Ата, Оғул вә мүгәддәс руһ исмилә вәфтиз олунмағын ваҹиблији
«Ҝедин, бүтүн халглары шаҝирдим един, онлары Ата, Оғул вә Мүгәддәс Руһ наминә [«исмилә», И—93] вәфтиз един» (МАТ. 28:19).
1, 2. а) Ерамызын 33-ҹү илинин Пентикост ҝүнүндә Јерусәлимдә нә баш верди? б) Бир чохларыны вәфтиз олунмаға тәшвиг едән нә иди?
БИР чох өлкәләрдән инсанлар Јерусәлимә ахышмышдылар. Ерамызын 33-ҹү илинин Пентикост бајрамы иди вә чохлары бу әламәтдар ҝүндә иштирак едирди. Лакин гејри-ади бир һадисә баш вердикдән сонра һәвари Петер нәтиҹәси һејрәтамиз олан тәсирли бир нитг сөјләди. Онун сөзләри тәхминән 3 000 јәһуди вә прозелитә елә ҝүҹлү тәсир ҝөстәрди ки, онлар төвбә едиб суда вәфтиз олундулар. Беләҹә онлар јениҹә тәсис олунмуш мәсиһчи јығынҹағына гошулдулар (Һәв. иш. 2:41). Чохлу инсанын Јерусәлимин әтрафындакы һовуз вә ноһурларда вәфтиз олунмасы, јәгин ки, чохларыны һејрәтә ҝәтирмишди!
2 Бу гәдәр инсаны вәфтиз олунмаға тәшвиг едән нә иди? Һәмин ҝүн бир гәдәр әввәл «ҝүҹлү бир күләк әсирмиш кими, ҝөјдән бир сәс ҝәлди». Евин јухары отағында топлашан Исанын 120 шаҝирди «Мүгәддәс Руһла долду». Сонра ора топлашан диндар киши вә гадынлар шаҝирдләрин ‘башга-башга дилләрдә данышдыгларыны’ ҝөрүб чох тәәҹҹүбләндиләр. Исанын өлүмү барәдә дедији ҝүҹлү сөзләр дә дахил олмагла, чохлары Петерин нитгини ешидәндә «үрәкләринә елә бил ох батды». Инди онлар нә етмәли идиләр? Петер ҹаваб верди: «Төвбә един вә һәр бириниз Иса Мәсиһин ады илә вәфтиз олсун. Вә Мүгәддәс Руһун әнамыны алаҹагсыныз» (Һәв. иш. 2:1—4, 36—38).
3. Пентикост ҝүнүндә төвбә едән јәһудиләр вә прозелитләр нә етмәли идиләр?
3 Петери динләјән јәһудиләрин вә прозелитләрин нәјә инандыгларына нәзәр салаг. Онлар артыг Јеһованы һәгиги Аллаһ кими гәбул едирдиләр. Вә онлар Ибраниҹә Мүгәддәс Јазылардан билирдиләр ки, јарадылыш заманы вә сонра Аллаһ мүгәддәс руһундан, јәни фәал гүввәсиндән истифадә етмишди (Јар. 1:2; Һак. 14:5, 6; 1 Шам. 10:6; Мәз. 33:6, КМ). Лакин буну билмәк кифајәт дејилди. Онларын Аллаһын хилас васитәси — Мәсиһ Иса барәдә өјрәнмәләри вә ону гәбул етмәләри һәјати ваҹиб әһәмијјәт кәсб едирди. Бу сәбәбдән Петер онларын ‘Иса Мәсиһин ады илә вәфтиз олунмаларынын’ ваҹиблијини вурғулады. Бундан бир нечә ҝүн әввәл дирилмиш Иса Петерә вә диҝәр шаҝирдләрә инсанлары ‘Ата, Оғул вә Мүгәддәс Руһ исмилә’ (И—93) вәфтиз етмәји тапшырды (Мат. 28:19, 20). Бу, биринҹи әсрдә олдуғу кими, бу ҝүн дә бөјүк әһәмијјәт кәсб едир. Сөһбәт нәдән ҝедир?
Атанын исмилә
4. Јеһова һансы бөјүк дәјишиклији етди?
4 Артыг гејд олундуғу кими, Петерин нитгинә гулаг асанлар Јеһоваја ибадәт едирдиләр; онларын әввәлләр дә Онунла мүнасибәтләри варды. Бу инсанлар Онун Ганунуна риајәт етмәјә чалышырдылар вә Јерусәлимә ҝәлмәләринин сәбәби дә елә бу иди (Һәв. иш. 2:5—11). Лакин Аллаһ инсанларла мүнасибәтиндә бөјүк дәјишиклик етди. О, јәһудиләри рәдд етди, онлар даһа Онун хүсуси халгы дејилдиләр; Гануна риајәт етмәк онлара артыг Аллаһын рәғбәтини газандырмырды (Мат. 21:43; Колос. 2:14). Әҝәр Петери динләјәнләр Јеһова илә сых мүнасибәтләрини горумаг истәјирдиләрсә, онлардан бир шеј дә тәләб олунурду.
5, 6. Биринҹи әсрдә бир чох јәһудиләр вә прозелитләр Јеһова илә мүнасибәтләринин олмасы үчүн нә етмишдиләр?
5 Онлардан мүтләг Јеһоваја — Һәјатверәнләринә тәрәф дөнмәләри тәләб олунурду (Һәв. иш. 4:24). Бәли, Петерин изаһатыны динләјиб она һај верәнләр Јеһованын хејирхаһ Ата олдуғуну инди даһа јахшы ҝөрә билирдиләр. Аллаһ Мәсиһи онлары хилас етмәк үчүн ҝөндәрмишди вә һәтта Петерин нөвбәти сөзләри үнванладығы инсанлары бағышламаға һазыр иди: «Гој бүтүн Исраил еви буну јахшы билсин ки, дирәјә чәкдијиниз Исаны Аллаһ һәм Аға, һәм дә Мәсиһ етмишдир» (ЈД). Петерин сөзләрини тәтбиг едәнләрин инди даһа чох сәбәбләри варды ки, Аллаһла јахын мүнасибәтләринин олмасыны истәјән һәр кәс үчүн Онун етдикләрини гијмәтләндирсинләр. (Һәвариләрин ишләри 2:30—36 ајәләрини оху.)
6 Һәмин јәһуди вә прозелитләр инди баша дүшүрдүләр ки, Јеһова илә мүнасибәтләри Онун Иса васитәсилә хилас тәгдим етдијини гәбул едиб-етмәмәләриндән асылыдыр. Инди сиз онларын, бир халг кими, билаваситә вә ја долајысы илә Исанын өлүмүндә дашыдыглары мәсулијјәт дә дахил олмагла, нәјә ҝөрә ҝүнаһларындан төвбә етдикләрини баша дүшүрсүнүз. Һәм дә онларын нөвбәти ҝүнләр әрзиндә һәвариләрдән һәвәслә тәлим алмаларынын сәбәби дә ајдын олур (Һәв. иш. 2:42). Онлар ‘лүтфкар Аллаһын тахтына ҹәсарәтлә јахынлашмаг’ истәјирдиләр вә бу, мүмкүн иди (Ибр. 4:16).
7. Бир чохларынын Аллаһ барәдә тәсәввүрләринин дәјишмәсинә вә онларын вәфтиз олунмасына нә сәбәб олуб?
7 Бизим ҝүнләрдә мүхтәлиф мәншәли милјонларла инсанлар Мүгәддәс Китабдан Јеһова һагда һәгигәти өјрәнмишләр (Јешаја 2:2, 3). Бәзиләри вахтилә атеист вә ја деистa олмушлар, амма сонра сых мүнасибәт гура биләҹәкләри Јараданын варлығына әмин олмушлар. Диҝәрләри Үч үгнума вә мүхтәлиф бүтләрә ибадәт едирдиләр. Онлар јалныз Јеһованын Гадир Аллаһ олдуғуну өјрәнибләр вә инди Она ады илә мүраҹиәт едирләр. Бу, Исанын өз шаҝирдләринә Атанын исми илә вәфтиз олунмалы олдугларыны дедији сөзләрә ујғундур.
8. Адәмдән мирас алынмыш ҝүнаһдан хәбәри олмајанлар Ата барәдә нәји өјрәнмәли идиләр?
8 Онлар һәмчинин Адәмдән ҝүнаһы мирас алдыгларыны өјрәнмишләр (Ром. 5:12). Бу, онларын гәбул етмәли олдуглары јени һәгигәт иди. Бу инсанлары хәстәлијиндән хәбәрсиз олан бир адамла мүгајисә етмәк олар. Ола билсин, хәстәлијин бәзи симптомлары өзүнү бүрузә вериб, мәсәлән, о, бәзән ағрылар һисс едир. Мүајинә кечиб диагноз гојулмадан о, елә дүшүнә биләр ки, сәһһәтиндә һеч бир проблем јохдур. Әслиндә исә һеч дә һәр шеј онун дүшүндүјү кими дејил. (1 Коринфлиләрә 4:4 ајәси илә мүгајисә ет.) Һәким мүајинәсиндән сонра дәгиг диагноз гојулса, неҹә? Мәҝәр ҝениш јајылмыш, сынанмыш, еффектив мүалиҹәни ахтарыб тапмаг, сонра да мүалиҹә гәбул етмәк ағыллы һәрәкәт олмаздымы? Буна бәнзәр шәкилдә, бир чохлары мирас алдыглары ҝүнаһ барәдә һәгигәти өјрәндикдән сонра Мүгәддәс Китабын гојдуғу «диагноз» илә барышмыш вә өјрәнмишләр ки, һәмин хәстәлијин «әлаҹы» Аллаһдадыр. Бәли, Атадан узаглашмыш һәр адам онлара «шәфа» верә биләҹәк Шәхсә тәрәф дөнмәлидир (Ефес. 4:17—19).
9. Аллаһ Онунла мүнасибәтимизин мүмкүн олмасы үчүн нә етди?
9 Әҝәр сән артыг өз һәјатыны Јеһова Аллаһа һәср едиб вәфтиз олунмуш мәсиһчисәнсә, Онунла сых мүнасибәтин нә гәдәр ҝөзәл олдуғуну артыг үзәриндә һисс етмисән. Инди сән Јеһованын нә гәдәр мәһәббәтли Ата олдуғуну баша дүшүрсән. (Ромалылара 5:8 ајәсини оху.) Адәмлә Һәвва Она гаршы ҝүнаһ ишләтсәләр дә, Аллаһ тәшәббүсү үзәринә ҝөтүрүб тәдбир ҝөрдү ки,— биз дә дахил олмагла — онларын өвладлары Онунла јахшы мүнасибәтдә олсунлар. Бунун үчүн Аллаһ севимли Оғлунун әзабларына вә өлүмүнә гатлашмалы иди. Мәҝәр бу, бизи Аллаһын һакимијјәтини гәбул етмәјә вә мәһәббәтдән ирәли ҝәләрәк Онун әмрләринә табе олмаға тәшвиг етмирми? Әҝәр сән һәлә һәјатыны Аллаһа һәср едиб вәфтиз олунмамысанса, буну етмәк үчүн там әсасын вар.
Оғулун исми илә
10, 11. а) Биз Исаја нәјә ҝөрә миннәтдар олмалыјыг? б) Исанын өзүнү фидјә олараг тәгдим етмәси сәндә һансы һиссләри доғурур?
10 Петерин издиһама дедији сөзләрин үзәриндә бир даһа дүшүнәк. О, Исаны гәбул етмәјин ваҹиблијини вурғулады, бу да ‘Оғулун исми илә вәфтиз олунмагла’ бирбаша әлагәлидир. Нәјә ҝөрә бу, о заман ваҹиб олдуғу кими, бу ҝүн дә ваҹибдир? Чүнки Исаны гәбул етмәк вә онун исми илә вәфтиз олунмаг онун Јараданла мүнасибәтимиздә ојнадығы ролу гәбул етмәк демәкдир. Иса јәһудиләри Ганунун ләнәтиндән хилас етмәк үчүн ишҝәнҹә дирәјиндән асылмалы иди; амма онун өлүмүнүн бундан да бөјүк фајдасы олмушду (Галат. 3:13). О, бүтүн бәшәријјәтин еһтијаҹ дујдуғу фидјә гурбанлығыны тәгдим етди (Ефес. 2:15, 16; Колос. 1:20; 1 Јәһ. 2:1, 2). Лакин бунун үчүн Иса әдаләтсизликлә, тәһгирләрлә, изтирабларла вә өлүмлә үзләшмәли олду. Сән онун гурбаныны нә дәрәҹәдә гијмәтләндирирсән? Тәсәввүр ет: 1912-ҹи илдир. Сәнин 12 јашын вар вә «Титаник»дә сәјаһәт едирсән. Гәфләтән ҝәми ајсберглә тоггушур вә батмаға башлајыр. Сән хиласедиҹи гајыға тулланмаға чалышырсан, амма о, долудур. Сонра гајыгда олан бир нәфәр киши һәјат јолдашыны өпүб, ҝәмијә галхыр вә сәни гајыға миндирир. Бу заман һансы һиссләри кечирәрдин? Әлбәттә, сән она чох миннәтдар олардын! Инди сән бу һадисәләри јашамыш бир оғланын кечирдији һиссләри баша дүшүрсәнb. Амма Иса сәнин уғрунда бундан да бөјүк ишләр ҝөрүб. О, ҹаныны гурбан вериб ки, сән әбәди јашајасан.
11 Аллаһын Оғлунун сәнин үчүн етдикләри барәдә илк дәфә өјрәнәндә һансы һиссләри кечирмишдин? (2 Коринфлиләрә 5:14, 15 ајәләрини оху.) Чох еһтимал ки, о ан үрәјиндә дәрин миннәтдарлыг јаранмышды. Бу, сәни һәјатыны Аллаһа һәср етмәјә вә ‘өзүн үчүн јох, сәнин уғрунда Өлән үчүн јашамаға’ тәшвиг етди. Оғулун исми илә вәфтиз олунмаг Исанын сәнин үчүн етдикләрини, о ҹүмләдән онун ‘Һәјат Рәиси’ кими малик олдуғу һакимијјәтини гәбул етмәк демәкдир (Һәв. иш. 3:15; 5:31). Әввәлләр сәнин Јараданла мүнасибәтин олмадығы үчүн, демәк олар ки, мөһкәм үмидин дә олмајыб. Амма Иса Мәсиһин төкүлмүш ганына иман ҝәтириб вәфтиз олдуғун үчүн инди сәнин сәмави Атанла јахын мүнасибәтин вар (Ефес. 2:12, 13). Һәвари Павел јазмышды: «Бир вахтлар ағлыныз пис ишләрә мејилли олдуғундан сиз Аллаһа гаршы јадлашмыш вә дүшмән олмушдунуз. Инди исә О, Оғлунун бәдәни, јәни өлүмү васитәсилә сизи Өзү илә барышдырды ки, сиз Онун гаршысында мүгәддәс, пак вә гүсурсуз оласыныз» (Колос. 1:21, 22, ЈД).
12, 13. а) Кимсә сәнин хәтринә дәјәрсә, Оғулун исми илә вәфтиз олунмағын реаксијана неҹә тәсир етмәлидир? б) Исанын исми илә вәфтиз олунмуш бир мәсиһчи кими, сән нә етмәјә борҹлусан?
12 Сән Оғулун исми илә вәфтиз олунмағына бахмајараг, ҝүнаһа мејилли олдуғуну дәрк едирсән. Буну јадда сахламаг ваҹибдир. Мәсәлән, кимсә хәтринә дәјәндә, чалышырсанмы ки, һәр икинизин дә ҝүнаһлы олдуғунузу унутмајасан? Һәр икинизин дә Аллаһ тәрәфиндән бағышланмаға еһтијаҹы вар вә сиз бир-биринизи бағышламаға борҹлусунуз (Марк 11:25). Бунун ваҹиблијини ҝөстәрмәк үчүн Иса бир мәсәл чәкди: Бир гулун ағасы онун он мин талант (60 милјон динар) борҹуну бағышлады. Бир гәдәр сонра һәмин гул она 100 динар борҹлу олан гулуну бағышламаг истәмәди. Иса мәсәлинә јекун вурараг деди: Јеһова гардашыны бағышламајан адамы бағышламајаҹаг (Мат. 18:23—35). Бәли, Оғулун исми илә вәфтиз олунмаг Исанын һакимијјәтини танымаг вә башгаларыны бағышламаг да дахил олмагла, онун нүмунәсини изләмәјә вә тәлимләринә риајәт етмәјә чалышмаг демәкдир (1 Пет. 2:21; 1 Јәһ. 2:6).
13 Гејри-камил олдуғумуздан биз там шәкилдә Исанын нүмунәсини тәглид едә билмәрик. Анҹаг Аллаһа һәср олунаркән үрәкдән вердијимиз анда ујғун олараг, биз Исаны әлимиздән ҝәлдији гәдәр јахшы тәглид етмәк истәјирик. Бунун үчүн биз даим сәј ҝөстәрмәлијик ки, көһнә мәнлији чыхарыб јени мәнлији ҝејинәк. (Ефеслиләрә 4:20—24 ајәләрини оху.) Чох ҝүман ки, сән һөрмәт едиб дәјәрләндирдијин достунун нүмунәсини вә ҝөзәл кејфијјәтләрини тәглид етмәјә чалышырсан. Буна бәнзәр тәрздә, биз дә Мәсиһдән өјрәнмәклә онун изләри илә ҝетмәк истәјирик.
14. Исаны сәлаһијјәтли сәмави Падшаһ кими гәбул етдијини неҹә ҝөстәрә биләрсән?
14 Оғулун исми илә вәфтиз олунмағын мәғзини дәрк етдијини башга ҹүр дә ҝөстәрә биләрсән. Аллаһ «һәр шеји Онун [Исанын] ајаглары алтына табе етдирди вә бүтүн варлыгларын үзәриндә баш олмаг үчүн, Ону иманлылар ҹәмијјәтинә верди» (Ефес. 1:22). Буна ҝөрә дә биз Исанын Јеһоваја һәср олунан инсанлара неҹә рәһбәрлик вердијинә һөрмәтлә јанашмалыјыг. Мәсиһ јығынҹагда гејри-камил инсанлардан, хүсусилә дә руһән јеткин гардашлардан — тәјин олунмуш ағсаггаллардан истифадә едир. Онлары тәјин етмәкдә мәгсәд «мүгәддәсләр»и ислаһ етмәк вә «Мәсиһин бәдәнини инкишаф етдирмәк»дир (Ефес. 4:11, 12). Гејри-камил инсанлар сәһвләрә јол версәләр дә, сәмави Падшаһлығын тәјин олунмуш Падшаһы кими, Иса јаранан проблеми вахтында вә истәдији кими һәлл етмәјә гадирдир. Сән буна инанырсан?
15. Вәфтиз олунсан, һансы хејир-дуалары алаҹагсан?
15 Бунунла белә, елә инсанлар вар ки, һәлә дә һәјатларыны Јеһоваја һәср едиб вәфтиз олунмајыблар. Әҝәр сән бу аддымы атмамысанса, јухарыда јазыланлары нәзәрә алараг, Оғулу танымағын мүдрик һәрәкәт вә миннәтдарлығын әламәти олдуғуну дәрк едирсәнми? Оғулун исми илә вәфтиз олунмаг сәнә чохлу ҝөзәл хејир-дуалар ҝәтирәҹәк. (Јәһја 10:9—11 ајәләрини оху.)
Мүгәддәс руһун исми илә
16, 17. Мүгәддәс руһун исми илә вәфтиз олунмаг сәнин үчүн нә демәкдир?
16 Мүгәддәс руһун исми илә вәфтиз олунмаг нә демәкдир? Јухарыда гејд олундуғу кими, Пентикост ҝүнүндә Петерин нитгинә гулаг асанлар мүгәддәс руһун нә олдуғундан аҝаһ идиләр. Үстәлик, онлар өз ҝөзләри илә ҝөрүрдүләр ки, Аллаһ Өз мүгәддәс руһундан истифадә етмәјә давам едир. ‘Мүгәддәс Руһла долуб башга-башга дилләрдә данышмаға башлајанларын’ арасында Петер дә варды (Һәв. иш. 2:4, 8). «Исми илә» дедикдә һеч дә һәмишә һансыса шәхсин ады нәзәрдә тутулмур. Мәсәлән, бу ҝүн бир чох ишләр «дөвләтин адындан» ҝөрүлүр. Әслиндә исә һәмин ишләр мүвафиг һакимијјәт органлары тәрәфиндән иҹра олунур. Ејнилә, мүгәддәс руһун исми илә вәфтиз олунан адам да мүгәддәс руһун шәхсијјәт јох, Јеһованын фәал гүввәси олдуғуну гәбул едир. Һәмчинин вәфтиз олунан инсан мүгәддәс руһун Аллаһын нијјәтиндә ојнадығы ролу да гәбул едир.
17 Јәгин ки, сән Мүгәддәс Китабдан мүгәддәс руһ һаггында өјрәнмисән. Мәсәлән, Аллаһын Кәламынын мүгәддәс руһ тәрәфиндән илһам алараг јазылдығыны билирсән (2 Тим. 3:16). Ола билсин, сән руһән инкишаф етдикҹә, ‘сәмави Атанын Ондан диләјәнләрә’, еләҹә дә сәнә, мүгәддәс руһ вердијини даһа јахшы баша дүшмүсән (Лука 11:13). Јәгин, мүгәддәс руһун һәјатына ҝөстәрдији тәсири һисс етмисән. Амма әҝәр сән мүгәддәс руһун исми илә вәфтиз олунмаға һазырлашырсанса, Исанын Атасынын мүгәддәс руһ верәҹәјинә даир вәди о демәкдир ки, руһла јанашы, ҝәләҹәкдә сәни әсил хејир-дуалар ҝөзләјир.
18. Мүгәддәс руһун исми илә вәфтиз олунанлар һансы хејир-дуалары алырлар?
18 Ајдын ҝөрүнүр ки, Јеһова бизим ҝүнләрдә дә мәсиһчи јығынҹағыны Өз руһу илә идарә едир. Бу руһ бизә ҝүндәлик һәјатымызда да көмәк едир. Мүгәддәс руһун исми илә вәфтиз олунмаг — онун һәјатымызда ојнадығы ролу гәбул етмәк вә миннәтдарлыгла онунла әмәкдашлыг етмәк демәкдир. Амма бәзиләри соруша биләрләр: Јеһоваја һәср олунмағымыза ујғун неҹә јашаја биләрик вә мүгәддәс руһ бунда һансы ролу ојнајыр? Бу, нөвбәти мәгаләдә мүзакирә олунаҹаг.
[Һашијәләр]
a Деистләр Аллаһын мөвҹудлуғуна инаныр, амма Онун јаратдығы варлыгларла марагланмадығыны дүшүнүрләр.
b «Ојанын!» журналынын 1981-ҹи ил 22 октјабр сајынын 3—8-ҹи сәһифәләринә (инҝ.) бахын.
Јадыныздадырмы?
• Атанын исми илә вәфтиз олунмаг сәнин үчүн нә демәкдир?
• Оғулун исми илә вәфтиз олунмаг нә демәкдир?
• Ата вә Оғул исми илә вәфтиз олунмағын ваҹиблијини дәрк етдијини неҹә ҝөстәрә биләрсән?
• Мүгәддәс руһун исми илә вәфтиз олунмаг нә демәкдир?
[10-ҹу сәһифәдәки шәкил]
Ерамызын 33-ҹү илинин Пентикост бајрамындан сонра јени шаҝирдләрин сәмави Аталары илә һансы мүнасибәтләри јаранды?
[Иҹазә илә]
By permission of the Israel Museum, Jerusalem