Дуаларымыз бизим һаггымызда нә дејир?
«Еј дуалары ешидән, бүтүн бәшәр һүзуруна ҝәләҹәк» (МӘЗ. 65:2).
1, 2. Нәјә ҝөрә Јеһованын хидмәтчиләри Она әминликлә дуа едирләр?
ЈЕҺОВА садиг хидмәтчиләринин јалварышларына һеч вахт биҝанә јанашмыр. Биз әмин ола биләрик ки, О, дуаларымыза гулаг асыр. Һәтта ејни вахтда милјонларла Јеһованын хидмәтчиси Аллаһа дуа едәрсә, О, һәр биринин дуасыны ешитмәјә гадирдир.
2 Давуд Аллаһын онун јалварышларыны ешитдијинә әмин олдуғу үчүн охујурду: «Еј дуалары ешидән, бүтүн бәшәр һүзуруна ҝәләҹәк» (Мәз. 65:2). Бәли, Давудун дуалары ҹавабсыз галмырды, чүнки о, Јеһованын садиг хидмәтчиси иди. Јахшы оларды ки, өзүмүздән сорушаг: «Дуаларым Јеһоваја етибар етдијими вә тәмиз ибадәтин һәјатымда биринҹи јери тутдуғуну ҝөстәрирми? Дуаларым мәним һаггымда нә дејир?»
Тәвазөкарлыгла дуа един
3, 4. а) Јеһоваја һансы әһвал-руһијјә илә дуа етмәлијик? б) Ҹидди ҝүнаһ ишләтдијимизә даир ‘фикирләр’ бизи раһат бурахмырса, нә етмәлијик?
3 Әҝәр дуаларымызын ешидилмәсини истәјириксә, онда Аллаһа тәвазөкарлыгла дуа етмәлијик (Мәз. 138:6). Давуд кими, биз дә Јеһовадан хаһиш етмәлијик ки, бизи јохласын. О демишди: «Еј Аллаһ, мәни јохла, гәлбими өјрән, Сән мәни сынагдан кечириб бүтүн фикирләрими бил. Ҝөр гәлбимдә пислијә јол верирәмми? Әбәди јолда мәнә рәһбәр ол!» (Мәз. 139:23, 24). Ҝәлин садәҹә дуа етмәклә кифајәтләнмәјәк, һәмчинин Аллаһын бизи сынагдан кечирмәсинә јол верәк вә Кәламы васитәсилә вердији мәсләһәтләрә табе олаг. Әбәди һәјата ҝедән јолда јеримәјә көмәк етмәклә Јеһова «әбәди јолда» бизә рәһбәр ола биләр.
4 Бәс әҝәр ҹидди ҝүнаһ ишләтдијимизә даир ‘фикирләр’ бизи раһат бурахмырса, онда неҹә? (Мәзмур 32:1-5 ајәләрини оху.) Ағаҹ јајын гызмар чағында гурудуғу кими, ҝүнаһлы виҹданын сәсини боғмаг да бизи тагәтдән сала биләр. Давуд ҝүнаһы уҹбатындан севинҹини итирмиш вә ола билсин, хәстәләнмишди. Лакин ҝүнаһларыны Аллаһын гаршысында етираф етдикдән сонра о, бөјүк раһатлыг тапды. «Үсјанкарлығы бағышланан»да вә Јеһова тәрәфиндән «ҝүнаһы әфв олунан»да Давудун кечирдији севинҹ һиссини бир тәсәввүр един! Инсанын Аллаһ гаршысында ҝүнаһыны етираф етмәси она раһатлыг ҝәтирә биләр вә мәсиһчи ағсаггалларын көмәји илә јенидән руһани сағламлығына говуша биләр (Сүл. мәс. 28:13; Јаг. 5:13-16).
Аллаһа нијаз вә шүкүр един
5. Јеһоваја нијаз етмәк нә демәкдир?
5 Әҝәр һәр һансы сәбәбдән ҝүҹлү нараһатчылыг кечиририксә, јахшы оларды ки, Павелин мәсләһәтинә диггәт јетирәк: «Һеч нәјин гејдинә галмајын, амма һәр шејдә, дуа вә нијаз едәрәк, өз хаһишләринизи Аллаһа шүкранла билдирин» (Филип. 4:6). «Нијаз» — тәвазөкарлыгла Аллаһа едилән јалварышдыр. Хүсусилә дә тәһлүкәли анларда вә ја тәгибләр заманы биз Јеһовадан көмәк вә рәһбәрлик диләмәлијик.
6, 7. Дуаларымызда Јеһоваја шүкүр етмәк үчүн һансы сәбәбләримиз вар?
6 Јалныз бизә лазым олан шејләр барәдә Јеһоваја дуа едәриксә, бу, бизим мотивләримиз һаггында нәји үзә чыхарар? Павел дејир ки, биз Аллаһа хаһишләримизи «шүкранла» билдирмәлијик. Әлбәттә, Давуд кими, бизим дә миннәтдар олмаға сәбәбләримиз вар. О дејирди: «Ја Рәбб, әзәмәт, гүдрәт, ҹәлал, зәфәр вә шөһрәт Сәнә мәхсусдур, чүнки ҝөјдә вә јердә олан һәр шеј Сәниндир. Ја Рәбб, падшаһлыг Сәниндир вә һөкмдар олараг һәр шејдән уҹасан. [...] ...Еј Аллаһымыз, биз Сәнә шүкүр едирик вә иззәтли адына һәмд едирик» (1 Салн. 29:11-13).
7 Хатирә Ҝеҹәсини тәсис етдији ахшам Иса јемәјә, чөрәјә вә шәраба ҝөрә Аллаһа шүкүр етди (Мат. 15:36; Марк 14:22, 23). Бунлардан башга, биз «бәшәр өвладларына ҝөстәрдији харигәләринә», «адил һөкмләринә» вә Кәламы васитәсилә чатдырдығы хәбәрә ҝөрә дә Јеһоваја ‘шүкүр етмәлијик’ (Мәз. 107:15; 119:62, 105).
Башгалары үчүн дуа един
8, 9. Нәјә ҝөрә һәмиманлыларымыз үчүн дуа етмәлијик?
8 Әлбәттә, биз өзүмүз үчүн дуа едирик, анҹаг бунунла јанашы, биз башгалары үчүн, һәтта танымадығымыз мәсиһчиләр үчүн дә дуа етмәлијик. Һәвари Павел Колосда јашајан һәмиманлыларынын һамысыны танымаса да, онлара јазырды: «Атамыз Аллаһдан вә Рәбб Иса Мәсиһдән сизә лүтф вә сүлһ олсун. Сизин үчүн даим дуа едәрәк, Рәббимиз Иса Мәсиһин Атасы Аллаһа шүкүр едирик; чүнки сизин Мәсиһ Исаја иманыныз вә бүтүн мүгәддәсләрә олан мәһәббәтиниздән хәбәрдар олдуг» (Колос. 1:3, 4). Павел Салоникдәки мәсиһчиләрә ҝөрә дә дуа едирди (2 Салон. 1:11, 12). Баҹы-гардашларымыз үчүн етдијимиз бу кими дуалар бизим неҹә инсан олдуғумуз вә онлара неҹә мүнасибәт бәсләдијимиз һагда чох шеј дејир.
9 Мәсһ олунмуш мәсиһчиләр вә онларын әмәкдашлары олан ‘башга гојунлар’ үчүн етдијимиз дуалар Аллаһын тәшкилатынын марагларыны дүшүндүјүмүзү ҝөстәрир (Јәһ. 10:16). Павел һәмиманлыларындан онун үчүн дуа етмәләрини хаһиш едирди ки, «Мүждәнин сиррини... билдирмәк үчүн» она данышмаг баҹарығы верилсин (Ефес. 6:17-20). Башга мәсиһчиләр үчүн биз бу ҹүр дуа едирикми?
10. Башгалары үчүн дуа етмәк бизә неҹә тәсир едә биләр?
10 Башгалары үчүн етдијимиз дуалар онлара олан мүнасибәтимизи дәјишә биләр. Кимдәнсә хошумуз ҝәлмәдији һалда онун үчүн дуа едириксә, она олан мүнасибәтимиз дәјишә биләр (1 Јәһ. 4:20, 21). Белә дуалар бирлијимизи мөһкәмләндирир. Үстәлик, арамызда мәсиһчи мәһәббәтинин олдуғуну ҝөстәрир (Јәһ. 13:34, 35). Бу кејфијјәт Аллаһын руһунун сәмәрәсинин бир һиссәсидир. Руһун сәмәрәсинә дахил олан мәһәббәт, севинҹ, сүлһ, сәбир, лүтфкарлыг, јахшылыг, сәдагәт, һәлимлик вә өзүнә һаким олмаг кими кејфијјәтләри тәзаһүр етдирмәк үчүн дуада Јеһовадан мүгәддәс руһ диләјирикми? (Лука 11:13; Галат. 5:22, 23). Белә етдијимиз тәгдирдә, сөзләримиз вә һәрәкәтләримиз руһа ҝөрә рәфтар етдијимизә вә јашадығымыза шәһадәт едәҹәк. (Галатијалылара 5:16, 25 ајәләрини оху.)
11. Нәјә ҝөрә демәк олар ки, башгаларынын бизим үчүн дуа етмәләрини хаһиш етмәк мүнасибдир?
11 Ишдир, хәбәр тутсаг ки, ушагларымыз мәктәбдә јохлама иши заманы шпаргалкадан истифадә етмәјә мејиллидирләр, онда онлар үчүн дуа етмәли, һәмчинин Мүгәддәс Китаб әсасында онлара көмәклик ҝөстәрмәлијик ки, дүрүст даврансынлар вә јанлыш һәрәкәт етмәсинләр. Павел Коринфдәки мәсиһчиләрә демишди: «Аллаһа дуа едирик ки, пис иш ҝөрмәјәсиниз» (2 Кор. 13:7). Тәвазөкарлыгла едилән бу ҹүр дуалар Јеһоваја хошдур вә бизим барәмиздә Она чох шеји дејир. (Сүлејманын мәсәлләри 15:8 ајәсини оху.) Һәвари Павел кими, биз дә башгаларындан бизим үчүн дуа етмәләрини хаһиш едә биләрик. «Бизим үчүн дуа един; — дејә о јазыр,— чүнки биз әминик ки, виҹданымыз тәмиздир, чүнки һәр ҹәһәтҹә өзүмүзү јахшы апармаға ҹан атырыг» (Ибр. 13:18).
Дуаларымыз бизим һаггымызда даһа нәләр дејир?
12. Дуаларымызын әсас мөвзусуну нә тәшкил етмәлидир?
12 Дуаларымыз Јеһоваја севинҹлә вә сәјлә хидмәт етдијимизи ҝөстәрирми? Дуаларымызын әсас мөвзусуну Аллаһын ирадәсинин јеринә јетмәси, Падшаһлыг һаггында хош хәбәрин тәблиғи, Јеһованын али һөкмранлығынын бәраәт газанмасы вә адынын тәгдис олунмасы тәшкил едирми? Бизим, әсас етибарилә, бу һагда дуа етмәли олдуғумузу Исанын нүмунәви дуасынын башланғыҹында дедији сөзләрдән ҝөрмәк олар: «Еј ҝөјләрдә олан Атамыз, адын мүгәддәс тутулсун. Сәлтәнәтин ҝәлсин. Ҝөјдә олдуғу кими, јердә дә Сәнин ирадән олсун» (Мат. 6:9, 10).
13, 14. Дуаларымыз бизим һаггымызда нә дејир?
13 Дуаларымыз нијјәтләримизи, марагларымызы вә арзуларымызы үзә чыхарыр. Јеһова бизим әслиндә неҹә инсан олдуғумузу јахшы билир. Сүлејманын мәсәлләри 17:3 ајәсиндә дејилир: «Гызыл-ҝүмүш исти күрәдә јохланар, Рәбб исә үрәји арашдырар». О, бизим үрәјимиздә оланлары ҝөрүр (1 Шам. 16:7). Јығынҹаг ҝөрүшләримизә, хидмәтимизә вә руһани баҹы-гардашларымыза неҹә мүнасибәт бәсләдијимиздән аҝаһдыр. Мәсиһин ‘гардашлары’ һаггында нә дүшүндүјүмүз Она мәлумдур (Мат. 25:40). О, һаггында дуа етдијимиз шејләри һәгигәтән дә истәјиб-истәмәдијимизи вә ја дуамызын садәҹә тәкрарланан сөз јығыны олуб-олмадығыны билир. Чүнки Иса демишдир: «Дуа етдијиниз заман бүтпәрәстләр кими бош сөзләр [«ејни сөзләри тәкрар-тәкрар», ЈД] сөјләмәјин; зира онлар санырлар ки, чох данышмагла ешидиләҹәкләр» (Мат. 6:7).
14 Дуада истифадә етдијимиз ифадәләр һәмчинин Аллаһа нә дәрәҹәдә етибар етдијимизи ҝөстәрир. Давуд дејирди: «Сән [Јеһова] мәним пәнаһҝаһымсан, дүшмәнә гаршы мөһкәм гүлләсән. Гој сонсузадәк чадырында јашајым, ганадларынын алтында пәнаһ тапым» (Мәз. 61:3, 4). Мәҹази дилдә десәк, Аллаһ чадырыны үзәримиздә гуранда биз өзүмүзү тәһлүкәсизликдә вә Онун гајғыкеш әлләри алтында олдуғумузу һисс едирик (Вәһј 7:15). Иманымыз сынаға чәкиләндә Јеһованын бизимлә олдуғуна там әмин олараг Она дуа етмәк бизә неҹә дә тәсәлли ҝәтирир! (Мәзмур 118:5-9 ајәләрини оху.)
15, 16. Дуа бизә јығынҹагда әлавә мәсулијјәтләр алмаг арзусу илә бағлы нәји мүәјјән етмәјә көмәк едә биләр?
15 Нијјәтләримиз барәдә сәмими-гәлбдән дуа етсәк, Јеһова онлары ајырд етмәкдә бизә көмәк едәҹәк. Мәсәлән, Аллаһын халгы арасында нәзарәтчи кими хидмәт етмәк истәји һәгигәтәнми башгаларына фајда ҝәтирмәк вә Падшаһлығын марагларынын ирәлиләмәси үчүн әлимиздән ҝәләни етмәк истәјиндән ирәли ҝәлир? Јохса биз башгалары үзәриндә ‘рәислик етмәк’ вә ја ‘һөкм сүрмәк’ арзусундајыг? Јеһованын халгы арасында белә шејләрә јер јохдур. (3 Јәһја 9, 10; Лука 22:24-27 ајәләрини оху.) Әҝәр үрәјимиздә дүзҝүн олмајан арзулар јараныбса, Јеһова Аллаһа сәмимијјәтлә дуа етсәк, О, бизә онлары ашкар етмәјә вә дәрин көк салмамыш өзүмүздә дәјишикликләр етмәјә көмәк едә биләр.
16 Јәгин, мәсиһчи гадынлар әрләринин хидмәти көмәкчи, сонра исә ағсаггал олмаларыны чох истәјирләр. Бу баҹылар нүмунәви давранмаға чалышмагла шәхси дуаларында ифадә етдикләри һиссләринә ујғун һәрәкәт етмәлидирләр. Бу, чох ваҹибдир, чүнки аилә үзвләринин давраныш вә данышыг тәрзи аилә башчысы барәдә јығынҹағын һансы фикирдә олмасына тәсир едәҹәк.
Башгаларынын адындан дуа етмәк
17. Нәјә ҝөрә дуа едән заман тәклијә чәкилмәк мүнасибдир?
17 Иса Атасына тәкликдә дуа етмәк үчүн чох вахт ҹамаатдан узаглашырды (Мат. 14:13; Лука 5:16; 6:12). Бизим дә тәкликдә олмаға еһтијаҹымыз вар. Чох ҝүман ки, сакит шәраитдә дуа етмәклә Јеһованы разы салан вә Она садиг галмаға көмәк едәҹәк гәрарлар гәбул едәҹәјик. Иса башгаларынын адындан да дуа едирди. Јахшы оларды ки, биз буну неҹә дүзҝүн етмәли олдуғумузу нәзәрдән кечирәк.
18. Јығынҹағы дуада тәгдим едән гардашлар һансы амилләри јадда сахламалыдырлар?
18 Ҝөрүшләримиздә садиг кишиләр јығынҹағын адындан дуа едирләр (1 Тим. 2:8). Һәр белә дуанын ахырында һәмиманлылар «гој елә олсун» мәнасыны дашыјан «амин» сөзүнү демәлидирләр. Лакин бунун үчүн онлар ҝәрәк дејиләнләрлә разы олсунлар. Исанын нүмунәви дуасында тәәҹҹүб доғуран вә ја нәзакәтсиз һеч бир шеј јохдур (Лука 11:2-4). Бундан әлавә, о, һәр бир динләјиҹисинин бүтүн тәләбат вә ја проблемләрини тәфсилаты илә садаламады. Шәхси мәсәләләри һамы гаршысында јох, тәкликдә етдијимиз дуалара дахил едә биләрик. Еләҹә дә бир груп инсаны тәгдим етдијимиз дуаја мәхфи мәлуматлары дахил етмәкдән гачынмалыјыг.
19. Үмуми дуа заманы һансы давраныш тәрзи мүнасибдир?
19 Үмуми дуа заманы Аллаһ гаршысында еһтирам долу горху тәзаһүр етдирмәлијик (1 Пет. 2:17). Башга вахт вә башга јердә нормал гәбул олунан мүәјјән һәрәкәтләр јығынҹаг ҝөрүшүндә мүнасиб олмаја биләр (Ваиз 3:1). Мәсәлән, ҝөтүрәк, бир нәфәр дуа заманы һамынын әл-әлә тутмасыны истәјир. Бу, бәзиләринин, еләҹә дә јығынҹаға тәзә ҝәлән инсанларын һиссләринә тохуна вә ја диггәтләрини јајындыра биләр. Бәзи әр-арвадлар еһмалҹа бир-бирләринин әлиндән тута биләрләр, лакин үмуми дуа заманы онлар бир-бирини гуҹаглајырса, бу вахт онлары тәсадүфән ҝөрән кимсә буна ҝөрә бүдрәјә биләр. Онларда елә һисс јарана биләр ки, ҹүтлүјүн фикри-зикри Јеһоваја еһтирам ҝөстәрмәкдә јох, өз романтик мүнасибәтләриндәдир. Јеһоваја дәрин еһтирам һиссиндән ирәли ҝәләрәк, ҝәлин ‘һәр шеји Аллаһын иззәти үчүн едәк’ вә киминсә диггәтини јајындыран, шока салан, јахуд бүдрәдән һәрәкәтләрдән гачынаг (1 Кор. 10:31, 32; 2 Кор. 6:3).
Нә һагда дуа етмәлијик?
20. Ромалылара 8:26, 27 ајәләрини неҹә изаһ едәрдиниз?
20 Бәзән шәхси дуалар заманы сөз тапмагда чәтинлик чәкә биләрик. «Биз лазым олдуғу кими дуа етмәји баҹармырыг,— дејә Павел етираф едир,— Руһ Өзү исә ифадә олунмаз аһларла бизим үчүн вәсатәт едир. Үрәкләри тәдгиг едән Аллаһ исә Руһун нә дүшүндүјүнү билир» (Ром. 8:26, 27). Јеһова бир чох дуалары Мүгәддәс Јазылара дахил етмәк гәрарына ҝәлиб. О, бу илһамланмыш дуалары бизим етмәк истәдијимиз дуаларымыз кими гәбул едир вә онлары јеринә јетирир. Аллаһ һәм бизи таныјыр, һәм дә руһ васитәсилә Мүгәддәс Китаб јазычыларыны гәләмә алмаға тәшвиг етдији сөзләрин мәнасыны билир. Руһ бизим үчүн ‘вәсатәт едәндә’ Јеһова бизим хаһишләримизә ҹаваб верир. Лакин Аллаһын Кәламы илә нә гәдәр јахындан таныш олсаг, бир о гәдәр дә Она дуа едәркән сөз тапмагда чәтинлик чәкмәјәҹәјик.
21. Нөвбәти мәгаләдә сөһбәт нәдән ҝедәҹәк?
21 Өјрәндијимиз кими, дуаларымыз һаггымызда чох шеј дејир. Мәсәлән, дуаларымыз бизим Јеһоваја нә дәрәҹәдә јахын олдуғумузу вә Аллаһын Кәламыны нә дәрәҹә јахшы билдијимизи ҝөстәрә биләр (Јаг. 4:8). Нөвбәти мәгаләдә Мүгәддәс Китабда јазылан бәзи дуалары вә орада ишләнән ифадәләри нәзәрдән кечирәҹәјик. Бу, дуаларымыза неҹә тәсир едә биләр?
Неҹә ҹаваб верәрдиниз?
• Һансы әһвал-руһијјә илә Јеһоваја дуа етмәлијик?
• Нәјә ҝөрә һәмиманлыларымыз үчүн дуа етмәлијик?
• Дуаларымыз өзүмүз вә мәгсәдләримиз һаггында нәји үзә чыхарыр?
• Үмуми дуа заманы һансы давраныш тәрзи мүнасибдир?
[4-ҹү сәһифәдәки шәкил]
Мүнтәзәм олараг Јеһоваја һәмд едир вә миннәтдарлығыны билдирирсәнми?
[6-ҹы сәһифәдәки шәкил]
Үмуми дуа заманы давранышымыз һәмишә Јеһоваја иззәт ҝәтирмәлидир