Ҝеҹикмәк нәјә ҝөрә јахшы дејил?

ЈОЛУН узаг олмасы, тыхаҹлар вә ҝәрҝин график уҹбатындан тәјин олунмуш јерә ҝеҹикмәмәк, һәмишә вахтында ҝәлмәк асан олмаја биләр. Бунунла белә, јенә дә вахтында ҝәлмәк чох ваҹибдир. Чүнки, адәтән, ишә вахтында ҝәлән инсан етибарлы вә чалышган сајылыр. Ҝеҹикән инсан исә башгаларынын ишинә мане ола, һәмчинин мәһсулун вә хидмәтин кејфијјәтинә мәнфи тәсир ҝөстәрә биләр. Шаҝирд дәрсә ҝеҹикәрсә, о, мүәјјән дәрсләри бурахдығы үчүн ҝери гала биләр. Һәкимин вә ја стоматологун јанына дедији вахтда ҝетмәсәк, бу, мүалиҹәјә өз тәсирини ҝөстәрә биләр.

Бәзи јерләрдә ҝеҹикмәмәк, јәни тәјин олунмуш вахтда ҝәлмәк мәсәләсинә бир о гәдәр дә ҹидди јанашылмыр. Белә мүһитдә бу, асанлыгла адәт һалына кечә биләр. Белә вәрдиши тәрҝитмәк үчүн үзәримиздә ҹидди сурәтдә чалышмалыјыг. Һәр шеји вахтында етмәјин ваҹиблијини дәрк етмәјимиз дәгиг олмағымыза көмәк едәҹәк. Бәс биз һансы сәбәбләрә ҝөрә ҝеҹикмәмәлијик? Ҝеҹикмәјимизә сәбәб олан әнҝәлләри неҹә арадан галдыра биләрик? Белә давранмағымыз һансы бәһрәләри ҝәтирәҹәк?

Јеһова Аллаһ һәр шејдә дәгигдир

Дәгиг олмаг истәмәјимизин әсас сәбәби ибадәт етдијимиз Аллаһы тәглид етмәк истәјидир (Ефес. 5:1). Чүнки бу саһәдә ән мүкәммәл нүмунә Јеһовадыр. О, һеч вахт ҝеҹикмир вә нијјәтини тәјин етдији вахтда һәјата кечирир. Мәсәлән, Јеһова аллаһсыз дүнјаны дашгынла мәһв етмәк гәрарына ҝәләндә Нуһа деди: «Өзүнә гофер ағаҹындан бир ҝәми дүзәлт». О ҝүн јахынлашанда Јеһова Нуһа ҝәмијә ҝирмәсини тапшырды вә она билдирди: «Једди ҝүн сонра јер үзүнә гырх ҝүн-гырх ҝеҹә јағыш јағдыраҹағам вә јаратдығым бүтүн ҹанлылары јер үзүндә мәһв едәҹәјәм». Дејилән вахтда, «једди ҝүн сонра јер үзүндә дашгын олду» (Јар. 6:14; 7:4, 10). Тәсәввүр един: әҝәр Нуһ вә онун аиләси вахтында ҝәмијә дахил олмасајдылар, онларла нә баш верәрди! Ибадәт етдикләри Аллаһ кими онлар да ҝеҹикмәмәли идиләр.

Дашгындан 450 ил сонра Јеһова Ибраһимин оғлу олаҹағыны вә вәд олунмуш Өвладын һәмин оғулун нәслиндән ҝәләҹәјини демишди (Јар. 17:15—17). Аллаһ Исһагын «ҝәлән ил бу вахт» доғулаҹағыны вәд етди. Бәс бу вәд һәјата кечдими? Мүгәддәс Китабда дејилир: «Сара һамилә олду вә Ибраһимин гоҹалыг чағында — Аллаһын она сөјләдији вахт бир оғул доғду» (Јар. 17:21; 21:2).

Мүгәддәс Китабда Јеһованын өз вәдләрини дәгигликлә јеринә јетирдијини ҝөстәрән чохсајлы нүмунәләр вар (Јер. 25:11—13; Дан. 4:20—25; 9:25). Орада Јеһованын һөкм ҝүнүнү ҝөзләмәли олдуғумуз дејилир. Инсан нөгтеји-нәзәриндән о ҝүн «ҝеҹикир»миш кими ҝөрүнсә дә, әмин ола биләрик ки, о «ҝеҹикмәјәҹәк», һөкмән ҝәләҹәк (Һаб. 2:3).

Ибадәтимиздә ваҹиблији

Бүтүн исраилли кишиләр «Рәббин тәјин етдији бајрамлар»да иштирак етмәк үчүн мүәјјән олунмуш јерә вахтында ҝәлмәли идиләр (Лев. 23:2, 4). Һәмчинин Аллаһ һәр бир гурбанын ҝәтирилмәси үчүн мүәјјән вахт тәјин етмишди (Чых. 29:38, 39; Лев. 23:37, 38). Бу ајдын ҝөстәрир ки, Аллаһ Өз хидмәтчиләринин ибадәтләриндә дәгиг олмаларыны истәјир.

Биринҹи әсрдә һәвари Павел Коринф мәсиһчиләринә ҝөрүшләрин кечирилмәсинә даир ҝөстәришләр верәрәк онлары тәшвиг едирди: «Гој һәр шеј әдәблә вә низамла едилсин» (1 Кор. 14:40). Буна мүвафиг олараг, мәсиһчиләрин ибадәт ҝөрүшләри тәјин олунмуш вахтда башламалыдыр. Јеһованын бу мәсәләјә даир нөгтеји-нәзәри дәјишмәјиб (Мал. 3:6). Бәс ҝөрүшләримизә ҝеҹикмәмәк үчүн һансы тәдбирләри ҝөрә биләрик?

Әнҝәлләри неҹә аша биләрик?

Бәзиләринин фикринҹә, һәр шеји әввәлҹәдән планлашдырмағын бу ишдә көмәји дәјә биләр (Сүл. мәс. 21:5). Тутаг ки, һараса ҝетмәлијик. Анҹаг евдән елә чыхырыг ки, һәмин јерә өзүмүзү ҝүҹлә чатдырырыг. Сизҹә, белә етмәк нә дәрәҹәдә мүдрикликдир? Јахшы олмаздымы ки, тәсадүфән баш верә биләҹәк һадисәләри нәзәрә алараг бир нечә дәгигә габаг чыхаг? (Ваиз 9:11). «Јола нә гәдәр вахт сәрф едиләҹәјини нәзәрә алмаг вахтында ҝәлмәјә көмәк едә биләр», — дејә һәмишә вахта дәгиг риајәт етмәјә чалышан Хосеa адлы ҝәнҹ гејд едир.

Бәзи баҹы-гардашлар мүәјјән тәдбирләр ҝөрүб ишдән тез чыхмалы олурлар ки, јығынҹаг ҝөрүшләринә ҝеҹикмәсинләр. Ефиопијалы бир Шаһид иш ҹәдвәлиндәки дәјишикликләрә ҝөрә јығынҹаға 45 дәгигә ҝеҹикәҹәјини биләндә иш јолдашындан хаһиш етди ки, јығынҹаг ҝүнләри өз нөвбәсинә вахтындан габаг ҝәлсин. Әвәзиндә исә гардаш иш јолдашынын јеринә 7 саат әлавә ишләјәҹәкди.

Кичик јашлы ушаглары олан валидејнләрә ҝөрүшләрә вахтында ҝәлмәк хүсусилә чәтиндир. Ушаглары һазырламаг мәсулијјәти әсасән ананын үзәринә дүшсә дә, аиләнин диҝәр үзвләри дә она көмәк етмәлидирләр. Мексикадан олан Есперанса сәккиз ушағыны тәк бөјүдүб боја-баша чатдырыб. Бөјүјүнүн 23, кичијинин исә 5 јашы вар. Есперанса аиләсинин һәр шеји вахтында неҹә чатдырдығыны белә изаһ едир: «Бөјүк гызларым балаҹаларын һазырлашмасына көмәк едирләр. Бунун сајәсиндә, мән дә ев ишләрини ҝөрүб гуртарырам вә биз јығынҹаға чатмаг үчүн вахтында евдән чыхырыг». Бу аилә евдән чыхмаг үчүн дәгиг вахт тәјин едиб, аиләнин һәр бир үзвү дә әлиндән ҝәләни едир ки, евдән вахтында чыхсын.

Ибадәтдә дәгиглијин фајдасы

Алдығымыз хејир-дуалар үзәриндә дүшүнсәк, јығынҹаглара вахтында ҝәлмәк истәјимиз артаҹаг вә биз вар ҝүҹүмүзлә чалышаҹағыг ки, һеч вахт ҝеҹикмәјәк. Јығынҹаг ҝөрүшләринә вахтындан бир гәдәр әввәл ҝәлмәји адәт едән Сандра адлы ҝәнҹ баҹы дејир: «Јығынҹаға тез ҝәлмәји она ҝөрә хошлајырам ки, баҹы-гардашлары саламламаг, онларла сөһбәт етмәк вә онлары даһа јахшы танымаг имканым олур». Падшаһлыг Залына тез ҝәлмәклә башгаларынын дөзүмү вә сәдагәти барәдә ешидирик, бу да бизи руһландырыр. Јығынҹаг ҝөрүшләриндә иштирак етмәклә вә руһландырыҹы үнсијјәтимизлә баҹы-гардашлара јахшы тәсир бағышлајыр вә онлары «мәһәббәтә вә хејирли ишләрә» тәшвиг едирик (Ибр. 10:24, 25).

Мәсиһчи ҝөрүшләримиз башлајанда охунан һәмд нәғмәси вә едилән дуа ибадәтимизин әсас һиссәсидир (Мәз. 149:1). Јеһованы тәрәннүм етмәк үчүн охудуғумуз нәғмәләр һансы кејфијјәтләри инкишаф етдирмәли олдуғумузу хатырладыр вә бизи хидмәтдә севинҹлә иштирак етмәјә тәшвиг едир. Бәс ҝөрүшүн әввәлиндә едилән дуа һаггында нә демәк олар? Гәдимдә Јеһова мәбәди «дуа евим» дејә адландырмышды (Јешаја 56:7). Бу ҝүн биз дә јығынҹаглара Аллаһа дуа етмәк үчүн топлашырыг. Илк дуа Јеһовадан тәкҹә рәһбәрлик вә мүгәддәс руһ диләмәјә јох, һәм дә бејнимизи вә үрәјимизи ешидәҹәјимиз фикирләрә һазырламаға көмәк едир. Биз гәти гәрарлы олмалыјыг ки, илк маһны вә дуада иштирак едәк.

23 јашлы Һелен јығынҹаг ҝөрүшләринә тез ҝәлмәсинин сәбәбини белә изаһ едир: «Мәним фикримҹә, бунунла мән Јеһоваја мәһәббәтими ҝөстәрирәм, чүнки бурада верилән тәлимин һамысы, о ҹүмләдән маһны вә дуа да Јеһовадандыр». Әлбәттә, биздә дә белә әһвал-руһијјә олмалыдыр. Буна ҝөрә, ҝәлин бүтүн ишләримиздә, хүсусилә дә һәгиги Аллаһа ибадәтимиздә һәмишә вахта дәгиг риајәт етмәк вәрдиши инкишаф етдирмәјә чалышаг.

[Һашијә]

[26-ҹы сәһифәдәки шәкил]

Вахтында һазырлашын

[26-ҹы сәһифәдәки шәкил]

Тәсадүфи һаллары нәзәрә алын

[26-ҹы сәһифәдәки шәкилләр]

Ҝөрүшләрә тез ҝәлмәклә үнсијјәтдән фајда әлдә един