Ҝәлин кар баҹы-гардашларымызы гијмәтләндирәк!

АЛЛАҺЫН мүасир халгы башланғыҹыны гәдим дөврләрин киши вә гадынларындан ҝөтүрән вә руһани баҹы-гардашлардан ибарәт бөјүк бир аиләдир. Бу сијаһыја Шамуел, Давуд, Шимшон, Рахав, Муса, Ибраһим, Сара, Нуһ вә Һабил дахилдир. Јеһованын садиг хидмәтчиләри арасында чохлу кар баҹы-гардашлар да вар. Мәсәлән, Монголустанда Јеһованын Шаһиди олан илк ики нәфәр кар әр-арвад олмушдур. Русијадакы кар һәмиманлыларымызын нөгсансызлығы сајәсиндә исә Авропа Инсан Һүгуглары Мәһкәмәсиндә гәләбә газанмышыг.

Бизим ҝүнләрдә «садиг вә ағыллы гул» синфи жест дилиндә нәшрләр бурахыр, еләҹә дә јығынҹаг ҝөрүшләри вә конгресләр тәшкил едир (Мат. 24:45). Кар баҹы-гардашлар бундан бөјүк фајда әлдә етмишләрa. Бәс сән һеч дүшүнмүсәнми ки, бунлар олмајанда бу баҹы-гардашлар һәгиги Аллаһ һаггында неҹә өјрәнир вә һәгигәтдә неҹә тәрәгги едирдиләр? Вә сән сизин әразидә јашајан кар инсанлара неҹә көмәк едә биләрсән?

Жест дилиндә јығынҹаг вә нәшрләр олмајанда

Нәјә ҝөрә јашлы кар баҹы-гардашлардан һәгигәтә неҹә ҝәлдикләрини сорушмајасан? Онлар сәнә Аллаһын адынын олдуғуну өјрәнәндә һансы һиссләри кечирдикләри барәдә даныша биләрләр. Мәсәлән, онлар тәкҹә бу һәгигәтин онларын һәјатыны неҹә дәјишдији вә даһа дәрин Мүгәддәс Китаб һәгигәтләрини жест дилиндә өјрәнмәјә көмәк едән видеокасетләр вә ја ДВД-ләр мејдана ҝәләнәдәк илләр әрзиндә онлара неҹә көмәк етдији илә бөлүшә биләрләр. Онлар мәсиһчи ҝөрүшләри жест дилиндә кечирилмәјәндә вә ја бу дилә тәрҹүмә олунмајанда вәзијјәтин неҹә олдуғуну изаһ едә биләрләр. Әввәлләр кимсә онларын јанында әјләшир вә сәһнәдән дејиләнләри баша дүшмәләри үчүн кағыза јазыб онлара ҝөстәрирди. Бир кар гардаш јығынҹаг ҝөрүшләри жест дилинә тәрҹүмә олунмаға башлајана гәдәр једди ил әрзиндә Мүгәддәс Китабы бу ҹүр өјрәнмишдир.

Бир јашлы кар гардаш јығынҹағын диҝәр үзвләри илә бирҝә ешидән инсанлара неҹә тәблиғ етдијини хатырлајыр. Онлар бир әлләриндә евдән-евә тәблиғ етмәк үчүн үзәриндә садә тәгдимә јазылмыш вәрәгәни, диҝәр әлләриндә исә «Ҝөзәтчи Гүлләси» вә «Ојанын!» журналынын сон сајыны тутурдулар. Өзләринин дә јахшы баша дүшмәдикләри нәшрләр васитәсилә диҝәр кар инсанлара Мүгәддәс Китабы өјрәтмәк онлар үчүн әсил сынаг иди. Јашлы кар тәблиғчиләр Мүгәддәс Китаб һәгигәтләрини баша дүшмәдикләри, буна ҝөрә дә башгаларына бу һәгигәтләри чатдыра билмәдикләри үчүн нә гәдәр мәјус олдугларыны, јәгин ки, хатырлајырлар. Һәмчинин Јеһоваја дәрин мәһәббәт бәсләмәјин, ејни заманда өјрәндикләрини дүзҝүн тәтбиг едиб-етмәдикләринә әмин олмамағын нә демәк олдуғу онлара јахшы танышдыр. Нәјә ҝөрә? Чүнки онлар мүәјјән шејләри дүзҝүн баша дүшдүкләринә әмин дејилдиләр.

Бүтүн бу чәтинликләрә бахмајараг, кар баҹы-гардашларымыз нөгсансызлыгларыны горујуб сахламышлар (Әјј. 2:3). Онлар сәбирлә Јеһованы ҝөзләмишләр (Мәз. 37:7). Инди Јеһова онлары ҝөзләдикләриндән даһа артыг хејир-дуаландырыр.

Ҝәлин ҝөрәк, аилә башчысы олан бир кар гардаш жест дилиндә видеофилмләр чыхмамышдан өнҹә, аиләви өјрәнмә кечирмәк үчүн неҹә сәј ҝөстәрирди. О, һәмишә бу мәсәләдә рәһбәрлији өз үзәринә ҝөтүрүрдү. Онун оғлу хатырлајыр: «Аиләви өјрәнмә кечирмәк һәмишә атам үчүн чәтин иди, чүнки о, һәр шеји чап олунмуш нәшрләрин әсасында өјрәтмәли олурду. Чох вахт о, јазыланлары там баша дүшмүрдү. Биз ушаглар онун ишини даһа да гәлизләшдирирдик. О, нәјисә дүзҝүн изаһ етмәјәндә дәрһал сәһвини тутурдуг. Бунлара бахмајараг, о, аиләви өјрәнмәни һеч вахт тәхирә салмырды. О баша дүшүрдү ки, бизим Јеһова һаггында нәсә өјрәнмәјимиз даһа ваҹибдир, нәинки онун бәзән инҝилис дилини баша дүшмәдији үчүн мәјус олмасы».

Ҝәлин һәмчинин Бруклиндә (Нју-Јорк, АБШ) јашајан 70 јашларында, ејни заманда кар вә кор олан Ричардын нүмунәсинә бахаг. Онун јығынҹағында һамыја мәлумдур ки, Ричард һеч бир ҝөрүшү бурахмыр. О, јығынҹаға метро илә ҝәлир вә һансы стансијада дүшәҹәјини билмәк үчүн дајанаҹаглары бир-бир сајыр. Бир гыш ҝүнү човғун олдуғундан ҝөрүш тәхирә салынмышды. Јығынҹагдакыларын һамысына бу барәдә хәбәр верилсә дә, нәјә ҝөрәсә Ричард јаддан чыхмышды. Гардашлар буну биләндә ону ахтармаға башладылар вә ону Падшаһлыг Залынын гапысынын ағзында сәбирлә ҝөзләјән тапдылар. Белә човғунда нәјә ҝөрә чөлә чыхдығыны сорушанда о ҹаваб верди: «Чүнки мән Јеһованы севирәм».

Сән нә едә биләрсән?

Сизин әразидә кар инсанлар јашајырмы? Онларла үнсијјәт етмәк үчүн сән жест дилини өјрәнә биләрсәнми? Адәтән, кар инсанлар башгаларына өз дилләрини өјрәдәркән нәзакәтли вә сәбирли олурлар. Хидмәтдә вә ја башга јердә онлара раст ҝәләндә сөһбәт етмәјә чалыш. Бу заман жестләрдән, гејдләрдән, тәсвирләрдән, шәкилләрдән, јахуд бунларын һамысындан истифадә едә биләрсән. Инсан һәгигәтә мараг ҝөстәрмәсә дә, кар олан вә ја жест дилини билән мәсиһчијә бу һагда мәлумат вер. Хош хәбәр жест дилиндә чатдырыланда бу, кар инсан үчүн даһа ҹәлбедиҹи олур.

Ола билсин, сән жест дилини өјрәнир вә жестдилли јығынҹаға ҝедирсән. Бәс сән бу дилдә данышмаг вә ону баша дүшмәк баҹарығыны неҹә јахшылашдыра биләрсән? Әҝәр јығынҹағында сәндән башга ешидән тәблиғчиләр варса, јахшы оларды ки, онларла да жест дилиндә үнсијјәт едәсән. Бу, сәнә жест дилиндә дүшүнмәјә көмәк едәҹәк. Һәрдән сәндә өз фикирләрини сөзлә ифадә етмәк истәји јарана биләр, чүнки бу даһа асан ҝөрүнә биләр. Лакин һансыса дилдә сәлис данышмаға мүвәффәг олмаг үчүн сәбир тәләб олундуғу кими, бу дили өјрәнәркән дә сәбирли олмаг тәләб олунур.

Биз жест дилиндә данышмаг үчүн әлимиздән ҝәләни едәндә кар баҹы-гардашларымыза мәһәббәт вә һөрмәт ҝөстәрмиш олуруг. Ишдә вә ја мәктәбдә инсанлары баша дүшмәдикләри үчүн карларын һәр ҝүн кечирдикләри мәјуслуг һиссини тәсәввүр ет. Бир кар гардаш дејир: «Мән һәр ҝүн данышан инсанларын әһатәсиндә олурам. Чох вахт өзүмү лазымсыз һисс едирәм вә тәнһалыг һисси ҝет-ҝедә дахилимдә бөјүјүр вә буна ҝөрә дә гәзәбләнир, һәтта өзүмдән чыхырам. Һәрдән һансы һиссләри кечирдијими сөзлә ифадә етмәк мүмкүн олмур». Јығынҹагларымыз кар баҹы-гардашларымызын руһани гида алдыглары, хош үнсијјәтдән вә достлугдан мәмнунлуг дујдуглары бир ваһә олмалыдыр (Јәһ. 13:34, 35).

Һәр һансы бир јығынҹағын нәздиндә олан кичик жестдилли груплар да нәзәрдән гачмајыб. Ҝөрүшләр онлар үчүн тәрҹүмә олунур. Сәһнәдән дејиләнләри там баша дүшмәк үчүн онлар өн сыраларда әјләширләр. Бунун сајәсиндә онлар һәм тәрҹүмәчини, һәм дә натиги ајдын ҝөрә билирләр. Тәҹрүбә ҝөстәрир ки, јығынҹағын диҝәр үзвләри буна тез алышыр вә бу, онлара мане олмур. Програмлары жест дилинә тәрҹүмә олунан конгресләр дә белә кечир. Жест дилинә тәрҹүмә едән чалышган баҹы-гардашлар тәрифә лајигдирләр, чүнки онлар мәлуматы мәналы, тәбии вә баша дүшүлән тәрздә чатдырырлар.

Ола билсин, сизин јығынҹағын нәздиндә жестдилли груп вар, јахуд ҝөрүшләр јығынҹаға ҝәлән азсајлы кар инсанлар үчүн тәрҹүмә олунур. Кар баҹы-гардашларымызын гајғысына галдығыны неҹә ҝөстәрә биләрсән? Онлары өз евинә дәвәт ет. Әҝәр мүмкүндүрсә, бир нечә жест өјрән. Гој үнсијјәтдә јаранан манеәләр сәни горхутмасын. Сиз үнсијјәт етмәјин јолларыны тапаҹагсыныз вә белә мәһәббәт ҝөстәрмәјин сајәсиндә јаддашларда хош хатирәләр галаҹаг (1 Јәһ. 4:8). Кар һәмиманлыларымызла үнсијјәтдә олмаг олдугҹа мараглыдыр. Онлар мараглы һәмсөһбәт олмагла јанашы, дәрин анлајыша вә ҝөзәл јумор һиссинә дә маликдирләр. Һәр ики валидејни кар олан бир гардаш дејир: «Өмрүм боју кар инсанларын әһатәсиндә олмушам вә онларын мәнә вердикләринин әвәзини һеч вахт өдәјә билмәјәҹәјәм. Биз кар баҹы-гардашларымыздан чох шеј өјрәнә биләрик».

Јеһова, карлар да дахил олмагла, Она садиг галан хидмәтчиләрини севир. Онларын иман вә дөзүм нүмунәләри, сөзсүз ки, Јеһованын тәшкилатыны зәнҝинләшдирир. Буна ҝөрә дә ҝәлин кар баҹы-гардашларымызы гијмәтләндирәк!

[Һашијә]

[31-ҹи сәһифәдәки шәкил]

Падшаһлыг һаггында хош хәбәр жест дилиндә чатдырыланда кар инсан үчүн даһа ҹәлбедиҹи олур

[32-ҹи сәһифәдәки шәкил]

Јығынҹагларымыз кар баҹы-гардашларымыза руһани тәравәт ҝәтирән бир ваһә олмалыдыр