Аллаһ инсанлара вар-дөвләт вәд едирми?
«Аллаһ истәјир ки, сиз варлы оласыныз — гаражда машынларыныз, јахшы ишиниз олсун. Садәҹә олараг, Она инанын вә пул кисәнизи ачыб, оланынызы Она верин».
БРАЗИЛИЈАДА нәшр олунан гәзетә әсасән, Бразилијада фәалијјәт ҝөстәрән бәзи дини груплар јухарыдакы сөзләрлә халга мүраҹиәт едир. Чохлары бу сөзләри ҹидди гәбул едир. Бирләшмиш Штатларда мәсиһчи олдуғуну иддиа едән инсанлар арасында апарылан сорғунун нәтиҹәләринә даир «Тајм» журналында дејилир: «Сорғуда иштирак едәнләрин 61 фаизи инаныр ки, Аллаһ инсанларын варлы олмасыны истәјир, 31 фаизи исә разыдыр ки, әҝәр пулуну Аллаһа версән, О, сәнин башындан төкәҹәк».
Чох вахт фираванлыг нәзәријјәси адланан бу ҹүр идеолоҝија хүсусилә Латын Америкасы өлкәләриндә, мәсәлән, Бразилијада ҝениш јајылмагдадыр вә инсанлар Аллаһын мадди ҹәһәтдән хејир-дуа верәҹәјини вәд едән килсәләрә ахышырлар. Бәс доғруданмы Аллаһ Она хидмәт едәнләрә вар-дөвләт вәд едир? Аллаһын кечмишдәки хидмәтчиләринин һамысымы варлы олуб?
Дүздүр, Ибраниҹә Мүгәддәс Јазылары охујанда тез-тез Аллаһын хејир-дуасынын мадди фираванлыгла әлагәләндирилдијинин шаһиди олуруг. Мәсәлән, Ганунун тәкрары 8:18 ајәсиндә јазылыб: «Унутмајын ки, бу сәрвәти газанмаг габилијјәтини сизә верән Аллаһыныз Рәбдир». Бу исраиллиләри әмин едирди ки, әҝәр онлар Аллаһын итаәтиндә галсалар, Аллаһ онлары варлы халг едәҹәк.
Бәс Аллаһын ајры-ајры хидмәтчиләри һагда нә демәк олар? Садиг Әјјуб һәддиндән артыг дөвләтли инсан иди. Шејтанын ону јохсуллуға дүчар етмәсиндән сонра исә, Јеһова она «икигат артыг вар-дөвләт верди» (Әјјуб 1:3; 42:10). Ибраһим дә чох варлы иди. Јарадылыш 13:2 ајәсиндә дејилир ки, «онун чохлу сүрүсү вә гызыл-ҝүмүшү» вар иди. Дөрд шәрг падшаһынын бирләшмиш ордусу Ибраһимин гардашы оғлу Луту әсир апаранда о, «евиндә доғулмуш, дөјүш тәлими кечмиш үч јүз он сәккиз нөкәрини ҝөтүрүб дүшмәнләри Дана гәдәр тәгиб етди» (Јарадылыш 14:14). Дөјүш тәлими кечмиш 318 нәфәри олан Ибраһимин аиләси еһтимал ки, чох бөјүк иди. Онун белә бөјүк аиләни доландыра билмәси ҝөстәрир ки, о, чохлу сүрүјә вә мал-гараја саһиб олан варлы инсан иди.
Бәли, Аллаһын кечмишдәки садиг хидмәтчиләринин чоху, мәсәлән, Ибраһим, Исһаг, Јагуб, Давуд, Сүлејман вә башгалары зәнҝин инсанлар иди. Бәс бу о демәкдирми ки, Аллаһ Она хидмәт едән һәр кәсә вар-дөвләт бәхш едәҹәк? Диҝәр тәрәфдән, киминсә касыб олмасы Аллаһын ондан наразы олдуғунуму ҝөстәрир? Нөвбәти мәгаләдә бу суалларын ҹавабыны арашдыраҹағыг.