Әсла түкәнмәјән мәһәббәт јетишдирин
‘[Мәһәббәт] һәр шејә таб ҝәтирәр. Мәһәббәт әсла түкәнмәз’ (1 КОР. 13:7, 8).
1. а) Мәһәббәт чох вахт неҹә тәгдим едилир? б) Чохлары кими вә нәји севир?
МӘҺӘББӘТ һаггында чох шеј јазылыб. Маһныларда тәрәннүм едилиб вә идеаллашдырылыб. Мәһәббәт инсанларын әсас тәләбатларындан биридир. Лакин китаб вә филмләрдә тәгдим олунан мәһәббәт һекајәләри чох вахт реаллығы әкс етдирмир; мағазалар бу кими материалларла долудур. Аллаһа вә инсанлара әсил мәһәббәт исә, демәк олар ки, јох дәрәҹәсиндәдир. Биз Мүгәддәс Китабын бу ахыр ҝүнләр һаггында дедикләринин неҹә јеринә јетдијинин шаһидијик. Инсанлар ‘худбин, пулпәрәст вә зөвгү Аллаһдан чох севир’ (2 Тим. 3:1-5).
2. Мүгәддәс Китаб бизи дүзҝүн олмајан мәһәббәтдән неҹә чәкиндирир?
2 Инсанлар севмәк баҹарығы илә јарадылыблар, лакин Аллаһын Кәламы бизи дүзҝүн олмајан мәһәббәтдән чәкиндирир. Мүгәддәс Китабда инсанын үрәјиндә бу ҹүр мәһәббәтин көк салдығы һалда нә баш вердији тәсвир олунур (1 Тим. 6:9, 10). Һәвари Павелин Димас һаггында јаздыгларыны јадыныза салын. Павелин әмәкдашы олмасына бахмајараг, о, бу дүнјанын тәклифләрини даһа чох севди (2 Тим. 4:10). Һәвари Јәһја да мәсиһчиләри бу тәһлүкәјә гаршы хәбәрдар едирди. (1 Јәһја 2:15, 16 ајәләрини оху.) Дүнјаны, онун кечиб ҝедән шејләрини вә јолларыны севмәк Аллаһы вә Ондан олан шејләри севмәјә зиддир.
3. Биз һансы чәтинликлә гаршылашырыг вә бу заман һансы суаллар мејдана чыхыр?
3 Бу дүнјадан олмасаг да, һәлә ки бу дүнјада јашајырыг. Буна ҝөрә дә, дүнјанын мәһәббәтә тәһриф олунмуш бахышларындан чәкинмәк бизә чәтин олур. Амма јанлыш вә тәһриф олунмуш мәһәббәтин тәләсинә дүшмәмәк һәјати ваҹиб мәсәләдир. Бәс биз принсипләрә әсасланан мәһәббәти кимә гаршы инкишаф вә тәзаһүр етдирмәлијик? Һәр шејә таб ҝәтирән вә әсла түкәнмәјән мәһәббәти инкишаф етдирмәкдә бизә нә көмәк едир? Мәһәббәтә ҹан атмаг бизә һансы фајданы ҝәтирир вә ҝәләҹәјимизә неҹә тәсир едир? Дүзҝүн јолда ола билмәјимиз үчүн бу суаллара даир Јеһованын нөгтеји-нәзәрини өјрәнмәлијик.
Јеһоваја гаршы мәһәббәт јетишдирин
4. Аллаһа олан мәһәббәтимиз неҹә бөјүјүр?
4 Јетишдирмәк — бир шеји һазырламаг вә бөјүмәси үчүн она гуллуг етмәк мәнасыны верир. Сәјлә чалышараг торпағы беҹәрән вә тохум сәпән әкинчини тәсәввүр едәк. О, сәпдији тохумун бөјүмәсини ҝөзләјир (Ибр. 6:7). Ејнилә, бизим Аллаһа олан мәһәббәтимиз дә бөјүмәлидир. Бунун үчүн нә тәләб олунур? Биз Падшаһлыг һаггында һәгигәт тохумунун сәпилдији үрәјимизин мүнбит торпағыны беҹәрмәлијик. Бунун үчүн Аллаһын Кәламыны диггәтлә өјрәнмәлијик ки, Онун һаггында билијимиз артсын (Колос. 1:10). Мүнтәзәм олараг јығынҹаг ҝөрүшләриндә фәал иштирак етмәк дә бизә билијимизи артырмаға көмәк едәҹәк. Дәрин биликләрә јијәләнмәк үчүн һәр биримиз даим сәј ҝөстәририкми? (Сүл. мәс. 2:1-7).
5. а) Јеһованын әсас кејфијјәтләри һаггында неҹә өјрәнә биләрик? б) Аллаһын әдаләти, мүдриклији вә гүввәси барәдә нә дејә биләрик?
5 Јеһова Өз Кәламы васитәсилә неҹә шәхсијјәт олдуғуну ачыглајыр. Мүгәддәс Јазылары өјрәнмәклә вә Јеһова һаггында даһа чох билик әлдә етмәклә Онун әдаләт, гүввә, мүдриклик, ән әсасы исә, ән үстүн олан мәһәббәт кими хүсусијјәтләринә ҝөрә миннәтдарлығымызы артыра биләрик. Јеһованын әдаләти Онун јолларында вә мүкәммәл ганунларында әкс олунур (Ганун. т. 32:4; Мәз. 19:7). Биз Јеһованын әл ишләри үзәриндә дүшүнә вә мисилсиз мүдриклијинә дәрин еһтирам бәсләјә биләрик (Мәз. 104:24). Һәмчинин Каинат Јеһованын ‘бол гүввә вә бөјүк гүдрәт’ Мәнбәји олдуғуна дәлаләт едир (Јешаја 40:26).
6. Аллаһын бизә олан мәһәббәти нәдән ҝөрүнүр вә бу, сизә неҹә тәсир едир?
6 Бәс Аллаһын әсас кејфијјәти олан мәһәббәт һаггында нә демәк олар? Онун мәһәббәти чох бөјүкдүр вә О, бизим һамымызы севир. Јеһова бу мәһәббәти бәшәријјәти азад етмәк үчүн фидјә вермәклә тәзаһүр етдириб. (Ромалылара 5:8 ајәсини оху.) Бу гурбан бүтүн бәшәријјәтә әлчатандыр, анҹаг јалныз Аллаһын мәһәббәтинә һај верәнләр вә Онун Оғлуна иман ҝәтирәнләр ондан фајда әлдә едәҹәк (Јәһ. 3:16, 36). Ҝүнаһларымызы јумаг үчүн Аллаһын Исаны фидјә олараг тәгдим етмәси үрәјимиздә Она гаршы мәһәббәт ојатмалыдыр.
7, 8. а) Аллаһа мәһәббәт ҝөстәрмәк үчүн биздән нә тәләб олунур? б) Һансы чәтинликләрә бахмајараг, Аллаһын халгы Онун әмрләринә әмәл едир?
7 Аллаһын бизим үчүн етдији һәр шејә ҝөрә мәһәббәтимизи неҹә ҝөстәрә биләрик? Мүгәддәс Китабда бу ваҹиб суала белә ҹаваб верилир: «Аллаһы севмәк, Аллаһын әмрләринә риајәт етмәк демәкдир. Онун әмрләри исә ағыр дејилдир» (1 Јәһ. 5:3). Бәли, Јеһова Аллаһа олан мәһәббәтимиз бизи Онун әмрләринә риајәт етмәјә тәшвиг едир. Бу, Онун ады вә Падшаһлығы һаггында шаһидлик етмәк кими башгаларына хејир ҝәтирән ишдә иштирак етмәјимизин сәбәбләриндән биридир. Әҝәр бу ишдә бүтүн үрәкдән иштирак едириксә, онда бу, Аллаһын әмрләринә тәмиз нијјәтлә риајәт етдијимизә дәлаләт едир (Мат. 12:34 ).
8 Инсанларын хош хәбәрә лагејд јанашмаларына вә ја ону рәдд етмәләринә бахмајараг, бүтүн дүнјада гардашларымыз Аллаһын әмрләринә риајәт етмәкдә әзмлидирләр. Онлар хидмәтләрини там шәкилдә иҹра етмәк сәјләрини зәифләтмирләр (2 Тим. 4:5). Буна бәнзәр тәрздә, биз дә Аллаһ һаггында билији башгалары илә бөлүшмәјә, һәмчинин Онун диҝәр әмрләринә риајәт етмәјә тәшвиг олунуруг.
Биз Иса Мәсиһи нәјә ҝөрә севирик?
9. Мәсиһ һансы сынаглара гатлашмалы олду вә ону буна нә тәшвиг етди?
9 Аллаһа олан мәһәббәтдән әлавә, Онун Оғлуна гаршы мәһәббәт јетишдирмәк үчүн дә чохлу сәбәбләримиз вар. Исаны һеч вахт ҝөрмәдијимизә бахмајараг, онун һаггында даһа чох өјрәндикҹә мәһәббәтимиз ҝет-ҝедә артыр (1 Пет. 1:8). Иса һансы сынаглара гатлашмалы олмушду? О, Атасынын ирадәсини јеринә јетирәндә сәбәбсиз нифрәт, тәгиб, јалан иттиһамлар, тәһгир вә диҝәр алчалдыҹы әдаләтсизликләрлә үзләшмишди. (Јәһја 15:25 ајәсини оху.) Иса сәмави Атасыны севдији үчүн бүтүн бу сынаглара таб ҝәтирди. Мәһз мәһәббәтдән ирәли ҝәләрәк, о, бир чохлары уғрунда ҹаныны фидјә олараг гурбан верди (Мат. 20:28).
10, 11. Мәсиһин бизим үчүн етдикләрини нәзәрә алсаг, мәгсәдимиз нә олмалыдыр?
10 Исанын етдикләри бизи она гаршылыглы олараг ҹаваб вермәјә тәшвиг едир. Мәсиһин бизим уғрумузда етдикләри барәдә дүшүнәндә она олан мәһәббәтимиз даһа да артыр. Онун давамчысы олдуғумуз үчүн ејни мәһәббәти инкишаф етдирмәли вә даим тәзаһүр етдирмәлијик, онда Падшаһлыг һаггында шаһидлик етмәк вә шаҝирд һазырламаг тапшырығына ахыра гәдәр риајәт едә биләҹәјик (Мат. 28:19, 20).
11 Мәсиһин бәшәријјәтә ҝөстәрдији мәһәббәтә ҹаваб олараг, биз сон ҝәлмәмишдән өнҹә онун тапшырығыны ахыра гәдәр јеринә јетирмәк истәјирик. (2 Коринфлиләрә 5:14, 15 ајәләрини оху.) Аллаһын бәшәријјәтә даир нијјәтини һәјата кечирмәкдә Мәсиһин мәһәббәти әсас рол ојнајыр. Мәсиһин изләри илә ҝетсәк, Аллаһын нијјәтинин јеринә јетмәсиндә бизим дә пајымыз олаҹаг. Бунун үчүн әлимиздән ҝәлдији гәдәр Аллаһа мәһәббәт инкишаф етдирмәк лазымдыр (Мат. 22:37). Исанын тәлимләринә вә әмрләринә риајәт етмәклә биз, Иса кими, Аллаһы севдијимизи вә һәр нә олурса-олсун Онун али һөкмранлығынын тәрәфини тутмаға гәти гәрарлы олдуғумузу ҝөстәририк (Јәһ. 14:23, 24; 15:10).
Ән мүкәммәл мәһәббәт јолу илә ҝедин
12. Павел «әла јол» ифадәси алтында нәји нәзәрдә тутурду?
12 Һәвари Павел Мәсиһи тәглид едирди. Мәсиһин нүмунәсини дәгиг изләдији үчүн Павел алныачыглыгла гардашлары өзүнү тәглид етмәјә чағырырды (1 Кор. 11:1). Павел Коринфдәки мәсиһчиләри Ы әсрдә верилән руһун шәфа вермәк вә башга дилләрдә данышмаг кими әнамларына ҹан атмаға тәшвиг етсә дә, бундан да јахшы јолун олдуғуну ҝөстәрди. О, 1 Коринфлиләрә 12:31 ајәсиндә дејир: «Мән сизә бундан әла јол ҝөстәрәрәм». Бу ајәнин контекстиндән ҝөрүрүк ки, бурада сөһбәт ән мүкәммәл мәһәббәт јолундан ҝедир. О, һансы мәнада ән мүкәммәл јолдур? Павел буну нүмунә әсасында изаһ едир. (1 Коринфлиләрә 13:1-3 ајәләрини оху.) Әҝәр онда мәһәббәт олмасајды, нә гәдәр бөјүк габилијјәтә малик олмасына вә нә гәдәр мөһтәшәм ишләр ҝөрмәсинә бахмајараг, бунларын бир дәјәри олардымы? Әлбәттә, јох! Аллаһын мүгәддәс руһу сајәсиндә о, бу ваҹиб һәгигәти изаһ етди. Буну бизә чатдырмаг үчүн о неҹә дә тәсирли сөзләрдән истифадә едиб!
13. а) 2010-ҹу ил үчүн иллик ајә һансыдыр? б) Нәјә ҝөрә мәһәббәт әсла түкәнмәјәҹәк?
13 Сонра Павел мәһәббәтин нә олдуғуну ајдын шәкилдә изаһ едир. (1 Коринфлиләрә 13:4-8 ајәләрини оху.) Вахт ајырыб, мәһәббәт һаггында дејиләнләрә нә дәрәҹәдә ујғун ҝәлдијинизи јохлајын. Амма ҝәлин 7-ҹи ајәнин сонунда вә 8-ҹи ајәнин башланғыҹында јазылан сөзләрә диггәт јетирәк. Орада дејилир: ‘[Мәһәббәт] һәр шејә таб ҝәтирәр. Мәһәббәт әсла түкәнмәз’. Бу, 2010-ҹу илин иллик ајәси олаҹаг. Диггәт јетирин: 8-ҹи ајәдә Павел дејир ки, мәсиһчи јығынҹағынын илк чағларында верилән пејғәмбәрлик етмәк вә башга дилләрдә данышмаг кими руһун әнамлары ләғв едиләҹәк. Онлара сон гојулаҹаг. Амма мәһәббәт һәмишә олаҹаг. Јеһова мәһәббәтин тәҹәссүмүдүр вә О әбәдидир. Буна ҝөрә дә мәһәббәт әсла түкәнмәјәҹәк. Бу хүсусијјәт, әбәди Аллаһымызын хүсусијјәти кими, әбәди галаҹаг (1 Јәһ. 4:8).
Мәһәббәт һәр шејә таб ҝәтирир
14, 15. а) Мәһәббәт бизә сынаглара таб ҝәтирмәкдә неҹә көмәк едир? б) Нәјә ҝөрә бир ҝәнҹ гардаш иманындан дөнмәди?
14 Мәсиһчиләрин истәнилән сынаглара, чәтинликләрә вә проблемләрә таб ҝәтирмәсинә нә көмәк едир? Әсас етибарилә, принсипләрә әсасланан мәһәббәт. Белә мәһәббәт өзүнә садәҹә мадди шејләрдән имтина етмәкдән даһа чох шеји дахил едир. Бу, нөгсансызлығымызы горумаг, лазым ҝәләрсә, Мәсиһ наминә һәјатымыздан белә кечмәк демәкдир (Лука 9:24, 25). Ҝәлин Икинҹи Дүнја мүһарибәси заманы вә ондан сонра һәбс вә әмәк дүшәрҝәләриндә әзијјәт чәкән Шаһидләрин садиглији үзәриндә дүшүнәк.
15 Ҝәнҹ алман Шаһиди Вилһемин һадисәси буну чох јахшы тәсвир едир. Насистләр ону ҝүлләләјәндә о, ҝүзәштә ҝетмәјиб ахыра гәдәр садиг галды. Аиләсинә јаздығы вида мәктубунда Вилһем дејирди: «Башчымыз Иса Мәсиһин әмр етдији кими, биз һәр шејдән әввәл, Аллаһы севмәлијик. Әҝәр Онун тәрәфини тутсаг, О, бизи мүкафатландыраҹаг». Бир гәдәр сонра «Ҝөзәтчи Гүлләси»ндә онун аилә үзвләриндән биринин сөзләри ҝәтирилирди: «Биз бир аилә кими чалышмышыг ки, тәлатүмлү дөврләрдә Аллаһа мәһәббәт һәмишә биринҹи јердә дурсун». Һал-һазырда Еритрејада, Ҹәнуби Корејада вә бир чох башга өлкәләрдә һәбсханаларда јатан гардашлар ејни руһ тәзаһүр етдирирләр. Бу гардашлар Јеһоваја олан мөһкәм мәһәббәтләрини горујуб сахлајырлар.
16. Малавидәки гардашларымыз һансы сынаглара таб ҝәтирмишләр?
16 Бир чох јерләрдә гардашларымызын иманы вә дөзүмлүлүјү мүхтәлиф сынаглара мәруз галыр. 26 ил әрзиндә Малавидә Јеһованын Шаһидләринин фәалијјәти гадаға алтында олмуш вә онлар шиддәтли тәгиб вә вәһшиликләрлә үзләшмишләр. Онларын дөзүмлүлүјү хејир-дуаландырылды. Тәгибләр башлајанда өлкәдә тәхминән 18 000-ә јахын Шаһид варды. Отуз илдән сонра онларын сајы ики дәфәдән чох артды — 38 393 нәфәр олду. Башга өлкәләрдә дә бу ҹүр артым мүшаһидә олунур.
17. Бәзиләри иманларына шәрик олмајан аилә үзвләри тәрәфиндән һансы сынаглара мәруз галырлар вә бунлара таб ҝәтирмәкдә онлара нә көмәк едир?
17 Аллаһын халгынын үмумиликдә гаршылашдығы бирбаша һүҹумлар бир јана, һәтта ајры-ајрылыгда да мәсиһчиләр аилә үзвләри тәрәфиндән тәгибләрә мәруз галырлар. Мәсиһчијә аилә үзвләри, еләҹә дә диҝәр јахын гоһумлары тәзјиг ҝөстәрә биләр. Мәҝәр Иса бунун баш верәҹәјини демәмишдими? Бәли, чохлары бу сөзләрин һәгигилијини өз үзәриндә һисс етмишдир (Мат. 10:35, 36). Јенијетмәләр иманларына шәрик олмајан валидејнләри тәрәфиндән тәгиб олунурлар. Һәтта бәзиләри евләриндән говулур, анҹаг онлар чөлдә галмырлар, хејирхаһ һәмиманлылары онлара сығынаҹаг верир. Диҝәрләри исә доғмалары тәрәфиндән рәдд едилир. Онлара бу ҹүр пис рәфтара таб ҝәтирмәк үчүн ҝүҹ верән тәкҹә гардашлыға олан мәһәббәт јох, ән әсасы, Јеһоваја вә Онун Оғлуна олан сәмими мәһәббәтдир (1 Пет. 1:22; 1 Јәһ. 4:21).
18. Һәр шејә таб ҝәтирән мәһәббәт евли мәсиһчиләрә неҹә көмәк едир?
18 Һәјатын бир чох башга саһәләри дә вар ки, һәр шејә таб ҝәтирән мәһәббәт тәләб едир. Мәһәббәт евли мәсиһчиләри Исанын нөвбәти сөзләринә һөрмәтлә јанашмаға тәшвиг едир: «Аллаһын бирләшдирдијини инсан ајырмамалыдыр» (Мат. 19:6). Евли мәсиһчиләр ‘һәјатда әзијјәтлә’ үзләшәндә өзләринә хатырлатмалыдырлар ки, онларын никаһында әсас јери Јеһова тутур (1 Кор. 7:28). Онун Кәламында дејилир ки, мәһәббәт ‘һәр шејә таб ҝәтирир’ вә бу хүсусијјәти ҝејинән әр-арвад бир-биринә јахын олаҹаг вә никаһларыны мөһкәмләндирәҹәк (Колос. 3:14).
19. Тәбии фәлакәтләр заманы Аллаһын халгы арасындакы мәһәббәти нәдән ҝөрмәк олар?
19 Мәһәббәт бизә тәбии фәлакәт заманы һәр шејә таб ҝәтирмәјә көмәк едир. Перунун ҹәнубунда зәлзәлә вә Бирләшмиш Штатларын Мексика көрфәзи саһилләриндә «Катрина» гасырғасы баш верән заман буну ајдын ҝөрмәк мүмкүн иди. Бу фәлакәтләр заманы бир чох гардашларымыз евләриндән вә ја әмлакларындан мәһрум олдулар. Мәһәббәт үмумдүнја јығынҹағыны онлара һуманитар јардым ҝөстәрмәјә, көнүллүләри исә евләрини јенидән тикмәјә вә Падшаһлыг Залларыны бәрпа етмәјә тәшвиг етди. Бу ишләр сүбут едир ки, гардашларымыз һәмишә вә истәнилән вәзијјәтләрдә бир-бирләрини севир вә гајғыларына галырлар (Јәһ. 13:34, 35; 1 Пет. 2:17).
Мәһәббәт әсла түкәнмәз
20, 21. а) Нәјә ҝөрә мәһәббәт ән мүкәммәл кејфијјәтдир? б) Нәјә ҝөрә сиз мәһәббәт јолу илә ҝетмәк әзминдәсиниз?
20 Јеһованын мүасир халгы арасында ән мүкәммәл мәһәббәт јолу илә ҝетмәјин мүдриклик олдуғуну ҝөрүрүк. Һәгигәтән дә, бу, бүтүн һалларда өзүнү доғрулдур. Ҝөрүн, һәвари Павел бу һәгигәти неҹә гејд едир. Биринҹиси, о дејир ки, руһун әнамлары кечиб ҝедәҹәк вә мәсиһчи јығынҹағы јеткинлијә чатаҹаг. Сонра исә о, белә нәтиҹә чыхарыр: «Инди исә үч шеј багидир: иман, үмид, мәһәббәт; амма мәһәббәт бунларын һамысындан үстүндүр» (1 Кор. 13:13).
21 Иман етдијимиз шејләр нәһајәтдә ҝерчәкләшәҹәк, буна ҝөрә дә онлара иман етмәјә артыг еһтијаҹ галмајаҹаг. Бүтүн шејләр јениләшәндән сонра һәјата кечмәсини һәсрәтлә ҝөзләдијимиз вәдләрә олан үмидә дә артыг еһтијаҹ галмајаҹаг. Бәс мәһәббәт? Мәһәббәт әсла түкәнмәјәҹәк, һәмишә олаҹаг. Әбәди јашајаҹағымызы нәзәрә алсаг, Аллаһын мәһәббәтинин диҝәр јөнләрини дә ҝөрәҹәк вә баша дүшәҹәјик. Әсла түкәнмәјән ән мүкәммәл мәһәббәт јолу илә ҝедәрәк Аллаһын ирадәсини һәјата кечирсәк, әбәди јашајаҹағыг (1 Јәһ. 2:17).
Неҹә ҹаваб верәрдиниз?
• Нәјә ҝөрә өзүмүзү дүзҝүн олмајан мәһәббәтдән ҝөзләмәлијик?
• Мәһәббәт бизә нәләрә таб ҝәтирмәјә көмәк едир?
• Һансы мәнада мәһәббәт әсла түкәнмир?
[27-ҹи сәһифәдәки јазы]
2010-ҹу ил үчүн иллик ајә: ‘[Мәһәббәт] һәр шејә таб ҝәтирәр. Мәһәббәт әсла түкәнмәз’ (1 Кор. 13:7, 8).
[25-ҹи сәһифәдәки шәкил]
Аллаһа олан мәһәббәт бизи шаһидлик етмәјә тәшвиг едир
[26-ҹы сәһифәдәки шәкил]
Түкәнмәз мәһәббәт Малавидәки баҹы вә гардашлара сынаглара таб ҝәтирмәјә көмәк етди