Јеһова мәним галамдыр

Нәгл етди Ҹоан Ковилл

Мән 1925-ҹи илин ијулунда Инҝилтәрәнин Һаддерсфилд шәһәриндә анадан олмушам. Аиләнин јеҝанә ушағы идим. Сәһһәтим зәиф иди. Атам тез-тез дејәрди: «Сәнә күләк дәјән кими хәстәләнирсән». О һаглы иди!

МӘН ушаг оланда кешишләрин сүлһ үчүн гызғын дуа етдикләрини, Икинҹи Дүнја мүһарибәси башлајанда исә гәләбә үчүн дуа етдикләрини ҝөрүрдүм. Бу мәни чашдырырды вә мәндә шүбһәләр ојанмаға башлады. Елә һәмин вахтларда евимизә Енни Ратклифф адлы бир гадын ҝәлди. О, әразимиздә јашајан јеҝанә Шаһид иди.

Һәгигәти өјрәнирәм

Енни бизә «Хилас» китабыны верди вә анамы өз евиндә кечирилән Мүгәддәс Китаб мүзакирәләринә дәвәт етдиa. Анам хаһиш етди ки, мән дә онунла ҝедим. Ҝетдијимиз илк ҝөрүш индијәдәк јадымдадыр. Бу ҝөрүшдә фидијә мүзакирә олунурду вә бу мүзакирәнин дарыхдырыҹы олмамасы мәни тәәҹҹүбләндирди. Орада чох суалларыма ҹаваб алдым. Нөвбәти һәфтә биз јенә дә Енниҝилә ҝетдик. Бу дәфә Исанын ахыр ҝүнләрин әламәти һаггында дедији пејғәмбәрлик изаһ олунурду. Дүнјанын аҹынаҹаглы вәзијјәтдә олдуғуну ҝөрдүкдә анамла мән о андаҹа баша дүшдүк ки, бу һәгигәтдир. Һәмин ҝүн бизи Падшаһлыг Залына дәвәт етдиләр.

Падшаһлыг Залында мән бир нечә ҝәнҹ пионерлә таныш олдум вә онларын арасында һал-һазырда әри Питерлә бәрабәр Лондондакы Бет-Елдә хидмәт едән Ҹоис Барбер (инди Еллис) варды. Мәндә елә тәәссүрат јаранды ки, һамы пионер кими хидмәт едир. Буна ҝөрә дә, мәктәбли олсам да, һәр ај 60 саат тәблиғ етмәјә башладым.

Беш ајдан сонра, 1940-ҹы илин февралын 11-дә анамла мән Брадфордда кечирилән зонал конгресдә (инди рајон конгреси адланыр) вәфтиз олундуг. Бахмајараг ки, атам Јеһованын Шаһиди олмады, бизим јени иманымыза мүгавимәт ҝөстәрмирди. Вәфтиз олдуғум әрәфәдә күчәдә тәблиғин башланғыҹы гојулмушду. Мән журнал чантасыны вә плакатлар дашымагла хидмәтдә иштирак едирдим. Бир шәнбә ҝүнү мәни тиҹарәт әразисиндә ҝәлиш-ҝедиш чох олан јердә дурмаға тәјин етдиләр. Мәндә һәлә дә инсан горхусу варды вә мәнә елә ҝәлирди ки, бүтүн синиф јолдашларым дурдуғум јердән кечирдиләр!

1940-ҹы илдә аид олдуғумуз јолдашлыг (һәмин вахт јығынҹаг белә адланырды) бөлүнмәли олду. Бу баш верәндән сонра, демәк олар ки, һәмјашыдларымын һамысы башга јолдашлыгда олду. Мән бу барәдә јолдашлыг хидмәтчисинә (инди сәдрлик едән нәзарәтчи) шикајәтләндим. Ҹавабында о мәнә деди: «Ҝәнҹ достлар истәјирсәнсә, ҝет саһәдә ҝәнҹләрә тәблиғ ет». Мән белә дә етдим! Чох кечмәмиш Елси Нобл адлы бир гызла таныш олдум. О, һәгигәти гәбул етди вә мәним јахын рәфигәм олду.

Пионер хидмәти вә онун ҝәтирдији хејир-дуалар

Мәктәби битирдикдән сонра мүһасиб ишләјирдим. Амма таммүддәтли хидмәтчиләрин севинҹини ҝөрдүкҹә Јеһоваја пионер кими хидмәт етмәк истәјим артырды. 1945-ҹи илин мај ајында хүсуси пионер тәјин олундум вә буна чох севинирдим. Бу хидмәтимин илк ҝүнүндә елә јағыш јағырды тут уҹундан ҝөјә галх. Амма тәблиғ етмәји о гәдәр хошлајырдым ки, јағыш мәни руһдан салмады. Һәр ҝүн хидмәтә чыхмаг вә хидмәт едәркән велосипед сүрмәк сағламлығыма јахшы тәсир ҝөстәрирди. Чәким һеч вахт 42 килограмдан артыг олмаса да, пионер хидмәтими дајандырмалы олмадым. Илләр әрзиндә һәрфи мәнада Јеһованын «галам» олдуғуну өз үзәримдә һисс едирдим (Мәз. 28:7).

Мән Шаһидләрин олмадығы шәһәрләрә хүсуси пионер кими ҝөндәрилирдим ки, јени јығынҹагларын тәмәлини гојум. Әввәлҹә үч ил Инҝилтәрәдә, сонра исә үч ил Ирландијада хидмәт етдим. Ирландијанын Лисбурн шәһәриндә протестант килсәсиндә кешишин көмәкчиси олан бир киши илә Мүгәддәс Китабы өјрәнмәјә башладым. О, Мүгәддәс Китабын әсас тәлимләри һаггында өјрәндикҹә јени биликләри илә өз јығынҹағында бөлүшүрдү. Онлардан бәзиләри килсәнин рәһбәрләринә шикајәтләндиләр вә әлбәттә, ондан изаһат тәләб етдиләр. О деди ки, вахтилә бир чох јаланлар өјрәтдијини килсә үзвләринә демәк мәсиһчи борҹу иди. Аиләси она шиддәтли мүгавимәт ҝөстәрсә дә, о, һәјатыны Јеһоваја һәср едиб өлүмүнәдәк Она сәдагәтлә хидмәт етди.

Икинҹи тәјинатым Ирландијанын Ларн шәһәри олду. Орада алты һәфтә тәк хидмәт етдим, чүнки әмәкдашым 1950-ҹи илдә Нју–Јоркда кечирилән «Теократијанын инкишафы» конгресинә ҝетмишди. Бу мәним үчүн чох чәтин ҝүнләр иди. Мән дә һәмин конгресдә олмағы арзулајырдым. Бунунла белә, һәмин һәфтәләр әрзиндә хидмәтдә бир нечә руһландырыҹы һадисә баш верди. Мән тәхминән 20 ил әввәл нәшрләримиздән бирини гәбул едән бир јашлы киши илә растлашдым. Бу илләр әрзиндә ону тәкрар-тәкрар охудуғуна ҝөрә, демәк олар ки, әзбәрләмишди. О, оғлу вә гызы илә бирликдә һәгигәти гәбул етди.

Ҝилеад Мәктәбиндә тәлим алырам

1951-ҹи илдә мән Инҝилтәрәдән олан он пионерлә бирҝә Нју–Јорк штатынын Саут-Лансинг адлы кичик шәһәриндә кечирилән Ҝилеад Мәктәбинин 17-ҹи синфинә дәвәт алдым. Бу ајлар әрзиндә алдығымыз Мүгәддәс Китаб тәлими неҹә дә хошума ҝәлирди! О вахтлар баҹылар јығынҹагларда Теократик Хидмәт Мәктәбиндә чыхыш етмирдиләр, лакин Ҝилеад Мәктәбиндә биз баҹылар тәдрис нитгләри илә чыхыш едир вә һесабатлар верирдик. Биз чох һәјәҹан кечирирдик! Илк чыхышым боју гејдләри тутан әлләрим тир-тир әсирди. Мүәллимимиз Максвел Френд ҝүлүмсәјәрәк деди: «Бүтүн јахшы натигләр кими, сән јалныз башланғыҹда јох, сонадәк һәјәҹан кечирәҹәксән». Дәрсләрдә биз һамымыз синиф гаршысында чыхыш етмәк баҹарығымызы јахшылашдырдыг. Вахт чох тез кечди вә мәзунлары мүхтәлиф өлкәләрә тәјин етдиләр. Мәним тәјинатым исә Таиланд олду!

«Тәбәссүмләр өлкәси»

Таиланда Астрид Андерсонун миссионер хидмәтиндә әмәкдашым тәјин едилмәсини Јеһовадан бир һәдијјә кими гәбул етдим. Таиланда чатмаг үчүн јүкдашыјан ҝәми илә једди һәфтә ҝетмәли олдуг. Онун пајтахты Бангкокда дүшәндә ҝөрдүк ки, шәһәрин базарларында инсанлар гајнашыр вә шәһәри, онун јоллары ким хидмәт едән каналлар бүрүјүрдү. 1952-ҹи илдә Таиландда 150-дән аз тәблиғчи варды.

Таи дилиндә илк дәфә «Ҝөзәтчи Гүлләси» ҝөрәндә биз фикирләшдик: «Ҝөрәсән, нә вахтса бу дилдә даныша биләҹәјикми?» Хүсусилә дә сөзләри дүз тонда тәләффүз етмәк чәтин иди. Мәсәлән, «хаоú» сөзү јүксәк тонда башлајыб алчаг тонда гуртаранда «дүјү», лакин ејни сөз бүтүнлүклә алчаг тонда тәләффүз олундугда «хәбәр» мәнасыны верир. Инсанлара о гәдәр сәјлә тәблиғ едирдик ки, башланғыҹда сәһв тәләффүзүмүзә фикир вермәдән «биз сизә хош хәбәр ҝәтирмишик» демәк әвәзинә, «хош дүјү ҝәтирмишик» дејирдик! Амма јаваш-јаваш вә башымыза бир чох ҝүлмәли әһвалатлар ҝәләндән сонра биз бу дили өјрәнмәјә мүвәффәг олдуг.

Таи халгы чох меһрибандыр. Буна ҝөрә Таиланд Тәбәссүмләр өлкәси адланыр. Бизим илк тәјинатымыз ики ил хидмәт етдијимиз Корат (инди Накһонратчасима адланыр) шәһәри олду. Сонра Чиангмај шәһәринә тәјин олундуг. Таиләрин әксәријјәти буддистдир вә Мүгәддәс Китабла таныш дејил. Коратда мән почтун мүдири илә өјрәнирдим. Биз гәбилә башчысы Ибраһим (таи дилиндә Абраһам) һагда данышырдыг. Киши онун адыны ешитдикҹә башыны јырғалајырды. Тезликлә анладым ки, сән демә, о, фикриндә тамамилә башга адамы ҹанландырырмыш. Почт мүдири гәбилә башчысы Ибраһими Бирләшмиш Штатларын кечмиш президенти Авраам Линколнла сәһв салмышды!

Биз сәмими таиләрә Мүгәддәс Китабы мәмнунијјәтлә өјрәдирдик, онлар да өз нөвбәсиндә бизә садә һәјат сүрәрәк неҹә хошбәхт олмағы өјрәдирдиләр. Өјрәндикләримиз чох дәјәрли иди, чүнки Коратдакы биринҹи миссионер евиндә ишыг вә су јох иди. Бу тәјинатда «фираван јашамаг вә еһтијаҹ дујмаг сиррини» өјрәндик. Һәвари Павелин: «Мәни мөһкәмләндирән... васитәсилә һәр шеји етмәјә гадирәм» сөзләринин нә демәк олдуғуну өз үзәримиздә һисс етдик (Филип. 4:12, 13).

Јени әмәкдаш вә јени тәјинат

1945-ҹи илдә Лондона ҝетмишдим. Орада оларкән бәзи пионерләрлә вә Бет-Елдә хидмәт едәнләрлә бирликдә Британија музејинә ҝетмишдик. Онлардан бири бундан гыса вахт сонра Ҝилеад Мәктәбинин 11-ҹи синфиндә охујан Алан Ковилл иди. О, әввәлҹә Франсаја, сонра исә Белчикаја тәјинат алмышдыb. Мән Таиландда миссионер кими хидмәт едәндә Алан мәнә она әрә ҝетмәји тәклиф етди, мән дә бу тәклифи гәбул етдим.

1955-ҹи ил ијулун 9-да Белчиканын пајтахты Брүсселдә евләндик. Мән бал ајымы Парисдә кечирмәк арзусунда олмушдум, буна ҝөрә дә Алан ишләри елә тәшкил етди ки, нөвбәти һәфтә орада кечирилән конгресдә иштирак етдик. Парисә чатар-чатмаз Аландан бүтүн конгреси тәрҹүмә етмәји хаһиш етдиләр. О, һәр ҝүн сәһәр тездән галхыб ҝедирди вә галдығымыз јерә ахшам чох ҝеҹ гајыдырдыг. Бал ајым Парисдә кечсә дә, Аланы чох вахт узагдан — сәһнәдә ҝөрүрдүм! Буна бахмајараг, әримин өз баҹы-гардашларына хидмәт етмәсинә чох шад идим вә шүбһә етмирдим ки, әҝәр Јеһова никаһымызда әсас јер тутарса, һәгигәтән дә хошбәхт олаҹағыг.

Әрә ҝедәндән сонра јени тәјинатым Белчика олду. Белчика һаггында јалныз ону билирдим ки, о, бир нечә мүһарибәнин дөјүш мејданы олмушду, лакин тезликлә белчикалыларын әксәријјәтинин сүлһсевәр инсанлар олдуғуну да өјрәндим. Мән һәм дә франсыз дилини өјрәнмәли олдум, чүнки бу, өлкәнин ҹәнубунда јашајан инсанларын доғма дили иди.

1955-ҹи илдә Белчикада тәхминән 4 500 тәблиғчи варды. Аланла мән һәм Бет-Елдә, һәм дә сәјјар хидмәтиндә тәхминән 50 ил чалышмышыг. Хидмәтә јени башлајанда биз ики ил јарым һәм јағышлы, һәм дә ҝүнәшли һавада велосипедлә тәпәләри ашмалы олмушуг. Бу илләр әрзиндә 2 000-дән чох һәмиманлымызын евиндә ҝеҹәләмишик! Мән, зәиф сағламлыгларына бахмајараг, вар-гүввәләри илә Јеһоваја хидмәт едән баҹы-гардашлара тез-тез раст ҝәлирдим. Онларын нүмунәси мәни хидмәти давам етдирмәјә тәшвиг едирди. Һәр һәфтәнин ахырында јығынҹаға баш чәкмәмиз сона чатанда өзүмүзү руһланмыш һисс едирдик (Ром. 1:11, 12). Алан әсл дост иди. Ваиз 4:9, 10 ајәләриндә јазылан сөзләр неҹә дә доғрудур: «Ики адам бир адамдан јахшыдыр... Әҝәр бири јыхылса, о бири јолдашыны галдырар»!

Һәјатым боју Јеһованы галам санмағымын ҝәтирдији хејир-дуалар

Илләр әрзиндә Алан вә мән башгаларына Јеһоваја хидмәт етмәјә көмәк етмәкдә чохлу севиндириҹи анлар јашамышыг. Мәсәлән, 1983-ҹү илдә Антверпенин франсыз јығынҹағына баш чәкирдик вә галдығымыз аилә Заирдән (инди Конго Демократик Республикасы) олан Бенҹамин Бандивиланы да гонаг етмишди. Бу ҝәнҹ гардаш Белчикаја али тәһсил алмаға ҝәлмишди. О бизә демишди: «Сиз һәјатынызы тамамилә Јеһоваја хидмәтә һәср етмисиниз, сизә һәсәд апарырам». Алан ҹаваб верди: «Бизә һәсәд апардығыны дејирсән, амма бу дүнјада карјера далынҹа гачырсан. Сәнә елә ҝәлмирми ки, сөзләриндә зиддијјәт вар?» Бу ачыг сөһбәтдән сонра Бенҹамин һәјаты һагда дүшүнмәјә башлады. Заирә гајыданда о, пионер хидмәтинә башлады, һал-һазырда филиал комитәсинин үзвүдүр.

Мән 1999-ҹу илдә гида борусунун хорасындан ҹәрраһијјә әмәлијјаты олундум. О вахтдан бәри чәким 30 килограмдыр. Мән сөзүн әсл мәнасында ‘сахсы габ’ кимијәм. Мәнә ‘ән үстүн гүдрәти’ вердији үчүн Јеһоваја чох миннәтдарам. Әмәлијјатдан сонра Јеһова мәнә јенә дә Аланы сәјјар хидмәтдә мүшајиәт етмәјә имкан верди (2 Кор. 4:7). О, 2004-ҹү илин мартында өлдү — јатды вә бир даһа ајылмады. Алан үчүн чох дарыхсам да, Јеһованын јаддашында олдуғуну билмәк мәнә тәсәлли верир.

Бу ҝүн мәним 83 јашым вар вә ҝери дөнүб таммүддәтли хидмәтдә кечирдијим 63 или јада салырам. Хидмәтдә һәлә дә фәалам, Мүгәддәс Китаб өјрәнмәси кечирирәм вә Јеһованын ҝөзәл нијјәти һаггында данышмаг үчүн һәр ҝүн имканлар ахтарырам. Бәзән өзүмдән сорушурам: «Әҝәр 1945-ҹи илдә пионер хидмәтинә башламасајдым, инди һәјатым неҹә оларды?» Зәиф сәһһәтим буну етмәмәк үчүн тутарлы сәбәб кими ҝөрүнүрдү. Лакин мән неҹә дә хошбәхтәм ки, ҹаван вахтымдан пионер хидмәтинә башламышам! Мән өз үзәримдә ҝөрмүшәм ки, әҝәр Јеһованы биринҹи јерә гојуругса, О бизим галамыз олаҹаг.

[Һашијәләр]

[18-ҹи сәһифәдәки шәкил]

Миссионер хидмәтимдәки әмәкдашым Астрид Андерсон (сағ тәрәфдә)

[18-ҹи сәһифәдәки шәкил]

Әримлә сәјјар хидмәтдә, 1956-ҹы ил

[20-ҹи сәһифәдәки шәкил]

2000-ҹи ил, Алан вә мән