Бир вахтлар олдуғу кими, хидмәтини јенидән бәрпа едә биләрсәнми?
НӘ ВАХТСА мәсиһчи јығынҹағында мәсул мөвге тутмусанмы? Ола билсин, сән хидмәти көмәкчи вә ја ағсаггал кими хидмәт етмисән. Јахуд да ола билсин, сән вахтилә таммүддәтли хидмәтин һансыса нөвүндә олмусан. Шүбһәсиз, тәјинатын сәнә севинҹ вә дәрин мәмнунлуг ҝәтирирди, анҹаг сонралар мүәјјән сәбәбләр уҹбатындан хидмәтини дајандырмалы олмусан.
Ола билсин, сән буну аилә үзвләринин гајғысына галмаг мәгсәдилә етмисән. Буна сәбәб јаш вә ја зәиф сағламлыг да ола биләр. Бу кими гәрарлар гәбул етмәк һеч дә зәифлијин әламәти дејил (1 Тим. 5:8). Биринҹи әсрдә јашамыш Филип миссионер кими хидмәт едирди, лакин сонралар аиләсинин гејдинә галмаг үчүн Гејсәријәјә көчмәли олду (Һәв. иш. 21:8, 9). Гәдим Исраилин падшаһы Давуд аһыл јашларында оланда оғлу Сүлејманы тахта чыхардараг хәләфи тәјин етди (1 Пад. 1:1, 32-35). Бунунла белә, Јеһова Филипи вә Давуду јенә дә севир вә гијмәтләндирирди. Һәтта онлара бу ҝүн дә бир чохлары һөрмәт едир.
Лакин, ола билсин, сәнә һәвалә олунан мәсулијјәтләр әлиндән алыныб. Бәлкә, буна сәбәб һансыса дүшүнҹәсиз һәрәкәт, јахуд аилә проблеми олуб? (1 Тим. 3:2, 4, 10, 12). Һәтта, еһтимал ки, сән бу гәрарын әдаләтсиз олдуғуну дүшүнүрсән вә инҹиклијин һәлә дә кечмәјиб.
Хидмәтә јенидән һәвәс ҝөстәр
Бәс бир кәрә итирилән тәјинаты бир даһа гајтармаг олармы? Бу, бир чох һалларда мүмкүндүр. Лакин хидмәти јенидән бәрпа етмәк үчүн, илк нөвбәдә, сән өзүн һәвәс ҝөстәрмәлисән (1 Тим. 3:1). Бәс буну нәјә ҝөрә арзуламаг лазымдыр? Өзүнү Аллаһа һәср етдијин сәбәбә, јәни Јеһованы вә Она хидмәт едәнләри севдијинә ҝөрә. Әҝәр сән јенидән хидмәт етмәклә мәһәббәт ҝөстәрмәјә һазырсанса, бу, Јеһоваја имкан верәҹәк ки, сәнин тәјинатыны итирмәздән өнҹәки вә сонракы тәҹрүбәндән истифадә етсин.
Исраиллиләр һаглы олараг хидмәт етмәк шәрәфиндән мәһрум олдугдан сонра Јеһованын онлара вердији әминлији јадына сал. Онун Кәламында дејилир: «Мән Рәббәм [Јеһовајам] вә һеч вахт дәјишмирәм. Сиз бунун үчүн мәһв олмадыныз, еј Јагуб өвладлары!» (Мал. 3:6). Јеһова исраиллиләри севир вә онлардан сонра да истифадә етмәк арзусунда иди. Јеһова ҝәләҹәкдә сәндән дә истифадә етмәк истәјир. Индики вәзијјәтиндә сән нә едә биләрсән? Теократијанын марагларына хидмәт етмәк үчүн фитри истедаддан чох Јеһова илә јахшы мүнасибәт тәләб олунур. Буна ҝөрә дә јығынҹагда әлавә мәсулијјәтләрин олмадығы үчүн диггәтини руһанилијини мөһкәмләндирмәјә ҹәмлә.
Иманда ‘мөһкәм олмаг’ үчүн сән ‘Рәбби, Онун гүввәтини арамалысан’ (1 Кор. 16:13; Мәз. 105:4). Бунун үчүн үрәкдән Она дуа ет. Вәзијјәтин һаггында Јеһоваја данышанда үрәјини Она бошалт вә мүгәддәс руһ дилә. Бунун сајәсиндә Јеһоваја јахынлашаҹаг вә мөһкәмләнәҹәксән (Мәз. 62:8; Филип. 4:6, 13). Руһанилијимизи мөһкәмләндирмәјин диҝәр үсулу шәхси өјрәнмәмизин кејфијјәтини јахшылашдырмагдыр. Һал-һазырда мәсулијјәтләрин аз олдуғундан, ола билсин, әввәлләр риајәт етмәјә чәтинлик чәкдијин графики бәрпа етмәклә шәхси вә аиләви өјрәнмә кечирмәкдә даһа чох шејләрә наил ола биләҹәксән.
Әлбәттә, Јеһованын Шаһиди кими, сән һәлә дә Онун тәмсилчисисән (Јешаја 43:10-12). ‘Аллаһын јанында әмәкдашлар’ олмаг бизим үчүн ән үстүн шәрәфдир (1 Кор. 3:9). Тәблиғ хидмәтиндә даһа фәал иштирак етмәк һәм өзүмүзүн, һәм дә әмәкдашларымызын руһанилијини мөһкәмләндирмәјин ән јахшы үсулудур.
Һиссләринин өһдәсиндән ҝәл
Мәсулијјәтләрини итирдикдән сонра сәндә хәҹаләт вә тәәссүф һисси, јахуд өз һәрәкәтләринә бәраәт газандырмаг мејили јарана биләр. Лакин әҝәр мәсул гардашлар өзүнү мүдафиә етмәк үчүн дедикләрини динләдикдән сонра да сәнин мүәјјән хидмәт нөвүндә гала билмәјәҹәјинә гәрар верибләрсә, онда неҹә? Гардашлара гаршы мәнфи һиссләр сәндә јенидән мәсулијјәтләрә ҹан атмаг һәвәсини өлдүрә вә бу һадисәдән өзүнә дәрс ҝөтүрмәјә мане ола биләр. Ҝәлин Әјјубун, Менашшенин вә Јусифин нүмунәсинин мәнфи һиссләрин өһдәсиндән ҝәлмәјә неҹә көмәк етдијини нәзәрдән кечирәк.
Әјјуб патриархал ҹәмијјәтдә башгаларыны Јеһованын гаршысында тәмсил едир, ел арасында ағсаггал вә һаким кими танынырды (Әјј. 1:5; 29:7-17, 21-25). Сонра һәјатынын ән фираван дөврүндә Әјјуб вар-дөвләтини, ушагларыны вә сағламлығыны итирди. Бунунла јанашы, о, башгаларынын јанында газандығы ад-саныны да итирди. О деди: «Јашҹа мәндән кичикләр мәнә лағ едирләр» (Әјј. 30:1).
Әјјуб һеч бир нөгсаны олмадығыны дүшүнүр вә Аллаһ гаршысында өзүнә бәраәт газандырмаға чалышырды (Әјј. 13:15). Бунунла белә, о, Јеһованы ҝөзләмәјә һазыр иди вә буна ҝөрә хејир-дуаланды. О, хүсусилә дә мәруз галдығы сынаглара гаршы мүнасибәтини дүзәлтмәли олдуғуну анлады (Әјј. 40:6-8; 42:3, 6). Әјјуб һәлим олдуғу үчүн Аллаһ ахырда ону бол-бол хејир-дуаландырды (Әјј. 42:10-13).
Әҝәр сән мәсулијјәтләрини өз ҝүнаһын уҹбатындан итирмисәнсә, сән нараһат ола биләрсән: «Ҝөрәсән, Јеһова вә мәсиһчи гардашларым мәни һәгигәтән дә бағышлајыб оланлары унудаҹаглармы?» Ҝәлин Јәһуда падшаһы Менашшенин нүмунәсини нәзәрдән кечирәк. О, «Рәббин ҝөзүндә чохлу пис ишләр ҝөрәрәк Ону гәзәбләндирди» (2 Пад. 21:6). Буна бахмајараг, Менашше сонда иманлы бир инсан вә идарә едән падшаһ кими өлдү. Бу, неҹә баш верди?
Әввәл-ахыр Менашше она верилән ҹәза тәдбирини гәбул етди. О, хәбәрдарлыглара мәһәл гојмајанда Јеһова ону гандаллајыб узаг Бабилә сүрҝүн едән ассуријалылары она гаршы галдырды. Менашше орада «Аллаһы Рәббә јалварды вә аталарынын Аллаһы өнүндә өзүнү чох алчалтды, Аллаһа дуа етди». Менашшенин үрәкдән ҝәлән бу сәмими төвбәси ону дүзәлмәјә тәшвиг етди вә о, нәтиҹәдә, бағышланды (2 Салн. 33:12, 13).
Итирдијимиз мәсулијјәтләри чох надир һалларда бир дәфәјә бәрпа етмәк мүмкүндүр. Лакин сәнә тәдриҹән аз-аз мәсулијјәтләр тапшырыла биләр. Онлары гәбул едиб јеринә јетирмәк үчүн әлиндән ҝәләни етсән, ҝәләҹәкдә даһа бөјүк мәсулијјәтләр ала биләрсән. Бу һеч дә о демәк дејил ки, һәр шеј асан олаҹаг. Бу јолда әнҝәлләрлә растлаша биләрсән. Бүтүн бунлара бахмајараг, һазыр вә дәјанәтли олмаг јахшы сәмәрәләр ҝәтирир.
Нүмунә үчүн Јагубун оғлу Јусифи ҝөтүрәк. 17 јашында оланда Јусиф гардашлары тәрәфиндән һагсыз олараг көләлијә сатылмышды (Јар. 37:2, 26-28). О, гардашлары тәрәфиндән белә бир мүнасибәти һеч ҝөзләмирди. Буна бахмајараг, о, дүшдүјү вәзијјәтә ујғунлашмаға һазыр иди вә Јеһованын хејир-дуасы сајәсиндә ‘ағасынын евиндә галды’ (Јар. 39:2). Сонра Јусиф һәбсә атылды. Лакин о, садиг галдығындан Јеһова онунла иди, буна ҝөрә дә, нәтиҹәдә, һәбсхана ишләри она тапшырылды (Јар. 39:21-23).
Јусиф бүтүн бу һадисәләрин мүәјјән мәгсәдә хидмәт етдијини билмирди. О садәҹә әлиндән ҝәләни етмәјә давам едирди. Јеһова ондан истифадә едәрәк Өвлада апаран нәсил шәҹәрәсини горуду (Јар. 3:15; 45:5-8). Бизләрдән һеч ким Аллаһын нијјәтиндә Јусиф кими ваҹиб рол ојнајаҹағыны ҝөзләмәсә дә, бу һадисә ҝөстәрир ки, хидмәтчиләринин мәсулијјәтләр алмасы үчүн Јеһова Өзү шәхсән гајғы ҝөстәрир. Јусифи тәглид етмәклә Јеһованын сәнә дә мәсулијјәтләр һәвалә етмәсинә шәраит јарат.
Аҹы тәҹрүбәдән дәрс ҝөтүр
Әјјуб, Менашше вә Јусиф ағыр сынагларла үзләшдиләр. Онларын һәр бири Јеһованын јол вердији сынагларла барышараг өзләринә ибрәт дәрси ҝөтүрдү. Бәс сән өзүнә һансы дәрси ҝөтүрә биләрсән?
Јеһованын сәнә нә өјрәтмәк истәдијини ҝөрмәјә чалыш. Мәјуслугла мүбаризә апаран Әјјуб диггәтини өзүнә ҹәмләмиш вә даһа ваҹиб шејләри нәзәрдән гачырмышды. Амма Јеһованын мәһәббәтлә дүзәлиш вермәси сајәсиндә о: «Билмәдијим шејләрдән... данышдым»,— дејә етираф едәрәк јенидән һәр шејә таразлы бахмаға башлады (Әјј. 42:3). Әҝәр сән мәсулијјәтләрини итирдијинә ҝөрә инҹимисәнсә, ‘өзүнә лүзумундан чох әһәмијјәт вермә; лакин Аллаһын һәр кәсә вердији иманын һәҹминә ҝөрә, тәмкинлиликлә дүшүн’ (Ром. 12:3). Ола билсин, Јеһова сәнә там анламадығын тәрздә дүзәлиш вермәјә чалышыр.
Ҹәзаны гәбул ет. Ола билсин, Менашше әввәлҹә алдығы ҹәзаја лајиг олмадығыны фикирләширди. Лакин о, буну гәбул едиб төвбә етди вә пис јолундан әл чәкди. Алдығын ҹәзаја неҹә мүнасибәт ҝөстәрмәјиндән асылы олмајараг, ‘Аллаһын ҝүҹлү әлинин һимајәси алтында тәвазөкар ол ки, О Өз вахтында сәни уҹалтсын’ (1 Пет. 5:6; Јаг. 4:10).
Сәбирли вә өјрәнмәјә һазыр ол. Јусифин башына ҝәләнләр онда асанлыгла нифрәт вә гисас алмаг һисси јарада биләрди. Лакин о, анлајышлы вә мәрһәмәтли олмағы өјрәнди (Јар. 50:15-21). Әҝәр мәјус олмусанса, сәбирли ол. Јеһованын вердији өјүд-нәсиһәти гәбул ет.
Мәсиһчи јығынҹағында нә вахтса мәсулијјәтләрин олубму? Јеһованын ҝәләҹәкдә дә сәнә мәсулијјәтләр һәвалә етмәсинә јол вер. Руһанилијини мөһкәмләндир. Сәбир вә һәлимлик ҝөстәрәрәк һиссләрини ҹиловла. Сәнә верилән һәр бир тапшырығы ҹанла-башла јеринә јетир. Әмин ол ки, Јеһова «хејирхаһлығыны дүз јолла ҝедәнләрдән әсирҝәмир» (Мәз. 84:11).
[30-ҹу сәһифәдәки јазы]
Сидги-үрәкдән дуа едәрәк иманыны мөһкәмләндир
[31-ҹи сәһифәдәки шәкил]
Тәблиғ хидмәтиндә даһа фәал иштирак етмәк руһанилијимизи мөһкәмләндирмәјин ән јахшы үсулудур
[32-ҹи сәһифәдәки шәкил]
Јеһованын ҝәләҹәкдә сәнә мәсулијјәтләр һәвалә етмәсинә јол вер