Мүгәддәс Китабы арашдырмагла дуаларыны јахшылашдыр
«Ја Худавәнд, јалварырам, бу гулунун дуасына... диггәтлә гулаг ас!» (НЕҺ. 1:11).
1, 2. Мүгәддәс Китабдакы бәзи дуалары арашдырмаг нәјә ҝөрә фајдалы оларды?
ДУА вә Мүгәддәс Китабын арашдырылмасы һәгиги ибадәтин ајрылмаз һиссәсидир (1 Салон. 5:17; 2 Тим. 3:16, 17). Дүздүр, Мүгәддәс Китаб дуа китабы дејил. Анҹаг «Зәбур» китабындакы чохсајлы дуалар да дахил олмагла, орада бир чох дуалар өз әксини тапмышдыр.
2 Мүгәддәс Китабы охујуб арашдырдыгҹа, ола билсин, сән гаршылашдығын вәзијјәтләрә ујғун дуалара раст ҝәләҹәксән. Һәгигәтән дә, Мүгәддәс Китабдакы дуаларда ифадә олунан фикирләри дуаларына дахил етмәклә сән онлары јахшылашдыра биләрсән. Бәс сән көмәк үчүн етдикләри јалварышлара ҹаваб аланлардан вә онларын дуаларынын мәзмунундан нә өјрәнә биләрсән?
Аллаһын рәһбәрлијини ахтар вә ону излә
3, 4. Ибраһим гулуна нә тапшырмышды вә Јеһованын бу иши истигамәтләндирмәсиндән нә өјрәнә биләрик?
3 Мүгәддәс Китабы арашдырмағын нәтиҹәсиндә сән Аллаһдан рәһбәрлик алмаг үчүн даима Она дуа етмәли олдуғуну өјрәндин. Ибраһим бөјүк гулуну, еһтимал ки, Елиезери Исһаг үчүн Аллаһдан горхан арвад тапмаг мәгсәдилә Месопотамијаја ҝөндәрәндә нә баш вердијини нәзәрдән кечирәк. Гадынлар гујудан су чәкәндә һәмин гул дуа едирди: «Ја Рәбб,.. [...] гој елә олсун ки, мәним “хаһиш едирәм, сәһәнҝини ендир, су ичим” дејәҹәјим вә мәнә “өзүн дә ич вә дәвәләринә дә верим” сөјләјәҹәк гыз гулун Исһаг үчүн тәјин етдијин арвад олсун; бундан биләрәм ки, ағама хејирхаһлыг едирсән» (Јар. 24:12-14).
4 Ривга Ибраһимин гулунун дәвәләринә су верән заман гул өз дуасына ҹаваб алды. Гыса мүддәтдән сонра Ривга онунла Кәнана ҝетди вә Исһагын истәкли арвады олду. Әлбәттә, биз Аллаһдан хүсуси ишарә ҝөзләмәли дејилик. Лакин әҝәр дуа етсәк вә Онун руһу илә јеримәјә гәтијјәтли олсаг, О, һәјат јолунда бизә рәһбәрлик едәҹәк (Галат. 5:18).
Дуа нараһатчылығы јүнҝүлләшдирмәјә көмәк едир
5, 6. Јагубун Есавла ҝөрүшмәздән өнҹә етдији дуада диггәтәлајиг олан нәдир?
5 Дуа нараһатчылығы азалда биләр. Әкиз гардашы Есавдан горхан Јагуб белә дуа едирди: «Еј [Јеһова],.. гулуна ҝөстәрдијин бүтүн хејирхаһлыға вә сәдагәтә лајиг дејиләм... Јалварырам, мәни гардашым Есавын әлиндән гуртар. Чүнки онун ҝәлиб мәни, ушагларымла аналарыны өлдүрмәсиндән горхурам. Сән дедин: “Һөкмән сәнә јахшылыг едәҹәјәм, нәслини сајсыз-һесабсыз дәниз гуму гәдәр чохалдаҹағам”» (Јар. 32:9-12).
6 Јагубун мүәјјән еһтијат тәдбирләри ҝөрмәсинә бахмајараг, онун дуасына ҹаваб Есавла барышмасы олду (Јар. 33:1-4). Бу дуаны диггәтлә охујанда ҝөрә биләрик ки, Јагуб јалныз көмәк үчүн дуа етмирди. О, вәд олунмуш Өвлада иман етдијини вә Аллаһын севҝи долу хејирхаһлығына ҝөрә миннәтдар олдуғуну билдирди. Сәнин дә дахилиндә горху һисси вармы? (2 Кор. 7:5). Әҝәр варса, онда Јагубун јалварышы сәнә хатырладаҹаг ки, дуа нараһатчылығы јүнҝүлләшдирмәјә гадирдир. Лакин дуаларымыза јалныз хаһишләр дејил, һәмчинин иманымыза дәлаләт едән ифадәләр дә дахил олмалыдыр.
Мүдриклик үчүн дуа ет
7. Нәјә ҝөрә Муса Аллаһын јолларыны өјрәнмәк үчүн дуа едирди?
7 Јеһованы разы салмаг истәји сәни мүдриклик үчүн дуа етмәјә тәшвиг етмәлидир. Муса Аллаһын јолларыны өјрәнмәк үчүн дуа едирди: «Бах [Јеһова] Сән мәнә “Бу халгы [Мисирдән] чыхарт” дејирсән... [...] Әҝәр мән, доғрудан да, Сәнин ҝөзүндә лүтф тапмышамса, јалварырам, өз јолуну мәнә аҝаһ елә ки,.. ҝөзүндә лүтф тапым» (Чых. 33:12, 13). Ҹавабында Аллаһ Мусаја даһа чох — халгынын арасында идарә етмәси үчүн лазым олан гәдәр билик верди.
8. 1 Падшаһлар 3:7-14 ајәләри үзәриндә дүшүнмәк бизә һансы фајданы ҝәтирә биләр?
8 Давуд да: «Ја Рәбб, јолларыны мәнә ҝөстәр»,— дејә дуа едирди (Мәз. 25:4). Давудун оғлу Сүлејман Исраилдә падшаһ вәзифәсини иҹра етмәк үчүн Аллаһдан мүдриклик диләди. Сүлејманын дуасы Јеһоваја мәгбул иди. Јеһова она јалныз истәдијини дејил, һәм дә вар-дөвләт вә шан-шөһрәт верди. (1 Падшаһлар 3:7-14 ајәләрини оху.) Әҝәр јығынҹагда сәнә һәвалә олунан мәсулијјәтләрин өһдәсиндән ҝәлә билмәјәҹәјини дүшүнүрсәнсә, онда мүдриклик үчүн дуа ет вә тәвазөкарлыг руһу тәзаһүр етдир. О заман Јеһова сәнә мәсулијјәтләрини дүзҝүн вә ҹанла-башла иҹра едә билмәјин үчүн билик вә мүдриклик верәҹәк.
Үрәкдән дуа ет
9, 10. Сүлејманын мәбәдин ачылышы заманы сөјләдији дуасында үрәк һаггында дедикләриндән нә өјрәнирик?
9 Дуаларымызын ешидилмәси үчүн онлар үрәкдән ҝәлмәлидир. Б. е. ә. 1026-ҹы илдә Сүлејман Јеһованын мәбәдинин ачылышы мүнасибәтилә Јерусәлимә топлашан ҹамаат гаршысында «Биринҹи Падшаһлар» китабынын 8-ҹи фәслиндә гәләмә алынан сәмими дуаны сөјләди. Әһд сандығы Ән Мүгәддәс јерә гојулдугдан вә Јеһованын иззәти мәбәди долдурдугдан сонра Сүлејман Аллаһы мәдһ етди.
10 Сүлејманын дуасыны арашдыр вә орада үрәк һаггында дејиләнләрә диггәт јетир. Сүлејман дәрк едирди ки, инсанын үрәјини јалныз Јеһова билир (1 Пад. 8:38, 39). Бу дуа ҝөстәрир ки, ҝүнаһ ишләдән адам ‘бүтүн үрәкдән Аллаһа тәрәф дөнәрсә’, онун үмиди олар. Әҝәр дүшмән Аллаһын халгыны әсир едибсә, онда үрәкләри бүтүнлүклә Јеһоваја бағлы оланларын јалварышлары ҹавабсыз галмајаҹаг (1 Пад. 8:48, 58, 61). Демәли, дуаларымыз сидг-үрәкдән ҝәлмәлидир.
Мәзмурларын көмәјилә дуаларыны неҹә јахшылашдыра биләрсән?
11, 12. Мүәјјән мүддәт Јеһованын мәбәдинә ҝедә билмәјән левилинин дуасындан нә өјрәндик?
11 Мәзмурлары арашдырмаг дуаларыны јахшылашдыра вә Аллаһын онлара ҹаваб вермәсини ҝөзләмәјинә көмәк едә биләр. Сүрҝүндә олан левилинин сәбринә диггәт јетирәк. О, мүәјјән мүддәт иди ки, Јеһованын мәбәдинә ҝедә билмәсә дә: «Мәним гәлбим, нијә гырылмысан? Ахы нијә бу көксүмдә тәлашланырсан? Үмидини јенә Аллаһа бағла, гој Аллаһа — мәни гуртарана шүкүр едим»,— дејә охујурду (Мәз. 42:5, 11; 43:5).
12 Бу левилинин нүмунәсиндән нә өјрәнә биләрик? Әҝәр салеһлик уғрунда һәбсә дүшмүсәнсә вә мүвәггәти олараг һәмиманлыларынла бирҝә ибадәт јериндә ола билмирсәнсә, онда Аллаһын сәнә көмәк етмәсини сәбирлә ҝөзлә (Мәз. 37:5). Бир заманлар Аллаһа хидмәт етмәкдән дујдуғун севинҹ үзәриндә дүшүн вә дуа ет ки, јенидән Аллаһын халгы илә үнсијјәтдә олаҹағын вахты ҝөзләдијин мүддәтдә чәтинликләрә таб ҝәтирә биләсән.
Иманла дуа ет
13. Јагуб 1:5-8 ајәсинә әсасән, нәјә ҝөрә иманла дуа етмәлисән?
13 Дүшдүјүн вәзијјәтдән асылы олмајараг, һәмишә иманла дуа ет. Әҝәр нөгсансызлығын сынаға мәруз галырса, онда шаҝирд Јагубун мәсләһәтинә әмәл ет. Јеһоваја дуа ет вә сынаглара таб ҝәтирмәк үчүн сәнә мүдриклик верәҹәјинә шүбһә етмә. (Јагуб 1:5-8 ајәләрини оху.) Аллаһ сәнин сынагларындан хәбәрдардыр вә О, мүгәддәс руһу васитәсилә сәнә рәһбәрлик вә тәсәлли верә биләр. ‘Һеч шүбһә етмәдән’ өз үрәјини там иманла Она ач вә руһу васитәсилә вердији рәһбәрлији вә Кәламындакы мәсләһәтләри гәбул ет.
14, 15. Нәјә ҝөрә демәк олар ки, Ханна дуа едиб иманла давранды?
14 Левили Елгананын ики арвадындан бири олан Ханна дуа едиб иманла давранды. Дүнјаја бир нечә ушаг ҝәтирән ҝүнүсү Пенинна сонсуз олан Ханнаја ришхәнд едирди. Мүгәддәс мәскәндә Ханна Јеһоваја анд ичди ки, оғлу оларса, ону Јеһоваја верәҹәк. О, үрәјиндә дуа етдији үчүн јалныз додаглары тәрпәнирди, буна ҝөрә дә баш каһин Ели онун сәрхош олдуғуну ҝүман етди. Анҹаг бунун белә олмадығыны биләндә деди: «Гој Исраилин Аллаһы сәни мурадына чатдырсын!» Ханна проблеминин неҹә һәлл олунаҹағыны дәгиг билмәсә дә, дуасынын ҹавабсыз галмајаҹағына инанырды. Буна ҝөрә дә «артыг чөһрәси кәдәрли дејилди». Бәли, артыг о, мәјуслуг ичиндә дејил вә дәрд-гәм чәкмирди (1 Шам. 1:9-18).
15 Шамуел доғуландан вә сүддән ајрыландан сонра мүгәддәс хидмәти иҹра етсин дејә анасы Ханна ону Аллаһын евинә ҝәтириб Јеһоваја тәгдим етди (1 Шам. 1:19-28). Онун дуасы үзәриндә дүшүнмәјә вахт ајырмаг дуаларымызы јахшылашдыра биләр. Ејни заманда Јеһованын дуаларымыза ҹаваб верәҹәјинә әмин олараг дуа етсәк, ҝөрәҹәјик ки, һәтта үзүҹү проблемләрин јаратдығы мәјуслуғун өһдәсиндән ҝәлмәк белә мүмкүндүр (1 Шам. 2:1-10).
16, 17. Неһемјанын дуа едиб иманла давранмасынын нәтиҹәси нә олду?
16 Б. е. ә. В әсрдә јашајан Неһемја адлы салеһ бир инсан да дуа едиб иманла давранырды. О јалварырды: «Ја Худавәнд, јалварырам, бу гулунун дуасына вә Сәнин адына еһтирам етмәкдән зөвг алан гулларынын дуасына диггәтлә гулаг ас! Јалварырам, бу ҝүн гулунун ишини уғурлу ет, гој падшаһын ҝөзүндә лүтф тапсын». Һаггында бәһс олунан «падшаһ» ким иди? О, Неһемјанын саги кими сарајында хидмәт етдији фарс падшаһы Артахшаста иди (Неһ. 1:11).
17 Неһемја Бабил әсарәтиндән азад олунуб јәһудиләрин ‘бөјүк мәшәггәт вә хәҹаләт ичиндә јашадыгларыны, Јерусәлимин диварынын дағыдылдығыны’ биләндән сонра ҝүнләрлә иманла дуа етди (Неһ. 1:3, 4). Падшаһ Артахшаста Јерусәлимин диварыны бәрпа етмәк үчүн Неһемјанын ора ҝетмәсинә изин верәндә о, дуаларына ҝөзләмәдији шәкилдә ҹаваб алды (Неһ. 2:1-8). Тез бир заманда дивар бәрпа олунду. Неһемја дуаларына ҹаваб алды, чүнки онун дуаларынын әсас мөвзусуну һәгиги ибадәт тәшкил едирди вә о, иманла дуа едирди. Сәнин дуаларын һаггында да ејни шеји демәк олармы?
Мәдһ етмәји вә миннәтдарлығыны билдирмәји унутма
18, 19. Һансы сәбәбләрә ҝөрә Јеһованын хидмәтчиси Ону мәдһ етмәли вә Она миннәтдарлығыны билдирмәлидир?
18 Дуа едәркән Јеһованы мәдһ етмәји вә Она миннәтдарлығыны билдирмәји унутма! Буну етмәк үчүн о гәдәр сәбәбләримиз вар ки! Мәсәлән, Давуд Аллаһын падшаһлығыны иззәтләндирмәји арзу едирди. (Мәзмур 145:10-13 ајәләрини оху.) Сәнин дуаларын Јеһованын Падшаһлығыны бәјан етмәк шәрәфини гијмәтләндирдијини ҝөстәрирми? Мәзмурчунун сөзләри һәмчинин бизә сәмими дуада мәсиһчи ҝөрүшләринә вә конгресләрә ҝөрә миннәтдарлығымызы ифадә етмәјә көмәк едә биләр (Мәз. 27:4; 122:1).
19 Аллаһла дәјәрли мүнасибәтә малик олдуғуна ҝөрә миннәтдарлыг сәни нөвбәти ајәдәки фикирләрә ујғун тәрздә үрәкдән дуа етмәјә тәшвиг едә биләр: «Еј Худавәнд, халглар арасында Сәнә шүкүр едәҹәјәм. Үммәтләр арасында Сәни тәрәннүм едәҹәјәм. Мәһәббәтин бөјүкдүр, ҝөјләрә чатыр, сәдагәтин булудлара дәјир. Еј Аллаһ, ҝөјләр үзәриндә уҹал! Еһтишамын бүтүн јер үзәриндә олсун!» (Мәз. 57:9-11). Неҹә дә үрәји исиндирән сөзләрдир! Мәҝәр мәзмурлардакы бу кими сөзләр дуаларымыза тәсир едәрәк онлары даһа долғун едә билмәзми?
Аллаһа дәрин еһтирамла дуа ет
20. Мәрјәм Аллаһа дәрин еһтирамыны неҹә ифадә етди?
20 Дуаларымыздан ајдын олмалыдыр ки, биз Јеһоваја дәрин еһтирам бәсләјирик. Мәсиһин анасы олаҹағыны биләндән сонра Мәрјәмин еһтирамла дедији сөзләр Ханнанын Шамуели ибадәтҝаһда хидмәт етмәјә ҝәтирәндә дедији сөзләрә бәнзәјир. Мәрјәмин Аллаһа дәрин еһтирамы онун бу сөзләриндән ҝөрүнүр: «Мәним гәлбим Рәбби јүксәлдир, вә мәним Хиласкарым олан Аллаһ үчүн руһум шад олду» (Лука 1:46, 47). Сән дә бу кими һиссләри ифадә етмәклә дуаларыны даһа долғун едә биләрсәнми? Аллаһ горхусуна малик олан Мәрјәмин Иса Мәсиһин анасы кими сечилмәси һеч дә тәәҹҹүблү дејил!
21. Исанын дуаларында еһтирам вә иман неҹә әкс олунурду?
21 Иса дәрин еһтирам вә иманла дуа едирди. Мәсәлән, Лазары дирилтдикдән әввәл, «Иса... ҝөзләрини јухарыја галдырыб деди: “Еј Ата, Мәни ешитдијин үчүн Сәнә миннәтдарам. Әлбәттә, Мәни даим ешидәҹәјини билирдим”» (Јәһ. 11:41, 42). Сәнин дә дуаларында бу ҹүр еһтирам вә иман әкс олунурму? Исанын еһтирам долу нүмунәви дуасыны нәзәрдән кечирсән, ҝөрәҹәксән ки, дуада Јеһованын адынын тәгдис олунмасы, Падшаһлығынын ҝәлмәси вә ирадәсинин јеринә јетмәси вурғуланыр (Мат. 6:9, 10). Өз дуаларын һаггында дүшүн. Сәнин дуаларындан Падшаһлығын марагларынын, Аллаһын ирадәсинин јеринә јетирилмәсинин вә Онун адынын тәгдис олунмасынын сәнин үчүн биринҹи јердә дурдуғуну ҝөрмәк олармы? Бу, белә дә олмалыдыр.
22. Нәјә ҝөрә әмин ола биләрсән ки, Јеһова хош хәбәри бәјан едә билмәјин үчүн сәнә ҹәсарәт верәҹәк?
22 Тәгибләрлә, јахуд башга сынагларла үзләшдијимиз үчүн чох вахт дуаларымыза Јеһоваја ҹәсарәтлә хидмәт етмәк хаһишләрини дахил едирик. Синедрион Петерлә Јәһјаја ‘Исанын ады илә тәлим вермәји’ гадаған едәндә онлар бу әмрә табе олмагдан ҹәсарәтлә имтина етдиләр (Һәв. иш. 4:18-20). Бурахылдыгдан сонра онлар башларына ҝәләнләр һаггында һәмиманлыларына данышдылар. Сонра исә онлар Кәламы ҹәсарәтлә бәјан етмәк үчүн Аллаһдан көмәк диләдиләр. Дуаларына ҹаваб олараг ‘Мүгәддәс Руһла долуб, Аллаһын сөзүнү ҹәсарәтлә сөјләмәләри’ неҹә дә һејранедиҹи иди! (Һәвариләрин ишләри 4:24-31 ајәләрини оху.) Нәтиҹәдә, чохлу сајда инсан Јеһованын хидмәтчиси олду. Һәмчинин дуа етмәк хош хәбәри ҹәсарәтлә бәјан етмәк үчүн сәни дә мөһкәмләндирә биләр.
Даима дуаларыны јахшылашдыр
23, 24. а) Мүгәддәс Китабы өјрәнмәјин дуаларымызы јахшылашдырдығыны ҝөстәрән башга нүмунәләр ҝәтир. б) Дуаларыны јахшылашдырмаг үчүн сән нә едәҹәксән?
23 Мүгәддәс Китабы охумағын вә өјрәнмәјин дуалары јахшылашдырдығыны ҝөстәрән чохлу нүмунәләр чәкмәк олар. Мәсәлән, Јунус кими, сән дә дуада ‘хиласын Рәбдә’ олдуғуну етираф едә биләрсән (Јун. 2:1-10). Әҝәр сән ҹидди ҝүнаһ уҹбатындан әзијјәт чәкирсәнсә вә ағсаггаллара көмәк үчүн мүраҹиәт етмисәнсә, онда Давудун мәзмурларында ифадә етдији һиссләр шәхси дуаларын заманы төвбә етдијини ҝөстәрмәјә көмәк едә биләр (Мәз. 51:1-12). Јеремја кими, сән дә бәзи дуаларында Јеһованы мәдһ едә биләрсән (Јер. 32:16-19). Әҝәр сән өзүнә һәјат јолдашы ахтарырсанса, онда «Езра» китабынын 9-ҹу фәслиндәки дуаны арашдырмаг вә орадакы фикирләри шәхси дуана дахил етмәк Аллаһын «Рәббә бағлы» олан кәслә аилә гурмаг тәләбинә әмәл етмәк гәтијјәтини мөһкәмләндирә биләр (1 Кор. 7:39; Езра 9:6, 10-15).
24 Мүгәддәс Китабы охумаға, өјрәнмәјә вә арашдырмаға давам ет. Дуаларына дахил едә биләҹәјин фикирләр ахтар. Мүгәддәс Јазылардакы фикирләри јалварышларына, миннәтдарлыг вә мәдһ дуаларына дахил едә биләрсән. Әмин ола биләрсән ки, Мүгәддәс Китабын көмәјилә дуаларыны јахшылашдырдыгҹа Јеһова Аллаһа даһа да јахын олаҹагсан.
Неҹә ҹаваб верәрдиниз?
• Аллаһын рәһбәрлијини нәјә ҝөрә ахтармалы вә изләмәлијик?
• Мүдриклик үчүн дуа етмәјә бизи нә тәшвиг етмәлидир?
• «Зәбур» китабы дуаларымызы јахшылашдырмаға неҹә көмәк едә биләр?
• Нәјә ҝөрә иманла вә еһтирамла дуа етмәлијик?
[8-ҹи сәһифәдәки шәкил]
Ибраһимин гулу Аллаһа рәһбәрлик үчүн дуа едирди. Бәс сән?
[10-ҹу сәһифәдәки шәкил]
Аиләви ибадәт дуаларыны јахшылашдырмаға көмәк едә биләр