‘Өз хаһишләринизи Аллаһа билдирин’
«Һәр шејдә, дуада вә риҹада, шүкр илә өз хаһишләринизи Аллаһ гаршысында билдирин» (ФИЛИПИЛИЛӘРӘ 4:6, И-93).
1. Бизим киминлә үнсијјәтдә олмаг үстүнлүјүмүз вардыр вә нә үчүн бу валеһедиҹидир?
ӘҜӘР сән өз өлкәнин президентинин рәсми гәбулуна дүшмәји хаһиш етсәјдин, нә ҹаваб алардын? Јәгин ки, онун идарәсиндән хаһишинә нәзакәтлә ҹаваб верәрдиләр, анҹаг президентин өзү илә данышмаға, чох ҝүман ки, иҹазә верилмәзди. Анҹаг ән бөјүк Һөкмдар, Каинатын Һөкмдары Јеһова Аллаһ илә һәр шеј башга ҹүрдүр. Биз Она олдуғумуз һәр јердән вә сечдијимиз һәр вахт мүраҹиәт едә биләрик. Мәгбул дуалар һәмишә Она чатаҹаг (Сүлејманын мәсәлләри 15:29). Бу, һәгигәтән дә чох мөһтәшәмдир! Миннәтдарлыг һисси бизи, мүнасиб олараг «дуалары ешидән» адланан Аллаһа мүнтәзәм дуа етмәјә тәшвиг етмәмәлидирми? (Мәзмур 65:2).
2. Дуаларымызын Аллаһа мәгбул олмасы үчүн нә ваҹибдир?
2 Анҹаг бә’зиләри соруша биләрләр: «Һансы дуалар Аллаһа мәгбулдур?» Дуаларымызын Јеһоваја мәгбул олмасы үчүн Мүгәддәс Китаб бир ваҹиб шеји изаһ едир: «Иман етмәдән Аллаһа мәгбул олмаг исә гејри-мүмкүндүр. Чүнки Аллаһа јахынлашан иман етмәлидир ки, О вар вә Ону ахтаранлара мүкафат верир» (Ибраниләрә 11:6). Бәли, кечән мәгаләдә изаһ едилдији кими, Аллаһа јахынлашмаг үчүн әсас амил имандыр. Аллаһ Она мүраҹиәт едәнләрин дуаларыны гәбул етмәјә һазырдыр, анҹаг онлар да буну иманла, сәмими вә тәмиз гәлблә етмәли, јахшы ишләр ҝөрмәлидирләр.
3. а) Гәдимдә јашајан садиг хидмәтчиләрин дуаларындан ҝөрүндүјү кими дуамыза нәләри дахил едә биләрик? б) Дуаларымыз һансы формада ола биләр?
3 Һәвари Павел өз ҝүнләриндә олан мәсиһчиләрә нәсиһәт верирди: «Һеч нәјин гејдинә галмајын, амма һәр шејдә, дуада вә риҹада, шүкр илә өз хаһишләринизи Аллаһ гаршысында билдирин» (Филипилиләрә 4:6, 7, И–93). Мүгәддәс Китабда гајғыларыны Аллаһын үзәринә гојан бир чох адамларын нүмунәләри вардыр. Онлардан бә’зиләри Ханна, Илјас, Хизгија вә Даниел иди (1 Шамуел 2:1-10; 1 Падшаһлар 18:36, 37; 2 Падшаһлар 19:15-19; Даниел 9:3-21). Биз онларын нүмунәсини изләмәлијик. Һәмчинин Павелин сөзләриндән ҝөрүнүр ки, дуалар мүхтәлиф ҹүр ола биләр. О, шүкраны хатырлатды. Шүкран Аллаһа бизим үчүн етдикләринә ҝөрә миннәтдарлығымызы билдирдијимиз дуадыр. Бу дуада Аллаһа һәмд дә едә биләрик. Риҹа тәвазөкар, сәмими јалварышдыр. Биз конкрет бир шејә ҝөрә дә хаһишләримизи билдирә биләрик (Лука 11:2, 3). Сәмави Атамыз бу ҹүр етдијимиз мүраҹиәти севинҹлә гәбул едир.
4. Јеһова тәләбатларымызы билсә дә, хаһишләримизи Она нә үчүн билдиририк?
4 Бә’зиләри соруша биләрләр: «Мәҝәр Јеһова нәјә еһтијаҹымыз олдуғуну билмир?» Бәли, О бунлардан хәбәрдардыр (Матта 6:8, 32). Белә исә нә үчүн хаһишләримизи Она сөјләмәјимизи истәјир? Бир нүмунәјә диггәт јетирәк: мағаза саһиби мүштәриләринә һәдијјә тәклиф едир. Анҹаг бу һәдијјәни әлдә етмәк үчүн мүштәри саһибин јанына ҝәлиб, ону истәмәлидир. Һәдијјәни алмаға ҹәһд ҝөстәрмәјәнләр, әслиндә ону гијмәтләндирмәдикләрини ҝөстәрәҹәкләр. Әҝәр биз дә дуада хаһишләримизи билдирмириксә, бу, Јеһованын тәгдим етдикләринә ҝөрә миннәтдар олмадығымызы ҝөстәрир. Иса демишди: «Истәјин вә аларсыныз» (Јәһја 16:24). Бу јолла биз Аллаһа е’тибар етдијимизи ҝөстәририк.
Аллаһа неҹә дуа етмәлијик?
5. Нә үчүн Исанын ады илә дуа етмәлијик?
5 Дуа етмәјә даир Јеһова чохлу сәрт ганунлар тәртиб етмәјиб. Буна бахмајараг, Мүгәддәс Китабда изаһ едилдији кими, Аллаһа дүзҝүн мүраҹиәт етмәји өјрәнмәлијик. Мәсәлән, Иса давамчыларына өјрәтмишди: «Атадан Мәним адымла һәр нә истәјәрсинизсә, ону сизә верәҹәкдир» (Јәһја 16:23). Беләликлә, биз Аллаһын бәшәријјәтә јалныз Иса Мәсиһ васитәсилә хејир-дуа вердијини е’тираф едәрәк, онун ады илә дуа етмәлијик.
6. Дуа едәркән һансы дуруш тәрзи алмалыјыг?
6 Дуа едәркән һансы дуруш тәрзи алмалыјыг? Мүгәддәс Китабда дуаларымызын ешидилмәси үчүн һеч бир дуруш тәрзи мүәјјән едилмәјиб (1 Падшаһлар 8:22; Неһемја 8:6; Марк 11:25; Лука 22:41). Ән ваҹиби Аллаһа сәмими вә тәмиз гәлблә дуа етмәкдир (Јоел 2:12, 13).
7. а) «Амин» сөзүнүн мә’насы нәдир? б) Мүнасиб олараг бу сөз дуада неҹә истифадә едилир?
7 Бәс дуанын сонунда дејилән «амин» сөзү һаггында нә демәк олар? Мүгәддәс Јазылар ҝөстәрир ки, бу, дуаларымыза, хүсусилә дә һамы гаршысында едилән дуаја мүнасиб јекундур (Мәзмур 72:19; 89:52). Ибрани сөзү олан «амен»ин әсас мә’насы «доғрудур» демәкдир. Мак-Клинток вә Стронгун енсиклопедијасынын изаһына ҝөрә, дуанын сонунда «амин» демәк «дуада дејиләнләри тәсдиг етмәји вә онларын јеринә јетмәсини диләмәји» билдирир. Беләликлә, сәмими гәлбдән «амин» демәклә, дуа едән шәхс индиҹә дедикләринә даир әминлијини ифадә едир. Јығынҹағы дуада тәмсил едән мәсиһчи сонда «амин» дејәндә, динләјиҹиләр дејиләнләрлә үрәкдән разы олдугларыны билдирмәк үчүн үрәкләриндә вә ја ешидилән тәрздә «амин» сөјләјә биләрләр (1 Коринфлиләрә 14:16).
8. Бә’зи дуаларымыз Јагуб вә Ибраһимин дуаларына неҹә бәнзәјә биләр вә бу бизим һаггымызда нәји ҝөстәрәҹәк?
8 Бә’зән Аллаһ, һаггында дуа етдијимиз мәсәләләрин бизим үчүн нә дәрәҹәдә ваҹиб олдуғуну ҝөстәрмәјимизә јол верә биләр. Елә ола биләр ки, бизә хејир-дуалары алмаг үчүн бүтүн ҝеҹәни мәләклә мүбаризә апаран гәдимдә јашајан Јагуб кими олмаг лазым ҝәлсин (Јарадылыш 32:24-26). Јахуд бә’зән, Лут вә Содомда ола биләҹәк башга салеһ адамлар үчүн тәкрар-тәкрар Јеһоваја мүраҹиәт едән Ибраһим кими давранмалы оларыг (Јарадылыш 18:22-33). О ҹүмләдән, Јеһованын әдаләт, мәһәббәт вә мәрһәмәтинә сығыныб, бизим үчүн гијмәтли олан шејләр үчүн дә Она јалвара биләрик.
Нә һагда хаһиш етмәк олар?
9. Дуаларымызын әсас мөвзусу нә олмалыдыр?
9 Павел демишди: «Һәр шејдә... өз хаһишләринизи Аллаһ гаршысында билдирин» (Филипилиләрә 4:6). Беләликлә, һәјатымызын һәр саһәси һаггында дуа едә биләрик. Анҹаг дуаларымызда әсас јери Јеһованын мараглары тутмалыдыр. Даниел бунда бизә ҝөзәл нүмунә гојмушдур. Исраил ҝүнаһларына ҝөрә ҹәзасыны чәкәндә, Даниел Јеһоваја мәрһәмәт ҝөстәрмәси үчүн јалварараг дејирди: «Еј Аллаһым, Өз адын наминә ҝеҹикмә» (Даниел 9:15-19). Бәс бизим дуалардан ҝөрүнүрмү ки, Јеһованын адынын мүгәддәс тутулмасы, ирадәсинин јеринә јетмәси бизим үчүн ән башлыҹа әһәмијјәти кәсб едир?
10. Һарадан билирик ки, шәхси мәсәләләр барәдә дуа етмәк мүнасибдир?
10 Шәхси мәсәләләр һаггында да хаһишләримизи билдирмәк мүнасибдир. Мәсәлән, мәзмурчу кими биз дә Аллаһын дәрин дүшүнҹәләрини баша дүшмәк үчүн дуа едә биләрик. О дуа едирди: «Мәнә ағыл вер, ганунуна ҝөрә јашајым, бүтүн гәлбимлә она бағланым» (Мәзмур 119:33, 34; Колослулара 1:9, 10). Иса ‘Ону өлүмдән хилас етмәјә гадир олан Аллаһа дуалар вә хаһишләр етмишди’ (Ибраниләрә 5:7). Белә етмәклә о ҝөстәрмишдир ки, тәһлүкә вә ја сынагларла үзләшәркән Аллаһдан ҝүҹ истәмәк мүнасибдир. Шаҝирдләринә нүмунәви дуаны сөјләјәркән Иса она ҝүнаһларын бағышланмасы, ҝүндәлик гиданын әлдә едилмәси кими шәхси мәсәләләри дә дахил етди.
11. Ширникдириҹи тәклифләрә ујмамаг үчүн дуа бизә неҹә көмәк едә биләр?
11 Һәмин нүмунәви дуаја Иса бир хаһиш дә дахил етмишдир: «Бизи имтаһана чәкмә, лакин бизи шәрдән хилас ет» (Матта 6:9-13). Сонралар о, мәсләһәт верди: «Ојаг дуруб дуа един ки, имтаһана уғрамајасыныз» (Матта 26:41). Имтаһанларла үзләшәндә дуа етмәк хүсусилә ваҹибдир. Ола билсин ки, ишдә вә ја мәктәбдә јаранан вәзијјәт бизи Мүгәддәс Китаб принсипләрини позмаға ширникләндирсин. Мүгәддәс Китаб принсипләринә ујғун јашамајан танышларымыз шүбһәли ишләрдә онлара гошулмағы тәклиф едә биләрләр. Биздән салеһ нормалара зидд ҝедән иши ҝөрмәји хаһиш едә биләрләр. Белә вахтларда јахшы оларды ки, Исанын мәсләһәтинә әмәл едәрәк, һәм габагҹадан, һәм дә имтаһанла үзләшәндә мәғлуб олмамаг үчүн Аллаһа дуа едиб Ондан көмәк истәјәк.
12. Һансы мәсәләләрлә бағлы нараһатлыгларымызы дуада сөјләјә биләрик вә Јеһова буна неҹә мүнасибәт ҝөстәрир?
12 Бу ҝүн Аллаһын хидмәтчиләринин һәјатында мүхтәлиф тәзјигләр вә нараһатлыглар олур. Бир чохларынын әсас нараһатлығы хәстәлик вә емосионал ҝәрҝинликлә бағлыдыр. Әтрафымыздакы зоракылыглар һәјатымызы ҝәрҝинләшдирир. Игтисади чәтинлик уҹбатындан чөрәк пулу газанмаг ҝүндән-ҝүнә чәтинләшир. Јеһованын бу мәсәләләр барәдә дуа едән хидмәтчиләрини динләдијини билмәк неҹә дә тәсәлливериҹидир! Мәзмур 102:17 ајәси Јеһова һаггында дејир: «Јохсулларын дуасына гулаг асаҹаг, јалварышларына хор бахмајаҹаг».
13. а) Һансы шәхси мәсәләләр барәдә дуа етмәк мүнасибдир? б) Белә дуаја даир нүмунә ҝәтирин.
13 Хидмәтимизә вә Јеһова илә мүнасибәтимизә аидијјәти олан һәр бир шеј дуамызын мөвзусу ола биләр (1 Јәһја 5:14). Әҝәр сән никаһ, иш вә ја хидмәтини ҝенишләндирмәк барәдә бир гәрара ҝәлмәлисәнсә, Аллаһа бунлары сөјләјәрәк ондан рәһбәрлик истәмәјә чәкинмә. Филиппиндә јашајан ҹаван баҹы таммүддәтли хидмәт етмәк истәјирди. Анҹаг онун өзүнү тә’мин етмәк үчүн иши јох иди. О данышыр: «Бир шәнбә мән Јеһоваја конкрет олараг пионер хидмәти барәдә дуа етдим. Һәмин ҝүнү тәблиғдә бир јенијетмәјә китаб тәклиф етдим. Ҝөзләнилмәдән гыз деди: “Базар ертәси сиз мүтләг мәним охудуғум мәктәбә ҝедин”. Сәбәбини сорушанда гыз ҹаваб верди ки, орада иш вар вә мүмкүн гәдәр тез ишчи тапмаг истәјирләр. Мән ора ҝетдим вә дәрһал ишә гәбул олдум. Һәр шеј елә сүр’әтлә баш верди ки». Бүтүн јер үзүндә олан чох сајда шаһидләрлә белә һадисәләр баш вериб. Беләликлә, өз сәмими хаһишләрини Аллаһа дуада билдирмәјә чәкинмә!
Ҝүнаһ ишләдәндә
14, 15. а) Нә үчүн ҝүнаһ ишләтдәндә дә дуа етмәји дајандырмаг олмаз? б) Инсана руһани ҹәһәтдән сағалмаға шәхси дуалардан башга нә көмәк едә биләр?
14 Ҝүнаһ едән заман дуа неҹә көмәк едә биләр? Хәҹаләт чәкдикләриндән, ҝүнаһ ишләдәнләрин бә’зиләри дуа етмирләр. Анҹаг бу һеч дә ағыллы һәрәкәт дејилдир. Мисал үчүн, тәјјарәчиләр билирләр ки, әҝәр онлар азсалар, көмәк алмаг үчүн һава нәглијјаты диспетчерилә әлагә сахлаја биләрләр. Бәс әҝәр тәјјарәчи аздығы үчүн утаныб, диспетчерлә әлагә сахламаса, онда неҹә? Бу, фәлакәтлә нәтиҹәләнә биләр! Ҝүнаһ ишләтдији үчүн Аллаһа дуа етмәјә утанан инсан өзүнә даһа чох зәрәр вура биләр. Ишләдилән ҝүнаһа ҝөрә хәҹаләт һисси Јеһова илә үнсијјәтә сон гојмамалыдыр. Ҹидди ҝүнаһ едәнләри Аллаһ дуа етмәјә чағырыр. Јешаја пејғәмбәр о дөврдә јашајан ҝүнаһкарлары Јеһоваја мүраҹиәт етмәјә тәшвиг едирди: «Онун әфви болдур» (Јешаја 55:6, 7). Әлбәттә, ҝүнаһ ишләдән әввәлҹә ҝүнаһдан дөнүб, сәмими гәлбдән төвбә етмәли, сонра Јеһоваја јалвармалыдыр (Мәзмур 119:58; Даниел 9:13).
15 Ҝүнаһ ишләдән заман дуа етмәк башга бир сәбәбдән дә ваҹибдир. Шаҝирд Јагуб руһани көмәјә еһтијаҹы олан кәс һаггында дејир: «Гој иманлылар ҹәмијјәтинин ағсаггалларыны чағыртсын... Онлар да онун үчүн дуа етсинләр... Рәбб ону ајаға галдырар» (Јагуб 5:14, 15). Бәли, инсан шәхсән өзү дуада Јеһоваја ҝүнаһыны е’тираф етмәлидир, лакин о, ағсаггаллардан да онун үчүн дуа етмәләрини хаһиш едә биләр. Бу она руһани ҹәһәтдән сағалмаға көмәк едәҹәкдир.
Дуаларын ҹаваблары
16, 17. а) Јеһова дуалара неҹә ҹаваб верир? б) Һансы нүмунә ҝөстәрир ки, дуа вә тәблиғ иши бир-бири илә сых бағлыдыр?
16 Аллаһ дуаларымыза неҹә ҹаваб верир? Бә’зиләри дуаларына дәрһал вә ајдын шәкилдә ҹаваб ала биләрләр (2 Падшаһлар 20:1-6). Башгалары исә бир гәдәр ҝеҹ ҹаваб алар вә ја ҹаваб чәтин баша дүшүлә биләр. Јахуд Исанын нүмунәсиндә һакимин јанына ҝәлмәјә давам едән дул гадын кими, бизә дә Аллаһа дәфәләрлә мүраҹиәт етмәк лазым ҝәлә биләр (Лука 18:1-8). Анҹаг әмин ола биләрик ки, Јеһованын ирадәсинә ујғун тәрздә дуа едәндә О, һеч вахт бизә: «Мәни нараһат етмә» демәјәҹәк (Лука 11:5-9).
17 Јеһованын бир чох хидмәтчиләри өз тәҹрүбәләри әсасында әмин олмушлар ки, Аллаһ онларын дуаларына ҹаваб верир. Бу, чох вахт тәблиғ хидмәти заманы ајдын ҝөрүнүр. Мәсәлән, Филиппиндә ики мәсиһчи баҹы узаг әразидә Мүгәддәс Китаба әсасланан әдәбијјат пајлајырды. Бир гадына трактат верәндә онун ҝөзләри јашарды. О деди: «Кечән ҝеҹә Аллаһа дуа едирдим ки, Мүгәддәс Китабы өјрәнмәк үчүн јаныма адам ҝөндәрсин, инди мәнә елә ҝәлир ки, бу мәним дуама ҹавабдыр». Аз сонра гадын Падшаһлыг Залында кечирилән ҝөрүшләрә ҝәлмәјә башлады. Ҹәнуб-шәрги Асијанын диҝәр һиссәсиндә бир гардаш мүһафизә едилән јашајыш комплексиндә тәблиғ етмәкдән горхурду. Лакин о, Јеһоваја дуа етди, ҹәсарәтини топлајараг бинаја ҝирди. Бир мәнзилин гапысыны ҝәнҹ гадын ачды. Гардаш ҝәлишинин сәбәбини изаһ едәндә о, ағламаға башлады, Јеһованын Шаһидләрини ахтардығыны вә онлары тапмаг үчүн дуа етдијини сөјләди. Гардаш Јеһованын Шаһидләринин јерли јығынҹағы илә әлагә јаратмаға севинҹлә она көмәк етди.
18. а) Дуаларымыза ҹаваб аланда нә етмәлијик? б) Әҝәр һәр фүрсәт јарананда дуа едириксә, нәјә әмин ола биләрик?
18 Дуа һәгигәтән дә Аллаһын ән’амыдыр. Јеһова дуалара гулаг асмаға вә ҹаваб вермәјә һазырдыр (Јешаја 30:18, 19). Анҹаг биз дә диггәтли олмалыјыг ки, Јеһованын дуаларымыза вердији ҹавабы дујаг. Ҹаваб һәмишә ҝөзләдијимиз кими олмур. Амма Онун рәһбәрлијини һисс едәндә һеч вахт миннәтдарлығымызы билдирмәји вә Ону иззәтләндирмәји унутмамалыјыг (1 Салоникилиләрә 5:18). Бундан башга, һәвари Павелин бу нәсиһәтини һәмишә јадда сахлајын: «Һәр шејдә, дуада вә риҹада, шүкр илә өз хаһишләринизи Аллаһ гаршысында билдирин». Бәли, Аллаһла данышмаг үчүн һәр фүрсәтдән истифадә един. Бу јолла сиз Павелин, дуаларына ҹаваб аланлар һаггында јаздығы сөзләрин һәгигилијини өз үзәриниздә һисс едәҹәксиниз: «Һәр ҹүр ағылдан үстүн олан Аллаһын сүлһү үрәкләринизи вә дүшүнҹәләринизи горујаҹагдыр» (Филипилиләрә 4:6, 7, И–93).
Ҹаваб верә биләрсинизми?
• Дуаларымыз һансы формада ола биләр?
• Биз неҹә дуа етмәлијик?
• Дуаларымыза нәји дахил етмәлијик?
• Ҝүнаһ ишләдән заман дуанын ролу нәдән ибарәтдир?
[29-ҹу сәһифәдәки шәкилләр]
Сәмими дуа бизә ширникдириҹи тәклифләрә ујмамаға көмәк едир.
[31-ҹи сәһифәдәки шәкилләр]
Миннәтдарлығымызы, гајғы вә хаһишләримизи Аллаһа дуада билдиририк.