Проблемләри неҹә һәлл етмәли?

МҮГӘДДӘС КИТАБДА дејилмир ки, аилә гуранларын әли бала батаҹаг. Әксинә, орада евләнәнләрин һәјатда мүхтәлиф «чәтинликләрлә үзләшәҹәкләр»и дејилир (1 Коринфлиләрә 7:28). Лакин мүнасибәтләрини јахшылашдырмаг вә аилә һәјатындан севинҹ дујмаг үчүн әр-арвадлар чох шеј едә биләрләр. Адәтән, әрләр вә арвадлар ән чох нәдән шикајәт едир? Ҝәлин онлардан алтысыны нәзәрдән кечирәк вә ҝөрәк Мүгәддәс Китаб мәсләһәт вә принсипләри бу саһәдә неҹә көмәк едә биләр.

1

ШИКАЈӘТ:

«Ҝет-ҝедә бир-биримиздән узаглашырыг».

МҮГӘДДӘС КИТАБЫН МӘСЛӘҺӘТИ:

«Даһа ваҹиб шејләри ајырд етмәји» баҹарын (ФИЛИПИЛИЛӘРӘ 1:10).

Аилә сизин һәјатынызда ән ваҹиб јерләрдән бирини тутмалыдыр. Она мүтләг диггәт ајырмаг лазымдыр. Бәлкә мүнасибәтләринизин бу һәддә ҝәлиб чатмасынын сәбәбләриндән бири елә сизин һәјат тәрзиниздир? Јол вермәјин ки, ҝүндәлик ади ишләриниз сизи һәјат јолдашыныздан узаглашдырсын. Әлбәттә, иш вә башга ваҹиб мәсәләләр бирликдә вахт кечирмәјинизи мүәјјән гәдәр мәһдудлашдыра биләр. Лакин тамамилә сизин әлиниздә олан шејләрә, мәсәлән, мүхтәлиф мәшғулијјәтләрә вә ја достларыныза ајырдығыныз вахты азалда биләрсиниз.

Бәзиләри һәјат јолдашлары илә вахт кечирмәмәк үчүн ишдән әлавә дә ишләјирләр вә ја вахтларыны мүхтәлиф мәшғулијјәтләрә сәрф едирләр. Белә инсанлар һәјат јолдашларындан узаглашараг проблемләрдән гачмаға чалышырлар. Әҝәр сизинлә дә вәзијјәт беләдирсә, онда сиз проблемин көкүнү мүәјјән етмәли вә ону арадан галдырмаға сәј ҝөстәрмәлисиниз. Анҹаг бирликдә вахт кечирдикҹә мүнасибәтләриниз јахшылашаҹаг вә Аллаһын Кәламында дејилдији кими, «бир бәдән» олаҹагсыныз (Јарадылыш 2:24).

Бәзиләри бу мәсләһәти неҹә тәтбиг етмишләр? Австралијада јашајан Ендрјуa вә Танји артыг он илдир ки, евлидирләр. Ендрју дејир: «Баша дүшдүм ки, ишә вә достлара һәддән артыг чох вахт ајырмаг аилә мүнасибәтләримизә хәләл јетирә биләр. Буна ҝөрә дә, һәјат јолдашымла отуруб сөһбәт етмәјә вә һиссләримизи бөлүшмәјә вахт ајырырыг».

Бирләшмиш Штатларда јашајан Дејв вә Ҹејн 22 илдир ки, аилә һәјаты гурублар. Онлар һәр ахшам јарым саат ајырараг ҝүнләринин неҹә кечдијини бир-бирләрилә бөлүшүрләр. Ҹејн дејир: «Бу вахт бизим үчүн чох өнәмлидир вә ону башга шејләрә сәрф етмирик».

2

ШИКАЈӘТ:

«Мүнасибәтләримиз артыг мәни гане етмир».

МҮГӘДДӘС КИТАБЫН МӘСЛӘҺӘТИ:

«Гој һәр кәс өз хејрини јох, башгасынын хејрини фикирләшсин» (1 КОРИНФЛИЛӘРӘ 10:24).

Әҝәр инсан аилә һәјатында анҹаг өзүнүн әлдә едәҹәји шејләр барәдә дүшүнүрсә, о нә гәдәр бошаныб евләнсә дә, һеч вахт хошбәхт олмајаҹаг. Әр дә, арвад да алаҹағындан чох верәҹәјини фикирләшсә, онда никаһлары онлара әсил хошбәхтлик ҝәтирәҹәк. Иса пејғәмбәрин мүдрик бир кәламы вар: «Вермәк алмагдан даһа чох хошбәхтлик ҝәтирир» (Һәвариләрин ишләри 20:35).

Бәзиләри бу мәсләһәти неҹә тәтбиг етмишләр? Мексикада јашајан Мартин вә Марија 39 илдир ки, евлидирләр. Лакин ишләр һеч дә һәмишә онларын истәдији кими ҝетмәјиб. Бир мүбаһисә онларын јаддашында хүсусилә дәрин из гојуб. Марија данышыр: «Мүбаһисәнин гызғын јериндә Мартинин шәхсијјәтини алчалдан бир сөз ишләтдим. Бу сөз ону өзүндән чыхартды. Әслиндә белә демәк истәмәдијими она баша салмаға чалышдым, лакин о, мәнә гулаг асмаг истәмәди». Мартин: «Бу мүбаһисә заманы артыг бирликдә јашаја билмәјәҹәјимизи вә мүнасибәтләримизи горумағын фајдасыз олдуғуну дүшүнмәјә башладым».

Мартинин истәдији һөрмәт, Маријанын истәдији исә анлајыш иди. Онлардан һеч бири истәдијини алмырды.

Бәс онлар бу проблеми неҹә һәлл етдиләр? Мартин дејир: «Һирсим јатандан сонра һәр икимиз дә Мүгәддәс Китабын һөрмәтҹил вә меһрибан давраныша даир мүдрик мәсләһәтини тәтбиг етмәк гәрарына ҝәлдик. Илләр кечдикҹә бир шеји баша дүшдүк: нә гәдәр проблем олурса-олсун, онун өһдәсиндән ҝәлмәк үчүн биз Аллаһдан көмәк диләмәли вә Мүгәддәс Китабын мәсләһәтләрини тәтбиг етмәлијик» (Јешаја 48:17, 18; Ефеслиләрә 4:31, 32).

3

ШИКАЈӘТ:

«Һәјат јолдашым аилә мәсулијјәтләринә башдансовду јанашыр».

МҮГӘДДӘС КИТАБЫН МӘСЛӘҺӘТИ:

«Һәр кәс өзүнә ҝөрә Аллаһын гаршысында ҹаваб верәҹәк» (РОМАЛЫЛАРА 14:12).

Әлбәттә, аиләнин там хошбәхтлији үчүн анҹаг бир тәрәфин сәј ҝөстәрмәси кифајәт дејил. Лакин әҝәр һәр ики тәрәф дә мәсулијјәтини бојнундан атырса вә бир-бирини ҝүнаһландырырса, бу, вәзијјәти даһа да ҝәрҝинләшдирир.

Әҝәр фикриниз-зикриниз анҹаг һәјат јолдашынызын етмәли олдуғу шејләрә ҹәмләсәниз, садәҹә өзүнүзә әзаб вермиш олаҹагсыныз. Хүсусилә дә һәјат јолдашыныз аилә мәсулијјәтләринә башдансовду јанашырса вә буну әлиниздә бајраг тутараг сиз дә белә давранырсынызса, бу, ағрынызы даһа да артыраҹаг. Диҝәр тәрәфдән, әҝәр јахшы әр вә ја арвад олмаг үчүн әлиниздән ҝәләни етсәниз, никаһынызы мөһкәмләндирәҹәксиниз (1 Петер 3:1—3). Һәмчинин белә давранмагла Аллаһын никаһ гурулушуна һөрмәт етдијинизи ҝөстәрәҹәк вә Ону разы салаҹагсыныз (1 Петер 2:19).

Бәзиләри бу мәсләһәти неҹә тәтбиг етмишләр? Корејада јашајан Ким 38 илдир ки, аилә гуруб. О дејир: «Бәзән һеч билмәдијим сәбәбдән әрим мәндән инҹијир вә данышдырмыр. Белә оланда онун артыг мәни севмәдијини дүшүнмәјә башлајырам. Бәзән өзүмдән сорушурам: “Әҝәр о, мәни баша дүшмәк истәмирсә, мән нијә онун һиссләрини баша дүшмәлијәм?”»

Белә вәзијјәтләрдә Ким әринин һагсыз олдуғу гәнаәтинә ҝәлә биләрди. Анҹаг о, башга ҹүр давранды. Ким дејир: «Анладым ки, күсүлү галмагданса, барышмаг үчүн илк аддымы мән атсам јахшыдыр. Инди биз отуруб раһат үнсијјәт едә билирик» (Јагуб 3:18).

4

ШИКАЈӘТ:

«Арвадым мәни сајмыр».

МҮГӘДДӘС КИТАБЫН МӘСЛӘҺӘТИ:

«Һәр кишинин башы Мәсиһ»дир (1 КОРИНФЛИЛӘРӘ 11:3).

Арвадынын она итаәткар олмадығыны дүшүнән әр илк нөвбәдә өзүндән сорушмалыдыр: «Мән өзүм Мәсиһә нә дәрәҹәдә табе олурам?» Әр Иса Мәсиһин нүмунәсини изләмәклә она итаәткар олдуғуну ҝөстәрир.

«Әрләр, арвадларынызы һәмишә севин, чүнки Мәсиһ дә јығынҹағы севди вә өзүнү онун јолунда фәда етди», — дејә Аллаһын Кәламында вурғуланыр (Ефеслиләрә 5:25). Иса шаҝирдләринин үзәриндә «ағалыг» етмирди (Марк 10:42—44). Онлара ајдын ҝөстәришләр верир, лазым ҝәләндә исә сәһвләринә дүзәлишләр едирди, онларла һеч вахт сәрт давранмырды. Шаҝирдләринин имканларыны нәзәрә алырды, онлара гаршы һәмишә мәрһәмәтли иди (Матта 11:29, 30; Марк 6:30, 31; 14:37, 38). О, һәмишә онларын мәнфәәтини өзүнүнкүндән үстүн тутурду (Матта 20:25—28).

Әр өзүндән сорушмалыдыр: «Мәним башчылыг принсипинә вә үмумијјәтлә, гадынлара олан мүнасибәтимә даһа чох нә тәсир едир: Мүгәддәс Китабын мәсләһәтләри вә орадакы нүмунәләр, јохса јерли адәт-әнәнәләр?» Мәсәлән, әҝәр гадын һансыса мәсәләдә әри илә разылашмырса, гәти, анҹаг һөрмәтҹил тәрздә өз фикрини билдирирсә, сиз белә гадын һагда нә дүшүнәрдиниз? Мүгәддәс Китабда Ибраһим пејғәмбәрин арвады Сара итаәткар гадын нүмунәси кими чәкилир (1 Петер 3:1, 6). Лакин о, лазым ҝәләндә, мәсәлән, Ибраһимин аиләси үчүн јаранан тәһлүкәни сезмәдијини ҝөрәндә ачыг шәкилдә өз фикрини билдирирди (Јарадылыш 16:5; 21:9—12).

Әлбәттә, Ибраһим арвадына ағзыны белә ачмаға гојмајан гәддар вә залым әр дејилди. Буна бәнзәр тәрздә, Мүгәддәс Китабын мәсләһәтинә риајәт едән әрләр дә арвадларына гаршы әзазил давранмамалы, өз дедијини јеритмәмәлидир. Әр башчылыг вәзифәсини ҹаныјананлыгла јеринә јетирсә, арвадынын һөрмәтини газанаҹаг.

Бәзиләри бу мәсләһәти неҹә тәтбиг етмишләр? Инҝилтәрәдә јашајан вә 8 илдир ки, евли олан Ҹејмс дејир: «Мән ваҹиб гәрарлары арвадымла мәсләһәтләшмәмиш гәбул етмәмәји өјрәнирәм. Чалышырам, тәкҹә өзүмү дүшүнмәјим. Әксинә, һәјат јолдашымын тәләбатларыны өзүмүнкүндән үстүн тутум».

Бирләшмиш Штатларда јашајан Ҹорҹ 59 илдир ки, евлидир. О етираф едир: «Арвадыма ашағы сәвијјәли инсан кими јох, ағыллы вә баҹарыглы бир шәхс кими јанашмағы өјрәндим» (Сүлејманын мәсәлләри 31:10).

5

ШИКАЈӘТ:

«Әрим тәшәббүс ҝөстәрмәји хошламыр».

МҮГӘДДӘС КИТАБЫН МӘСЛӘҺӘТИ:

«Һикмәтли гадын евини гурар, сәфеһ гадын ону әли илә учурар» (СҮЛЕЈМАНЫН МӘСӘЛЛӘРИ 14:1).

Әҝәр әриниз гәрар гәбул етмәји хошламырса вә ја аиләни көнүлсүз идарә едирсә, бу һалда сизин ән азы үч вариантыныз вар: 1) даима әринизин сәһвләрини үзүнә вура биләрсиниз, 2) аиләдә рәһбәрлији әлә ала биләрсиниз вә ја 3) сәмими-гәлбдән онун һәр бир сәјини тәрифләјә биләрсиниз. Әҝәр илк ики варианты сечсәниз, өз әлинизлә аиләнизи дағытмыш олаҹагсыныз. Анҹаг үчүнҹү варианты сечмәклә никаһынызы мөһкәмләндирәҹәксиниз.

Бир чох кишиләр үчүн һөрмәт мәһәббәтдән даһа ваҹибдир. Әриниз она һөрмәт етдијинизи — онун рәһбәрлијини вә сәјини гијмәтләндирдијинизи ҝөрәндә өз вәзифәсини даһа јахшы јеринә јетирәҹәк. Әлбәттә, сиз бәзән мүәјјән мәсәләләрдә һәјат јолдашынызла разылашмајаҹагсыныз. Бу заман сизә отуруб мәсәләни бирликдә мүзакирә етмәк лазымдыр (Сүлејманын мәсәлләри 18:13). Лакин сөзләриниз вә сәсинизин тону никаһынызы ја дағыда, ја да мөһкәмләндирә биләр (Сүлејманын мәсәлләри 21:9; 27:15). Фикирләринизи һөрмәтҹил тәрздә ифадә един, о заман истәдијинизә наил олаҹагсыныз — һәјат јолдашыныз рәһбәрлији өз үзәринә ҝөтүрмәкдә тәрәддүд етмәјәҹәк.

Бәзиләри бу мәсләһәти неҹә тәтбиг етмишләр? Бирләшмиш Штатлардан јашајан вә 30 илдир ки, евли олан Мишел белә дејир: «Анам баҹыларымла мәни атасыз бөјүдүб. О, чох әзмли вә сәрбәст гадын олуб. Бу ҹәһәтдән мән она охшамышам. Буна ҝөрә дә һәмишә өз үзәримдә ишләмәли олурам ки, лазыми гајдада итаәткарлыг ҝөстәрә билим. Мәсәлән, өзбашына гәрар гәбул етмәк әвәзинә, чалышырам әримлә мәсләһәтләшим».

Австралијадан олан Рејчел 21 ил бундан әввәл Маркла аилә гуруб. Алдығы тәрбијәнин она да ҝүҹлү тәсири олмушдур. О дејир: «Анам һеч вахт атама табе олмурду. Мүбаһисәләр вә сајмамазлыг евимиздә ади һал иди. Тәзә аилә гуранда мән дә анам кими давранырдым. Илләр өтдүкҹә, Мүгәддәс Китабын һөрмәт ҝөстәрмәк мәсләһәтини тәтбиг етмәјин нә дәрәҹәдә фајдалы олдуғуну өјрәндим. Инди Маркла мән чох хошбәхтик».

6

ШИКАЈӘТ:

«Һәјат јолдашымын вәрдишләринә дөзә билмирәм».

МҮГӘДДӘС КИТАБЫН МӘСЛӘҺӘТИ:

«Бир-биринизә гаршы һәмишә сәбирли олун, биринизин диҝәриндән шикајәти оларса, бир-биринизи үрәкдән бағышлајын» (КОЛОСЛУЛАРА 3:13).

Сиз ҝәләҹәк һәјат јолдашынызла илк ҝөрүшдүјүнүз вахтлар онун јалныз јахшы хүсусијјәтләрини ҝөрүр, чатышмајан ҹәһәтләрини исә, демәк олар ки, һеч ҝөрмүрдүнүз. Инди дә елә даврана билмәзсиниз? Әлбәттә, сизин һәјат јолдашыныздан шикајәтләнмәјә әсасыныз ола биләр. Анҹаг јенә дә өзүнүздән сорушун: «Онун һансы хүсусијјәтләринә диггәт јетирсәм јахшыдыр: мәнфи, јохса мүсбәт?»

Иса башгаларынын чатышмајан хүсусијјәтләрини нәјә ҝөрә бағышламалы олдуғумузу ајдын нүмунә әсасында ҝөстәрмишди. «Нијә гардашынын ҝөзүндәки чөпә бахырсан, амма өз ҝөзүндәки тири ҝөрмүрсән?» — дејә сорушмушду (Матта 7:3). Сөзсүз ки, балаҹа чөп бөјүк тирлә һеч мүгајисәјә белә ҝәлмәз. Иса бунунла нә демәк истәјирди? «Сән әввәл өз ҝөзүндәки тири чыхарт, сонра гардашынын ҝөзүндәки чөпү неҹә чыхартмағы ајдын ҝөрәрсән» (Матта 7:5).

Иса пејғәмбәр бу нүмунәдән габаг ајылдыҹы хәбәрдарлыг вермишди: «Бәсдирин инсанлары мүһакимә етдиниз, јохса өзүнүз дә мүһакимә олунаҹагсыныз. Чүнки һансы һөкмлә мүһакимә едирсинизсә, о һөкмлә дә мүһакимә олунаҹагсыныз» (Матта 7:1, 2). Әҝәр Аллаһ сизин сәһвләринизә — ҝөзүнүздәки тирә фикир вермәсини истәмирсинизсә, онда сиз дә һәјат јолдашынызын нөгсанларыны бағышламалы дејилсинизми? (Матта 6:14, 15).

Бәзиләри бу мәсләһәти неҹә тәтбиг етмишләр? Инҝилтәрәдә јашајан Ҹенни вә Сајмон артыг доггуз илдир ки, евлидир. Ҹенни данышыр: «Фикир вермишәм ки, әримин мәни ән чох әсәбиләшдирән хасијјәти онун һеч нәји габагҹадан планлашдырмамасы вә һәр шеји сон ана сахламасыдыр. Ән ҝүлмәлиси дә одур ки, биз тәзә-тәзә ҝөрүшәндә онун бу ҹүр сүрпризләрлә долу инсан олмасы мәним чох хошума ҝәлирди. Анҹаг баша дүшүрәм ки, мәним дә чатышмајан ҹәһәтләрим вар, мәсәлән, мән һәр шеји нәзарәт алтында сахламағы хошлајырам. Буна ҝөрә дә, Сајмонла мән бир-биримизин ән хырда гүсурларына ҝөз јуммағы өјрәнирик».

Јухарыда ады чәкилән Мишелин һәјат јолдашы Көрт белә дејир: «Инсан диггәтини һәјат јолдашынын ону гыҹыгландыран ҹәһәтинә ҹәмләјәндә һәмин сәһвләр ҝет-ҝедә онун ҝөзүндә бөјүјүб даға дөнүр. Мән исә диггәтими Мишелин илк дәфә ону мәнә севдирән хүсусијјәтинә ҹәмләмәјә үстүнлүк верирәм».

Хошбәхтлијин сирри

Бу нүмунәләрдән ҝөрүнүр ки, никаһда чәтинликләрин олмасы гачылмаздыр, анҹаг дәфедилмәз дејил. Бәс хошбәхтлијин сирри нәдәдир? Үрәјиниздә Аллаһа мәһәббәт инкишаф етдирин вә Онун Кәламы олан Мүгәддәс Китабдакы мәсләһәтләрә ҹанла-башла әмәл един.

Ниҝеријада јашајан Алекс вә Итоһам 20 илдән артыгдыр ки, аилә гурублар вә онлар артыг хошбәхтлијин сирринә јијәләнибләр. Алекс дејир: «Бир шејә әмин олмушам ки, әҝәр әрлә арвад Мүгәддәс Китаб принсипләрини там тәтбиг едирләрсә, аиләдә јаранан һәр бир чәтинлијин өһдәсиндән ҝәлмәк мүмкүндүр». Онун һәјат јолдашы исә дејир: «Биз мүнтәзәм олараг бирликдә дуа етмәјин вә Мүгәддәс Китабын мәсләһәтләрини тәтбиг едәрәк бир-биримизә сәмими мәһәббәт вә сәбир ҝөстәрмәјин нә гәдәр ваҹиб олдуғуну анладыг. Индики проблемләримиз әввәлкиләрин јанында һеч нәдир».

Сиз Аллаһын Кәламындакы мәсләһәтләрин аиләнизә неҹә фајда ҝәтирәҹәји һагда даһа чох өјрәнмәк истәјәрдинизми? Онда Јеһованын Шаһидләриндән хаһиш етсәниз, онлар сизинлә «Мүгәддәс Китаб әслиндә нә өјрәдир?» китабынын 14-ҹү фәслини мүзакирә едә биләрләрb.

[Һашијәләр]

[4-ҹү сәһифәдәки шәкил]

Бир-биримизә вахт ајырырыгмы?

[5-ҹи сәһифәдәки шәкил]

Алмагдан чох вермәјә ҹан атыраммы?

[6-ҹы сәһифәдәки шәкил]

Фикир ајрылығыны һәлл етмәк үчүн биринҹи аддымы мәнми атырам?

[7-ҹи сәһифәдәки шәкил]

Гәрар гәбул етмәздән өнҹә арвадымын фикрини нәзәрә алыраммы?

[9-ҹу сәһифәдәки шәкил]

Һәјат јолдашымын јахшы хүсусијјәтләрини ҝөрмәјә чалышыраммы?