Еј ҝәнҹләр, Јеһоваја хидмәт етмәк истәјинизи ҝүҹләндирин!
«Ҹаванлыг ҝүнләриндә сәни Јараданы хатырла» (ВАИЗ 12:1).
1. Исраилли ушаглар нәјә тәшвиг олунурдулар?
ТӘХМИНӘН 3 500 ил бундан әввәл Јеһованын пејғәмбәри Муса Исраилин каһинләринә вә ағсаггалларына әмр верәрәк демишди: «Халгын киши, гадын вә ушагларыны... топлајын. Гој һамы ешидиб өјрәнсин вә Аллаһыныз Рәбдән горхуб, ганунун бүтүн сөзләринә дәгиг әмәл етсин» (Ганун. т. 31:12). Фикир верин ки, ибадәт үчүн нәзәрдә тутулан бу ҝөрүшләрдә кишиләр вә гадынларла бирликдә ушаглар да иштирак етмәли идиләр. Бәли, һәтта балаҹа ушаглар белә ешидиб өјрәнәнләрин арасында олмалы вә Јеһованын ҝөстәришләринә әмәл етмәли идиләр.
2. Еркән мәсиһчи јығынҹағында Јеһова ҝәнҹләрин гајғысына неҹә галырды?
2 Биринҹи әсрдә дә Јеһова Ондан горхан ҝәнҹләрин гајғысына галырды. Мәсәлән, О, һәвари Павели јығынҹаглара јаздығы мәктублардан бәзиләринә ҝәнҹләр үчүн нәзәрдә тутулан ҝөстәришләри дахил етмәјә илһамландырмышды. (Ефеслиләрә 6:1; Колослулара 3:20 ајәләрини оху.) Һәмин мәсләһәтләрә риајәт едән ҝәнҹ мәсиһчиләрин мәһәббәтли сәмави Аталарына миннәтдарлыглары артыр вә Онун хејир-дуаларыны алырдылар.
3. Бу ҝүн ҝәнҹләр Јеһоваја хидмәт етмәк истәдикләрини неҹә ҝөстәрирләр?
3 Бәс бу ҝүн дә ҝәнҹләр Јеһоваја ибадәт етмәк үчүн јығынҹаг ҝөрүшләринә дәвәт олунурлармы? Бәли, олунурлар! Буна ҝөрә дә бүтүн дүнјада бу гәдәр ҝәнҹин Павелин Ибраниләрә 10:24, 25 ајәләриндәки чағырышына үрәкдән һај вермәси Аллаһын халгыны севиндирир: «Бир-биримизи мәһәббәтә вә хејирли ишләрә неҹә тәшвиг едәҹәјимизин гајғысына галаг. Бәзиләринин адәт етдикләри кими өз јығынҹагларымызы тәрк етмәјәк. Амма хүсусән, о Ҝүнүн јахынлашдығыны ҝөрдүјүмүз нисбәтдә бир-биримизи даһа чох үрәкләндирәк». Бундан әлавә, бир чох ушаглар валидејнләри илә бирҝә Аллаһын Падшаһлығы һаггында хош хәбәрин тәблиғиндә иштирак едирләр (Мат. 24:14). Јеһоваја сәмими мәһәббәтләринин тәзаһүрү кими, һәр ил минләрлә ҝәнҹләр вәфтиз олунур вә Мәсиһин шаҝирди олмаларынын сајәсиндә бол хејир-дуалар бичирләр (Мат. 16:24; Марк 10:29, 30).
Дәвәти јубанмадан гәбул ет!
4. Аллаһа хидмәт етмәк дәвәтини ҝәнҹләр нечә јашындан гәбул едә биләрләр?
4 Ваиз 12:1 ајәсиндә дејилир: «Ҹаванлыг ҝүнләриндә сәни Јараданы хатырла». Сиз ҝәнҹләр, Јеһованын Она ибадәт вә хидмәт етмәк дәвәтини гәбул етмәк үчүн нечә јашында олмалысыныз? Мүгәддәс Јазыларда конкрет јаш һәдди ҝөстәрилмир. Буна ҝөрә дә Јеһоваја гулаг асмаг вә хидмәт етмәк үчүн һәлә чох ҝәнҹ олдуғунузу дүшүнәрәк тәрәддүд етмәјин. Јашыныздан асылы олмајараг, Аллаһын Кәламы сизи јубанмадан бу сәмими дәвәти гәбул етмәјә сәсләјир.
5. Валидејнләр өз өвладларына руһән тәрәгги етмәкдә неҹә көмәк едә биләрләр?
5 Биринҹи әсрдә јашамыш Тимотеј кими, бир чох ҝәнҹләрин дә һәгигәтдә тәрәгги етмәсинә валидејнләри, јахуд онлардан бири көмәк етмишдир. Көрпәликдән етибарән анасы Евники вә нәнәси Лоида она мүгәддәс јазылары өјрәтмишдиләр (2 Тим. 3:14, 15). Чох ҝүман ки, сәнин валидејнләрин дә сәни бу ҹүр тәрбијә едирләр: сәнинлә Мүгәддәс Китабы өјрәнир, бирҝә дуа едир, сәни јығынҹаг ҝөрүшләринә вә бөјүк конгресләрә, еләҹә дә тәблиғә апарырлар. Бәли, Јеһованын ганунларыны вә тәләбләрини сәнә ашыламаг валидејнләринин Ондан алдыглары ән үмдә мәсулијјәтләрдән биридир. Онларын сәнә ҝөстәрдикләри мәһәббәт вә гајғыны гијмәтләндирирсәнми? (Сүл. мәс. 23:22).
6. а) Мәзмур 110:3 ајәсинә әсасән, Јеһоваја неҹә ибадәт мәгбулдур? б) Биз инди нәји нәзәрдән кечирәҹәјик?
6 Бунунла белә, Јеһова истәјир ки, ушаглар бөјүдүкҹә, Тимотеј кими, ‘Аллаһын јахшы, мәгбул вә камил ирадәсинин нә олдуғуну дәрк етсинләр’ (Ром. 12:2). Әҝәр белә етсән, онда сән ата-ананын арзусу илә јох, өзүн Аллаһын ирадәсини јеринә јетирмәк истәдијин үчүн јығынҹағын фәалијјәтиндә иштирак едәҹәксән. Әҝәр Јеһоваја хидмәтдә һазырлыг руһу ҝөстәрсән, О севинәҹәк (Мәз. 110:3). Белә исә, сән Јеһоваја гулаг асмаг вә Онун рәһбәрлијинә риајәт етмәк истәјини артырмаға ҹан атдығыны неҹә ҝөстәрә биләрсән? Ҝәлин бунун үч ваҹиб үсулуну — өјрәнмә, дуа вә давраныш тәрзини бир-бир нәзәрдән кечирәк.
Јеһованы бир Шәхсијјәт кими таны
7. Иса Мүгәддәс Јазылары арашдырмагда һансы нүмунәни гојуб вә бу ишдә она нә көмәк едиб?
7 Јеһоваја хидмәт етмәк арзуну ҝүҹләндирмәк истәдијини ҝөстәрмәјин үсулларындан бири һәр ҝүн Мүгәддәс Китабы охумагдыр. Мүнтәзәм олараг Аллаһын Кәламыны охумагла сән руһани тәләбатларыны өдәјәҹәк вә ондан дәгиг гијмәтли биликләр әлдә едәҹәксән (Мат. 5:3). Иса бу саһәдә ҝөзәл нүмунә гојуб. Онун 12 јашы оланда бир дәфә валидејнләри ону мәбәддә тапмышдылар, о, «мүәллимләрин арасында отуруб онлары динләјир, суаллар верирди» (Лука 2:44—46). Һәлә балаҹа олса да, артыг онун Мүгәддәс Јазылара марағы вә онлары анламаға ҝүҹлү истәји варды. Онда бу истәк һарадан иди? Шүбһәсиз ки, анасы Мәрјәмин вә өҝеј атасы Јусифин бунда бөјүк ролу олмушду. Онлар Аллаһын хидмәтчиси идиләр вә лап көрпә јашларындан Исаја Аллаһ барәдә өјрәдирдиләр (Мат. 1:18—20; Лука 2:41, 51).
8. а) Валидејнләр Аллаһын Кәламына мәһәббәти ушагларына нә заман ашыламаға башламалыдырлар? б) Ушаглары көрпәликдән өјрәтмәјин ваҹиблијини ҝөстәрән нүмунә данышын.
8 Аллаһ горхусу олан буҝүнкү валидејнләр дә Мүгәддәс Китаб һәгигәтләринә мәһәббәти өвладларына көрпә јашларындан ашыламағын ваҹиблијини дәрк едирләр (Ганун. т. 6:6—9). Руби адлы баҹымыз илк өвлады Ҹозеф дүнјаја ҝәлән кими белә дә етмәјә башлады. О, һәр ҝүн оғлуна «Мүгәддәс Китаб һекајәләри» китабыны охујурду. Ҹозеф бөјүдүкҹә анасы она мүхтәлиф ајәләри әзбәрләмәјә көмәк едирди. Бу ҹүр тәлимин Ҹозефә бир фајдасы дәјдими? О, данышмаға башлајандан гыса мүддәт сонра артыг бир чох Мүгәддәс Китаб һекајәләрини өз сөзләри илә данышырды. Беш јашы оланда исә Теократик Хидмәт Мәктәбиндә илк дәфә тапшырыгла чыхыш етди.
9. Нәјә ҝөрә Мүгәддәс Китабы охујуб үзәриндә дүшүнмәк чох ваҹибдир?
9 Сиз ҝәнҹләр даима руһән тәрәгги етмәк үчүн Мүгәддәс Китабы һәр ҝүн охумағы вәрдиш етмәли вә бу вәрдиши јенијетмәлик дөврүндә вә бөјүјәндә дә горујуб сахламалысыныз (Мәз. 71:17). Бәс нәјә ҝөрә Мүгәддәс Китабы охумаг сәнә тәрәгги етмәкдә көмәк едәҹәк? Исанын Атасына дуада дедији сөзләрә диггәт јетир: «Әбәди һәјат о демәкдир ки, Сәни, ваһид һәгиги Аллаһы... танысынлар» (Јәһ. 17:3). Јеһова һагда билик әлдә етдикҹә О, сәнин үчүн даһа реал олаҹаг вә Она олан мәһәббәтин артаҹаг (Ибр. 11:27). Буна ҝөрә дә һәр дәфә Мүгәддәс Китабдан бир парча охујанда Јеһова һагда даһа чох өјрәнмәјә чалыш. Өзүндән соруш: «Бу ајәләрдән Јеһованын Шәхсијјәти барәдә нә өјрәндим? Мүгәддәс Китабын бу парчасы Аллаһын мәни севдијини вә гајғыма галдығыны неҹә ҝөстәрир?» Бу кими суалларын үзәриндә дүшүнмәк үчүн вахт ајырмаг сәнә Јеһованын дүшүнҹә тәрзини вә һансы һиссләри кечирдијини, һәмчинин сәндән нә тәләб етдијини өјрәнмәјә көмәк едәҹәк. (Сүлејманын мәсәлләри 2:1—5 ајәләрини оху.) Ҝәнҹ Тимотеј кими, сән дә Мүгәддәс Јазылардан өјрәндикләринә ‘әмин олаҹаг’ вә Јеһоваја үрәкдән ибадәт етмәк истәјәҹәксән (2 Тим. 3:14).
Дуа сәнин Јеһоваја мәһәббәтини неҹә артырыр?
10, 11. Дуаларын Аллаһа хидмәт етмәк арзуну неҹә артыра биләр?
10 Јеһоваја үрәкдән хидмәт етмәк арзуну артырмағын диҝәр үсулу дуадыр. Мәзмур 65:2 ајәсиндә охујуруг: «Еј дуалары ешидән, бүтүн бәшәр һүзуруна ҝәләҹәк». Һәтта Јеһова Исраил халгы илә әһддә олдуғу дөврләрдә белә мәбәдә ҝәлән јаделлиләр Она дуада мүраҹиәт едә биләрдиләр (1 Пад. 8:41, 42). Аллаһ үзҝөрән дејил. Онун әмрләринә табе оланлары Мүгәддәс Китаб әмин едир ки, Аллаһ онлары ешидәҹәк (Сүл. мәс. 15:8). Әлбәттә, «бүтүн бәшәр» дејилдикдә ҝәнҹләр дә нәзәрдә тутулур.
11 Билдијимиз кими, әсил достлуғун тәмәлиндә јахшы үнсијјәт дурур. Ола билсин, сән фикирләрини, һиссләрини вә сәни нараһат едән шејләри јахын достунла бөлүшмәји хошлајырсан. Буна бәнзәр тәрздә, үрәкдән дуа едәндә сән Даһи Јараданынла үнсијјәт едирсән (Филип. 4:6, 7). Ән мәһрәм һиссләрини әзиз ата-анан вә ја јахын достунла бөлүшдүјүн кими, дуада Јеһова илә дә бөлүш. Јеһоваја неҹә дуа етмәјинлә Она бәсләдијин һиссләр бир-бирилә сых әлагәлидир. Сән ҝөрәҹәксән ки, Јеһова илә достлуғун нә гәдәр мөһкәм олса, бир о гәдәр дә дуаларын мәналы олаҹаг.
12. а) Нәјә ҝөрә мәналы дуа өзүнә јалныз сөзләри дахил етмир? б) Јеһованын сәнә јахын олдуғуна неҹә әмин ола биләрсән?
12 Амма унутма ки, мәналы дуа садәҹә сөзләрдән ибарәт дејил. Бураја сәнин ән дәрин һиссләрин дә дахилдир. Дуаларында Јеһоваја бәсләдијин ҹошгун мәһәббәтини, дәрин еһтирамыны ифадә ет вә Она тамамилә архаландығыны ҝөстәр. Јеһованын дуаларына ҹаваб вердијини ҝөрәндә һәмишәкиндән даһа чох әмин олаҹагсан ки, Јеһова «Ону сидг үрәкдән чағыран бүтүн инсанлара јахындыр» (Мәз. 145:18). Бәли, Јеһова сәнә јахын олаҹаг, Иблисә гаршы дурмағын вә һәјатда дүзҝүн гәрарлар верә билмәјин үчүн сәни мөһкәмләндирәҹәк. (Јагуб 4:7, 8 ајәләрини оху.)
13. а) Аллаһла достлуг бир баҹыја неҹә көмәк едиб? б) Аллаһла достлуг һәмјашыдларынын тәзјигләринин өһдәсиндән ҝәлмәкдә сәнә неҹә көмәк едир?
13 Ҝәлин Шеринин Јеһова илә јахын мүнасибәтдән неҹә ҝүҹ әлдә етдијинә диггәт јетирәк. Орта мәктәбдә әла охудуғу вә идманда јахшы наилијјәтләр әлдә етдији үчүн о, чохлу мүкафатлар алмышды. Мәктәби битирдикдән сонра Шеријә тәгаүд тәклиф олунду, бунун да сајәсиндә онун али тәһсил алмаг имканы јаранды. «Бу тәклиф мәним үчүн әсил сынаг иди,— дејә Шери гејд едир. — Идман мүәллимләрим вә синиф јолдашларым ҝүҹлү тәзјиг ҝөстәрирдиләр ки, ону гәбул едим». Лакин Шери анлајырды ки, әҝәр тәһсилини давам етдирмәк гәрарына ҝәлсә, вахтынын чоху охумаға вә идман јарышларына һазырлашмаға ҝедәҹәк, Јеһоваја хидмәт үчүн исә чох аз вахт галаҹаг. Шери нә етмәк гәрарына ҝәлди? О дејир: «Јеһоваја дуа етдикдән сонра тәгаүддән имтина етдим вә даими пионер хидмәтинә башладым». Артыг беш илдир ки, о, пионер кими хидмәт едир. «Мән пешман дејиләм,— дејә Шери давам едир. — Гәрарымын Јеһоваја мәгбул олдуғуну билмәк мәнә севинҹ ҝәтирир. Һәгигәтән дә, инсан Аллаһын Падшаһлығыны биринҹи јерә гојанда галан һәр шеј әлавә олараг верилир» (Мат. 6:33).
Сәнин јахшы давранышын ‘гәлбинин тәмиз’ олдуғуну ҝөстәрир
14. Нәјә ҝөрә сәнин тәмиз давраныш тәрзин Јеһованын ҝөзүндә ваҹибдир?
14 Јеһоваја үрәкдән хидмәт етдијини ҝөстәрмәјин үчүнҹү үсулу давраныш тәрзидир. Јеһова әхлаги тәмизликләрини горујуб сахлајан ҝәнҹләри хејир-дуаландырыр. (Мәзмур 24:3—5 ајәләрини оху.) Ҝәнҹ Шамуел баш каһин Елинин әхлагсыз һәјат тәрзи сүрән оғулларынын јолу илә ҝетмәди. Мүгәддәс Китабдан ҝөрүндүјү кими, онун тәмиз давраныш тәрзи нәзәрдән гачмады: «Кичик Шамуел исә ҝетдикҹә бөјүјүр, Рәббин вә инсанларын ҝөзүндә һөрмәт газанырды» (1 Шам. 2:26).
15. Сәни дүзҝүн давранмаға тәшвиг едән сәбәбләрдән бәзиләри һансылардыр?
15 Биз худбин, тәкәббүрлү, валидејнләринә итаәт етмәјән, нанкор, гүдсијјәтдән мәһрум, азғын, рәһмсиз, мәғрур, зөвгү Аллаһдан чох севән инсанларын чохлуг тәшкил етдији бир дүнјада јашајырыг — бунлар Павелин садаладығы хүсусијјәтләрин һәлә һамысы дејил (2 Тим. 3:1—5). Пис мүһитдә јашаја-јашаја нүмунәви давраныш тәрзини горујуб сахламаг чох чәтин ола биләр. Амма сән һәр дәфә дүз давранмагла вә јанлыш һәрәкәтдән гачмагла али һөкмранлыг мәсәләсиндә Јеһованын тәрәфиндә олдуғуну сүбут едирсән (Әјј. 2:3, 4). Јеһованын Сүлејманын мәсәлләри 27:11 ајәсиндәки сәмими дәвәтинә һај вермәјин дә сәнә дәрин мәмнунлуг ҝәтирир: «Оғлум, һикмәтли ол, гој гәлбим севинсин, онда мәни утандырана ҹаваб верә биләрәм». Бундан әлавә, Јеһованын сәндән разы галдығыны билмәјин дә Она хидмәт етмәк истәјини мөһкәмләндирәҹәк.
16. Бир баҹы Јеһованын гәлбини неҹә севиндирмишди?
16 Керол адлы баҹымыз јухары синифләрдә охујанда Мүгәддәс Китаб принсипләринә бағлы галырды вә онун јахшы давранышы инсанларын нәзәриндән јајынмады. Керол һансы чәтинликләрлә үзләширди? Мүгәддәс Китаб әсасында тәрбијә едилмиш виҹданы бајрамларда вә вәтәнпәрвәрлик мәрасимләриндә иштирак етмәјә јол вермәдији үчүн синиф јолдашлары ону әлә салырдылар. Белә һалларда бәзән онун өз иманыны башгаларына изаһ етмәк имканы јаранырды. Чох илләр сонра Керол кечмиш синиф јолдашындан бир ачыгҹа алды. Орада дејилирди: «Чохдандыр сәнинлә ҝөрүшмәк вә өз миннәтдарлығымы билдирмәк истәјирәм. Сәнин давраныш тәрзин вә ҝәнҹ мәсиһчи кими вердијин ҝөзәл нүмунә, һәмчинин бајрамлара гаршы тутдуғун ҹәсарәтли мөвге мәнә ҝүҹлү тәсир бағышлады. Таныдығым илк Јеһованын Шаһиди сән олмусан». Керолун нүмунәси синиф јолдашына о гәдәр дәрин тәәссүрат бағышламышды ки, сонрадан о, Мүгәддәс Китабы өјрәнмәјә башлады. Керола јаздығы ачыгҹада о, 40 илдән чохдур ки, Јеһованын вәфтиз олунмуш Шаһиди олдуғуну гејд едирди. Керол кими, сиз ҝәнҹләр дә ҹәсарәтлә Мүгәддәс Китаб принсипләринә әмәл етмәклә сәмими инсанлары Јеһова һагда өјрәнмәјә тәшвиг едә биләрсиниз.
Јеһованы иззәтләтләндирән ҝәнҹләр
17, 18. а) Јығынҹағыныздакы ҝәнҹләр һагда нә дејә биләрсиниз? б) Аллаһдан горхан ҝәнҹләри һансы ҝәләҹәк ҝөзләјир?
17 Биз чох шадыг ки, Јеһованын үмумдүнја тәшкилатында бизимлә бирҝә минләрлә ҝәнҹләр һәгиги Аллаһа ибадәт едир! Бу ҝәнҹ оғлан вә гызлар Мүгәддәс Китабы һәр ҝүн охумагла, дуа етмәклә вә Аллаһын ирадәсинә ујғун јашамагла Јеһоваја ибадәт етмәк истәкләрини ҝүҹләндирирләр. Бу нүмунәви ҝәнҹләрин валидејнләри вә Аллаһын бүтүн хидмәтчиләри онлара бахыб фәрәһләнир (Сүл. мәс. 23:24, 25).
18 Аллаһын вәд етдији јени дүнјаја дахил оланларын арасында ҝәнҹләр дә олаҹаг (Вәһј 7:9, 14). Јеһоваја миннәтдарлыглары артдыгҹа онлар орада чохлу ҝөзәл хејир-дуалар алаҹаг вә онларын Аллаһа әбәдијјәт боју һәмд етмәк имканлары олаҹаг (Мәз. 148:12, 13).
Изаһ едә биләрсинизми?
• Бу ҝүн ҝәнҹләрин һәгиги ибадәтдә иштирак етмәләри үчүн нә тәләб олунур?
• Мүгәддәс Китабы охумагдан фајда әлдә етмәк үчүн нәјә ҝөрә онун үзәриндә дүшүнмәк ваҹибдир?
• Дуалар сәнә Јеһоваја јахынлашмаға неҹә көмәк едә биләр?
• Мәсиһчинин ҝөзәл давранышы һансы бәһрәләр верә биләр?
[5-ҹи сәһифәдәки шәкил]
Мүгәддәс Китабы һәр ҝүн охумаға вәрдиш етмисәнми?