Јеһованын вердији тәһсилин мисилсиз дәјәри
‘Уғрунда һәр шејин зәрәрини чәкдијим Мәсиһ Исаны танымағын үстүн дәјәри јанында һәр шеји зијан һесаб едирәм’ (ФИЛИП. 3:8).
1, 2. Бәзи мәсиһчиләр һансы сечими етмишләр вә нәјә ҝөрә?
РОБЕРТ мәктәбдә әлачы иди. Онун ҹәми сәккиз јашы оланда мүәллимләриндән бири евләринә ҝәлиб һәјатда газана биләҹәји чохсајлы наилијјәтләрдән сөз ачды. Мүәллимә онун бир ҝүн һәким олаҹағына үмид бәсләдијини деди. Јухары синифләрдә алдығы әла гијмәтләр Робертә өлкәсинин истәнилән ән јахшы университетинә дахил олмаг имканы верирди. Амма о, чохларынын надир имкан һесаб етдији бу фүрсәтдән имтина едәрәк даими пионер олмаға үстүнлүк верди.
2 Роберт кими, бир чох ҝәнҹ вә јашлы баҹы-гардашларын да гаршысында бу дүнјада уғур газанмаг имканы ачылыр. Лакин руһани мәгсәдләрә ҹан атдыглары үчүн онлардан бәзиләри һәмин имканлардан там истифадә етмәмәк гәрарына ҝәлмишләр (1 Кор. 7:29-31). Роберт кими, бир чох мәсиһчиләри дә вар гүввәләрини тәблиғ хидмәтинә сәрф етмәјә нә тәшвиг едир? Әлбәттә ки, ән ваҹиб амил Јеһоваја олан мәһәббәтләридир. Лакин бундан әлавә, онлар ајдын баша дүшүрләр ки, Аллаһын вердији тәһсил мисилсиз дәјәрә маликдир. Һәгигәти билмәсәјдин, һәјатын неҹә оларды? Һеч бу барәдә дүшүнмүсән? Ҝәлин Јеһованын вердији тәһсилин ҝәтирдији бөјүк хејир-дуалардан бәзиләри үзәриндә дүшүнәк. Буну етмәк бизә һәр заман хош хәбәрә ҝөрә миннәтдар олмаға вә бу хәбәри ҹанла-башла тәблиғ етмәјә көмәк едәҹәк.
Аллаһдан тәһсил алмаг бөјүк шәрәфдир
3. Нәјә ҝөрә әмин ола биләрик ки, Јеһова гејри-камил инсанлары өјрәтмәјә һазырдыр?
3 Јеһова Аллаһымыз хејирхаһлығындан ирәли ҝәләрәк гејри-камил инсанлары өјрәтмәјә һазырдыр. Мәсһ олунмуш мәсиһчиләр барәдә Јешаја 54:13 ајәсиндәки пејғәмбәрликдә дејилир: «Бүтүн өвладларыны Мән Рәбб өјрәдәҹәјәм, онлар там сүлһ ичиндә олаҹаг». Ајәдә әкс олунан принсипи ‘башга гојунлара’ да тәтбиг етмәк олар (Јәһ. 10:16). Буну бизим ҝүнләрдә јеринә јетән диҝәр бир пејғәмбәрликдән ајдын ҝөрмәк олар. Јешаја алдығы ҝөрүнтүдә бүтүн халглардан олан инсанларын һәгиги ибадәтә ахышдығыны ҝөрдү. Онлар бир-биринә дејирдиләр: «Ҝәлин Рәббин дағына, Јагубун Аллаһынын евинә галхаг, гој Рәбб бизә Өз јолуну өјрәтсин, биз Онун јолу илә ҝедәк» (Јешаја 2:1-3). Аллаһ тәрәфиндән өјрәдилмәк неҹә дә бөјүк шәрәфдир!
4. Јеһова өјрәтдији инсанларын гаршысында һансы тәләби гојур?
4 Бәс Јеһова тәрәфиндән өјрәдилмәк үчүн биздән нә тәләб олунур? Ән әсас тәләб инсанын һәлим вә үзүјола олмасыдыр. Мәзмурчу Давуд јазмышды: «Рәбб хејирхаһ вә һагдыр... мәзлумлары [«һәлимләри», ЈД] һагг јолу илә апарыр, Өз јолуну онлара өјрәдир» (Мәз. 25:8, 9). Иса исә демишди: «Еј ҝөјүн вә јерин Рәбби олан Ата, шүкүр едирәм Сәнә ки, бу шејләри мүдрикләрдән вә ағыллылардан ҝизләдиб көрпәләрә ачдын» (Лука 10:21). Мәҝәр сән ‘тәвазөкарлара лүтф верән’ Аллаһа јахынлашмаг истәмирсән? (1 Пет. 5:5).
5. Јалныз нәјин сајәсиндә биз Аллаһы танымышыг?
5 Һәгигәти мүдриклијимизин вә баҹарығымызын сајәсиндә өјрәндијимизи дејә биләрикми? Хејр. Әслиндә, биз һеч вахт буна өзүмүз наил ола билмәздик. Иса демишди: «Әҝәр Мәни ҝөндәрән Атам ҹәлб етмирсә, һеч ким Мәним јаныма ҝәлә билмәз» (Јәһ. 6:44). Јеһова тәблиғ иши вә мүгәддәс руһу васитәсилә һәлим инсанлары — ‘милләтләрин ҹаһ-ҹәлалыны’ Өзүнә ҹәлб едир (Һаг. 2:7). Јеһованын Өзүнә ҹәлб етдији инсанлардан бири дә сәнсән. Мәҝәр буна ҝөрә Она миннәтдар дејилсәнми? (Јеремја 9:23, 24 ајәләрини оху.)
Һәјатлары дәјишән гүввә
6. ‘Рәбб билији’ она јијәләнән инсанларда һансы бәһрәләри јетишдирир?
6 Јешаја пејғәмбәр парлаг бәдии тәсвирләрдән истифадә едәрәк бизим ҝүнләрдә инсанларын характериндә баш верән дәјишикликләри тәсвир едир. Вахтилә залым олан инсанлар инди сүлһпәрвәрдирләр. (Јешаја 11:6-9 ајәләрини оху.) Бир-бирилә ирги, милли вә мәдәни мүхтәлифлијә ҝөрә јола ҝетмәјән инсанлар бирликдә јашамағы өјрәнмишләр. Мәҹази диллә десәк, онлар ‘гылынҹларындан котан дүзәлтмишләр’ (Јешаја 2:4). Бәс нәјин сајәсиндә онлар белә бөјүк дәјишикликләр едә билмишләр? Онлар ‘Рәбб билијинә’ јијәләниб ону һәјатларында тәтбиг етмишләр. Аллаһа хидмәт едәнләр гејри-камил олсалар да, һәгиги үмумдүнја гардашлығыны тәшкил едирләр. Бүтүн дүнјада мүхтәлиф мәншәли инсанларын хош хәбәрә һај вермәси вә онун ҝәтирдији ҝөзәл бәһрәләр Јеһованын вердији тәһсилин мисилсиз дәјәрә малик олдуғуна дәлаләт едир (Мат. 11:19).
7, 8. а) Јеһованын вердији тәһсил сајәсиндә инсанларын азад олдуғу ‘истеһкамлардан’ бәзиләри һансылардыр? б) Илаһи тәһсилин Јеһоваја иззәт ҝәтирдијини һансы нүмунәдән ҝөрүрүк?
7 Һәвари Павел Аллаһын хидмәтчиләринин һәјата кечирдији тәблиғ ишини руһани мүһарибәјә бәнзәтди. Биз охујуруг: «Ҹәнҝимизин силаһлары ҹисмани дејилдир, лакин истеһкамлары јыхмаг үчүн Аллаһын гүдрәтинә маликдирләр. Биз нәзәријјәләри вә Аллаһын билијинә гаршы дуран һәр әнҝәли јыхырыг» (2 Кор. 10:4, 5). Аллаһын вердији билијин сајәсиндә инсанлар һансы ‘истеһкамлардан’ азад олурлар? Јалан тәлимләр, мөвһуматлар вә инсан фәлсәфәси бунлардан јалныз бәзиләридир (Колос. 2:8). Јеһованын вердији тәһсил инсанлара пис вәрдишләри атмаға вә Онун хошуна ҝәлән хүсусијјәтләри өзләриндә јетишдирмәјә көмәк едир (1 Кор. 6:9-11). О, аилә һәјатыны јахшылашдырыр вә үмидләрини итирмиш инсанларын һәјатына әсил мәна гатыр. Бизим ҝүнләрдә инсанларын мәһз белә тәһсилә еһтијаҹы вар.
8 Јеһованын инсанлара инкишаф етдирмәјә көмәк етдији хүсусијјәтләрдән бири, нөвбәти нүмунәдән ҝөрәҹәјимиз кими, дүрүстлүкдүр (Ибр. 13:18). Һиндистанда бир гадын Мүгәддәс Китабы өјрәнмәјә башлады вә бир мүддәтдән сонра вәфтиз олунмамыш тәблиғчи олду. Ҝүнләрин бир ҝүнү о, Падшаһлыг Залынын тикинтисиндән евә гајыдаркән автобус дајанаҹағынын јахынлығында гијмәти 800 АБШ доллары олан бир зинәт әшјасы тапды. Газанҹы аз олса да, о, һәмин әшјаны полис мәнтәгәсинә апарды. Ону полис забитинә тәгдим едәндә о, ҝөзләринә инана билмәди! Бир гәдәр сонра башга бир полис ондан сорушду: «Сиз нәјә ҝөрә ону өзүнүздә сахламадыныз?» О, бунун сәбәбини белә изаһ етди: «Мүгәддәс Китаб тәлимләри мәни тамамилә дәјишди вә мән инди дүрүст инсанам». Һејрәт ичиндә олан полис онунла бирҝә мәнтәгәјә ҝәлән мәсиһчи ағсаггала деди: «Бу штатда 38 милјон инсан јашајыр. Әҝәр һеч олмаса он нәфәрә бу гадын кими олмаға көмәк етсәниз, бөјүк иш ҝөрмүш оларсыныз». Бәли, Јеһованын вердији тәһсил милјонларла инсанын һәјатыны көкүндән дәјишиб. Мәҝәр бу, Јеһованы иззәтләндирмәјимиз үчүн әсаслы сәбәб дејилми?
9. Инсанлар нәјин сајәсиндә һәјатларында көклү дәјишикликләр едә биләрләр?
9 Јеһованын мүгәддәс руһу васитәсилә тәгдим етдији көмәкдән башга, Онун Кәламынын тәсирли гүввәси дә инсанлара һәјатларында бөјүк дәјишикликләр етмәјә ҝүҹ верир (Ром. 12:2; Галат. 5:22, 23). Колослулара 3:10 ајәсиндә дејилир: «Јени мәнлијиниз ону Јараданын сурәтинә бәнзәр тәрздә тәзәләнир ки, дәрракәниз там олсун». Мүгәддәс Китаб инсана өзүнү танымаға вә дүшүнҹә тәрзини, һәтта һәр шејә мүнасибәтини белә дәјишмәјә көмәк етмәк гүввәсинә маликдир. (Ибраниләрә 4:12 ајәсини оху.) Мүгәддәс Јазылардан дәгиг билик әлдә етмәклә вә һәјатыны Јеһованын салеһ нормаларына ујғунлашдырмагла инсан Аллаһын досту ола вә әбәди јашамаг үмидини газана биләр.
Ҝәләҹәјә һазырлыг
10. а) Нәјә ҝөрә јалныз Јеһова бизи ҝәләҹәјә һазырлаја биләр? б) Бүтүн јер үзүндә тезликлә һансы бөјүк дәјишикликләр баш верәҹәк?
10 Ҝәләҹәјә һазырлашмагда бизә јалныз Јеһова көмәк едә биләр, чүнки ҝәләҹәкдә нә олаҹағыны јалныз О билир. Бәшәријјәтин ҝәләҹәјинә О гәрар верир (Јешаја 46:9, 10). Мүгәддәс Китаб пејғәмбәрлији ҝөстәрир ки, «Рәббин [Јеһованын] мөһтәшәм ҝүнү јахынлашыр» (Сеф. 1:14). Һәмин ҝүн Сүлејманын мәсәлләри 11:4 ајәсиндәки сөзләр өз тәсдигини тапаҹаг: «Һеч кими вар-дөвләти гәзәб ҝүнүндән хилас етмәз, амма салеһлик инсаны өлүмдән гуртарар». Шејтан дүнјасы үзәриндә Јеһованын Өз һөкмләрини һәјата кечирәҹәји вахт ҝәләндә јалныз Онун гаршысында малик олдуғумуз ад өз әһәмијјәтини итирмәјәҹәк. Пул гијмәтдән дүшәҹәк. Језекел 7:19 ајәсиндә дејилир: «Ҝүмүшләрини күчәләрә атаҹаглар, гызыллары напак сајылаҹаг». Буну габагҹадан билмәк бизә артыг инди мүдрик давранмаға көмәк едә биләр.
11. Аллаһдан алдығымыз тәһсил ҝәләҹәјә һазырлашмагда бизә даһа неҹә көмәк едир?
11 Јеһованын вердији тәһсилин сәҹијјәви хүсусијјәтләриндән бири дә одур ки, бу тәһсил бизә һәјатда ән ваҹиб шејләри ајырд етмәјә вә Онун јахынлашмагда олан ҝүнүнә һазырлашмаға көмәк едир. Һәвари Павел Тимотејә јазмышды: «Индики зәманәдә варлы оланлара тапшыр ки, тәкәббүрлү олмасынлар вә ҝүвәнилә билмәјән вар-дөвләтә бел бағламасынлар, лакин... Аллаһа үмид бәсләсинләр». Һәтта тәһсил һаггы өдәмәмәклә биз бу мәсләһәтдән фајдалана биләрик. Неҹә? Вар-дөвләт топламаг әвәзинә, биз ‘хејирхаһлыг етмәјә’ вә ‘јахшы ишләрлә варлы олмаға’ чалышмалыјыг. Руһани ишләри биринҹи јерә гојмагла биз ‘ҝәләҹәк үчүн јахшы тәмәл олаҹаг бир хәзинә топлајырыг’ (1 Тим. 6:17-19). Бу ҹүр фәдакарлыг практики мүдриклијин ҝөстәриҹисидир, чүнки Иса демишди: «Инсан бүтүн дүнјаја јијәләниб өз ҹаныны итирәрсә, она нә фајда олаҹагдыр» (Мат. 16:26, 27). Јеһованын ҝүнүнүн јахын олдуғуну нәзәрә алараг һәр кәс өзүндән сорушмалыдыр: «Мән хәзинәми һарада топлајырам? Мән кимә хидмәт едирәм: Аллаһа, јохса вар-дөвләтә?» (Мат. 6:19, 20, 24).
12. Киминсә хидмәтимизә һәгарәтлә бахмасы бизи нәјә ҝөрә руһдан салмамалыдыр?
12 Мүгәддәс Китаба әсасән мәсиһчиләрин етмәли олдуғу ән ‘јахшы ишләрдән’ бири һәјатлары хилас едән тәблиғ вә шаҝирд һазырламаг ишидир (Мат. 24:14; 28:19, 20). Биринҹи әсрдә олдуғу кими, бу ҝүн дә бәзиләри хидмәтимизә һәгарәтлә бахырлар. (1 Коринфлиләрә 1:18-21 ајәләрини оху.) Лакин бу нә чатдырдығымыз хәбәри гијмәтдән салыр, нә дә һәр бир инсана һәлә вахт вар икән она иман ҝәтирмәси үчүн имкан вермәјин ваҹиблијини азалдыр (Ром. 10:13, 14). Башгаларына Аллаһын вердији тәһсилдән јарарланмаға көмәк едәндә өзүмүз чохлу хејир-дуалар алырыг.
Фәдакарлыг хејир-дуаландырылыр
13. Һәвари Павел хош хәбәр наминә нәләри архада гојду?
13 Мәсиһчилији гәбул етмәздән өнҹә, һәвари Павел алдығы тәһсил сајәсиндә јәһудиләр арасында нүфузлу мөвгејә саһиб ола биләрди. Тәхминән 13 јашы оланда о, халг арасында бөјүк һөрмәтә малик олан Ганун мүәллими Гамлијелдән тәһсил алмаг мәгсәдилә доғма шәһәри Тарсусдан Јерусәлимә јолланды (Һәв. иш. 22:3). Мүәјјән вахтдан сонра Павел мүасирләри арасында сечилмәјә башлады вә бу минвалла о, иудаизмдә бөјүк вәзифәјә јијәләнә биләрди (Галат. 1:13, 14). Лакин хош хәбәри гәбул едәндә вә тәблиғ етмәјә башлајанда о, һәр шеји архада гојду. Павел белә аддым атдығына ҝөрә пешман идими? Јох. Биз охујуруг: «Уғрунда һәр шејин зәрәрини чәкдијим... Мәсиһ Исаны танымағын үстүн дәјәри јанында һәр шеји зијан һесаб едир вә зибил сајырам» (Филип. 3:8).
14, 15. Аллаһын ‘әмәкдашлары’ кими, биз һансы хејир-дуалары алырыг?
14 Павел кими, мүасир мәсиһчиләр дә хош хәбәр наминә нәләрдәнсә кечирләр (Марк 10:29, 30). Бәс демәк олармы ки, белә етмәклә биз өзүмүзү нәдәнсә мәһрум едирик? Бир чох инсанлар јухарыда ады чәкилән Робертин фикринә шәрикдирләр. О дејир: «Мән зәррә гәдәр дә тәәссүфләнмирәм. Таммүддәтли хидмәт мәнә севинҹ вә мәмнунлуг ҝәтирир вә Јеһованы ‘дадмаға [вә Онун нә гәдәр] ширин’ олдуғуну ҝөрмәјә көмәк едир. Руһани мәгсәдләр наминә нә заман мадди гурбанлар версәм, Јеһова мәни бундан да артыг хејир-дуаландырыр. Санки, һеч нәдән кечмирәм, анҹаг әлдә едирәм!» (Мәз. 34:8; Сүл. мәс. 10:22).
15 Әҝәр мүәјјән мүддәтдир ки, тәблиғ вә тәлим ишиндә иштирак едирсәнсә, шүбһә јохдур ки, Јеһованын нә гәдәр ширин олдуғуну дадмаг имканын олуб. Хош хәбәри тәблиғ едәркән Онун руһунун сәнә неҹә дајаг олдуғуну һисс етмисәнми? Јеһова кимәсә һәгигәти ачанда онун ҝөзләринин севинҹдән неҹә ишылдадығыны ҝөрмүсәнми? (Һәв. иш. 16:14). Јеһова сәнә манеәләрин, мәсәлән, хидмәтини ҝенишләндирмәкдә сәнә мане олан чәтинликләрин өһдәсиндән ҝәлмәкдә көмәк едибми? Чәтин анларында О, сәнә арха олубму? Әлдән дүшәндә хидмәтини дајандырмамағын үчүн сәни неҹә мөһкәмләндирдијини һисс етмисәнми? (Филип. 4:13, И–93). Јеһоваја хидмәт едәркән Онун гајғыкеш әлинин үзәримиздә олдуғуну ҝөрәндә О, бизим үчүн даһа реал олур вә биз Она даһа да јахын олдуғумузу һисс едирик (Јешаја 41:10). Мөһтәшәм маарифләндирмә ишиндә Аллаһын ‘әмәкдашларындан’ бири олмаг мәҝәр хејир-дуа дејил? (1 Кор. 3:9).
16. Руһани маарифләндирмә ишиндә иштирак етмәк үчүн ҝөстәрдијин сәјләрә вә гурбанлара неҹә јанашырсан?
16 Бир чох инсанлар ҝөзләрини һәјата јуммамыш узун мүддәт әһәмијјәтини итирмәјәҹәк бир иш ҝөрмәк арзусундадырлар. Һәр биримиз јашадығымыз дүнјадакы мөһтәшәм наилијјәтләрин белә, адәтән, тез бир заманда унудулдуғунун шаһидијик. Амма Јеһованын Өз адыны тәгдис етмәклә әлагәдар һал-һазырда һәјата кечирдији ишләр теократик тарихин сәһифәләриндән һеч вахт силинмәјәҹәкдир. Онлар әбәдијјән јаддашларда галаҹаг! (Сүл. мәс. 10:7; Ибр. 6:10). Ҝәлин тарихи әһәмијјәт дашыјан руһани маарифләндирмә ишиндә иштирак етмәк шәрәфини јүксәк гијмәтләндирәк!
Неҹә ҹаваб верәрдиниз?
• Јеһова Ондан өјрәнмәк истәјән инсанлар гаршысында һансы тәләби гојур?
• Аллаһын вердији тәһсил инсанларын һәјатыны неҹә јахшылашдырыр?
• Башгаларына Аллаһын вердији биликләрдән јарарланмаға көмәк едән бизләр һансы хејир-дуалары алырыг?
[23-ҹү сәһифәдәки шәкил]
Јеһовадан тәһсил аланлар әсил үмумдүнја гардашлығыны тәшкил едирләр
[24-ҹү сәһифәдәки шәкил]
Мәҝәр Аллаһын ‘әмәкдашы’ олмаг хејир-дуа дејил?