Аллаһа јахынлашын
Јеһова Аллаһын үрәји јумшалды
УШАГЛЫГДАН Аллаһын ганунларына әсасән тәрбијә олунмуш, лакин сонрадан онлара ујғун јашамаға сон гојан бир нәфәр етираф едир: «Мән өзүмү лазымсыз һисс едирдим». О, һәјат тәрзини дәјишмәк үчүн аддымлар атмаға башлајанда Аллаһын ону һеч вахт бағышламајаҹағындан горхурду. Амма ҝүнаһларындан төвбә етмиш бу инсан Мүгәддәс Китабын 2 Салнамәләр 33:1—17 ајәләриндә һаггында бәһс олунан Менашшенин һадисәсиндән өзүнә тәсәлли тапды. Кечмиш ҝүнаһларыныза ҝөрә сиз дә өзүнүзү дәјәрсиз һисс едирсинизсә, Менашшенин нүмунәсиндән тәскинлик тапа биләрсиниз.
Менашше Аллаһы севән бир аиләдә бөјүмүшдү. Атасы Хизгија Јәһуданын ән јахшы падшаһларындан бири иди. Менашше атасынын Аллаһ тәрәфиндән мөҹүзәви шәкилдә өлүмҹүл хәстәликдән гуртулмасындан үч ил сонра анадан олмушду (2 Падшаһлар 20:1—11). Шүбһәсиз, Хизгија оғлуна Аллаһын мәрһәмәтинин тәҹәссүмү олан бир бәхшиш кими јанашырды вә чалышырды ки, она һәгиги ибадәтә мәһәббәт ашыласын. Лакин Аллаһдан горхан валидејнләрин ушаглары һеч дә һәмишә онларын јолу илә ҝетмирләр. Буну Менашшенин нүмунәсиндән ҝөрмәк олар.
Атасы өләндә Менашшенин ҹәми 12 јашы оларды. Тәәссүф ки, Менашше «Рәббин ҝөзүндә пис олан ишләр» етмәјә башлады (1 вә 2-ҹи ајәләр). Бәлкә, һәгиги ибадәтә һеч бир һөрмәт бәсләмәјән мәсләһәтчиләр бу ҝәнҹ падшаһа пис тәсир ҝөстәрмишдиләр? Мүгәддәс Китабда бу һагда һеч бир шеј дејилмир. Анҹаг дејилир ки, Менашше ҝүҹлү бүтпәрәстлијә вә зоракылыға гапылмышды. О, јаланчы аллаһлара сәҹдәҝаһлар тикмиш, оғулларыны гурбан ҝәтирмиш, фалчылыг вә ҹадуҝәрликлә мәшғул олмуш, дүзәлтдији ојма бүтү Јерусәлимдә Јеһованын мәбәдинә гојмушду. Инадкар Менашше падшаһ дәфәләрлә Јеһованын хәбәрдарлығыны рәдд етмишди, һалбуки о, Јеһованын мөҹүзәси сајәсиндә дүнјаја ҝәлмишди (3—10-ҹу ајәләр).
Әввәл-ахыр Јеһова јол верди ки, Менашшени гандаллајыб Бабилә әсир апарсынлар. Сүрҝүндә оларкән онун тутдуғу јолун үзәриндә ҹидди дүшүнмәк имканы варды. Инди о, аҹиз вә ҹансыз бүтләрин ону горумаға гадир олмадыгларыны анладымы? Аллаһ горхусуна малик олан атасынын ушаглыгдан она өјрәтдији шејләрин үзәриндә дүшүндүмү? Һәр неҹә олса да, ән ваҹиби Менашше өз үрәјинин дүшүнҹәләрини дәјишмишди. Мүгәддәс Китабда дејилир: «О бу кәдәриндә Аллаһы Рәббә јалварды вә аталарынын Аллаһы өнүндә өзүнү чох алчалтды, Аллаһа дуа етди» (12 вә 13-ҹү ајәләр). Бәс белә ағыр ҝүнаһлар ишләтмиш бир инсан Аллаһ тәрәфиндән бағышлана биләрдими?
Менашшенин сәмими-гәлбдән төвбә етмәси сајәсиндә Јеһованын үрәји јумшалды. Аллаһ онун мәрһәмәт үчүн јалварышыны ешитди вә «ону јенә Јерусәлимә — өз падшаһлығына ҝәтирди» (13-ҹү ајә). Төвбә едиб, она ујғун давранаг, о, сәһвләрини арадан галдырмаг үчүн әлиндән ҝәләни етди: падшаһлығы бүтләрдән тәмизләди вә халгыны ‘Рәббә гуллуг етмәјә’ чағырды (15—17-ҹи ајәләр).
Әҝәр кечмиш ҝүнаһларыныза ҝөрә сиз дә өзүнүзүн һеч бир шејә лајиг олмадығынызы дүшүнүрсүнүзсә, Менашшенин нүмунәси үзәриндә дәриндән дүшүнүн. Бу һадисә Аллаһын илһамланмыш Кәламынын бир һиссәсидир (Ромалылара 15:4). Јеһова бир шеји билмәјимизи истәјир — О «бағышлајан» Аллаһдыр (Мәзмур 86:5). Ҝүнаһын өзү јох, ҝүнаһкарын үрәјинин вәзијјәти Онун үчүн бөјүк әһәмијјәт кәсб едир. Пешманчылыг чәкиб үрәкдән дуа едән, пис јолундан әл чәкән вә дүзҝүн оланы етмәјә ҹан атан инсан, Менашше кими, Јеһова Аллаһын мәрһәмәтинә лајиг ҝөрүлә биләр (Јешаја 1:18; 55:6, 7).
Јанварда нөвбәти фәсилләри охумаг тәклиф олунур:
_______