Сон јахындыр — Јеһоваја ҝүвән!

«Рәббә һәмишә ҝүвәнин» (ЈЕШАЈА 26:4).

1. Аллаһын хидмәтчиләри илә бу дүнјанын инсанлары арасында һансы фәрг вар?

ЈАШАДЫҒЫМЫЗ дүнјада милјонларла инсанлар артыг билмирләр кимә вә ја нәјә ҝүвәнсинләр, чүнки дәфәләрлә гәлбләри гырылыб вә ја мәјус олублар. Лакин Јеһованын хидмәтчиләри һагда буну демәк олмаз! Аллаһын мүдриклијини әлдә рәһбәр тутан инсанлар кимә ҝүвәнмәли олдугларыны јахшы билирләр, буна ҝөрә дә бу дүнјаја вә онун ‘әсилзадәләринә’ бел бағламырлар (Мәз. 146:3). Онлар һәјатларыны вә ҝәләҹәкләрини Јеһоваја етибар едирләр, чүнки Јеһованын онлары севдијини вә вәдләрини һәмишә јеринә јетирдијини билирләр (Ром. 3:4; 8:38, 39).

2. Јешуа Аллаһын етибара лајиг олдуғуну неҹә тәсдигләди?

² Гәдимдә јашајан Јешуа Аллаһын етибара лајиг олдуғуну тәсдигләмишди. Өмрүнүн сонуна аз галмыш о, сојдашларына демишди: «Бүтүн гәлбинизлә вә варлығынызла билирсиниз ки, Аллаһыныз Рәббин һаггынызда дедији бүтүн јахшы шејләрдән һеч бири боша чыхмады. Һамысы сизин үчүн јеринә јетди» (Јешуа 23:14).

3. Аллаһын ады Онун барәсиндә нәји ачыглајыр?

³ Јеһова вәдләрини јалныз хидмәтчиләрини севдији үчүн јох, әсас етибарилә, Өз ады наминә һәјата кечирир (Чых. 3:14; 1 Шам. 12:22). Аллаһын ады барәдә Ҹозеф Ротерһамын тәрҹүмә етдији Мүгәддәс Китабын ҝиришиндә гејд олунур: «[Бу] ән лүтфкар вәддир вә ҝөстәрир ки, Аллаһ һәр вәзијјәтә, һәр чәтинлијә, һәр еһтијаҹа ујғунлашмаға гадирдир... [Бу], вәд,.. вәһј, јаддашлыг вә анддыр. Аллаһ Өз Адына һәмишә садиг галаҹаг; ондан һеч вахт утанмајаҹаг» («The Emphasized Bible»).

4. а) Јешаја 26:4 ајәси бизи нәјә сәсләјир? б) Бу мәгаләдә биз нә мүзакирә едәҹәјик?

⁴ Өзүндән соруш: «Аллаһы нә дәрәҹәдә јахшы таныјырам? Бу, Она етибар етмәјим үчүн кифајәтдирми? Һәр шејин Аллаһын нәзарәти алтында олдуғуну биләрәк ҝәләҹәјә әминликлә бахыраммы?» Јешаја 26:4 ајәсиндә јазылыб: «Рәббә һәмишә ҝүвәнин, чүнки Рәбб Аллаһ әбәди Гајадыр». Мүгәддәс Китабын јазылдығы дөврдә Јеһова бәзән инсанларын һәјатларына мөҹүзәви шәкилдә мүдахилә етсә дә, бу ҝүн буну етмир. Бунунла белә, Аллаһымыз ‘әбәди Гаја’ олараг галыр вә биз Она ‘һәмишә ҝүвәнә’ биләрик. Етибарымыза лајиг олан Аллаһымыз садиг хидмәтчиләринә бу ҝүн неҹә көмәк едир? Биринҹиси, ширникдириҹи тәсирләрә мүгавимәт ҝөстәрмәк үчүн Аллаһдан көмәк истәјәндә О, бизи мөһкәмләндирир; икинҹиси, хидмәтдә лагејд вә әдавәтли мүнасибәтлә үзләшәндә бизә дајаг олур; үчүнҹүсү, нараһатчылыглар бизи сыханда бизә ҝүҹ-гүввәт верир. Бунлары бир-бир мүзакирә етдикҹә Јеһоваја олан етибарыны неҹә мөһкәмләндирә биләҹәјинин үзәриндә дүшүн.

Үрәјимиз Јеһованын ганунларыны позмаға тәһрик едәндә

5. Һансы мәсәләдә Јеһоваја ҝүвәнмәк хүсусилә чәтин ола биләр?

⁵ Јеһованын әхлаг нормаларына вә принсипләринә риајәт етмәјин дүзҝүн олдуғуна вә әсил хошбәхтлик ҝәтирдијинә үрәкдән инанмаг һәсрәтлә ҝөзләдијимиз Ҹәннәтә вә дирилмәјә инанмагдан даһа чәтин ола биләр. Сүлејман падшаһ нәсиһәт едирди: «Бүтүн гәлбинлә Рәббә ҝүвән, өз идракына етибар етмә. Бүтүн јолларында Ону таны, О сәнин јолларыны дүзәлдәр» (Сүл. мәс. 3:5, 6). Диггәт јетирдинсә, бурада сөһбәт бизим ‘јолларымыздан’ ҝедир. Бәли, Јеһоваја етибар етдијимиз тәкҹә Онун вәдләринә инанмағымыздан јох, бүтүн һәјат тәрзимиздән ҝөрүнмәлидир. Сынаглар заманы Јеһоваја ҝүвәндијимизи неҹә ҝөстәрә биләрик?

6. Пис фикирләри говмаг гәтијјәтини неҹә мөһкәмләндирә биләрсән?

⁶ Пис әмәлдән јаха гуртармаг истәјириксә, илк нөвбәдә, бејнимизи белә фикирләрдән тәмизләмәлијик. (Ромалылара 8:5; Ефеслиләрә 2:3 ајәләрини оху.) Бәс онда пис фикирләри говмаг гәтијјәтини неҹә мөһкәмләндирә биләрсән? Беш үсулу нәзәрдән кечирәк. 1) Дуа васитәсилә Аллаһдан көмәк дилә (Мат. 6:9, 13). 2) Аллаһын әмрләринә риајәт едән, һәм дә риајәт етмәјән Мүгәддәс Китаб персонажларынын нүмунәләри үзәриндә дүшүн. Давранышларынын онлар үчүн нә илә нәтиҹәләндијинә диггәт јетирa (1 Кор. 10:8—11). 3) Ҝүнаһ ишләтсән, бунун сәнә вә јахынларына һансы мәнәви вә ја емосионал зәрбә вураҹағыны фикирләш. 4) Хидмәтчиси ҹидди ҝүнаһа јол верәндә Јеһованын һансы һиссләри кечирдијини дүшүн. (Мәзмур 78:40, 41 ајәләрини оху.) 5) Јеһованын садиг хидмәтчиси истәр ҹамаат гаршысында, истәрсә дә тәкликдә оланда пислији рәдд едиб дүзҝүн оланы едәндә Онун үрәјинин севинҹлә неҹә долдуғуну тәсәввүр ет (Мәз. 15:1, 2; Сүл. мәс. 27:11). Сән дә Јеһоваја ҝүвәндијини ҝөстәрә биләрсән.

Лагејдлик вә ја әдавәтлә үзләшәндә

7. Јеремја һансы сынагларла үзләширди вә һәрдән о, өзүнү неҹә һисс едирди?

⁷ Бир чох баҹы-гардашларымыз тәблиғ ишинин чәтин олдуғу әразиләрдә хидмәт едирләр. Онлара, һәгигәтән дә, тәһәммүл ҝәрәкдир. Јеремја пејғәмбәр мәһз белә бир әразидә — кешмәкешли сон ҝүнләрини јашајан Јәһуда падшаһлығында хидмәт едирди. Јеһованын һөкм хәбәрини итаәткарлыгла бәјан етдији үчүн онун Аллаһа олан етибары һәр ҝүн сынаға чәкилирди. Һәтта бир дәфә Јеремјанын садиг мирзәси Барук артыг тәнҝә ҝәлдијини сөјләмишди (Јер. 45:2, 3). Бәс Јеремја руһ дүшкүнлүјүнә гапылырды? Бәли, бир дәфә бу, онунла баш вермишди. «Доғулдуғум ҝүн ләнәтә ҝәлсин!.. Нә үчүн ана бәтниндән чыхдым? Әзаб-әзијјәт ҝөрмәк, өмрүмү рүсвајчылыгла кечирмәк үчүнмү?» — дејә о нида етмишди (Јер. 20:14, 15, 18).

8, 9. Јеремја 17:7, 8 вә Мәзмур 1:1—3 ајәләринә әсасән, һәмишә бәһрәли олмаг үчүн биз нә етмәлијик?

⁸ Лакин бүтүн бунлара бахмајараг, Јеремја тәслим олмады. Онун Јеһоваја олан етибары сарсылмады. Нәтиҹәдә, Јеремја 17:7, 8 ајәләриндә јазылан Јеһованын сөзләри бу садиг пејғәмбәрин үзәриндә јеринә јетди: «Нә хошбәхтдир о адам ки Рәббә ҝүвәнир, Рәбби өзүнә арха сајыр. О, сулар кәнарында әкилмиш ағаҹ кими олаҹаг. Елә ағаҹ ки чај кәнарында көк салар, исти ҝәләндә горхмаз, јарпағы һәмишә јашыл галар, гураглыг олан ил гајғы чәкмәз, бәһәр вермәкдән галмаз».

⁹ «Чај кәнарында» вә ја суварылан мејвә бағында әкилән јашыл вә шахәли ағаҹ кими, Јеремја һеч вахт ‘бәһәр вермәкдән галмырды’. О, әтрафындакы ришхәндчиләрин тәсири алтына дүшмәк истәмирди. Әксинә, һәјатвериҹи ‘су’ Мәнбәји олан Јеһоваја јахын дурур вә Онун һәр сөзүнә ҹидди јанашырды. (Мәзмур 1:1—3 ајәләрини оху; Јер. 20:9.) Јеремја бизә, хүсусилә дә тәблиғин чәтин ҝетдији әразиләрдә хидмәт едән баҹы-гардашлара неҹә дә ҝөзәл нүмунә гојуб! Әҝәр сән дә белә әразидә хидмәт едирсәнсә, бүтүн гәлбинлә Јеһоваја ҝүвәнмәјә давам ет. Онда Аллаһ сәнә тәһәммүл верәҹәк ки, «Онун адыны уҹалдан мәдһ гурбаны» ҝәтирәсән (Ибр. 13:15).

10. Биз Аллаһдан һансы хејир-дуалары алмышыг вә өзүмүзә һансы суалы вермәлијик?

¹⁰ Јашадығымыз сон ҝүнләрин чәтинликләринин өһдәсиндән ҝәлмәк үчүн Јеһова бизә лазым олан һәр шеј тәгдим едиб. Мәсәлән, бизә вердији руһани әнамлардан бири һал-һазырда даһа чох дилә дәгиг тәрҹүмә олунан там Мүгәддәс Китабдыр. Һәмчинин О, садиг вә ағыллы нөкәр васитәсилә һамымызы вахтлы-вахтында бол руһани гида илә тәмин едир. Үстәлик, биз јығынҹагларда вә конгресләрдә ҝөрүшдүјүмүз чохлу баҹы-гардашларын дәстәјинә маликик. Бәс сән Јеһованын тәгдим етдији бүтүн әнамлардан там јарарланырсанмы? Бу суала мүсбәт ҹаваб верәнләрин һамысы «шадланыб мәдһијјәләр сөјләјәҹәк». Аллаһын сөзүнү гулагардына вуранлар исә ‘үрәк ағрысындан гышгыраҹаг, кәдәрли руһла фәрјад едәҹәкләр’ (Јешаја 65:13, 14).

Нараһатчылыглар бизи боғанда

11, 12. Дүнјада мөвҹуд олан проблемләри нәзәрә алсаг, ән мүдрик јол һансы јолдур?

¹¹ Габагҹадан дејилдији кими, бу дүнја проблемләрин ичиндә боғулур, елә бил, дашгын суларынын алтында галыб (Мат. 24:6—8; Вәһј 12:12). Адәтән, чај мәҹрасындан чыхыб дашанда инсанлар јүксәк јерләрә гачыр вә ја евин дамына чыхырлар — әсас одур ки, ора һүндүр јер олсун. Буна бәнзәр тәрздә, дүнјанын проблемләри артдыгҹа, инсанлар зирвә кими ҝөрүнән игтисадијјатда, сијасәтдә, диндә, еләҹә дә елм вә технолоҝијада пәнаһ ахтарырлар. Лакин онларын һеч бирини әсил сығынаҹаг адландырмаг олмаз (Јер. 17:5, 6). Јеһованын хидмәтчиләри исә ән етибарлы сығынаҹаға — ‘әбәди Гаја’ олан Јеһоваја үз тутублар (Јешаја 26:4). Мәзмурчу дејирди: «[Јеһова] мөһкәм гајам вә пәнаһымдыр». (Мәзмур 62:6—9 ајәләрини оху.) Гајајабәнзәр Јеһова бизим дә сығынаҹағымыз олсун дејә нә етмәлијик?

¹² Бунун үчүн биз чох вахт инсан мүдриклији илә үст-үстә дүшмәјән Аллаһын Кәламына риајәт етмәлијик (Мәз. 73:23, 24). Мәсәлән, инсан мүдриклијинә архалананлар белә дејирләр: «Әши, бешҝүнлүк дүнјадыр, је, ич, кеф елә!», «Өзүн үчүн карјера гур», «Чохлу пул газан», «Үрәјин нә истәјирсә ону ал», «Дүнјаны ҝәз-долан». Аллаһын мүдриклији исә мәсләһәт ҝөрүр ки, «бу дүнјадан бәһрәләнән, ондан там шәкилдә бәһрәләнмәјән кими олсун, чүнки бу дүнјанын сәһнәси дәјишир» (1 Кор. 7:31). Иса да өз давамчыларыны Падшаһлыг ишини һәјатларында һәмишә биринҹи јерә гојмаға сәсләјирди. Белә едәнләр өз хәзинәләрини ән тәһлүкәсиз јердә — «ҝөјдә» топлајырлар (Мат. 6:19, 20).

13. Јәһјанын биринҹи мәктубундакы сөзләри нәзәрә алараг, өзүмүзә һансы суаллары вермәлијик?

¹³ ‘Дүнјаја вә дүнјадакы шејләрә’ мүнасибәтин Јеһоваја там ҝүвәндијини ҝөстәрирми? (1 Јәһ. 2:15—17). Сәнин үчүн даһа ваҹиб вә дәјәрли олан нәдир: руһани сәрвәтләр вә Јеһоваја хидмәт, јохса бу дүнјанын тәклиф етдији шејләр? (Филип. 3:8). ‘Ҝөзүнү тох’ сахламаға чалышырсанмы? (Мат. 6:22). Әлбәттә, Аллаһ истәмир ки, Онун хидмәтчиләри, хүсусилә дә аиләли оланлар дүшүнҹәсиз даврансынлар вә ја мәсулијјәтсиз олсунлар (1 Тим. 5:8). Аллаһ истәјир ки, онлар сон ҝүнләрини јашајан Шејтан дүнјасына јох, тамамилә Она архалансынлар (Ибр. 13:5).

14-16. ‘Ҝөзләрини тох’ сахлајан вә илк нөвбәдә Падшаһлыг ишини дүшүнәнләрин бәзиләри һансы хејир-дуалары алмышлар?

¹⁴ Үч ушаг саһиби олан Ричардла Рутун нүмунәсинә нәзәр салаг. Ричард дејир: «Үрәјимдә һеј фикирләширдим ки, Јеһоваја даһа чох хидмәт едә биләрәм. Ҝүзәраным јахшы иди, амма һисс едирдим ки, Аллаһа јалныз вахтымын артыг галан һиссәсини верирәм. Өлкәмиздә игтисади бөһранын ән јүксәк һәддә чатдығы вахт олса да, Рутла гәрара ҝәлдик ки, ҝедиб мүдирлә данышым вә ондан мәнә һәфтәдә дөрд ҝүн ишләмәјә иҹазә вермәсини хаһиш едим. Амма бу гәрары вермәздән өнҹә биз отуруб Јеһоваја дуа етдик вә бунун бүдҹәмизә неҹә тәсир едәҹәјини ҝөтүр-гој етдик. Мүдир хаһишими гәбул етди вә бир ајын ичиндә мән јени ҹәдвәл үзрә ишләмәјә башладым». Гәрарына ҝөрә Ричард пешман олдуму?

¹⁵ О дејир: «Алдығым мәваҹиб 20 фаиз азалды, амма инди аиләмлә вахт кечирмәк вә ушагларыма тәлим-тәрбијә вермәк үчүн илдә әлавә 50 ҝүнүм вар. Бунун сајәсиндә хидмәтә сәрф етдијим вахт икигат, Мүгәддәс Китабы өјрәтдијим инсанларын сајы исә үчгат артды вә инди мән јығынҹагда даһа чох иш ҝөрә билирәм. Ушагларла мәшғул олмаг үчүн вахтым даһа чох олдуғундан Рут вахташыры көмәкчи пионер кими хидмәт едир. Мән баҹардығым гәдәр бу ҹәдвәл үзрә јашамаг нијјәтиндәјәм».

¹⁶ Таммүддәтли хидмәтчи олмаг үчүн даһа аз ишләмәк гәрарына ҝәлән Рој вә Петинанын нүмунәсинә нәзәр салаг. Онларын оғлу башга јердә, гызы исә балаҹа олдуғу үчүн онларла бирликдә галыр. Рој дејир: «Мән һәфтәнин үч, Петина исә ики ҝүнүнү ишләјир. Бундан әлавә, биз һәјәт евиндән бина евинә көчдүк ки, ев ишләри даһа аз вахт апарсын. Өвладларымыз дүнјаја ҝәлмәздән өнҹә дә биз пионер идик вә һеч вахт бу истәјимизи итирмәмишдик. Буна ҝөрә дә ушагларымыз бир аз бөјүјәндә биз таммүддәтли хидмәтимизи бәрпа етдик. Бунун ҝәтирдији хејир-дуалар вар-дөвләтлә мүгајисәјә ҝәлә билмәз».

«Аллаһын вердији гәлб раһатлығы» гој үрәјини горусун

17. Һәјатын гејри-сабит олдуғуну нәзәрә алсаг, Мүгәддәс Китаб сәнә неҹә тәсәлли верир?

¹⁷ Сабаһ башымыза нә ҝәләҹәјини һеч биримиз билмирик, чүнки ‘заман вә фүрсәт’ һәр кәсин габағына чыхыр (Ваиз 9:11). Амма Аллаһла сых мүнасибәтләри олмадығы үчүн өзләрини тәһлүкәсизликдә һисс етмәјән инсанлардан фәргли олараг, биз нараһат олмамалыјыг (Мат. 6:34). Һәвари Павел јазмышды: «Һеч нәјә ҝөрә нараһат олмајын. Һәр диләјинизи дуа, јалварыш вә шүкранла Аллаһа билдирин. Аллаһын вердији гәлб раһатлығы бүтүн инсан фикирләрини үстәләјир; о, үрәјинизи вә зеһнинизи... горујаҹаг» (Филип. 4:6, 7).

18, 19. Аллаһ бизә неҹә тәсәлли верир? Нүмунә чәк.

¹⁸ Бир чох һәмиманлыларымыз дара дүшәндә Јеһованын вердији гәлб раһатлығыны һисс едирләр. Бир баҹы дејир: «Ҹәрраһ мәнә дәфәләрлә һәдә-горху ҝәләрәк ганкөчүрмәјә разылыг вермәјимә наил олмаг истәјирди. Онун илк “саламы” белә иди: “Бу нә ҹәфәнҝијатдыр белә — ‘ган олмаз’?!” Һәмин анларда вә башга вахт үрәјимдә Јеһоваја дуа едирдим вә О, мәнә гәлб раһатлығы верирди. Өзүмү гаја кими мөһкәм һисс едирдим. Чохлу ган итирдијимә ҝөрә зәифләсәм дә, мөвгејими ајдын шәкилдә Мүгәддәс Китаб әсасында һәкимә изаһ етдим».

¹⁹ Бәзән Аллаһ бизә һансыса гајғыкеш баҹы вә ја гардаш, јахуд да вахтлы-вахтында вердији руһани гида васитәсилә көмәклик ҝөстәрир. Јәгин ки, сән дә баҹы-гардашлардан бу кими сөзләр ешитмисән: «Бу мәгалә неҹә дә јеринә дүшүб! Елә бил, мәним үчүн јазылыб!» Бәли, шәраитимиз вә тәләбатымыз һәр неҹә олса да, әҝәр биз Јеһоваја ҝүвәнириксә, О, Өз мәһәббәтини бизә сүбут едәҹәк. Ахы биз Онун ‘гојунлары’ вә адыны дашыјан халгыг (Мәз. 100:3; Јәһ. 10:16; Һәв. иш. 15:14, 17).

20. Нәјә ҝөрә Шејтанын дүнјасы јерлә јексан едиләндә Јеһованын хидмәтчиләри тәһлүкәсизликдә олаҹаглар?

²⁰ Инсанларын Шејтан дүнјасында ҝүвәндикләри һәр шеј сүрәтлә јахынлашан «Рәббин гәзәб ҝүнүндә» јерлә јексан едиләҹәк. Гызыл, ҝүмүш вә диҝәр гијмәтли әшјалар инсанлары гәтијјән хилас едә билмәјәҹәк (Сеф. 1:18; Сүл. мәс. 11:4). Јеҝанә етибарлы сығынаҹаг ‘әбәди Гајамыз’ олан Јеһова Аллаһ олаҹаг (Јешаја 26:4). Буна ҝөрә дә ҝәлин Аллаһын салеһлик јоллары илә итаәткарлыгла јеријәк, лагејд вә әдавәтли мүнасибәтә бахмајараг, Падшаһлыг һагда хош хәбәри тәблиғ едәк вә гајғы јүкүмүзү Аллаһын үзәринә гојаг. Бунунла да Она там ҝүвәндијимизи ҝөстәрәк. Әҝәр белә етсәк, онда биз, һәгигәтән дә, ‘әмин-аманлыгда јашајаҹағыг, раһатлыг тапаҹағыг, писликдән горхмајаҹағыг’ (Сүл. мәс. 1:33).

[Һашијә]

Изаһ едә биләрсинизми?

Аллаһа ҝүвәндијимизи

• үрәјимиз бизи пислик етмәјә тәһрик едәндә...

• лагејдлик вә әдавәтли мүнасибәтлә үзләшәндә...

• нараһатчылыглар бизи боғанда...

неҹә ҝөстәрә биләрик?

[13-ҹү сәһифәдәки шәкил]

Аллаһын нормаларына риајәт етмәк хошбәхтлик ҝәтирир

[15-ҹи сәһифәдәки шәкил]

«Рәбб Аллаһ әбәди Гајадыр»