Ҝәнҹләр, ҝәләҹәјиниз үчүн тәмәл гојурсунузму?
“Сизин үчүн дүшүнмәкдә олдуғум дүшүнҹәләри мән билирәм... пислик дүшүнҹәләри дејил, анҹаг сонунузда сизә үмид вермәк үчүн сүлһ дүшүнҹәләридир” (ЈЕРЕМЈА 29:11).
1, 2. Ҝәнҹлијә һансы фәргли нөгтеји-нәзәрләрдән бахмаг олар?
ЈЕТКИН јаша чатмыш инсанларын әксәријјәти ҝәнҹлик дөврүнү һәјатын ҝөзәл дөврү һесаб едир. Онлар ҝәнҹ олдуглары заман енержи вә шөвглә долу олдуглары вахты хатырлајырлар. Даһа аз мәс’улијјәт дашыдыглары, дојунҹа әјләндикләри вә гаршыларында түкәнмәз имканларла долу бир һәјатын олдуғу вахты хатырламаг онлара хошдур.
2 Әҝәр сән өзүн ҝәнҹсәнсә, еһтимал ки, вәзијјәтә башга нөгтеји-нәзәндән бахырсан. Јәгин ки, сәндә баш верән емосионал вә физики дәјишикликләрә ујғунлашмаг сәнин үчүн чәтиндир. Мәктәбдә вә ја охудуғун башга тәһсил оҹағында јашыдларынын ҝүҹлү тәзјиги илә гаршылаша биләрсән. Ола биләр ки, ҝүнү-ҝүндән наркотикә, спиртли ичкиләрә вә әхлагсызлыға даһа сәрт мүгавимәт ҝөстәрмәли олурсан. Ҝәнҹләрдән чохунун гаршысында, иманлары илә әлагәдар битәрәфлик мөвгеји вә диҝәр мәсәләләр дурур. Бәли, ҝәнҹлик чәтин дөвр ола биләр. Буна бахмајараг, һәмин дөвр доғрудан да түкәнмәз имканларла долудур. Мәсәлә, сәнин бу дөврдән неҹә истифадә етмәјиндәдир.
Ҝәнҹлијиндән зөвг ал
3. Сүлејман ҝәнҹ оланлара һансы мәсләһәти вә һансы хәбәрдарлығы вермишдир?
3 Јашҹа бөјүк олан адамлар сәнә ҝәнҹлик илләринин гыса олдуғуну сөјләјәҹәкләр вә онлар һаглыдырлар. Ҹәми бир нечә илдән сонра ҝәнҹлијин ҝеридә галаҹаг. Белә исә ондан зөвг ал! Сүлејман падшаһ мәһз буну мәсләһәт ҝөрүрдү: “Еј ҝәнҹ адам, ҝәнҹлијиндә севинҹли ол вә ҝәнҹлијинин ҝүнләриндә үрәјин сәни севиндирсин, көнлүнүн јолларында вә ҝөзләринин ҝөрдүкләриндә јери”. Лакин Сүлејман хәбәрдар едирди: “Кәдәри үрәјиндән чыхар вә пислији бәдәниндән узаглашдыр”. Сонра о демишди: “Ҝәнҹлик вә иҝидлик чағы бошдур” (Ваиз 11:9, 10).
4, 5. Ҝәнҹлик илләриндә ҝәләҹәјә һазырлашмаг нәјә ҝөрә мүдрикликдир? Нүмунә әсасында изаһ ет.
4 Сүлејманын нәји нәзәрдә тутдуғуну баша дүшүрсәнми? Нүмунә үчүн, һансыса гијмәтли һәдијјәни, дејәк ки, нәји исә мирас алан ҝәнҹ һаггында дүшүн. Ҝәнҹ адам алдығы бу мирасла неҹә давранаҹаг? О, Исанын мәсәлиндәки гејб олмуш оғул кими, пулу истәдији кими хәрҹләјә биләр (Лука 15:11-23). Бәс пуллар түкәнәндә нә олаҹаг? Һәр һалда бу гәдәр мәс’улијјәтсиз даврандығы үчүн пешман олаҹаг! Диҝәр тәрәфдән фәрз едәк ки, мәсәлән, пулларын чох һиссәсини сәрмајә гојараг, ҝәләҹәјини тә’мин етмәк үчүн мүдрикликлә истифадә едир. Неҹә дүшүнүрсән, нәтиҹәдә онун пуллары ҝәлир ҝәтирәндә, ҝәнҹлик чағларында пуллары истәдији јерә хәрҹләмәдији үчүн пешман олаҹагмы? Әлбәт ки, јох!
5 Өз ҝәнҹлијини, әслиндә олдуғу кими, Аллаһдан олан бир ән’ам кими нәзәрдән кечир. Сән ондан неҹә истифадә едирсән? Сән ҝәләҹәк һаггында дүшүнмәдән бүтүн енержини вә шөвгүнү өз еһтирасларыны тә’мин етмәјә вә даими әјләнҹәләрә сәрф едә биләрсән. Әҝәр сән белә етсән, “ҝәнҹлик вә иҝидлик чағы” сәнин үчүн һәгигәтән дә “бош” олаҹагдыр. Ҝәнҹлијини ҝәләҹәјә һазырлашмаг үчүн јашамаг нә гәдәр ҝөзәлдир!
6. а) Сүлејманын һансы мәсләһәти ҝәнҹләр үчүн рәһбәрлик кими хидмәт едир? б) Јеһова ҝәнҹ оланлара нә вермәк истәјир вә ҝәнҹләр буну неҹә газана биләрләр?
6 Сүлејман, ҝәнҹлик илләриндән мүдрикликлә истифадә етмәјә көмәк едән принсип вермишдир. О демишдир: “Ҝәнҹлијинин ҝүнләриндә сәни Јараданы хатырла” (Ваиз 12:2). Мүвәффәгијјәтин ачары — Јеһованы динләмәк вә Онун ирадәсини јеринә јетирмәкдир. Јеһова гәдим исраиллиләр үчүн нә етмәк истәдијини онлара демишдир: “Сизин үчүн дүшүнмәкдә олдуғум дүшүнҹәләри мән билирәм... пислик дүшүнҹәләри дејил, анҹаг сонунузда сизә үмид [“үмидли бир ҝәләҹәк”, ЈД] вермәк үчүн сүлһ дүшүнҹәләридир” (Јеремја 29:11). Јеһова сәнә дә “үмидли бир ҝәләҹәк” вермәк истәјир. Әҝәр сән Ону давранышларында, дүшүнҹә вә гәрарларында јада салырсанса, һәмин үмидли ҝәләҹәк сәнин үчүн ҝерчәклијә чевриләҹәк (Вәһј 7:16, 17; 21:3, 4).
“Аллаһа јахынлашын”
7, 8. Ҝәнҹләр Јеһоваја неҹә јахынлаша биләр?
7 Јагуб нөвбәти сөзләрлә бизи Јеһованы хатырламаға тәшвиг едир: “Аллаһа јахынлашын, О да сизә јахынлашар” (Јагуб 4:8). Јеһова һамынын ибадәтинә вә һәмдинә лајиг олан Јарадан, сәмави Һөкмдардыр (Вәһј 4:11). Буна бахмајараг, биз Она јахынлашсаг, О да бизә јахынлашаҹаг. Мәҝәр бу ҹүр севҝи долу бир мараг сәнин үрәјини риггәтә ҝәтирмирми? (Матта 22:37).
8 Биз Јеһоваја мүхтәлиф јолларла јахынлашырыг. Мәсәлән, һәвари Павел дејирди: “Дуада сабит олун вә онда шүкран илә ојаг дурун” (Колослулара 4:2). Башга сөзләрлә, дуа етмәк вәрдишини инкишаф етдир. Садәҹә олараг атан вә ја јығынҹагда һәмиманлын сәни дуада тәгдим едәндән сонра “амин” сөзүнү тәләффүз етмәклә кифајәтләнмә. Нә дүшүндүјүн, нәдән горхдуғун вә һансы чәтинликләрлә гаршылашдығын барәдә данышараг, нә вахтса үрәјини Јеһоваја ачмысанмы? Инсанлардан киминләсә мүзакирә етмәјә утандығын мәсәләни Она данышмысанмы? Сәмими вә ачыг дуалар сүлһ вә раһатлыг ҝәтирир (Филипилиләрә 4:6, 7). Бу дуалар бизә Јеһоваја јахынлашмаға вә Онун бизә јахынлашдығыны һисс етмәјә көмәк едир.
9. Ҝәнҹләр Јеһоваја неҹә гулаг аса биләрләр?
9 Јеһоваја јахынлашмағын даһа бир үсулуну илһамланмыш бу сөзләрдә ҝөрүрүк: “Нәсиһәтә гулаг ас, тәрбијәни гәбул ет, бунун нәтиҹәсиндә һикмәтли оларсан” (Сүлејманын мәсәлләри 19:20, МКШ). Беләликлә, әҝәр сән Јеһоваја гулаг асыр вә Она табе олурсанса, ҝәләҹәјин үчүн тәмәл гојурсан. Јеһоваја гулаг асдығыны неҹә ҝөстәрә биләрсән? Шүбһәсиз ки, сән мүнтәзәм олараг мәсиһчи ҝөрүшләринә ҝәлир вә програмы динләјирсән. Һәм дә Мүгәддәс Китабын аиләликҹә өјрәнилмәсиндә иштирак етмәклә ‘атана вә анана һөрмәт едирсән’ (Ефеслиләрә 6:1, 2; Ибраниләрә 10:24, 25). Бу чох тә’рифәлајигдир. Лакин ҝөрүшләрә һазырлашмаг, Мүгәддәс Китабы мүнтәзәм охумаг вә тәдгиг етмәк үчүн ‘һәр фүрсәтдән истифадә едирсәнми’, даһа доғрусу, вахты сатын алырсанмы? “Һикмәтли кими” давранмаг үчүн охудуғуна риајәт етмәјә чалышырсанмы? (Ефеслиләрә 5:15-17; Мәзмур 1:1-3). Әҝәр буну едирсәнсә, онда сән Јеһоваја јахынлашырсан.
10, 11. Ҝәнҹләр Јеһоваја гулаг асанда һансы фајданы әлдә едирләр?
10 “Сүлејманын мәсәлләри” китабынын әввәлиндә, Мүгәддәс Китабын бу һиссәсинин јазылмасынын мәгсәди илһамланмыш сөзләрлә ачыгланыр: “Һикмәт вә тәрбијәјә малик олмаг, мүдрик сөзләри дәрк етмәк үчүн, салеһлик, әдаләт, инсаф барәдә идрак тәрбијәси алмаг үчүн, ҹаһилләрә узагҝөрәнлик, ҝәнҹ оғлана билик вә дәрракә вермәк үчүн” (Сүлејманын мәсәлләри 1:1-4, МКШ). Беләликлә, Мүгәддәс Китабын диҝәр китаблары кими, “Сүлејманын мәсәлләри” китабыны да охујараг вә тәтбиг едәрәк, өзүндә, әдаләтлилик вә инсафлылыг кими кејфијјәтләри јетишдирәҹәксән, Јеһова да Она јахынлашдығын үчүн севинәҹәк (Мәзмур 15:1-5). Әдаләтлилик, узагҝөрәнлик габилијјәтини нә гәдәр чох јахшылашдырсан, нә гәдәр чох билик вә дәрракә әлдә етсән, гәбул етдијин гәрарлар да бир о гәдәр јахшы олаҹаг.
11 Ҝәнҹләрдән бу ҹүр мүдриклик ҝөзләмәк олармы? Әлбәттә, ахы бир чох ҝәнҹ мәсиһчиләр бу кејфијјәти әкс етдирирләр. Буна ҝөрә бир чохлары онлара һөрмәт едир вә онларын ‘ҝәнҹлијинә хор бахмырлар’ (1 Тимотејә 4:12). Бу ҝәнҹләрин валидејнләри һаглы олараг онларла фәхр едирләр, Јеһова исә дејир ки, онлар Онун үрәјини севиндирирләр (Сүлејманын мәсәлләри 27:11). Онлар чох ҝәнҹ олсалар да, әмин ола биләрләр ки, нөвбәти илһамланмыш сөзләр онлара да аиддир: “Камил адама бах, әмәлисалеһ инсана нәзәр јетир, ҝәләҹәк сүлһсевән адама бәхш едиләҹәк” (Мәзмур 37:37, МКШ).
Дүзҝүн сечим ет
12. Ҝәнҹләрә һансы ҹидди сечими етмәк лазымдыр вә бу сечимин нәјә ҝөрә узунмүддәтли нәтиҹәләри вар?
12 Ҝәнҹлик чағы сечим, чох вахт исә ҹидди сечим дөврүдүр. Ола биләр ки, инди етдијин сечимин нәтиҹәси сәнә ҝәләҹәкдә, узун илләр әрзиндә тә’сир едәҹәк. Мүдрик сечим хошбәхт, мүвәффәгијјәтли һәјата апарыр. Мүдрик олмајан сечим исә, бүтүн һәјаты пуч едә биләр. Бунун нә гәдәр доғру олдуғуну ики саһәдә нәзәрдән кечирәк. Биринҹиси, дост сечиминдә. Буна нәјә ҝөрә ҹидди јанашмаг лазымдыр? Ҹавабы илһамланмыш мәсәлдән өјрәнмәк олар: “Һикмәтлиләрлә јеријән адам һикмәтли олар; фәгәт ағылсызларын досту зәрәр ҝөрәр” (Сүлејманын мәсәлләри 13:20). Башга сөзләрлә, нәтиҹәдә биз дә үнсијјәтдә олдуғумуз адамлар кими ја мүдрик, ја да ағылсыз олуруг. Сән неҹә адам олмаг истәјирсән?
13, 14. а) Достлуг өзүнә инсанларла бирбаша әлагәдән башга даһа нәји дахил едир? б) Ҝәнҹ мәсиһчиләр һансы сәһвә јол вермәли дејилләр?
13 Үнсијјәт вә достлуг барәдә данышанда, сән, јәгин ки, сөһбәтин инсанлардан ҝетдијини дүшүнүрсән. Бу доғрудур, лакин гисмән. Телевизија програмына бахмагла, мусигијә гулаг асмагла, роман охумагла, кинотеатра ҝетмәклә вә ја Интернетдән истифадә етмәклә дә сән үнсијјәтдә олурсан. Әҝәр белә үнсијјәт зоракылыға вә әхлагсызлыға олан мејлә јол верирсә, наркотик маддәләрин гәбулуна, сәрхошлуға вә ја Мүгәддәс Китабын принсипләринә зидд ҝедән нәјә исә тәшвиг едирсә, онда сән, санки Јеһованын мөвҹуд олдуғуна инанмајан “ағылсыз” адамла достлуг едирсән (Мәзмур 14:1).
14 Бәлкә дә сәнә елә ҝәлир ки, мәсиһчи ҝөрүшләринә ҝәлдијин вә јығынҹағын фәалијјәтиндә јахындан иштирак етдијин үчүн елә ҝүҹлүсән ки, зоракы сәһнәләри олан филм вә ја јахшы мелодијасы, лакин шүбһәли мәзмуну олан маһнылар сәнә тә’сир едә билмәз. Бәлкә дә Интернетдәки порнографик Wеб-сајта ҝөзуҹу бахмағын сәнә һеч бир зәрәри олмајаҹағыны дүшүнүрсән. Лакин һәвари Павел дејир ки, сән јанылырсан! О дејир: “Пис достлуг јахшы әхлагы позар” (1 Коринфлиләрә 15:33). Әфсуслар олсун ки, бир чох баҹарыглы ҝәнҹ мәсиһчиләр дост сечәркән мүдрик давранмадыглары үчүн јахшы әхлагларыны, јә’ни фајдалы вәрдишләрини итирмишләр. Сән исә пис достлуглардан гачынмаға там гәрарлы ол. Әҝәр белә даврансан, Павелин мәсләһәтинә риајәт етмиш олаҹагсан: “Бу зәманәјә ујғунлашмајын, анҹаг Аллаһын јахшы, мәгбул вә камил ирадәсинин нә олдуғуну дәрк етмәк үчүн ағлынызын јениләнмәси илә көкүндән дәјишин” (Ромалылара 12:2).
15. Ҝәнҹләрә башга һансы саһәдә сечим етмәк лазымдыр вә бу ҹәһәтдән онлара бә’зән һансы тәзјигләр ҝөстәрилир?
15 Сечим етмәли олдуғумуз икинҹи саһә дә вар. Вахт ҝәләҹәк ки, мәктәби гуртардыгдан сонра нә илә мәшғул олаҹағыны гәрара алмалы олаҹагсан. Әҝәр сән ишсизлијин ҝениш јајылдығы әразидә јашајырсанса, һәр бир јахшы ишә разы олмаг барәдә дүшүнә биләрсән. Әҝәр инкишаф едән өлкәдә јашајырсанса, иш сарыдан бөјүк сечим етмәк имканын ола биләр, бә’зи тәклифләр исә олдугҹа ширникдириҹи ҝөрүнә биләр. Мүәллимләрин вә ја валидејнләрин јахшы нијјәтләрдән ирәли ҝәләрәк, еһтимал ки, сәни мадди мүвәффәгијјәт, һәтта вар-дөвләт ҝәтирәҹәк сәнәт сечмәјә тәшвиг едирләр. Лакин бу сәнәтә јијәләнмәк үчүн, еһтимал ки, чохлу охумаг лазым ҝәләҹәк, Јеһоваја хидмәтә исә олдугҹа аз вахт галаҹаг.
16, 17. Мүгәддәс Китабын мүхтәлиф ајәләринин сәнәт сечиминә таразлы сурәтдә јанашмагда ҝәнҹләрә неҹә көмәк едә биләҹәјини изаһ един.
16 Гәрар гәбул етмәздән әввәл Мүгәддәс Китабла мәсләһәтләшмәји унутма. Мүгәддәс Китаб бизи, өзүмүзү тә’мин етмәк үчүн ишләмәјә тәшвиг едир (2 Салониклиләрә 3:10-12). Лакин башга амилләри дә нәзәрә алмаг лазымдыр. Биз сәни Мүгәддәс Китабын нөвбәти ајәләрини охумаға вә өзүнә сәнәт сечәркән бу ишә таразлы сурәтдә јанашмагда ајәләрин сәнә неҹә көмәк едә биләҹәјинин үзәриндә дүшүнмәјә тәшвиг едирик: Сүлејманын мәсәлләри 30:8, 9; Ваиз 7:11, 12; Матта 6:33; 1 Коринфлиләрә 7:31; 1 Тимотејә 6:9, 10. Бу ајәләри охудугдан сонра Јеһованын нөгтеји-нәзәрини баша дүшдүнмү?
17 Бизим үчүн дүнјәви иш, Јеһоваја хидмәтимизи икинҹи плана чәкәҹәк дәрәҹәдә ваҹиб олмалы дејил. Әҝәр орта тәһсилә малик олараг мүнасиб иш тапа билирсәнсә, бу чох јахшыдыр. Әҝәр сәнә әлавә тәһсил алмаг лазымдырса, буну валидејнләринлә мүзакирә етмәк олар. Һәр неҹә олса да, “ән үстүн дәјәрләри” — руһани дәјәрләри нәзәрдән гачырма (Филипилиләрә 1:9, 10). Јеремјанын мирзәси олан Барукун етдији сәһвләрә јол вермә. Барук, она е’тибар едилән хидмәтә ҝөрә олан миннәтдарлығыны итирди вә ‘өзү үчүн бөјүк шејләр ахтармаға’ башлады (Јеремја 45:5). О, бир анлыға унутду ки, бу дүнјадакы “бөјүк шејләр”ин һеч бири ону Јеһоваја јахынлашдыра вә Јерусәлимин мәһвиндән сағ чыхмаға көмәк едә билмәзди. Буну бу ҝүн бизим һаггымызда да демәк олар.
Руһани дәјәрләри гијмәтләндир
18, 19. а) Сәнинлә гоншулугда јашајан инсанларын әксәријјәти нәдән әзијјәт чәкирләр вә сән онлара гаршы һансы һиссләри дујмалысан? б) Бир чохлары нәјә ҝөрә руһани аҹлығы һисс етмирләр?
18 Нә заманса журналларда вә ја телевизија верилишләриндә аҹлығын һөкм сүрдүјү өлкәләрдә јашајан ушагларын тәсвирини ҝөрмүсәнми? Әҝәр ҝөрмүсәнсә, јәгин ки, онларын һалына аҹымысан. Бәс гоншулугда јашајан инсанларын һалына аҹыјырсанмы? Онларын һалына нәјә ҝөрә аҹымаг лазымдыр? Чүнки онларын да әксәријјәти аҹлыг чәкир. Онлар, Амос пејғәмбәрин сөјләдији аҹлыгдан әзијјәт чәкирләр: “Будур, ҝүнләр ҝәлир, Рәбб Јеһова дејир вә мәмләкәтә аҹлыг ҝөндәрәҹәјәм, чөрәк аҹлығы дејил вә суја сусама дејил, анҹаг Рәббин сөзләрини ешитмәјә сусама ҝөндәрәҹәјәм” (Амос 8:11).
19 Доғрудур ки, руһән аҹлыг чәкәнләрин әксәријјәти “руһән јохсул” олдугларыны дәрк етмир (Матта 5:3). Бир чохлары руһән аҹ олдугларыны һисс етмирләр. Бә’зиләри һәтта јахшы гидаландыгларыны дүшүнә биләрләр. Лакин бу она ҝөрә беләдир ки, онлар, өзүнә зәнҝинлијә мејл, елми фәрзијјәләр, әхлаг мәсәләсинә вә бу кими шејләрә даир мүхтәлиф фикирләр дахил едән “бу дүнјанын мүдриклији” илә гидаланырлар. Бә’зиләри һесаб едирләр ки, мүасир “мүдрикликлә” мүгајисәдә Мүгәддәс Китабын тә’лимләри көһнәлиб. Лакин бу дүнја “өз мүдриклији илә Аллаһы танымады”. Дүнјанын мүдриклији Аллаһа јахынлашмагда сәнә көмәк етмәјәҹәк. Чүнки бу мүдриклик ‘Аллаһ гаршысында ағылсызлыгдан’ башга бир шеј дејил (1 Коринфлиләрә 1:20, 21; 3:19).
20. Јеһоваја хидмәт етмәјән инсанлара һәсәд апармаг нәјә ҝөрә ағылсызлыгдыр?
20 Сән аҹ ушагларын шәклини ҝөрәндә, онлар кими олмаг истәјирсәнми? Әлбәт ки, јох! Лакин елә тәәссүрат јараныр ки, мәсиһчи аиләләриндән олан бә’зи ҝәнҹләр, әтрафларындакы руһән аҹлыг чәкән инсанлар кими олмаг истәјирләр. Јәгин онлар дүнјадакы ҝәнҹләрин һеч бир гајғылары олмадығыны вә анҹаг зөвглә јашадыгларыны дүшүнүрләр. Онлар, дүнјадакы ҝәнҹләрин Јеһовадан тәҹрид олундугларыны унудурлар (Ефеслиләрә 4:17, 18). Онлар һәм дә руһани аҹлығын пис нәтиҹәләрә ҝәтириб чыхардығыны унудурлар. Бу, јенијетмә дөврүндә арзуолунмаз һамиләлик, һәмчинин әхлагсызлығын физики вә емосионал нәтиҹәләри, сәрхошлуг вә наркотикләрин истифадәси ола биләр. Руһани аҹлыг үсјанкарлыға, үмидсизлијә вә мә’насыз бир һәјата јол ачыр.
21. Өзүмүзү Јеһоваја хидмәт етмәјән инсанларын бахышлары вә әһвал-руһијјәләриндән неҹә горуја биләрик?
21 Мәктәбдә — Јеһоваја хидмәт етмәјән инсанларын әһатәсиндә оланда, онларын бахышларынын вә әһвал-руһијјәләринин сәни сарсытмасына јол вермә (2 Коринфлиләрә 4:18). Бә’зиләри руһани дәјәрләр һаггында лагејдликлә данышаҹаглар. Бундан әлавә, күтләви информасија васитәләринин көмәји илә сәни тәдриҹән инандырмаға чалышаҹаглар ки, әхлагсызлыгла мәшғул олмаг, сәрхошлуг вә ја ијрәнҹ сөзләрдән истифадә етмәк тамамилә мүнасибдир. Бу ҹүр тә’сирә ујма. Мүнтәзәм олараг “имана вә тәмиз виҹдана” малик олан инсанларла үнсијјәт етмәји давам етдир. Һәр заман ‘Рәббин ишиндә тәрәгги ет’ (1 Тимотејә 1:19; 1 Коринфлиләрә 15:58). Јығынҹагда фәал ол вә сә’јлә тәблиғ ет. Мәктәбдә охудуғун мүддәтдә вахташыры олараг көмәкчи пионер хидмәти ҝөтүр. Бунун васитәсилә руһани дәјәрләрә олан бахышларыны мөһкәмләндир, белә олан һалда таразлығыны итирмәзсән (2 Тимотејә 4:5).
22, 23. а) Ҝәнҹ мәсиһчиләрин сечимләри нәјә ҝөрә чох вахт башгаларына ајдын олмур? б) Ҝәнҹләр нәјә тәшвиг олунурлар?
22 Һәр шејә руһани нөгтеји-нәзәрлә бахмағын, еһтимал ки, башгаларынын анламадығы гәрарлар гәбул етмәјинә сәбәб олаҹаг. Мәсәлән, бир ҝәнҹ мәсиһчи исте’дадлы мусигичи вә бүтүн фәнләрдән ә’лачы иди. Мәктәби битирәндән сонра о, шүшәләри јумаг ишиндә атасына гошулду. Бу она, гаршысына гојдуғу мәгсәдә — таммүддәтли тәблиғчи, јә’ни пионер олмаға имкан јаратды. Мүәллимләри онун бу ҹүр гәрар гәбул етмәсинин сәбәбини һеч ҹүр баша дүшә билмәдиләр. Лакин әҝәр сән Јеһоваја јахынлашмысанса, сөзсүз ки, баша дүшмүсән.
23 Ҝәнҹлијин гијмәтли дөврүндән неҹә истифадә етмәји нәзәрдән кечирәрәк, ‘өзүнә ҝәләҹәк үчүн јахшы тәмәл олаҹаг бир хәзинә топла ки, һәгиги һәјата наил оласан’ (1 Тимотејә 6:19). Ҝәнҹлијиндә вә бүтүн галан һәјатын боју “сәни Јараданы хатырла”маға мөһкәм гәрарлы ол. Јалныз беләликлә хошбәхт ҝәләҹәјә, сону олмајаҹаг ҝәләҹәјә тәмәл гојмаг олар.
Һансы нәтиҹәјә ҝәлдин?
• Аллаһдан илһам алмыш һансы нәсиһәт ҝәнҹләрә ҝәләҹәкләрини планлашдырмагда көмәк едир?
• Ҝәнҹләр һансы үсулларла Аллаһа јахынлаша биләрләр?
• Ҝәнҹликдә гәбул едилән гәрарлардан һансылар ҝәләҹәјә тә’сир ҝөстәрәҹәк?
[25-ҹи сәһифәдәки шәкилләр]
Шәхси мәшғулијјәтләрин бүтүн ҝәнҹлијинин енержи вә шөвгүнү әлиндән алмасына јол верәҹәксәнми?
[26 вә 27-ҹи сәһифәләрдәки шәкил]
Мүдрик ҝәнҹ мәсиһчиләр руһани бахышларыны тәмиз сахлајырлар.