Мүгәддәс Китаб һәјатлары дәјишир

СӨЈҮШ сөјән, ички вә наркотик дүшҝүнү олан, барда офисиант ишләјән гадын һәјат тәрзини неҹә дәјишди? Неҹә олду ки, динә нифрәт едән кечмиш сијасәтчи Аллаһа ибадәт етмәјә башлады? Русијадан олан вә әлбәјаха дөјүш үзрә инструктор ишләјән бир нәфәр Јеһованын Шаһиди олмаг үчүн һансы чәтинликләрин өһдәсиндән ҝәлмәли олуб? Ҝәлин ҝөрәк, онларын өзләри бу барәдә нә данышыр.

«Инди анамла ҝөзәл мүнасибәтләримиз вар» (НАТАЛИ ҺАМ).

АНАДАН ОЛДУҒУ ИЛ: 1965

ӨЛКӘ: АВСТРАЛИЈА

КЕЧМИШДӘ: НАРКОТИК ГӘБУЛ ЕДИРДИ

АВТОБИОГРАФИЈА. Мән Австралијанын ҹәнубунда јерләшән вә әсас мәшғулијјәти балыгчылыг олан кичик Роб шәһәриндә бөјүмүшәм. Адәтән, белә шәһәрләрдә јерли ҹамаатын бош вахтларыны кечирдији меһманханалар олур. Валидејнләр ушаглары илә бирҝә вахтларынын чохуну бу јердә кечирирләр. Буна ҝөрә дә онларын ушаглары сәрхош, сөјүш сөјән вә сигарет чәкән инсанларын әһатәсиндә бөјүјүр.

12 јашым оланда артыг сигарет чәкир, сөјүш сөјүр вә анамла јола ҝетмирдим. 15 јашым оланда валидејнләрим ајрылдылар, ил јарымдан сонра исә мән евдән чыхыб ҝетдим. Чох ичир, наркотик гәбул едир вә әхлагсыз һәјат тәрзи сүрүрдүм. Һамыја гаршы аҹыглы идим вә өзүмү чарәсиз һисс едирдим. Лакин беш ил әлбәјаха дөјүш мәшгләринә вә гадынлар үчүн өзүнүмүдафиә курсларына ҝетдијимдән фикирләширдим ки, мәнә һеч ким дәјиб-долаша билмәз. Анҹаг сакит вахтларымда отуруб фикирләшәндә мәјуслуға гапылырдым вә Аллаһдан көмәк диләјирдим. Амма дејирдим: «Бирҹә мәндән килсәјә ҝетмәјими истәмә».

Мүәјјән вахтдан сонра һеч бир килсәјә ҝетмәјән, анҹаг Аллаһа инанан бир достум мәнә Мүгәддәс Китаб верди. Диҝәр достларым кими, о да нәшә чәкирди. Бунунла белә, о, Аллаһа инандығыны дејирди, һәтта мәни вәфтиз олунмаға инандырды. Биз јахынлыгдакы ҝөлә ҝетдик вә о, мәни орада вәфтиз етди. Бундан сонра фикирләширдим ки, мәним Аллаһла хүсуси мүнасибәтләрим вар, һалбуки Мүгәддәс Китабы охумаға һеч вахт маҹал тапмырдым.

МҮГӘДДӘС КИТАБ ҺӘЈАТЫМЫ ДӘЈИШДИ. 1988-ҹи илдә ики Јеһованын Шаһиди гапымы дөјдү. Онлардан бири: «Аллаһын адыны билирсинизми?» — дејә сорушду. О, мәнә Мүгәддәс Китабдан Мәзмур 83:18 ајәсини охуду: «Инсанлар билсинләр ки, ады Јеһова олан Сән, бүтүн јер үзәриндә јалныз Сән Уҹасан» (Китабы Мукаддес). Мәни һејрәт бүрүдү! Онлар ҝедән кими, 56 километр аралыда јерләшән дини китаблар сатылан мағазаја ҝедиб Мүгәддәс Китабын диҝәр тәрҹүмәләриндә вә лүғәтдә Аллаһын адынын олуб-олмадығыны јохладым. Аллаһын адынын Јеһова олдуғуна әмин олдугдан сонра фикирләшдим ки, ҝөрәсән, билмәдијим даһа нә вар.

Анам Јеһованын Шаһидләринин гәрибә инсанлар олдуғуну дејәрди. Ушаглыгдан мәндә белә бир фикир формалашмышды ки, онлар һәддән артыг дардүшүнҹәли вә әјләнмәји баҹармајан инсанлардыр. Гәрар вердим ки, онлар ҝәлән дәфә ҝәләндә гапыны ачмајым, ҝуја евдә јохам. Лакин онлар ҝәләндә фикрими дәјишдим, евә дәвәт етдим вә дәрһал Мүгәддәс Китабы өјрәнмәјә башладым.

Һәр дәфә өјрәндикләрими истәдијим оғлана, Крејгә данышырдым. О, данышдыгларымдан тәнҝә ҝәлиб, ахырда дәрс кечдијимиз китабы әлимдән чәкиб алды вә ону өзү охумаға башлады. Ҹәми үч һәфтәдән сонра Аллаһ һаггында һәгигәти тапдығына әмин олду. Биз наркотикдән истифадәјә вә сәрхошлуға сон гојдуг, еләҹә дә мән бардакы офисиант ишими атдым. Һәјатымызы Аллаһын нормаларына ујғунлашдырмаг үчүн Крејглә никаһа дахил олмаг гәрарына ҝәлдик.

МӘНӘ ФАЈДАСЫ. Јеһованын Шаһидләри илә Мүгәддәс Китабы өјрәнмәјә башлајанда Крејглә биз ајрылмаг үзрәјдик. Инди исә Крејг ҝөзәл һәјат јолдашыдыр вә бизим ҝөзәл-ҝөјчәк ики өвладымыз, һәмчинин иманымыза шәрик олан јахшы достларымыз вар.

Јеһованын Шаһидләри илә үнсијјәт етдијими биләндә анамын әввәлҹә аҹығы тутду. Лакин онун бу нараһатчылығы јанлыш тәсәввүрләрә әсасланырды. Инди анамла ҝөзәл мүнасибәтләримиз вар. Артыг дахилимдә әввәлки кими бошлуг һисс етмирәм. Әксинә, һәјатымын мәнасыны тапмышам вә өзүмү Аллаһа јахын һисс едирәм (Матта 5:3).

«Мүгәддәс Китабдан чохлу мараглы шејләр өјрәндим» (ИСАКАЛА ПАЕНИУ).

АНАДАН ОЛДУҒУ ИЛ: 1939

ӨЛКӘ: ТУВАЛУ

КЕЧМИШДӘ: СИЈАСӘТЧИ

АВТОБИОГРАФИЈА. Мән инди Тувалуја аид олан Сакит океанын ҝөзәл Нукулаелае адасында доғулмушам. Бу адада һәр шеј Самоадакы коллеҹдә дини тәһсил алмыш кешишләрин әлиндә иди. Буранын сакинләри кешишләри вә онларын аиләләрини ҝүндәлик гида вә евлә тәмин етмәли, өзү дә һәр шејин јахшысыны вермәли идиләр. Һәтта инсанын өз аиләсини доландырмагда чәтинлик чәкмәсинә бахмајараг, о, јенә дә кешишләри тәмин етмәк мәҹбуријјәтиндә иди.

Јашадығым адада кешиш кәнд мәктәбиндә дин, ријазијјат вә һәрдән ҹоғрафија фәнләриндән дәрс дејирди. Јадымдадыр, кешиш шаҝирдләри ал-гана бәләнәнә кими дөјүрдү. Һеч ким, һәтта валидејнләр белә кешишә сөз демәјә ҹүрәт етмирдиләр. Она елә јанашырдылар, санки, ҝөјдә Аллаһ, јердә кешишдир.

Он јашым оланда еви тәрк едиб башга адада јерләшән јеҝанә дөвләт мәктәбиндә охумаға ҝетдим. Тәһсилими битирдикдән сонра дөвләт ишинә дүзәлдим. Һәмин вахтлар бу адалар Британијанын мүстәмләкәсиндә олан Ҝилберт вә Еллис адалары кими танынырды. Мүхтәлиф идарәләрдә ишләдикдән сонра һәфтәлик дөвләт гәзетләринин бириндә редактор ишләмәјә башладым. Бир охуҹунун мәктубуну дәрҹ едәнә кими һәр шеј гајдасында ҝедирди. Һәмин охуҹу өз мәктубунда Уелс шаһзадәсинин ҝәлишилә әлагәдар һазырлыг ишләринә нә гәдәр пул сәрф олундуғуну тәнгид едирди. Охуҹу мәктубунда әсил адыны ҝөстәрмәмишди вә рәһбәрлик онун адынын ачыгланмасыны тәләб едирди. Лакин мән имтина етдим. Буна ҝөрә арамызда бөјүк сәс-күјә сәбәб олан мүбаһисә дүшдү.

Бу хошаҝәлмәз һадисәдән сонра ишдән чыхыб сијасәтә ҝиришдим. Нукулаелае адасында кечирилән сечкиләрдә галиб ҝәлиб Тиҹарәт вә Тәбии Сәрвәтләр назири тәјин олундум. Сонралар Кирибати (кечмиш Ҝилберт) вә Тувалу (кечмиш Еллис) адалары Британијадан мүстәгиллик әлдә едәндә ҝенерал-губернатор мәнә Тувалу администрасијасынын рәһбәри постуну тәклиф етди. Лакин мән мүстәмләкә һөкумәти илә һеч бир әлагәмин олмасыны истәмирдим. Буна ҝөрә дә тәклифдән имтина етдим вә һеч кимин дәстәји олмадан бу сечкиләрдә өз намизәдлијими ирәли сүрдүм. Лакин удуздум. Бундан сонра јолдашымла доғма кәндимизә гајыдыб орада садә һәјат сүрмәк гәрарына ҝәлдик.

МҮГӘДДӘС КИТАБ ҺӘЈАТЫМЫ ДӘЈИШДИ. Адаларда һәфтәнин базар ҝүнү динҹлик ҝүнү һесаб олунур вә һамы тәрәфиндән мүгәддәс тутулурду, — тәкҹә мәндән башга. Гәсдән һәмин ҝүн дәнизә чыхыб балыг тутурдум. Истәмирдим ки, мәни диндар инсан кими танысынлар. Атам дејирди ки, мәним һәрәкәтләрим она вә башгаларына пис тәсир бағышлајыр. Лакин килсәнин һәјатыма тәсир етмәсинә јол вермәмәкдә гәти гәрарлы идим.

Бир дәфә Тувалунун пајтахтынын јерләшдији Фунафути адасында оланда кичик гардашым мәни Јеһованын Шаһидләринин јығынҹағына дәвәт етди. Сонра онлардан бири мәнә хејли «Ҝөзәтчи Гүлләси» вә «Ојанын!» журналы верди, һәмчинин килсәләрин тәлимләринин көкүнү ифша едән бир китаб бағышлады. Бу китабы бир нечә дәфә охудум. Мүгәддәс Китабдан чохлу мараглы шејләр өјрәндим. Мәсәлән, өјрәндим ки, Аллаһ шәнбә ҝүнүнә риајәт етмәји тәләб етмирa. Бунлары арвадыма да данышдым, о, бундан сонра бир дә килсәјә ҝетмәди.

Амма мән өзүмә сөз вермишдим ки, һеч вахт динлә мәшғул олмајаҹағам. Ики ил кечмәсинә бахмајараг, һәлә дә охудугларымы унуда билмирдим. Әввәл-ахыр Фунафутидә јашајан һәмин адама мәктуб јазыб, өзүмдә дәјишикликләр етмәјә һазыр олдуғуму билдирдим. Мүгәддәс Китабы өјрәнмәјә мәнә көмәк етмәк үчүн о, елә илк ҝәмијә миниб јаныма ҝәлди. Јеһованын Шаһиди олмаг истәдијими биләндә атам бәрк гәзәбләнди. Анҹаг атама дедим ки, Јеһованын Шаһидләринин көмәјилә Мүгәддәс Китабдан кифајәт гәдәр билик алдығым үчүн гәрарымда гәтијәм.

МӘНӘ ФАЈДАСЫ. 1986-ҹы илдә мән, бир ил сонра исә һәјат јолдашым вәфтиз олуб Јеһованын Шаһиди олдуг. Ики гызымыз да Мүгәддәс Китабы өјрәниб бизә гошулдулар.

Неҹә дә хошбәхтәм ки, Иса Мәсиһин биринҹи әсрдәки давамчылары кими, һеч бир дини тәбәгәјә бөлүнмәјән инсанларла бәрабәр Аллаһа хидмәт едирәм (Матта 23:8—12). Онлар һәмчинин Иса Мәсиһ кими тәвазөкарлыгла Аллаһын Падшаһлығы, јәни Онун гурдуғу сәмави һөкумәти барәдә хош хәбәри бүтүн инсанлара чатдырырлар (Матта 4:17). Неҹә дә Аллаһа миннәтдарам ки, Өзү вә халгы һаггында һәгигәти өјрәнмәјә мәнә бу гәдәр имкан верди!

«Јеһованын Шаһидләри мәнә ағыл вермәјә чалышмырдылар» (АЛЕКСАНДР СОСКОВ).

АНАДАН ОЛДУҒУ ИЛ: 1971

ӨЛКӘ: РУСИЈА

КЕЧМИШДӘ: ӘЛБӘЈАХА ДӨЈҮШ ҮЗРӘ ИНСТРУКТОР

АВТОБИОГРАФИЈА. Мән әввәлләр Совет Иттифагынын пајтахты олан Москвада анадан олмушам. Аиләмиз чохмәртәбәли бинада јашајырды вә гоншуларымызын әксәријјәти бир заводда ишләјирди. Јадымдадыр, онлар мәним һәддән артыг надинҹ ушаг олдуғумдан шикајәтләнирдиләр вә фикирләширдиләр ки, мәни ја бир ҝүн вуруб өлдүрәҹәкләр, ја да өмрүмүн ахырына кими һәбсханада чүрүјәҹәјәм. Артыг он јашым оланда милис бөлмәсиндә гејдијјата алынмышдым.

18 јашымда мән һәрби хидмәтә чағырылараг сәрһәд гошунларына ҝөндәрилдим. Ики илдән сонра евә гајытдым вә заводда ишә дүзәлдим. Лакин бу иш мәним үчүн бездириҹи иди. Буна ҝөрә дә бу ишдән чыхыб Москва ОМОН-нунда (хүсуси тәјинатлы милис дәстәси) әлбәјаха дөјүш үзрә инструктор ишинә дүзәлдим. Силаһлы гулдурлара гаршы әмәлијјатларда иштирак едирдим вә өлкәнин мүхтәлиф гајнар нөгтәләринә ҝетмәли олурдум. Дахилимдә бөјүк бир ҝәрҝинлик кечирирдим. Һәтта јатанда һәјат јолдашыма хәтәр јетирмәмәк үчүн бәзән ајры јатмалы олурдум.

МҮГӘДДӘС КИТАБ ҺӘЈАТЫМЫ ДӘЈИШДИ. Јеһованын Шаһидләри илә Мүгәддәс Китабы өјрәнәндә ҝөрдүм ки, мәним ишим Аллаһын Кәламында дејиләнләрә зидд ҝедир. Еләҹә дә сигарети атмалы вә спиртли ичкиләрдән суи-истифадә етмәмәли олдуғуму да баша дүшдүм. Лакин мәнә елә ҝәлирди ки, ишими дәјишә билмәрәм, чүнки аиләни доландырмаг үчүн әлимдән башга иш ҝәлмирди. Һәмчинин Јеһованын Шаһидләри кими тәблиғ едә билмәјәҹәјими фикирләширдим.

Әввәл-ахыр әмин олдум ки, Мүгәддәс Китабда јазыланлар һәгигәтдир. Језекел 18:21, 22 ајәләриндән өзүмә тәсәлли тапырдым. Орада белә сөзләр вар: «Пис адам етдији бүтүн ҝүнаһлардан дөнәрсә,.. етдији ҝүнаһлардан һеч бири онун ајағына јазылмајаҹаг».

Бир шејдән хошум ҝәлирди — Јеһованын Шаһидләри мәнә ағыл вермәјә чалышмырдылар, әксинә, мәни охудугларым үзәриндә мүлаһизә јүрүтмәјә тәшвиг едирдиләр. Онлардан тәхминән 40 дәнә журнал ҝөтүрүб үч һәфтәјә охудум. Орадан өјрәндикләримдән һәгигәт јолуну тапдығыма әмин олдум.

МӘНӘ ФАЈДАСЫ. Мүгәддәс Китабы өјрәнмәздән габаг һәјат јолдашымла бошанмаг үзрә идик. Лакин инди ҝөзәл мүнасибәтләримиз вар. Биз бирликдә Мүгәддәс Китабы өјрәнмәјә вә бирҝә Јеһоваја хидмәт етмәјә башладыг. Индики аилә һәјатым мәнә хошбәхтлик ҝәтирир. Һәмчинин өзүмә Аллаһын Кәламына зидд ҝетмәјән бир иш тапа билдим.

Биринҹи дәфә евдән-евә тәблиғә ҝедәндә бир вахтлар дөјүш әмәлијјатларында кечирдијим ҝәрҝинлик һиссини кечирирдим. Инди әминәм ки, һәтта мәни өзүмдән чыхартмаға чалышсалар да, әсәбләрими ҹиловлаја биләрәм. Вахт кечдикҹә инсанларла мүнасибәтдә даһа тәмкинли олмағы баҹардым. Өмрүмүн чох һиссәсини бош шејләрә сәрф етдијимә һејфсиләнирәм. Лакин инди һәјатымда мәна вар. Бөјүк севинҹлә ҝүҹүмү Јеһова Аллаһа хидмәтә вә башгаларына көмәк етмәјә сәрф едирәм.

[Һашијә]