Һәјатынын һәр ҝүнү илә Аллаһы иззәтләндир

МӘЗМУРЧУ Давуд Јеһоваја дуа едирди: «Һәр сәһәр мәһәббәтини мәнә һисс етдир... ҝедәҹәјим јолу мәнә өјрәт» (Мәз. 143:8). Сәһәр јухудан ајыланда вә јени ҝүн үчүн Јеһоваја миннәтдарлығыны билдирәндә, Давуд кими, сән дә гәрарларын вә аддымларын үчүн рәһбәрлик диләјирсәнми? Шүбһә јохдур ки, бу беләдир.

Јеһованын һәср олунмуш хидмәтчиләри олан бизләр ‘јејириксә, ичириксә, нә едириксә, һәр шеји Аллаһын иззәти үчүн етмәјә’ чалышырыг (1 Кор. 10:31). Биз баша дүшүрүк ки, һәр ҝүнүмүзлә ја Јеһованы иззәтләндирә, ја да ки Онун адына ләкә ҝәтирә биләрик. Үстәлик, Аллаһын Кәламындан билирик ки, Шејтан Мәсиһин гардашларыны вә демәк олар ки, Аллаһын јер үзүндәки һәр бир хидмәтчисини «ҝеҹә вә ҝүндүз» иттиһам едир (Вәһј 12:10). Буна ҝөрә дә биз «ҝеҹә-ҝүндүз» сәмави Атамызын гаршысында мүгәддәс хидмәтимизи иҹра етмәклә Шејтанын јалан иттиһамларына ҹаваб вермәјә вә Онун гәлбини севиндирмәјә гәти гәрарлыјыг (Вәһј 7:15; Сүл. мәс. 27:11).

Ҝәлин һәр ҝүнүмүзлә Аллаһы неҹә иззәтләндирә биләҹәјимизин ики ваҹиб үсулуну гысаҹа нәзәрдән кечирәк. Биринҹиси үстүн дәјәрләри ајырд етмәк, икинҹиси исә башгаларына гаршы диггәтли олмагдыр.

Вәдимизә ујғун јашајырыг

Өзүмүзү Јеһоваја һәср етмәклә Она үрәкдән хидмәт етмәк истәдијимизи ҝөстәрмишик. Биз һәмчинин сөз вермишик ки, «һәр ҝүн», һәтта әбәдијјән Онун јоллары илә ҝедәҹәјик (Мәз. 61:5, 8). Белә исә, һәр ҝүн вәдимизә ујғун јашадығымызы вә Јеһованы үрәкдән севдијимизи неҹә ҝөстәрә биләрик?

Јеһованын Кәламында Онун бизә һәвалә етдији мәсулијјәтләр ајдын ҝөстәрилир (Ганун. т. 10:12, 13). Онлардан бәзиләри 22-ҹи сәһифәдәки «Аллаһ биздән нә тәләб едир?» адлы чәрчивәдә садаланыр. Бүтүн бу тапшырыглар Аллаһдан олдуғундан онлар бизим үчүн мүһүм әһәмијјәт кәсб едир. Әҝәр ики-үч тапшырығы ејни вахтда јеринә јетирмәк тәләб олунурса, онлардан һансына үстүнлүк вермәли олдуғумузу неҹә мүәјјән едә биләрик?

Биз мүгәддәс хидмәтимизә — Аллаһын Кәламыны охумаға, дуа етмәјә, мәсиһчи ҝөрүшләринә вә тәблиғ хидмәтинә үстүнлүк веририк (Мат. 6:33; Јәһ. 4:34; 1 Пет. 2:9). Әлбәттә, сәһәрдән ахшамаҹан руһани ишләрлә мәшғул олмаг гејри-мүмкүндүр. Иш, мәктәб вә мүхтәлиф ев ишләри дә диггәт тәләб едир. Бунунла белә, биз бүтүн ишләримизи елә планлашдырырыг ки, јығынҹаг ҝөрүшләриндә иштирак етмәк кими мүгәддәс хидмәтимиздән галмајаг. Мәсәлән, мәзунијјәтә чыхмағы планлашдыранда рајон нәзарәтчисинин башчәкмәсини, хүсуси бирҝүнлүк, рајон вә вилајәт конгресләринин һеч бирини бурахмамалыјыг. Бәзән ејни заманда бир нечә мәсулијјәтин өһдәсиндән ҝәлә биләрик. Мәсәлән, Падшаһлыг Залынын јығышдырылмасында аиләликҹә иштирак етмәк олар, јахуд ишдә вә ја мәктәбдә фасилә заманы тәблиғ едә биләрик. Һәгигәтән дә, һәјатымызда ән ваҹиб јер тутан севимли Атамыз Јеһоваја ибадәт иш, тәһсил вә ја дост сечими кими гәрарларымыза тәсир етмәлидир (Ваиз 12:13).

Башгаларына гаршы диггәтли ол

Јеһова башгаларынын гајғысына галмағымызы вә онлара јахшылыг етмәјимизи истәјир. Шејтан исә, әксинә, худбинлик руһу јајыр. Онун дүнјасы өзүнү вә ‘зөвгү севән’, һәмчинин «өз ҹисмани тәбиәти үчүн әкән» инсанларла долудур (2 Тим. 3:1—5; Галат. 6:8). Чохлары һәрәкәтләринин башгаларына неҹә тәсир едәҹәјини веҹләринә белә алмырлар. «Ҹисмани тәбиәтин әмәлләри» бүтүн дүнјаны ағушуна алыб (Галат. 5:19—21).

Јеһованын мүгәддәс руһу илә һәрәкәт едәрәк инсанларла мәһәббәтлә давранан, хејирхаһлыг вә јахшылыг едәнләрин дүшүнҹә тәрзи неҹә дә фәрглидир! (Галат. 5:22). Аллаһын Кәламы мәсләһәт ҝөрүр ки, биз башгаларынын тәләбатларыны өзүмүзүнкүндән үстүн тутаг. Буна ҝөрә дә биз башгаларына дәрин мараг ҝөстәририк, лакин онларын шәхси ишләринә гарышмырыг (1 Кор. 10:24, 33; Филип. 2:3, 4; 1 Пет. 4:15). Биз хүсусилә дә баҹы-гардашларымыза гаршы диггәтлијик. Бунунла белә, иманымыза шәрик олмајан инсанлара да имкан дахилиндә көмәк едирик (Галат. 6:10). Инсанлара хејирхаһлыг ҝөстәрмәк үчүн имканлар ахтара биләрсәнми? («Онлара гаршы диггәтли ол» адлы чәрчивәјә бах, сәһифә 23.)

Әлбәттә, хејирхаһлыг ҝөстәрмәк үчүн биз мүәјјән вахты вә ја һансыса вәзијјәтин јаранмасыны ҝөзләмирик (Галат. 6:2; Ефес. 5:2; 1 Салон. 4:9, 10). Әксинә, һәр ҝүн чалышырыг ки, башгаларынын вәзијјәти илә марагланаг вә бизим үчүн раһат олмаса белә, онларын тәләбатларына һај верәк. Биз малик олдуғумуз һәр шеји — вахтымызы, мадди вәсаитләримизи, тәҹрүбәмизи вә билијимизи сәхавәтлә бөлүшмәјә ҹан атырыг. Јеһова бизи әмин едир ки, әҝәр башгаларына гаршы сәхавәтли олсаг, О да бизә гаршы сәхавәтли олаҹаг (Сүл. мәс. 11:25; Лука 6:38).

«Ҝеҹә-ҝүндүз» мүгәддәс хидмәти иҹра едирик

«Ҝеҹә-ҝүндүз» Јеһованын гаршысында мүгәддәс хидмәти иҹра етмәк мүмкүндүрмү? Бәли, амма бунун үчүн ибадәтимизин бүтүн саһәләриндә мүнтәзәм вә чалышган олмалыјыг (Һәв. иш. 20:31). Аллаһын Кәламыны һәр ҝүн охумағын вә онун үзәриндә дүшүнмәјин, дурмадан дуа етмәјин, бүтүн јығынҹаг ҝөрүшләриндә иштирак етмәјин вә шаһидлик вермәк үчүн һәр бир фүрсәтдән истифадә етмәјин сајәсиндә һәјатымыз мүгәддәс хидмәтин әтрафында дөвр едәҹәк (Мәз. 1:2; Лука 2:37; Һәв. иш. 4:20; 1 Салон. 3:10; 5:17).

Бәс шәхсән биз бу ҹүр мүгәддәс хидмәти јеринә јетиририкми? Әҝәр јетиририксә, онда Ону разы салмаг вә Шејтанын иттиһамларына ҹаваб вермәк истәји ҝүндәлик һәјатымызын һәр бир саһәсиндә әкс олунаҹаг. Биз һәр ан, һәр заман Јеһованы иззәтләндирмәјә чалышырыг. Биз данышығымызда, давранышымызда, һәмчинин гәрар гәбул едәндә Онун принсипләрини әлдә рәһбәр тутуруг. Әҝәр Аллаһа там етибар едир вә ҝүҹүмүзү хидмәтә сәрф едириксә, Онун нәвазишлә гајғымыза галдығыны вә бизә дәстәк олдуғуну гијмәтләндирдијимизи ҝөстәририк. Гејри-камиллик уҹбатындан Аллаһын нормаларыны позанда Онун бизә вердији мәсләһәт вә ҹәзаны мәмнунијјәтлә гәбул едирик (Мәз. 32:5; 119:97; Сүл. мәс. 3:25, 26; Колос. 3:17; Ибр. 6:11, 12).

Ҝәлин јашадығымыз һәр ҝүнлә Аллаһы иззәтләндирәк. Онда ҹанымыз раһатлыг тапаҹаг, үстәлик, сәмави Атамызын мәһәббәт долу гајғысыны әбәдијјән үзәримиздә һисс едәҹәјик (Мат. 11:29; Вәһј 7:16, 17).

[22-ҹи сәһифәдәки чәрчивә/шәкилләр]

Аллаһ биздән нә тәләб едир?

• Даима дуа етмәји (Ром. 12:12).

• Мүгәддәс Китабы охујуб арашдырмағы вә өзүмүзә тәтбиг етмәји (Мәз. 1:2; 1 Тим. 4:15).

• Она јығынҹагла бирҝә ибадәт етмәји (Мәз. 35:18; Ибр. 10:24, 25).

• Аиләмизин мадди, руһани вә емосионал тәләбатларынын гајғысына галмағы (1 Тим. 5:8).

• Падшаһлыг һаггында хош хәбәри тәблиғ етмәји вә шаҝирдләр һазырламағы (Мат. 24:14; 28:19, 20).

• Сағлам истираһәт дә дахил олмагла, физики, руһани вә емосионал сәһһәтимизин гајғысына галмағы (Марк 6:31; 2 Кор. 7:1; 1 Тим. 4:8, 16).

• Јығынҹаг ишләринин гајғысына галмағы (Һәв. иш. 20:28; 1 Тим. 3:1).

• Евимизин вә Падшаһлыг Залымызын гајғысына галмағы (1 Кор. 10:32).

[23-ҹү сәһифәдәки чәрчивә/шәкил]

Онлара гаршы диггәтли ол

• Јашлы баҹы-гардашлара (Лев. 19:32).

• Физики вә ја емосионал хәстәликләрдән әзијјәт чәкәнләрә (Сүл. мәс. 14:21).

• Сәндә олан шејә еһтијаҹ дујан һәмиманлына (Ром. 12:13).

• Аилә үзвләринә (1 Тим. 5:4, 8).

• Һәјат јолдашы вәфат етмиш һәмиманлына (1 Тим. 5:9).

• Јығынҹагда сәјлә чалышан ағсаггала (1 Салон. 5:12, 13; 1 Тим. 5:17).