Һәмиманлыларына һөрмәт ҝөстәрмәкдә тәшәббүсү үзәринә ҝөтүрүрсәнми?
«Бир-биринизә нәвазишлә гардашлыг мәһәббәти бәсләјин. Бир-биринизә һөрмәтдә һәмишә тәшәббүс ҝөстәрин» (РОМ. 12:10).
1, 2. а) Павел Ромадакы һәмиманлыларына үнванладығы мәктубунда һансы нәсиһәти верир? б) Биз һансы суаллары арашдыраҹағыг?
ҺӘВАРИ Павел Ромадакы һәмиманлыларына јаздығы мәктубунда вурғулајыр ки, биз мәсиһчиләр бир-биримизә мәһәббәт ҝөстәрмәлијик. О, бизә мәһәббәтимизин «ријасыз» олмасынын ваҹиблијини хатырладыр. Бундан әлавә, Павел «гардашлыг мәһәббәти»ндән данышыр вә гејд едир ки, бу мәһәббәт «нәвазишлә» ҝөстәрилмәлидир (Ром. 12:9, 10а).
2 Сөзсүз ки, гардашлыг мәһәббәти башгаларына хош мүнасибәт бәсләмәклә битмир. Буну әмәлдә ҝөстәрмәк ҝәрәкдир. Әкс тәгдирдә, үрәјимиздә белә мәһәббәтин олдуғуну башгалары һарадан биләҹәк? Буна ҝөрә дә һәвари Павел сөзүнә давам едәрәк дејир: «Бир-биринизә һөрмәтдә һәмишә тәшәббүс ҝөстәрин» (Ром. 12:10б). Һөрмәт ҝөстәрмәк нә демәкдир? Һәмиманлыларымыза һөрмәт ҝөстәрмәкдә тәшәббүсү үзәримизә ҝөтүрмәк нәјә ҝөрә ваҹибдир? Биз буну неҹә едә биләрик?
Башгаларына һөрмәт ҝөстәрмәк нә демәкдир?
3. Мүгәддәс Китабын јазылдығы дилләрдә «һөрмәт» сөзү һансы мәнаны дашыјыр?
3 Ибрани дилиндә «һөрмәт» үчүн истифадә олунан әсас сөзүн һәрфи мәнасы «ағырлыг»дыр. Һөрмәт саһиби олан кәс нүфузлу вә ваҹиб сајылыр. Һәмин ибрани сөзү Мүгәддәс Јазыларда чох вахт «иззәт» кими дә тәрҹүмә олунур вә бу, һөрмәт саһиби олан инсана ҝөстәрилән еһтирамдан хәбәр верир (Јар. 45:13). Мүгәддәс Китабда «һөрмәт» кими тәрҹүмә олунан јунан сөзү еһтирам вә дәјәр мәнасыны верир (Лука 14:10). Бәли, һөрмәт етдијимиз инсанлар бизим үчүн чох дәјәрлидир.
4, 5. Башгаларына үрәјимиздә һөрмәт бәсләмәклә онлара һөрмәт ҝөстәрмәк арасында һансы бағлылыг вар? Нүмунә әсасында ҝөстәрин.
4 Башгаларына һөрмәт етмәк өзүнә нәләри дахил едир? Һөрмәт башгалары һагда нә фикирләшмәјимиздән башлајыр. Бу, онларла неҹә рәфтар етмәјимизә тәсир ҝөстәрир. Башга сөзлә, әввәлҹә үрәјимиздә инсанлара гаршы һөрмәт олмалыдыр ки, сонра онларла һөрмәтлә рәфтар едә биләк.
5 Мәсиһчи гәлбиндә һәмиманлыларына һөрмәт бәсләмәдији һалда, онларла неҹә һөрмәтлә даврана биләр? (3 Јәһ. 9, 10). Битки мүнбит торпагда дәрин көк салдығы тәгдирдә бој атдығы вә узунөмүрлү олдуғу кими, үрәјимиздә башгаларына гаршы сәмими һөрмәт бәсләмәлијик ки, онларла һөрмәтҹил тәрздә даврана биләк. Әҝәр үрәјимиздә белә һөрмәт јохдурса, онларла мүвафиг тәрздә рәфтар едә билмәјәҹәјик вә јарарсыз торпагда әкилән битки гурудуғу кими, һөрмәтимиз дә ҝеҹ-тез јоха чыхаҹаг. Буна ҝөрә дә тәәҹҹүблү дејил ки, Павел әмәлдә һөрмәт ҝөстәрмәк нәсиһәтини вермәздән өнҹә јазмышды: «Гој мәһәббәтиниз ријасыз олсун». (Ром. 12:9; 1 Петер 1:22 ајәсини оху.)
«Аллаһын бәнзәриндә» јарадылмыш инсанлара һөрмәт ет
6, 7. Нәјә ҝөрә инсанлара һөрмәтлә јанашмалыјыг?
6 Бәли, башгалары илә һөрмәтлә давранмаг үчүн үрәјимиздә онлара һөрмәт бәсләмәк олдугҹа ваҹибдир. Буна ҝөрә дә биз бүтүн баҹы-гардашларымыза һөрмәт бәсләмәли олдуғумузун сәбәбләринин Мүгәддәс Китаба әсасландығыны јаддан чыхармамалыјыг. Ҝәлин ики сәбәбә нәзәр салаг.
7 Инсан, јер үзүндә јашајан диҝәр варлыглардан фәргли олараг, «Аллаһын бәнзәриндә» јарадылыб (Јаг. 3:9). Елә бу сәбәбдән биздә мәһәббәт, һикмәт вә әдаләт кими илаһи хүсусијјәтләр вар. Ҝөрүн Јараданымыз бизә даһа нә бәхш едиб. Бу һагда мәзмурчу дејир: «Еј Худавәндимиз Рәбб,.. еһтишамын ҝөјләрә галхыр!.. Ону [инсаны] Аллаһдан бир аз ашағы јаратдын, иззәт вә әзәмәт [«һөрмәт», «Китабы Мукаддес»] таҹыны онун башына гојдун» (Мәз. 8:1, 4, 5; 104:1)a. Үмумиликдә, Аллаһ инсанлары һөрмәтә вә иззәтә лајиг ҝөрүб. Санки, бу шејләри инсанларын башына таҹ кими гојуб, јахуд да бу шејләрлә онлары бәзәјиб. Демәли, биз кимәсә һөрмәт едәндә инсанлара бу хүсусијјәти Јеһованын вердијини гәбул етдијимизи ҝөстәрмиш олуруг. Һамыја һөрмәт етмәк үчүн ҹидди сәбәбләримизин олдуғуну нәзәрә алсаг, ҝөр онда һәмиманлыларымыза нә гәдәр һөрмәт етмәлијик! (Јәһ. 3:16; Галат. 6:10).
Биз бир аиләнин үзвүјүк
8, 9. Павел һәмиманлыларымыза һөрмәт бәсләмәли олдуғумузун һансы сәбәбини вурғулајыр?
8 Һәмиманлыларымыза нәјә ҝөрә һөрмәт бәсләмәли олдуғумузун икинҹи сәбәбини һәвари Павел ачыглајыр. Әмәлдә һөрмәт ҝөстәрмәк нәсиһәтини вермәздән өнҹә о демишди: «Бир-биринизә нәвазишлә гардашлыг мәһәббәти бәсләјин». Јунан дилиндә «нәвазишлә» сөзү үзвләринин бир-биринә мәһәббәт бәсләдији вә дајаг олдуғу аиләни бирләшдирән мөһкәм телләрә аиддир. Бу сөзү истифадә етмәклә Павел вурғулајыр ки, меһрибан аиләдә олдуғу кими, јығынҹагдакы мүнасибәтләр дә мөһкәм вә сәмими олмалыдыр (Ром. 12:5). Ону да јадда сахламалыјыг ки, Павел бу сөзләри ејни Ата — Јеһова тәрәфиндән өвладлыға ҝөтүрүлмүш мәсһ олунмуш мәсиһчиләрә јазмышды. Беләликлә, онлар мөһкәм аиләнин үзвләри идиләр. Буна ҝөрә дә Павелин ҝүнләриндәки мәсһ олунмуш мәсиһчиләрин бир-бириләринә һөрмәт етмәјә әсаслы сәбәби вар иди. Ејни шеји бу ҝүн јер үзүндә јашајан мәсһ олунмуш мәсиһчиләрә дә шамил етмәк олар.
9 Бәс ‘башга гојунлар’ һагда нә демәк олар? (Јәһ. 10:16). Аллаһ тәрәфиндән һәлә өвладлыға ҝөтүрүлмәсәләр дә, онларын бир-бириләринә баҹы вә ја гардаш дејә мүраҹиәт етмәләри мүнасибдир, чүнки онлар бирлик ичиндә јашајан үмумдүнја мәсиһчи аиләсинин үзвләридирләр (1 Пет. 2:17; 5:9). Демәли, башга гојунлар һәмиманлыларыны нәјә ҝөрә «гардаш» вә ја «баҹы» адландырдыгларыны там дәрк едирләрсә, онда онларын да бир-бириләринә гәлбләриндә һөрмәт бәсләмәјә әсаслы сәбәби вар. (1 Петер 3:8 ајәсини оху.)
Нәјә ҝөрә бу, олдугҹа ваҹибдир?
10, 11. Нәјә ҝөрә үрәјимиздә һәмиманлыларымыза һөрмәт бәсләмәк вә буну әмәлдә ҝөстәрмәк олдугҹа ваҹибдир?
10 Нәјә ҝөрә һәмиманлыларымыза һөрмәт бәсләмәк вә буну әмәлдә ҝөстәрмәк чох ваҹибдир? Чүнки бунунла биз јығынҹагда јахшы аб-һаванын вә бирлијин олмасына бөјүк төһфә вермиш олуруг.
11 Әлбәттә, биз дәрк едирик ки, Јеһова илә сых мүнасибәтләримиз вә Онун мүгәддәс руһунун дәстәји һәгиги мәсиһчиләр кими малик олдуғумуз ән бөјүк гүввә мәнбәјидир (Мәз. 36:7; Јәһ. 14:26). Ејни заманда, һәмиманлыларымызын бизи гијмәтләндирдијини ҝөрмәк бизә гол-ганад верир (Сүл. мәс. 25:11). Кимсә бизи гијмәтләндирдијини дејәндә вә бизә һөрмәт етдијини ҝөстәрәндә руһланырыг. Бу, һәјат јолунда севинҹлә вә гәтијјәтлә јеримәкдә бизә әлавә ҝүҹ верир. Јәгин ки, бу һиссләр сәнә дә танышдыр.
12. Һәр биримиз јығынҹагда сәмими вә меһрибан аб-һаваны неҹә горуја биләрик?
12 Јеһова билир ки, биз инсанлар башгаларынын һөрмәтинә еһтијаҹ дујуруг. Буна ҝөрә дә О, бизи Кәламы васитәсилә ‘бир-биримизи һөрмәтдә габагламаға’ тәшвиг едир. (Ром. 12:10, «Инҹил», 1996; Матта 7:12 ајәсини оху.) Һеч вахт өз дәјәрини итирмәјән бу мәсләһәтә ҹидди јанашмагла һәр бир мәсиһчи үмумдүнја мәсиһчи јығынҹағында сәмими вә меһрибан аб-һаваны горумуш олур. Буна ҝөрә дә ҝәлин бир анлыг ајаг сахлајыб өзүмүздән сорушаг: «Ахырынҹы дәфә нә вахт сөздә вә әмәлдә јығынҹагда баҹы вә ја гардаша һөрмәт бәсләдијими ҝөстәрмишәм?» (Ром. 13:8).
Һәр биримиз тәшәббүсү өз үзәримизә ҝөтүрмәлијик
13. а) Башгаларына һөрмәт ҝөстәрмәкдә тәшәббүсү өз үзәринә кимләр ҝөтүрмәлидирләр? б) Павелин Ромалылара 1:7 ајәсиндә дедији сөзләрдән һансы нәтиҹәјә ҝәлирик?
13 Һөрмәт ҝөстәрмәкдә тәшәббүсү ким өз үзәринә ҝөтүрмәлидир? Ибраниләрә јаздығы мәктубунда Павел мәсиһчи ағсаггалларын бизә ‘рәһбәрлик етдијини’ дејир (Ибр. 13:17). Дүздүр, ағсаггаллар јығынҹагда бир чох ишләрә рәһбәрлик едирләр. Бунунла белә, онлар, диҝәр ағсаггаллар да дахил олмагла, һәмиманлыларына һөрмәт ҝөстәрмәкдә тәшәббүсү өз үзәрләринә ҝөтүрмәлидирләр. Мәсәлән, ағсаггаллар јығынҹағын руһани тәләбатларыны мүзакирә етмәк үчүн топлашанда бир-бириләрини диггәтлә динләмәклә, еләҹә дә гәрар гәбул едәркән бүтүн ағсаггалларын фикрини нәзәрә алмагла бир-бириләринә һөрмәт ҝөстәрмиш олурлар (Һәв. иш. 15:6—15). Лакин унутмамалыјыг ки, Павел ромалылара јаздығы мәктубу јалныз ағсаггаллара јох, бүтүн јығынҹаг үзвләринә үнванламышды (Ром. 1:7). Демәли, ҝениш мәнада, Павелин бу мәсләһәти һәр биримизә аиддир.
14. а) Һөрмәт етмәклә бу саһәдә тәшәббүсү өз үзәримизә ҝөтүрмәк арасында һансы фәрг вар? б) Өзүмүзә һансы суаллары верә биләрик?
14 Павелин вердији мәсләһәтин диҝәр ҹәһәтинә дә диггәт јетирәк. О, Ромадакы һәмиманлыларыны садәҹә һөрмәт ҝөстәрмәјә јох, тәшәббүсү өз үзәрләринә ҝөтүрмәјә тәшвиг едирди. Бунлар арасында нә фәрг вар? Бир нүмунәјә бахаг. Мүәллим јазыб-охумағы баҹаран шаҝирдләрә һәрфләри өјрәдәрми? Сөзсүз ки, јох. Ахы онлар артыг буну баҹарырлар. Әксинә, мүәллим шаҝирдләрин охумаг габилијјәтләрини тәкмилләшдирмәләринә көмәк едәр. Ејнилә, бизи бир-биримизә һөрмәт етмәјә тәшвиг едән мәһәббәт онсуз да һәгиги мәсиһчиләрин сәҹијјәви хүсусијјәтидир (Јәһ. 13:35). Лакин охумағы баҹаран шаҝирдин даһа да јахшы охумағы өјрәнмәк имканы олдуғу кими, бизим дә бу саһәдә тәкмилләшмәк имканымыз вар. Буну бир-биримизә һөрмәт ҝөстәрмәкдә тәшәббүсү өз үзәримизә ҝөтүрмәклә едә биләрик (1 Салон. 4:9, 10). Бу, һәр биримизин борҹудур. Өзүмүздән соруша биләрик: «Мән буну едирәмми? Јығынҹагда һәмиманлыларыма һөрмәт ҝөстәрмәкдә биринҹи аддымы мәнми атырам?»
‘Касыблара’ һөрмәт ҝөстәр
15, 16. а) Јығынҹагда башгаларына һөрмәт ҝөстәрәркән кимләри јаддан чыхармамалыјыг? б) Үрәјимиздә баҹы-гардашларымыза һөрмәт бәсләјиб-бәсләмәдијимизи неҹә үзә чыхара биләрик?
15 Јығынҹагда башгаларына һөрмәт ҝөстәрәркән кимләри јаддан чыхармамалыјыг? Аллаһын Кәламында дејилир: «Касыба сәхавәт ҝөстәрән санки Рәббә борҹ верәр, чүнки онун әвәзи Рәбдән ҝәләр» (Сүл. мәс. 19:17). Бу сөзләрин архасында дуран принсип һөрмәт ҝөстәрмәкдә тәшәббүсү өз үзәримизә ҝөтүрмәјә бизи неҹә тәшвиг едә биләр?
16 Јәгин, разылашаҹагсан ки, әксәр инсанлар вәзифәҹә онлардан бөјүк олан инсанлара һөрмәт ҝөстәрирләр. Диҝәрләринә исә аз вә ја һеч һөрмәт етмирләр. Лакин Јеһова белә дејил. О дејир: «Мәнә һөрмәт едәнләри һөрмәтә чатдыраҹағам» (1 Шам. 2:30; Мәз. 113:5—7). Јеһова Она хидмәт едән вә еһтирам бәсләјән һәр бир кәсә һөрмәтлә јанашыр. О, ‘јохсуллара’ хор бахмыр. (1 Шамуел 2:8 ајәсини оху; 2 Салн. 16:9.) Әлбәттә, биз дә Јеһова кими давранмаг истәјирик. Беләликлә, инсанлара ҝөстәрдијимиз һөрмәтин нә дәрәҹәдә сәмими олуб-олмадығыны билмәк истәјириксә, онда өзүмүзә нөвбәти суалы вермәлијик: «Јығынҹагда мәсулијјәти олмајанларла неҹә рәфтар едирәм?» (Јәһ. 13:14, 15). Бу суала вердијимиз ҹаваб үрәјимиздә башгаларына нә дәрәҹәдә һөрмәт бәсләдијимизи үзә чыхараҹаг. (Филипилиләрә 2:3, 4 ајәләрини оху.)
Башгаларына һөрмәтини онлара вахт ајырмагла ҝөстәр
17. Тәшәббүсү үзәримизә ҝөтүрәрәк һәмиманлыларымыза һөрмәт ҝөстәрмәјин ән јахшы үсулларындан бири һансыдыр вә нәјә ҝөрә?
17 Тәшәббүсү үзәримизә ҝөтүрәрәк һәмиманлыларымыза һөрмәт ҝөстәрмәјин ән јахшы үсулларындан бири һансыдыр? Онлара вахт ајырмаг. Нәјә ҝөрә мәһз бу? Мәсиһчи олдуғумуздан вахтымызын әксәр һиссәси чохсајлы ваҹиб руһани ишләрә ҝедир. Буна ҝөрә дә тәәҹҹүблү дејил ки, вахт бизим үчүн гызылдыр. Биз дә баша дүшүрүк ки, баҹы-гардашларымыздан бизә һәддән артыг чох вахт ајырмаларыны тәләб етмәмәлијик. Ејнилә, башгалары да буну баша дүшәндә биз онлара миннәтдар олуруг.
18. Он сәккизинҹи сәһифәдәки шәкилдә тәсвир олундуғу кими, һәмиманлыларымыза һәвәслә вахт ајырмағымыз нәдән ҝөрүнә биләр?
18 Бунунла белә, биз (хүсусилә дә јығынҹаг ағсаггаллары) баша дүшүрүк ки, әлимиздәки иши кәнара гојуб һәмиманлыларымыза вахт ајырмагла онлара һөрмәт етдијимизи ҝөстәрмиш олуруг. Һансы мәнада? Бунунла биз, санки, дејирик: «Сән мәним үчүн о гәдәр дәјәрлисән ки, бөјүк мәмнунијјәтлә сәнә вахт ајырарам» (Марк 6:30—34). Әкс тәгдирдә, һәмин инсан дүшүнә биләр ки, о, бизим үчүн гијмәтли дејил. Ајдындыр ки, бәзән ҝөрдүјүмүз иш тәҹили олдуғундан ону кәнара гоја билмирик. Бунунла белә, баҹы-гардашларымыза һәвәслә вә ја ҹандәрди вахт ајырмағымыз үрәјимиздә онлара нә дәрәҹәдә һөрмәт бәсләдијимиз һагда чох шеј дејир (1 Кор. 10:24).
Тәшәббүс ҝөстәрмәјә гәти гәрарлы ол
19. Һәмиманлыларымыза һөрмәт ҝөстәрмәк үчүн онлара вахт ајырмагдан башга даһа нә едә биләрик?
19 Һәмиманлыларымыза һөрмәт ҝөстәрмәјин диҝәр ваҹиб үсуллары да вар. Мисал үчүн, вахтла јанашы, онлара диггәт дә ајырмалыјыг. Бу саһәдә дә Јеһовадан нүмунә ҝөтүрә биләрик. Мәзмурчу Давуд дејир: «Рәббин ҝөзү салеһләрин үзәриндәдир, гулаглары онларын фәрјадларына ачыгдыр» (Мәз. 34:15). Ҝәлин бу саһәдә дә Јеһованы тәглид етмәјә чалышаг. Баҹы-гардашларымыз бизә мүраҹиәт едәндә, хүсусилә дә биздән көмәк диләјәндә бүтүн диггәтимизи онлара јөнәлтмәлијик. Башга сөзлә, сөһбәт едәркән онларын үзүнә бахмалы вә гулаг асмалыјыг. Бунунла онлара һөрмәт етдијимизи ҝөстәрмиш олуруг.
20. Һөрмәт ҝөстәрмәјә даир һансы хатырлатмалары јадда сахламаг истәјирик?
20 Артыг арашдырдығымыз кими, биз нәјә ҝөрә үрәјимиздә баҹы-гардашларымыза һөрмәт бәсләмәли олдуғумузу јахшы јадда сахламаг истәјирик. Бунунла јанашы, биз, касыблар да дахил олмагла, һамыја һөрмәт етмәкдә тәшәббүсү өз үзәримизә ҝөтүрмәлијик. Белә давранмагла јығынҹагда гардашлыг мәһәббәтимизи вә бирлијимизи мөһкәмләндирәҹәјик. Буна ҝөрә дә ҝәлин бир-биримизә һөрмәт ҝөстәрмәклә кифајәтләнмәјәк, бу саһәдә тәшәббүсү өз үзәримизә ҝөтүрмәјә давам едәк. Бәс сән неҹә, буну етмәјә гәти гәрарлысанмы?
[Һашијә]
a Давудун сәккизинҹи мәзмурда дедији сөзләр һәмчинин камил инсан олан Иса Мәсиһ барәдә сөјләнилән пејғәмбәрликдир (Ибр. 2:6—9).
Јадыныздадырмы?
• Башгаларына үрәјимиздә һөрмәт бәсләмәклә онлара һөрмәт ҝөстәрмәк арасында һансы бағлылыг вар?
• Һәмиманлыларымыза һөрмәт ҝөстәрмәјә һансы сәбәбләримиз вар?
• Бир-биримизә һөрмәт ҝөстәрмәк нәјә ҝөрә ваҹибдир?
• Баҹы-гардашларымыза һөрмәт етдијимизи неҹә ҝөстәрә биләрик?
[18-ҹи сәһифәдәки шәкил]
Һәмиманлыларымыза һөрмәт етдијимизи неҹә ҝөстәрә биләрик?