Јеһова ‘Өз нурлу үзүнү онлара ҝөстәрди’

ИНСАНЫН үзүндә 30-дан чох әзәлә вар. Ади ҝүлүмсәмәдә 14 әзәлә һәрәкәт едир! Бир анлыға тәсәввүр един, бу әзәләләр олмаса, инсан данышанда ҹәлбедиҹи ҝөрүнәрдими? Чәтин ки. Анҹаг үз әзәләләри кар инсанлар үчүн тәкҹә сөһбәти мараглы етмир. Онлар физики һәрәкәтләрлә вәһдәтдә дүшүнҹә вә фикирләри ифадә етмәк үчүн чох ваҹиб рол ојнајыр. Бир чох инсанлар жест дили васитәсилә мүрәккәб фикрин һәр бир хырда чаларыны белә чатдырмағын мүмкүнлүјүнә һејран олурлар.

Бу јахынларда бүтүн дүнјада кар инсанлар истәнилән инсанын симасындан даһа ифадәли вә мәналы биз үз ҝөрдүләр. Мәҹази мәнада десәк, онлар Јеһованын ‘һүзуруна’ ҝәлдиләр, јәни Онун үзүнү ҝөрдүләр (Мәрс. 2:19). Бу һеч дә тәсадүф дејилди. Јеһова карлара даима мәһәббәт тәзаһүр етдириб. О һәтта гәдим Исраил халгынын дөврүндә белә онлара бу ҹүр јанашырды (Лев. 19:14). Онун карлара олан мәһәббәти мүасир дөврдә дә ҝөз габағындадыр. «[Аллаһ] истәјир ки, бүтүн инсанлар хилас олуб, һәгигәти дәрк етсинләр» (1 Тим. 2:4). Аллаһ һаггында дәгиг билијә јијәләнмәклә карларын чоху, демәк олар ки, Онун үзүнү ҝөрмүшдүр. Әҝәр онларын ешитмәк габилијјәти јохдурса, бу, неҹә мүмкүн ола биләр? Бу суала ҹаваб вермәздән өнҹә, ҝәлин ҝөрәк, жест дили кар инсанлар үчүн нә дәрәҹәдә әһәмијјәтлидир.

Ҝөрмәк ешитмәк демәкдир

Кар инсанлар вә жест дили һагда бир чох јанлыш тәсәввүрләр мөвҹуддур. Ҝәлин онлардан бәзиләринә ајдынлыг ҝәтирәк. Кар инсанлар автомобил сүрә билир. Додагдан охумаг онлар үчүн чох чәтиндир. Жест дилинин Брајл әлифбасы илә һеч бир әлагәси јохдур, ејни заманда бу садәҹә пантомима дејил. Бүтүн дүнјада үмуми бир жест дили мөвҹуд дејил. Һәтта бир өлкәдә белә, жест дилинин фәргли ләһҹәләри ола биләр.

Бәс карлар охумағы баҹарырлармы? Бәзиләри јахшы охудуғу һалда, бөјүк әксәријјәти охумагда чәтинлик чәкир. Нәјә ҝөрә? Чүнки јазы данышыг дилиндән әмәлә ҝәлир. Нүмунә үчүн ешитмәк габилијјәти олан ушағын дили неҹә өјрәндијини нәзәрдән кечирәк. Доғулдуғу ҝүндән о, јерли дилдә данышан инсанларын әһатәсиндә олур. Көрпә гыса мүддәт әрзиндә сөзләри бирләшдириб ҹүмлә гурмаг баҹарығына јијәләнир. Бу, башгаларынын данышдыгларыны ешитмәјин сајәсиндә тәбии олараг баш верир. Гулағы ешидән ушаг охумаға башлајанда әсас мәгсәд — китабын сәһифәләриндә ҝөрдүјү гара ишарәләрин она таныш олан сәсләри вә сөзләри неҹә вердијини өјрәнмәкдир.

Инди исә өзүнүзү хариҹи өлкәдә, сәс кечирмәјән шүшәли бир отагда тәсәввүр един. Сиз оранын әһалисинин данышдығы дили һеч заман ешитмәмисиниз. Һәр ҝүн јерли ҹамаат јаныныза ҝәләрәк шүшәнин о бири тәрәфиндән сизинлә данышмаға чалышыр, сиз исә онларын нә дедијини ешитмирсиниз. Садәҹә додагларынын тәрпәндијини ҝөрүрсүнүз. Сизин онлары баша дүшмәдијинизи анладыгда һәмин сөзләри кағыза јазыб сизә ҝөстәрирләр. Онлара елә ҝәлир ки, сиз јазыланлары баша дүшәҹәксиниз. Белә вәзијјәтдә нә едәрдиниз? Јәгин ки, сөһбәтин баш тутмајаҹағы гәнаәтинә ҝәләрдиниз. Нәјә ҝөрә? Чүнки кағызда јазыланлар һеч вахт ешитмәдијиниз бир дилдә јазылыб. Бир чох карлар да мәһз белә бир вәзијјәтдәдир.

Жест дили карлар үчүн әла үнсијјәт васитәсидир. Инсан жестләрдән истифадә едәрәк бәдәни әтрафында фикирләр гурур. Үз ифадәләри дә дахил олмагла, әл-гол вә бәдән һәрәкәтләри жест дилинин грамматикасы илә һәмаһәнҝдир. Беләликлә, информасијанын ҝөзә өтүрүлмәсини мүмкүн едән ҝөрүнән бир дил әмәлә ҝәлир.

Әслиндә, кар инсанын истәр әлләри, истәрсә дә бәдәни илә етдији, демәк олар ки, һәр бир һәрәкәтин вә үз ҹизҝисинин өз мәнасы вар. Үз ифадәләри садәҹә олараг инсанларда дәрин тәәссүрат бағышламаг үчүн дејил. Онлар жест дили грамматикасынын ајрылмаз һиссәсидир. Мәсәлән, гашларын галдырылмасы ја риторик суал верилдијини, ја да садәҹә «бәли» вә ја «јох» ҹавабы ҝөзләнилдијини билдирир. Гашларын ашағы салынмасы исә «ким?», «нә?», «һарада?», «нә заман?», «нә үчүн?» вә ја «неҹә?» кими суаллары ифадә едә биләр. Мүәјјән додаг һәрәкәтләри һәр һансы бир шејин өлчүсүнү вә ја һәрәкәтин интенсивлијини ҝөстәрә биләр. Бундан әлавә, кар инсанын чијинләрини галдырмасы, башыны вә јанагларыны тәрпәтмәси, ҝөзләрини гырпмасы кими һәрәкәтләрин һамысы фикрин инҹәликләрини чатдырыр.

Бүтүн бунлар һәмсөһбәтә мәлуматы чох ҝөзәл баша дүшмәјә көмәк едир. Жест дилини јахшы билән кар инсанлар бу зәнҝин үнсијјәт васитәсиндән истифадә едәрәк поетик дилдән тутмуш техники дилә, романтик дилдән тутмуш јумор һиссинә, конкрет фикирдән тутмуш мүҹәррәд анлајыша гәдәр истәнилән фикри верә билирләр.

Жест дилиндәки нәшрләр инсанларын һәјатыны дәјишир

Јеһова һаггында билик жест дилиндә кар инсана чатдырыланда, әслиндә, о, хәбәри ешидир вә бу хәбәрин Мүәллифинә ‘иман едир’. Буна ҝөрә дә Јеһованын Шаһидләри бүтүн дүнјада кар инсанлара тәблиғ етмәк вә онлары фајдалы вәсаитләрлә тәмин етмәк үчүн әлләриндән ҝәләни етмишләр (Ром. 10:14). Һал-һазырда бүтүн дүнјада жест дилинә тәрҹүмә едән 58 груп фәалијјәт ҝөстәрир вә бу дилдә әдәбијјатлар ДВД-дә 40 дилдә бурахылыр. Бәс ҝөрүлән бу ишләрин бир фајдасы вармы?

Валидејнләринин һәр икиси кар олан Ҹереми данышыр: «Јадымдадыр, атам “Ҝөзәтчи Гүлләси”нин садәҹә бир нечә абзасыны баша дүшмәк үчүн јатаг отағында саатларла вахт кечирирди. Гәфил отагдан чыхыб һәјәҹанла ишарә едирди: “Баша дүшдүм! Баша дүшдүм!” Сонра исә нә баша дүшдүјүнү мәнә изаһ едирди. О вахт мәним 12 јашым варды. Абзаслары дәрһал ҝөздән кечириб ишарә илә баша салырдым: “Ата, мәнҹә, бурада фикир башгадыр. Бурада...” О, мәнә ишарә илә дајан дејиб, абзаслары баша дүшмәк үчүн јенидән отағына гајыдарды. Мән онун үзүндәки мәјуслуғу, һәмчинин фикри баша дүшмәк үчүн јенидән отағына гајытдығыны ҝөрәндә кечирдијим севинҹ һиссини һеч вахт унутмајағаҹам. Анҹаг инди о, жест дилиндә ДВД-дә чыхан әдәбијјатлар сајәсиндә мәлуматы даһа ајдын баша дүшүр. Онун Јеһоваја олан һиссләрини ифадә едәркән үзүндәки севинҹи ҝөрмәк мәним үчүн бөјүк мәна кәсб едир».

Чилидә Јесенија адлы ҝәнҹ гадынла сөһбәт едән Јеһованын Шаһиди олан әр-арвадын һадисәсинә нәзәр салаг. Онлар ДВД-дә чыхан Чили жест дилиндә «Мүгәддәс Китаб һекајәләри»ни Јесенијаја ҝөстәрмәк үчүн анасындан иҹазә алдылар. Сонра нәләрин баш вердији һагда онлар дејирләр: «Јесенија һекајәләрә бахмаға башлајанда әввәлҹә ҝүлдү, сонра исә ағлады. Анасы ондан нијә ағладығыны сорушанда о, бахдығы шејләрин хошуна ҝәлдијини деди. О заман анасы анлады ки, о, ДВД-дә ҝөрдүјү һәр шеји баша дүшүб».

Венесуеланын кәнд јериндә јашајан ҹүтлүјүн бир өвлады варды вә гадын икинҹи ушаға һамилә иди. Икинҹи ушағы сахламаға имканлары чатмадығындан аборт етдирмәк гәрарына ҝәлдиләр. Бу вәзијјәтдән бихәбәр олан Јеһованын Шаһидләри онлара баш чәкәндә Венесуела жест дилиндә «Аллаһ биздән нә тәләб едир?» адлы видеоброшүранын 12-ҹи дәрсини ҝөстәрдиләр. Бу дәрсдә Аллаһын аборта вә гатиллијә даир нөгтеји-нәзәри изаһ олунур. Сонра һәмин гадын Шаһидләрә бу дәрси онунла мүзакирә етдикләринә ҝөрә өз миннәтдарлығыны билдирди. О деди ки, бундан сонра онлар аборт етдирмәк фикриндән дашындылар. ДВД-дә жест дилиндә чыхан әдәбијјатын сајәсиндә доғулмамыш бир көрпәнин һәјаты гуртулду!

Кар баҹымыз Лоррејн дејир: «Мүгәддәс Китабы өјрәнмәк үчүн баш сындырмаг лазым ҝәлирди. Һәр шеји там баша дүшә билмирдим. Мүгәддәс Китаб һәгигәтләри жест дилиндә чыхмаға башлајанда һәр шеј јербәјер олду». 38 илдир ки, Јеһованын Шаһиди олан кар гардашымыз Ҹорҹ сөјләјир: «Шүбһәсиз ки, инсан һәр һансы мәсәләни өзү баша дүшәндә бу, мүәјјән гәдәр өзүнә һөрмәт вә әминлик һисси һасил едир. Мән һисс едирәм ки, жест дилиндә олан ДВД-ләрин руһани инкишафымда мүстәсна ролу олмушдур».

‘Нәһајәт, доғма дилимдә јығынҹаг ҝөрүшләри!’

Жест дилиндәки нәшрләрдән әлавә, Јеһованын Шаһидләри бу дилдә јығынҹаглар да тәшкил етмишләр. Һал-һазырда дүнјада жест дилиндә 1 100-дән чох јығынҹаг мөвҹуддур. Кар инсанлара өз дилләриндә мүраҹиәт едилир вә Мүгәддәс Китаб һәгигәтләри онларын дүшүндүкләри дилдә — жест дилиндә тәгдим олунур. Бу биликләр онларын мәдәнијјәтинә вә һәјат тәҹрүбәсинә һөрмәтҹил тәрздә чатдырылыр.

Жест дилиндә јығынҹаглар тәшкил етмәјин бир нәтиҹәси олдуму? 1955-ҹи илдә Јеһованын Шаһиди кими вәфтиз олунан Сирилин нүмунәсинә бахаг. О, чап олунмуш нәшрләри чох илләр әрзиндә чалышганлыгла арашдырыр вә мүнтәзәм олараг јығынҹаг ҝөрүшләриндә иштирак едирди. Јығынҹагда бәзән жест дилинә тәрҹүмә олур, бәзән исә олмурду. Тәрҹүмә етмәјә адам олмајанда әлаҹы сәһнәдән дејиләнләри кағыза јазыб она ҝөстәрән гајғыкеш баҹы-гардашлара галырды. 1989-ҹу илдә Нју-Јоркда илк жестдилли јығынҹаг тәшкил олунанда о артыг 34 ил иди ки, һәгигәтдә иди. Һәмин јығынҹағын бир үзвү кими, Сирил өзүнү неҹә һисс едирди? О дејир: «Бу, зүлмәт гаранлыгдан ишыға чыхмаға бәнзәјирди. Нәһајәт ки, доғма дилимдә јығынҹаг ҝөрүшләри кечирилир!»

Јеһованын Шаһидләринин тәшкил етдији жест дилиндәки јығынҹагларда кар инсанлар Аллаһ һаггында өјрәнмәк вә Она ибадәт етмәк үчүн мүнтәзәм олараг топлашырлар. Орада Аллаһын халгы емосионал ҹәһәтдән чичәкләнир. Ешидән вә данышан инсанлар арасында өзләрини тәҹрид олунмуш һисс едән бу инсанлар үчүн јығынҹаглар үнсијјәт етмәк вә достлуг гурмаг үчүн әсил ҹәннәтдир. Белә мүһитдә кар инсанлар өјрәнир, пүхтәләшир вә Јеһоваја хидмәтләрини ҝенишләндирмәјә ҹан атырлар. Онлардан бир чоху таммүддәтли хидмәт едә билирләр. Бәзиләри башга өлкәләрә көчүрләр ки, кар инсанлара Јеһова һаггында өјрәнмәјә көмәк етсинләр. Кар гардашлар баҹарыглы мүәллим, тәшкилатчы вә ағсаггал олмағы өјрәнир, бунун сајәсиндә дә онлардан чохлары јығынҹагда үзәрләринә мәсулијјәт ҝөтүрмәк үчүн јарарлы олурлар.

Бирләшмиш Штатларда жест дилиндә 100-дән артыг јығынҹаг вә тәхминән 80 груп фәалијјәт ҝөстәрир. Бразилијада жест дилиндә һарадаса 300-ә јахын јығынҹаг вә 400-дән артыг груп вар. Мексикада бу јығынҹагларын сајы 300-ә чатыр. Русијада исә жест дилиндә 30-дан чох јығынҹаг вә 113 груп фәалијјәт ҝөстәрир. Бу, бүтүн дүнјада баш верән инкишафа даир садәҹә бир нечә нүмунәдирa.

Јеһованын Шаһидләри жест дилиндә хүсуси бирҝүнлүк, рајон вә вилајәт конгресләри дә кечирирләр. Кечән ил бүтүн дүнјада бир чох жест дилләриндә 120-дән артыг вилајәт конгреси кечирилмишдир. Бу һадисәләр кар баҹы-гардашлара өзләрини руһани гиданы вахтлы-вахтында алан үмумдүнја мәсиһчи гардашлығынын бир һиссәси олдугларыны һисс етмәјә көмәк едир.

25 илдир ки, Јеһованын Шаһиди олан кар гардашымыз Леонард дејир: «Јеһованын һәгиги Аллаһ олдуғуна һәмишә инанмышам. Лакин Онун әзаб-әзијјәтләрә нәјә ҝөрә јол вердијини һеч ҹүрә баша дүшә билмирдим. Һәтта буна ҝөрә бәзән Она һиддәтләнирдим. Анҹаг жест дилиндә кечирилән вилајәт конгресинин чыхышларынын бириндән, нәһајәт, бунун сәбәбини анладым. Чыхышдан сонра арвадым мәни дирсәкләјиб сорушду: “Гане олдун?” Раһат нәфәс алыб дедим: “Һә!” 25 ил әрзиндә Јеһованы тәрк етмәдијимә ҝөрә чох шадам. Үрәјимдә һәмишә Аллаһа мәһәббәтим олуб, анҹаг әввәлләр Ону там баша дүшә билмирдим. Бу ҝүн исә баша дүшүрәм!»

Үрәкдән миннәтдар оланлар

Кар инсанлар Јеһова һаггында өјрәнәндә Онун үзүндә һансы «ифадәни» ҝөрүрләр? Бу, мәһәббәт, шәфгәт, әдаләт, сәдагәт, севҝи долу хејирхаһлыг вә саирә кими хүсусијјәтләрдир.

Бүтүн дүнјада Јеһованын Шаһидләринин арасында олан кар инсанлар һал-һазырда Јеһованын үзүнү ҝөрүрләр вә онлар буну ҝет-ҝедә даһа ајдын ҝөрәҹәкләр. Үрәјиндә карлара гаршы мәһәббәт һисси олан Јеһова ‘Өз нурлу үзүнү онлара ҝөстәрди’ (Сај. 6:25). Кар олан бу баҹы-гардашларымыз Јеһованы таныдыгларына ҝөрә неҹә дә миннәтдардырлар!

[Һашијә]

[25-ҹи сәһифәдәки шәкил]

Һал-һазырда бүтүн дүнјада жест дилиндә 1 100-дән чох јығынҹаг мөвҹуддур

[26-ҹы сәһифәдәки шәкил]

Јеһова Өз нурлу үзүнү карлара ҝөстәрди