Гадынлар нәјә ҝөрә башчылыг принсипинә риајәт етмәлидирләр?
‘Арвадын башы әрдир’ (1 КОР. 11:3).
1, 2. а) Һәвари Павел Јеһованын башчылыг вә табечилик принсипи һагда нә јазмышдыр? б) Бу мәгаләдә һансы суаллар арашдырылаҹаг?
ЈЕҺОВА мүәјјән гајда-ганун тәсис етмишдир. Буну һәвари Павел белә ифадә едир: «Һәр әрин башы Мәсиһ... Мәсиһин башы исә Аллаһдыр» (1 Кор. 11:3). Әввәлки мәгаләдән Исанын Башы олан Јеһова Аллаһа табечилији өзүнә шәрәф билдијини вә бундан севинҹ дујдуғуну, еләҹә дә Исанын мәсиһчи кишиләрин башы олдуғуну өјрәндик. Мәсиһ инсанлара гаршы хејирхаһ, мүлајим вә шәфгәтли иди вә о, һеч вахт өз мәнфәәтини ҝүдмүрдү. Јығынҹагдакы кишиләр дә бүтүн инсанларла, хүсусилә дә өз һәјат јолдашлары илә мәһз бу ҹүр рәфтар етмәлидирләр.
2 Бәс гадынлар һагда нә демәк олар? Онларын башы кимдир? «Арвадын башы әр[дир]»,— дејә Павел јазмышдыр. Аллаһын илһамландырдығы бу сөзләрә гадынларын мүнасибәти неҹә олмалыдыр? Гадынын һәјат јолдашы онун иманына шәрик олмајанда да бу принсип тәтбиг едиләндирми? Әрин башчылығына табе олмаг о демәкдирми ки, аиләдә гәрарлар гәбул едиләркән гадын өз фикрини сөјләмәмәлидир? Гадын әринин рәғбәтини неҹә газана биләр?
«Мән она... бир көмәкчи јарадаҹағам»
3, 4. Никаһда башчылыг принсипинә риајәт етмәк һансы фајданы ҝәтирир?
3 Башчылыг принсипини Јеһова Аллаһ тәсис едиб. Адәми јаратдыгдан сонра О деди: «Инсанын тәк олмасы јахшы дејил, Мән она мүнасиб олан бир көмәкчи јарадаҹағам». Һәвва јарандыгдан сонра Адәм һәјат јолдашынын вә көмәкчисинин олмасына о гәдәр севинди ки: «Бах, нәһајәт, бунун сүмүјү мәним сүмүјүмдән, бәдәни мәним бәдәнимдәндир»,— дејәрәк нида етди (Јар. 2:18—24). Адәмлә Һәвванын јерүзү ҹәннәтдә әбәди вә сәадәт ичиндә јашајаҹаг камил бәшәријјәтин улу валидејни олмаг кими ҝөзәл имканлары варды.
4 Илк инсан ҹүтү Еден бағында үсјан галдырдыгдан сонра инсанлар артыг башчылыг принсипинә мүкәммәл сурәтдә риајәт едә билмирләр. (Ромалылара 5:12 ајәсини оху.) Буна бахмајараг, башчылыг принсипи һәлә дә гүввәдәдир. Бу принсипә дүзҝүн риајәт едилдикдә аилә һәјаты әрлә арвада бөјүк фајда вә хошбәхтлик ҝәтирир. Нәтиҹәдә, өз Башы олан Јеһоваја табе олан Иса кими, онлар да мәмнунлуг дујаҹаглар. Јерә ҝәлмәздән өнҹә, Иса һәмишә Јеһованын ‘һүзурунда севинирди’ (Сүл. мәс. 8:30). Гејри-камиллик уҹбатындан нә кишиләр камил башчы ола билир, нә дә ки гадынлар әрләринә мүкәммәл сурәтдә табе ола билирләр. Лакин әрлә арвад әлләриндән ҝәләни едәндә никаһда мүмкүн гәдәр мәмнунлуг әлдә едирләр.
5. Нәјә ҝөрә әрлә арвад Ромалылара 12:10 ајәсиндәки мәсләһәтә ҹидди јанашмалыдыр?
5 Әрлә арвад никаһларынын уғурлу олмасы үчүн, илк нөвбәдә, бүтүн мәсиһчиләрә верилән Мүгәддәс Китаб мәсләһәтинә риајәт етмәлидир: «Гардашлыг севҝиси илә бир-биринизи шәфгәтлә севин; бир-биринизи һөрмәтдә габаглајын» (Ром. 12:10). Бундан әлавә, һәм әр, һәм дә арвад ‘бир-бирләринә гаршы лүтфкар, шәфгәтли олмаг вә бир-бирләрини бағышламаг’ үчүн сәјлә чалышмалыдыр (Ефес. 4:32).
Һәјат јолдашын сәнин иманына шәрик олмајанда
6, 7. Мәсиһчи гадынын иманына шәрик олмајан һәјат јолдашына табе олмасы һансы нәтиҹәни верә биләр?
6 Әҝәр сәнин һәјат јолдашын Јеһоваја хидмәт етмирсә, онда неҹә? Әксәр һалларда һәјат јолдашынын иманына шәрик олмајан әр олур. Белә олдугда гадын өз әринә неҹә мүнасибәт бәсләмәлидир? Мүгәддәс Китаб ҹаваб верир: «Еј гадынлар, сиз... өз әрләринизә табе олун ки, бәзиләри кәлама итаәт етмәзләрсә, еһтирам ичиндә тәмиз һәјатынызы мүшаһидә едәрәк, сиз арвадларын рәфтары илә һеч бир сөз сөјләнмәдән фәтһ едилсинләр» (1 Пет. 3:1, 2).
7 Аллаһын Кәламы гадынлара иманларына шәрик олмајан әрләринә табе олмағы мәсләһәт ҝөрүр. Ола билсин, гадынын јахшы давранышы әрини бунун сәбәбләри үзәриндә дүшүнмәјә вадар етсин вә нәтиҹәдә, о, мәсиһчи арвадынын етигадлары илә мараглана вә һәгигәти гәбул едә биләр.
8, 9. Мәсиһчи гадынын бүтүн сәјләринә бахмајараг, иманына шәрик олмајан әри онун јахшы давранышына һај вермирсә, о, нә етмәлидир?
8 Һәјат јолдашынын бүтүн сәјләринә бахмајараг, әр һәгигәтә гаршы биҝанә галырса, гадын нә етмәлидир? Мүгәддәс Јазылар Јеһоваја хидмәт едән гадынлары, нә гәдәр чәтин олса да, һәр заман мәсиһчи кејфијјәтләри тәзаһүр етдирмәјә тәшвиг едир. Мәсәлән, 1 Коринфлиләрә 13:4 ајәсиндә охујуруг: «Мәһәббәт сәбирли[дир]». Буна ҝөрә дә мәсиһчи гадынлар мәһәббәт вә дөзүмлүлүк ҝөстәрәрәк «там тәвазөкарлыг вә һәлимликлә, сәбирлә» давранмалыдырлар (Ефес. 4:2). Аллаһын фәал гүввәси олан мүгәддәс руһун көмәји илә чәтин анларда белә мәсиһчи хүсусијјәтләрини горујуб сахламаг мүмкүндүр.
9 Павел јазырды: «Мәни Мөһкәмләндирән васитәсилә һәр шеји етмәјә гадирәм» (Филип. 4:13, И—93). Аллаһын руһу мәсиһчи әрә вә ја арвада ҝүҹ верир ки, руһун көмәји олмадан едә билмәјәҹәји бир чох шеји етсин. Мәсәлән, һәјат јолдашларындан бири диҝәри илә кобуд рәфтар едәндә о бирисиндә гисас алмаг фикри јарана биләр. Лакин Мүгәддәс Китаб бүтүн мәсиһчиләрә дејир: «Һеч кимә пислик әвәзинә пислик етмәјин... Чүнки јазылмышдыр: “Рәбб дејир: Гисас Мәнимдир, әвәзини Мән верәҹәјәм”» (Ром. 12:17—19). 1 Салониклиләрә 5:15 ајәсиндә белә бир мәсләһәт вар: «Диггәтли олун ки, кимсә јаманлыг әвәзинә јаманлыг етмәсин, лакин һәмишә бир-биринизә вә һамыја јахшылыг етмәјә чалышын». Јеһованын мүгәддәс руһунун көмәји сајәсиндә биз өз ҝүҹүмүзә мүмкүн олмајан шејләрин өһдәсиндән ҝәлә биләрик. Буна ҝөрә дә Аллаһын мүгәддәс руһунун бизи еһтијаҹ дујдуғумуз шејләрлә тәмин етмәси һагда дуа етмәк неҹә дә мүнасибдир!
10. Иса онунла пис данышан вә ја рәфтар едән инсанларла неҹә давранырды?
10 Хошаҝәлмәз тәрздә данышан вә ја рәфтар едән инсанларла неҹә давранмаға даир Иса ән ҝөзәл нүмунәни гојуб. 1 Петер 2:23 ајәсиндә дејилир: «Сөјүләркән, ҹавабында сөјмәди; әзаб чәкәркән, тәһдид етмәди, әксинә әдаләтлә мүһакимә едәнә Өзүнү тәслим етди». Биз бу ҝөзәл нүмунәјә риајәт етмәјә чағырылырыг. Гој башгаларынын пис давранышы сәни әвәз чыхмаға тәһрик етмәсин. Бүтүн мәсиһчиләрә мәсләһәт ҝөрүлдүјү кими, ‘шәфгәтли, меһрибан, тәвазөкар ол, пислијә писликлә, сөјүшә дә сөјүшлә ҹаваб вермә’ (1 Пет. 3:8, 9).
Гадынын дили-ағзы олмамалыдыр?
11. Бәзи мәсиһчи гадынлар һансы бөјүк шәрәфә лајиг ҝөрүлүбләр?
11 Әрин башчылығына табе олмаг о демәкдирми ки, гадын дилсиз-ағызсыз олмалы, јәни онун аилә вә диҝәр мәсәләләрдә өз фикрини сөјләмәк һүгугу олмамалыдыр? Бу һеч дә белә дејил. Кишиләрлә бәрабәр гадынлара да чохлу шәрәфли мәсулијјәтләр һәвалә олунуб. Мәсиһлә бирҝә ҝөјләрдә падшаһ вә каһин кими хидмәт етмәјин 144 000 үчүн неҹә дә бөјүк шәрәф олаҹағыны бир тәсәввүр ет! Бу саја гадынлар да дахилдир (Галат. 3:26—29). Бурадан ајдын ҝөрүрүк ки, Јеһова Өз гурулушунда гадынлар үчүн фәал рол ајырыб.
12, 13. Гадынларын пејғәмбәрлик етдикләринә даир нүмунә ҝәтирин.
12 Мәсәлән, гәдим дөврләрдә гадынлар пејғәмбәрлик едирдиләр. Јоел 2:28, 29 ајәләриндә дејилир: «Бүтүн бәшәр үзәринә руһуму төкәҹәјәм. Оғулларыныз вә гызларыныз пејғәмбәрлик едәҹәк... О ҝүнләрдә гул вә гаравашларын үзәринә дә руһуму төкәҹәјәм».
13 Ерамызын 33-ҹү илинин Пентикост ҝүнүндә Јерусәлимдә јухары отагда топлашан Исанын тәгрибән 120 шаҝирди арасында һәм гадынлар, һәм дә кишиләр варды. Аллаһ һамынын үзәринә мүгәддәс руһ төкдү. Буна ҝөрә дә Петер Јоелин пејғәмбәрлијини ситат ҝәтирәрәк ону кишиләрлә бәрабәр гадынлара да тәтбиг етди. Петер деди: «Бу һадисә Јоел пејғәмбәр тәрәфиндән хәбәр верилмишди: “Аллаһ дејир: Сон ҝүнләрдә бүтүн бәшәр үзәринә Руһумдан төкәҹәјәм; оғулларыныз да, гызларыныз да пејғәмбәрлик едәҹәкләр... О ҝүнләрдә гулларым вә гарабашларым үзәринә дә Руһумдан төкәҹәјәм, вә пејғәмбәрлик едәҹәкләр”» (Һәв. иш. 2:16—18).
14. Биринҹи әсрдә гадынлар мәсиһчилијин јајылмасында һансы ролу ојнамышлар?
14 Биринҹи әсрдә гадынлар мәсиһчилијин јајылмасында бөјүк рол ојнајырдылар. Онлар башгаларына Аллаһын Падшаһлығы һаггында тәблиғ едир вә бунунла бағлы диҝәр ишләри дә ҝөрүрдүләр (Лука 8:1—3). Мәсәлән, һәвари Павел «Кенхрејадакы јығынҹагда хидмәт едән» (ЈД) Фиби адлы баҹыдан бәһс едир. Һәмкарларына салам ҝөндәрәндә Павел, ‘Рәбб үчүн зәһмәт чәкән Трифена вә Трифоса’, һәмчинин ‘Рәбб үчүн чох зәһмәт чәкмиш севимли Персис’ дә дахил олмагла, бир нечә садиг гадынын адыны чәкир (Ром. 16:1, 12).
15. Бизим ҝүнләрдә мәсиһчилијин јајылмасында гадынларын һансы ролу вар?
15 Бизим ҝүнләрдә Аллаһын Падшаһлығы һаггында хош хәбәри бүтүн дүнјада бәјан едән једди милјондан чох тәблиғчинин бөјүк һиссәсини мүхтәлифјашлы гадынлар тәшкил едир (Мат. 24:14). Онларын чоху таммүддәтли хидмәтчи, миссионер вә бет-еллидир. Мәзмурчу Давуд охујурду: «Худавәнд әмр едир, бир алај гадынлар белә мүждә пајлајырлар» (Мәз. 68:11). Бу сөзләр, һәгигәтән дә, өз тәсдигини тапды! Јеһова хош хәбәрин бәјан едилмәсиндә вә нијјәтинин һәјата кечмәсиндә гадынларын ојнадығы ролу гијмәтләндирир. Аллаһын мәсиһчи гадынлардан башчылыг принсипинә табе олмаларыны тәләб етмәси о демәк дејил ки, онларын сөз демәјә ихтијары јохдур.
Фикрини билдирмәкдән чәкинмәјән ики гадын
16, 17. Саранын нүмунәси гадынын аиләдәки вәзифәсинин садәҹә сусмагдан ибарәт олмадығыны неҹә ҝөстәрир?
16 Јеһова гадынлара чохлу мәсулијјәтләр һәвалә етдији һалда, мәҝәр әрләр ваҹиб гәрарлар гәбул етмәздән өнҹә һәјат јолдашлары илә мәсләһәтләшмәли дејилләрми? Белә етмәклә онлар мүдрик давранмыш олурлар. Мүгәддәс Јазыларда һәтта әрләри онларын фикрини сорушмадыгда белә, тәшәббүсү өз үзәринә ҝөтүрүб һәрәкәт едән вә ја фикир билдирән бир нечә гадынын нүмунәси чәкилир. Ҝәлин онлардан икисинә нәзәр салаг.
17 Ибраһимин арвады Сара ону дилә тутду ки, икинҹи арвадыны вә оғлуну һөрмәтсизлик ҝөстәрдикләри үчүн евдән говсун. Бу иш Ибраһимин хошуна ҝәлмәсә дә, Јеһова буна башга ҹүр јанашды. О, Ибраһимә деди: «Ушагдан вә ҹаријәндән өтрү нараһат олма. Саранын сәнә сөјләдији бүтүн сөзләрә гулаг ас» (Јар. 21:8—12). Ибраһим Аллаһа табе олду, Сараја гулаг асыб онун истәдији кими етди.
18. Авигаил үзәринә һансы тәшәббүсү ҝөтүрдү?
18 Инди исә Навалын арвады Авигаилин нүмунәсинә нәзәр салаг. Давуд она пахыллыг едән Шаул падшаһдан гачанда Навалын сүрүләринин јанында дүшәрҝә салмышды. Давуд бу вар-дөвләтли адамын сүрүләринә әл дәјмир, әксинә, адамлары илә бирҝә онлары горујурду. Лакин «кобуд вә бәдхасијјәт» олдуғундан Навал Давудун адамларыны «тәһгир етди». О, «јарамаз» вә ‘ахмаг’ инсан иди. Давудун адамлары һөрмәтҹил шәкилдә ондан азугә истәјәндә Навал онларын хаһишләрини рәдд етди. Авигаил бу һагда ешидәндә нә етди? Әринә бир кәлмә дә демәдән о «ҹәлд тәрпәниб, ики јүз көмбә чөрәк вә ики тулуг шәраб һазырлады. Беш гојун ҹәмдәји, беш өлчү говурға, јүз салхым гуру үзүм вә ики јүз парча басылмыш әнҹир лавашанасы ҝөтүрүб» Давуда вә онун адамларына апарды. Авигаил дүзҝүнмү һәрәкәт етди? Бәли, чүнки Мүгәддәс Китабда дејилир ки, «Рәбб Навалы вурду вә о өлдү». Сонра да Давуд Авигаиллә евләнди (1 Шам. 25:3, 14—19, 23—25, 38—42).
‘Тәрифәлајиг гадын’
19, 20. Гадыны һәгигәтән дә тәрифәлајиг едән нәдир?
19 Мүгәддәс Јазыларда Јеһованын истәдији кими һәрәкәт едән гадынлар тәрифләнир. «Сүлејманын мәсәлләри» китабы ‘хејирхаһ арвады’ тәрифләјәрәк дејир: «О, јагутлардан даһа гијмәтлидир. Әринин гәлби ондан архајындыр, дајанмадан бәрәкәт газаныр. Өмрү боју әринә пислик дејил, јахшылыг ҝәтирир». Үстәлик, «ағзыны ачанда һикмәт ахыр, дилиндән сәдагәт тәлими чыхыр. Аиләсинин ишини идарә едир, тәнбәлә лајиг олан чөрәји јемир. Өвладлары ајаға галхыб ону алгышлајыр, әри ону тәрифләјир» (Сүл. мәс. 31:10—12, 26—28).
20 Гадыны һәгигәтән дә тәрифәлајиг едән нәдир? Сүлејманын мәсәлләри 31:30 ајәсиндә дејилир: «Гадынын мәлаһәти алдадыҹы, ҝөзәллији фанидир, јалныз Рәбдән горхан гадын тәрифә лајигдир». Рәбб горхусуна Јеһованын тәсис етдији башчылыг принсипинә көнүллү сурәтдә табе олмаг дахилдир. ‘Әрин башы Мәсиһ, Мәсиһин башы исә Аллаһ’ олдуғу кими, «арвадын [да] башы әр»дир (1 Кор. 11:3).
Аллаһын әнамына ҝөрә миннәтдар олун
21, 22. а) Аиләли мәсиһчиләрин Аллаһын никаһ әнамына ҝөрә миннәтдар олмалары үчүн һансы сәбәбләри вар? б) Нәјә ҝөрә биз Јеһованын башчылыг вә һакимијјәт принсипинә һөрмәтлә јанашмалыјыг? (17-ҹи сәһифәдәки чәрчивәјә бахын.)
21 Евли мәсиһчиләрин Аллаһа миннәтдар олмалары үчүн о гәдәр сәбәбләри вар ки! Онлар Аллаһын ҝөзәл никаһ әнамына ҝөрә хүсусилә миннәтдар ола биләрләр, чүнки бу, онлара әл-әлә вериб хошбәхт аилә кими Јеһова илә јеримәк имканы верир (Рут 1:9; Мик. 6:8, КМ). О, никаһын Баниси олдуғундан әр-арвадын хошбәхт олмасы үчүн нә тәләб олдуғуну дәгиг билир. Һәмишә Онун мәсләһәтләри илә отуруб-дурсан, бу дүнјада һәјатын чәтин олмасына бахмајараг, ‘Рәббин вердији севинҹ сәнин гүввәтин’ олаҹаг (Неһ. 8:10).
22 Арвадыны өзү кими севән әр өз һәјат јолдашына нәвазишлә вә нәзакәтлә башчылыг едәҹәк. Онун Аллаһдан горхан арвады әринә дајаг олдуғу вә дәрин еһтирам бәсләдији үчүн, һәгигәтән дә, севиләҹәк. Ән ваҹиби исә, онларын нүмунәви никаһы тәрифәлајиг вә сәхавәтли Јеһова Аллаһы иззәтләндирәҹәк.
Јадыныздадырмы?
• Јеһованын башчылыг вә табечилик принсипи нәдән ибарәтдир?
• Нәјә ҝөрә әр-арвад бир-биринә һөрмәт етмәлидир?
• Мәсиһчи гадын иманына шәрик олмајан әринә неҹә мүнасибәт бәсләмәлидир?
• Нәјә ҝөрә әр ваҹиб гәрарлар гәбул етмәздән өнҹә арвады илә мәсләһәтләшмәлидир?
[17-ҹи сәһифәдәки чәрчивә]
Нәјә ҝөрә башчылыг принсипинә һөрмәтлә јанашмалыјыг?
Јеһова шүурлу варлыглар арасында башчылыг вә һакимијјәт принсипи тәсис едиб. Бу һәм руһани варлыгларын, һәм дә инсанларын хејри үчүн едилиб. Бунун сајәсиндә онларын ирадә азадлыгларыны ифадә етмәк вә Аллаһа бирликдә вә низам-интизамла хидмәт едәрәк Ону иззәтләндирмәк имканы вар (Мәз. 133:1).
Мәсһ олунмушларын јығынҹағы Иса Мәсиһин һакимијјәтини вә башчылығыны гәбул едир (Ефес. 1:22, 23). Јеһованын һакимијјәтини гәбул етдијини ҝөстәрәрәк сонда «Оғулун Өзү дә, Она һәр шеји табе етдирәнә табе олаҹаг ки, Аллаһ һәр шејдә һәр шеј олсун» (1 Кор. 15:27, 28). Буна ҝөрә дә Аллаһа һәср олунан инсанларын Јеһованын јығынҹагда вә аиләдә тәсис етдији башчылыг принсипинә һөрмәт етмәләри неҹә дә мүнасибдир! (1 Кор. 11:3; Ибр. 13:17). Бу, бизим хејримизәдир, чүнки Јеһованын рәғбәтини газаныр вә Онун хејир-дуаларыны алырыг (Јешаја 48:17).
[13-ҹү сәһифәдәки шәкил]
Дуа аиләли мәсиһчи гадынлара Аллаһа мәгбул кејфијјәтләр тәзаһүр етдирмәјә көмәк едәҹәк
[15-ҹи сәһифәдәки шәкилләр]
Јеһова Падшаһлығын марагларынын ирәлиләмәсинә гадынларын вердикләри төһфәни гијмәтләндирир