни неҹә тәшкил едә биләрик?
3 Өјрәнмәни неҹә башлајаҹағымыз ҝетдијимиз гоҹалар евиндән асылыдыр. Сакинләринин вә ишчиләринин сајы чох олан бөјүк гоҹалар евиндә, јахшы олар ки, гәбул шөбәсинә јахынлашыб мүдиријјәтлә ҝөрүшмәк истәдијимизи билдирәк. Азсакинли вә бир нечә ишчиси олан балаҹа гоҹалар евиндә исә мүәссисә саһиби илә сөһбәт етмәк олар.
4 Һәр ики һалда, билдир ки, сән Мүгәддәс Китабы охујуб мүзакирә етмәји хошлајан инсанлары руһландырмаг үчүн вахт ајыран көнүллүсән. Орада һәфтәдә бир дәфә 30 дәгигә әрзиндә Аллаһын Кәламыны груп шәклиндә арашдырмаг истәјән инсанларын олуб-олмадығыны соруша биләрсән. Мүхтәлиф нәшрләримиздән истифадә етмәк олар. Бир чох тәблиғчиләр фикир вермишләр ки, орада јашајанлар «Мүгәддәс Китаб һекајәләри» нәшринә даһа чох мараг ҝөстәрирләр. Бу әдәбијјатларымызы мүдирә дә ҝөстәрмәк олар. Ҝүнү, вахты, ҝөрүш отағыны онунла мәсләһәтләш вә чалыш ки, бу мәлумат гоҹалар евинин үмуми ҹәдвәлиндә гејд олунсун. Өзүнү Јеһованын Шаһиди кими тәгдим етмәјә чәкинмә. Ејни заманда, мүдирә баша сал ки, сән бура дин јајмаға ҝәлмәмисән, садәҹә олараг, мәгсәдин Мүгәддәс Китаб үзрә маарифләндирмәкдир.
5. Һансы практики мәсләһәтләр мүзакирәни рәнҝарәнҝ вә фајдалы едә биләр?
5 Мүгәддәс Китаб үзрә арашдырманын кечирилмәси. Арашдырманын неҹә кечирилмәси гоҹалар евиндәки шәраитдән вә мүһитдән асылыдыр. Буна ҝөрә дә ујғунлашмағы баҹар вә анлајышла јанаш. Тәблиғчи арашдырылаҹаг нәшрин бир нечә нүсхәсини ҝәтирмәли, мүзакирәнин сонунда исә онлары ҝери топламалыдыр. Ола билсин, бәзиләринә нәшрин иришрифтли нүсхәси лазым олсун. Гајда үзрә, абзаслар охунмалы, суал-ҹаваб шәклиндә мүзакирә апарылмалыдыр. Истәјән вә баҹаран кәсләрдән абзаслары вә Мүгәддәс Китаб ајәләрини охумағы хаһиш етмәк олар. Арашдырма заманы мүсбәт әһвал-руһијјәни гору, ҝүләрүз вә достјана ол. Мүдиријјәтин разылығы илә һәрдәнбир тәшкилатымызын иманы ҝүҹләндирән, јахуд һансыса Мүгәддәс Китаб һадисәсиндән ибрәтамиз нәтиҹә чыхармаға көмәк едән видеолар ҝөстәрә биләрсән. Мүзакирәнин әввәлиндә вә сонунда гыса дуа етмәк олар. Бәзи тәблиғчиләр һәтта Падшаһлыг нәғмәләрини дә охујурлар.
6. Етиразын өһдәсиндән неҹә ҝәлмәк олар?
6 Гоҹалар евинин сакини мүзакирә заманы нәјәсә етираз едәрсә, онда неҹә? Јахшы олар ки, сөзү ағзында бишириб сонра ҹаваб верәсән (Колос. 4:6). Мәсәлән, ону нараһат едән мөвзуја даир бир ајә охуја биләрсән. Әҝәр бу мүмкүн дејилсә, етиразыны сәмими олараг гәбул ет вә мүзакирәдән сонра бу һагда ајрыҹа сөһбәт етмәји тәклиф ет.
7. Гоҹалар евинин сакининин суалы јаранарса, нә етмәк олар?
7 Етираз едән шәхс суал верә вә ја әлавә мәлумат әлдә етмәк истәдијини сөјләјә биләр. Бу ҹүр вәзијјәтдә бир баҹы, адәтән, белә дејир: «Мараглы суалдыр, олар ки, бу суалы сонда ајрыҹа мүзакирә едәк?» Бунун сајәсиндә чох вахт мараглананла Мүгәддәс Китабы ајрыҹа арашдырмаг мүмкүн олур.
8. Групла вә фәрди гајдада мүзакирә неҹә һесабланмалыдыр?
8 Адәтән, јахшы олар ки, групла мүзакирәни һәмишә ејни тәблиғчиләр апарсын. Мүзакирәдә иштирак едән тәблиғчиләр вахты һесаблаја биләр. Групла мүзакирәни апаран тәблиғчи һесабатына һәр мүзакирә үчүн бир тәкрар башчәкмә вә бир өјрәнмә јаза биләр. Лакин киминләсә фәрди олараг Мүгәддәс Китаб өјрәнмәси башланыларса, буну ади гајдада һесабламаг олар.
9, 10. Бу хидмәтдә иштирак едән тәблиғчиләрдән һансы кејфијјәтләр тәләб олунур? Изаһ ет.
9 Давамијјәти гору. Групла мүзакирәнин өз вахты вә ҝүнү олмалыдыр. Сакинләр вә ишчиләр сиздән ҝөзләјәҹәкләр ки, мүзакирә мүнтәзәм кечирилсин вә вахтында башлајыб вахтында гуртарсын (Мат. 5:37). Буна ҝөрә дә бу ишдә мәсулијјәт вә низам-интизам тәләб олунур. Груп шәклиндә мүзакирәдә ики баҹарыглы тәблиғчи әмәкдашлыг етсә, јахшы олар (Ваиз 4:9, 10). Бөјүк гоҹалар евиндә исә даһа чох тәблиғчи тәләб олуна биләр.
10 Достлашмаг вә сәмими мараг ҝөстәрмәк дә ваҹибдир (Филип. 2:4). Илк дәфә гоҹалар евинә ҝедәндә сакинләрин һәр бири илә шәхсән таныш ол. Адлары өзүндә гејд ет вә нөвбәти дәфә ҝәләнә кими әзбәрлә. Лакин бәзи јашлылар танымадыглары адам онлара тәкҹә ады илә мүраҹиәт едәндә инҹијирләр. Сәбир вә шәфгәт ҝөстәрсәк, һәр кәс өзүнү раһат вә дәјәрли һисс едәҹәк.
11. Ишчи һејәтинә вә орада јашајанларын аилә үзвләринә һөрмәт етдијимизи неҹә ҝөстәрә биләрик?
11 Ишчи һејәтинә вә орада јашајанларын аилә үзвләринә дә гаршы һөрмәтҹил вә хејирхаһ олмаг ваҹибдир. Өјрәнмәнин вахтыны вә кечирилмә тәрзини дәјишмә. Вахташыры мүзакирә илә бағлы мүдиријјәтин фикрини өјрән. Орада јашајанларын аилә үзвләри өјрәнмә заманы онлара баш чәкәрсә, онларла таныш ол вә нә үчүн Мүгәддәс Китаб әсасында мүзакирә апардығыны изаһ ет. Онлары бурада јашајан аилә үзвләринә гаршы сәмими олдуғуна әмин ет вә отуруб мүзакирәјә гулаг асмағы тәклиф ет.
12, 13. Гоҹалар евиндә шаһидлик етмәјин фајдалы олдуғуну ҝөстәрән нүмунәләр чәк.
12 Наилијјәтләр. Сәјјар нәзарәтчиләрин вә јығынҹагларын һесабатларындан ҝөрүнүр ки, тәблиғин бу нөвүндә чохлу наилијјәтләр әлдә едилиб. Бир дәфә орада јашајанлардан 20 нәфәр илк мүзакирәјә гатылды. Алты нәфәрлә фәрди өјрәнмә башланылды. Онлардан бири исә вәфтиз олунду. Башга бир гоҹалар евиндә исә 85 јашлы бир гадын јығынҹаға ҝетмәјә башлады вә сонрадан вәфтиз олунмаг истәјини билдирди. Бир дәфә мүдиријјәт бу мүзакирәләрә сон гојмаг истәјәндә мүзакирәдә иштирак едән сакинләр мүдирә өз етиразларыны билдирдиләр. Нәтиҹәдә, мүзакирәләр јенидән апарылмаға башланды вә һәмин мүзакирәләрдә иштирак едәнләрин сајы 25—30 нәфәр олду.
13 Ҝөстәрдијимиз мәһәббәт јалныз орада јашајан сакинләрә јох, ишчиләрә дә ҝүҹлү тәсир едир, чүнки һәрдән онлар да мүзакирәләрдә отурур, һәтта иштирак едирләр. Беләҹә, гоҹалара ҝөстәрдијимиз сәмими мараг сајәсиндә әтрафдакылара да ҝөзәл шаһидлик етмиш олуруг (1 Пет. 2:12). Бир мүдир белә мүзакирәләрин мәгсәдини биләндә деди: «Сиз индијә кими һарада идиниз? Нә вахтдан башлајаҹагсыныз?» Диҝәр бир мүдир јазмышды: «Мән белә мүзакирәләри бүтүн гоҹалар евинә мәсләһәт билирәм. Чүнки Јеһованын Шаһидләри ибадәтләринин бир һиссәси олан бу хидмәти пулсуз-тәмәннасыз иҹра едирләр». Һавај адаларындакы гоҹалар евинин бириндә Јеһованын Шаһидләринә хејирхаһ әмәлләринә ҝөрә сертификат вермиш вә бу көнүллүләри «дәјәрли хәзинә» илә тәсвир етмишдиләр.
14. Нәјә ҝөрә биз гоҹалар евиндә јашајанлары унутмамалыјыг?
14 Јеһова јашлы нәслин нүмајәндәләрини дә Она һәмд етмәјә сәсләјир (Мәз. 148:12, 13). Бу дәвәт гоҹалар евиндә јашајанлара да аиддир. Бәс сизин әразидә елә гоҹалар еви вармы ки, орада хош хәбәрдән фајдаланаҹаг гоҹалар олсун? Јерли ағсаггалларын вә гоҹалар евинин мүдирләринин көмәји илә биз оранын сакинләринә хош хәбәри чатдыра биләрик. Јаша долан кәсләри унутмамагла Јеһованы тәглид етмиш олуруг (Мәз. 71:9, 18).