Севинмәјиниз үчүн сәбәб
ХЫРДА ҹанлы һүҹејрәләрдән тутмуш нәһәнҝ галактикалар топлусунадәк Јеһованын јаратдығы һәр шејдә низам-интизам вар. Бу, тәәҹҹүблү дејил, чүнки Јараданымыз «низамсызлығы севмир» (1 Кор. 14:33). Јеһованын ибадәт үчүн тәсис етдији гурулуш да валеһедиҹидир. Ҝәлин Онун етдикләринә нәзәр салаг. Јеһова шүура вә ирадә азадлығына малик олан милјонларла физики вә руһани варлыглары бир тәшкилатда, тәмиз ибадәтдә бирләшдириб. Бу, һәгигәтән дә, һејрәтамиздир!
Гәдим Исраилдә Јеһованын тәшкилатынын јердәки һиссәсинин рәмзи Јерусәлим шәһәри иди. Орада Јеһованын мәбәди јерләширди вә Онун мәсһ етдији падшаһ јашајырды. Бабилә сүрҝүн едилән исраиллиләрдән бири мүгәддәс шәһәрә даир һиссләрини бу сөзләрлә ифадә етмишди: «Сәни анмасам, ән бөјүк севинҹим олмасан, гој дилим дамағыма јапышсын» (Мәз. 137:6).
Сиз дә Аллаһын тәшкилатына белә мүнасибәт бәсләјирсинизми? Сизә ән чох севинҹ ҝәтирән нәдир: Јеһованын үмумдүнја тәшкилаты илә бирҝә Она ибадәт етмәк, јохса башга бир шеј? Ушагларынызын Аллаһын тәшкилатынын јердәки һиссәсинин тарихи вә фәалијјәти барәдә анлајышы вармы? Онлар Јеһованын Шаһидләринин үмумдүнја гардашлығынын үзвү олдугларыны дәрк едир вә гијмәтләндирирләрми? (1 Пет. 2:17). Јеһованын тәшкилаты һаггында даһа чох өјрәнмәк вә ону гијмәтләндирмәк үчүн нәјә ҝөрә аиләви ибадәт заманы ашағыдакы тәклифләри тәтбиг етмәјәсиниз?
‘Гәдим заманлар’ һаггында данышын
Һәр ил исраиллиләр аиләләри илә бирликдә Пасха бајрамыны гејд едирдиләр. Бу бајрам тәсис олунанда Муса халга белә бир ҝөстәриш вермишди: «Ҝәләҹәкдә өвладларыныз сиздән “Бу нәдир?” сорушанда дејин: “Рәбб бизи Мисирдән, көләлик дијарындан гүввәтли әли илә чыхартды”» (Чых. 13:14). Јеһованын Исраил халгы илә мүнасибәти садәҹә тарихин сәһифәләриндә галмамалы иди. Шүбһә јохдур ки, бир чох исраилли аталар Мусанын әмринә әмәл етмишдиләр. Әсирләр сонра бир исраилли дуасында демишди: «Еј Аллаһ, өз гулағымызла ешитмишик ки, ата-бабаларымыздан бизә чатыб ки, онларын дөврүндә, гәдим заманда Сән һансы ишләри ҝөрмүсән» (Мәз. 44:1).
Јүз илдән чох вахты әһатә едән Јеһованын Шаһидләринин мүасир тарихи ушаглар үчүн «гәдим заманда» баш верән һадисә кими ҝөрүнә биләр. Бу һадисәләр онлар үчүн реал олсун дејә нә едә биләрсиниз? Бәзи валидејнләр «Јеһованын Шаһидләри — Аллаһын Падшаһлығынын мүждәчиләри» (рус.) китабындан, «Иллик мәҹмуә»дән (рус.), журналларымызда дәрҹ олунан һәјат һекајәләриндән, Аллаһын халгынын мүасир тарихиндән бәһс едән јени DVD-дән (рус.) вә диҝәр вәсаитләрдән истифадә едирләр. Совет Иттифагында вә фашист Алманијасында Јеһованын Шаһидләринин үзләшдији тәгибләрә һәср олунан видеофилмләр аиләләрә сынаглар заманы Јеһоваја бел бағламағы өјрәдир. Белә материаллары да аиләви ибадәтә дахил етмәк олар. Бунун сајәсиндә ушагларынызын иманы мөһкәмләнәҹәк вә онлар сынаглар заманы нөгсансызлыгларыны горујаҹаглар.
Буну садәҹә мүһазирә кими данышмаг ушаглары бездирә биләр. Буна ҝөрә дә чалышын ки, онлар фәал иштиракчы олсунлар. Мәсәлән, оғлунуздан хаһиш едә биләрсиниз ки, онун үчүн мараглы олан өлкәни сечиб онун теократик тарихини арашдырсын, сонра да өјрәндикләрини аилә илә бөлүшсүн. Ола билсин, јығынҹағынызда узун илләр Јеһоваја сәдагәтлә хидмәт едән мәсиһчиләр вар. Нәјә ҝөрә онлары бир ҝүн аиләви ибадәтинизә дәвәт етмәјәсиниз? Гызыныз онлара суаллар верәрәк кечдикләри һәјат јоллары барәдә данышмаларыны хаһиш едә биләр. Јахуд ушағыныз мүһүм теократик һадисәләрин, мәсәлән, филиалын тикинтисинин, бејнәлхалг конгресин вә ја евдән-евә тәблиғдә фонографын неҹә истифадә олундуғунун шәклини чәкә биләр.
‘Һәр бир үзвүн’ нә етдијини өјрәнин
Һәвари Павел мәсиһчи јығынҹағыны бәдәнлә мүгајисә едәрәк јазыр: «Бүтүн бәдән зәрури ојнаглар васитәсилә һәмаһәнҝ сурәтдә бирләшир, бәдәнин һәр бир үзвү гаршылыглы әмәкдашлыг шәраитиндә өз ишини ҝөрәрәк бүтүн бәдәнин инкишафына вә мәһәббәтдә мөһкәмләнмәсинә хидмәт едир» (Ефес. 4:16). Инсан бәдәнинин функсијалары барәдә өјрәндикҹә Јараданымыза олан миннәтдарлығымыз вә һөрмәтимиз артыр. Ејнилә, үмумдүнја јығынҹағын неҹә фәалијјәт ҝөстәрдијини арашдыранда «Аллаһын зәнҝин һикмәти»нә һејран олуруг (Ефес. 3:10).
Јеһова Өз тәшкилатынын һәм ҝөјдәки, һәм дә јердәки һиссәсинин неҹә фәалијјәт ҝөстәрдијини изаһ едир. Нүмунә үчүн: Јеһова дејир ки, О, биринҹи Иса Мәсиһә вәһј верди, Иса да «өз мәләјини ҝөндәриб онун васитәсилә бу вәһји рәмзләрлә гулу Јәһјаја верди. Јәһја да... шаһидлик етди» (Вәһј 1:1, 2). Әҝәр Јеһова Өз тәшкилатынын ҝөрүнмәз һиссәсинин неҹә фәалијјәт ҝөстәрдијини ачыглајырса, мәҝәр јер үзүндә «һәр бир үзвү»н неҹә фәалијјәт ҝөстәрдијини билмәјимизи истәмир?
Туталым, тезликлә сизин јығынҹаға рајон нәзарәтчисинин башчәкмәси олаҹаг. Нәјә ҝөрә сәјјар нәзарәтчиләринин вәзифәсини вә онларын алдығы хејир-дуалары аиләнизлә бирликдә мүзакирә етмәјәсиниз? Онлар һәр биримизә неҹә көмәк едирләр? Јахуд да бу суаллары арашдырмаг олар: тәблиғ хидмәти һаггында һесабаты вермәк нәјә ҝөрә ваҹибдир? Аллаһын тәшкилаты неҹә малијјәләшдирилир? Рәһбәрлик Шурасы неҹә тәшкил олунуб вә бизи руһани гида илә неҹә тәмин едир?
Јеһованын халгынын неҹә тәшкил олундуғуну билмәјимизин ән азы үч фајдасы вар: бизим үчүн сәјлә чалышан инсанларын зәһмәтини даһа чох гијмәтләндирәҹәјик (1 Салон. 5:12, 13); теократик гурулушу дәстәкләмәјә тәшвиг олунаҹағыг (Һәв. иш. 16:4, 5); јығынҹагдакы нәзарәтчиләрин гәрарларынын вә етдији һәр шејин Мүгәддәс Китаба әсасландығыны ҝөрәндә онлара олан етибарымыз артаҹаг (Ибр. 13:7).
«Галаларына диггәтлә бахын»
«Сионун әтрафында ҝәзиб-долашын, онун гүлләләрини сајын. Диварларына фикир верин, галаларына диггәтлә бахын. Ҝәләҹәк нәслә... дејин» (Мәз. 48:12, 13). Бурада мәзмурчу исраиллиләри Јерусәлимин диварларына јахындан нәзәр салмаға сәсләјир. Бајрамлар заманы мүгәддәс шәһәри зијарәт едән вә орадакы мөһтәшәм мәбәди ҝөрән исраилли аиләләрин һансы хатирәләрлә өз евләринә гајытдыгларыны тәсәввүр едә биләрсинизми? Шүбһә јохдур ки, онлар бу һагда «ҝәләҹәк нәслә» данышырдылар.
Сәба мәләкәсини јадымыза салаг. О, Сүлејманын әзәмәтли һакимијјәти вә бөјүк һикмәти һагда ешидәндә буна шүбһә илә јанашмышды. Бәс ешитдикләринин һәгигәт олдуғуна ону нә инандырды? О дејир: «Ҝәлиб өз ҝөзләримлә ҝөрәнә гәдәр мән бу сөзләрә инанмамышдым» (2 Салн. 9:6). Бәли, ‘өз ҝөзләримизлә’ ҝөрдүкләримиз бизә дәрин тәсир бағышлаја биләр.
Ушагларыныза Јеһованын тәшкилатынын мөҹүзәләрини ‘өз ҝөзләрилә’ ҝөрмәјә неҹә көмәк едә биләрсиниз? Јахынлыгда Јеһованын Шаһидләринин филиалы варса, чалышын ора баш чәкәсиниз. Бир аиләнин нүмунәсинә нәзәр салаг. Менди вә Бетани баҹылары ушаглыгда Бет-Елдән 1500 километр аралыда јашајырдылар. Валидејнләри тез-тез онлары филиала екскурсијаја апарырды. Менди вә Бетани хатырлајырлар: «Әввәл-әввәл елә фикирләширдик ки, Бет-Ел һәддән артыг ҹидди јердир вә анҹаг гоҹалар үчүндүр. Амма ора баш чәкәндә ҝөрдүк ки, сән демә, орада ҹаванлар да вар имиш. Онлар ҹанла-башла Јеһоваја хидмәт едир вә бундан севинҹ дујурдулар. Биз әмин олдуг ки, Јеһованын тәшкилаты јашадығымыз балаҹа әрази илә мәһдудлашмыр. Һәр дәфә Бет-Елдән гајыданда севинҹдән ганадланырдыг вә бундан сонра Јеһоваја даһа сәјлә хидмәт едирдик». Јеһованын тәшкилатыны јахындан ҝөрмәк бу баҹылары пионер хидмәтинә башламаға тәшвиг етди вә онлар һәтта Бет-Елдә мүвәггәти көнүллү кими хидмәт етмәјә дәвәт алдылар.
Јеһованын тәшкилатыны башга үсулла да ‘ҝөрә’ биләрик. Биздә олан имкан гәдим Исраил халгында јох иди. Сон илләр әрзиндә биз Јеһованын тәшкилаты барәдә даһа әтрафлы мәлумат верән видеофилмләр алмышыг. Һәмин филмләр бунлардыр: «Јеһованын Шаһидләри — хош хәбәри бөлүшмәк үчүн тәшкил олунублар» (рус.), «Үмумдүнја гардашлығымыз» (рус.), «Јерин уҹгарларынадәк» (инҝ.), «Аллаһын тәлими алтында бирләшәнләр» (инҝ.). Сиз вә аиләниз бет-еллиләрин, фәлакәт заманы јардым ҝөстәрән көнүллүләрин, миссионерләрин вә конгресләри тәшкил едән гардашларын ағыр зәһмәтини ҝөрәндә үмумдүнја гардашлығымызы даһа чох гијмәтләндирәҹәксиниз.
Хош хәбәрин тәблиғиндә вә баҹы-гардашлара дәстәк олмагда һәр јығынҹағын ваҹиб ролу вар. Бунунла белә, «бүтүн гардашлығы» һәмишә хатырламаг үчүн аиләнизлә бирҝә вахт ајырын. Бунун сајәсиндә сизин дә, ушагларынызын да иманы мөһкәм галаҹаг вә севинмәк үчүн сәбәбиниз олаҹаг (1 Пет. 5:9).
[18-ҹи сәһифәдәки чәрчивә/шәкил]
Аллаһын тәшкилаты Бунлары арашдырмаға дәјәр
Јеһованын тәшкилатынын тарихи вә фәалијјәти барәдә өјрәнмәк үчүн әлимизин алтында чохлу вәсаит вар. Илк әввәл нөвбәти мөвзулары арашдырмаг олар.
☞ Сәјјар хидмәтин тәмәли нә заман гојулуб? («Јеһованын Шаһидләри — Аллаһын Падшаһлығынын мүждәчиләри», сәһ. 222—227 (рус.)).
☞ 1941-ҹи илдә кечирилән конгресин ушаглар ҝүнүндә диггәтәлајиг олан нә иди? («Јеһованын Шаһидләри — Аллаһын Падшаһлығынын мүждәчиләри», сәһ. 86, 88 (рус.)).
☞ Рәһбәрлик Шурасы гәрарлары неҹә верир? («Аллаһын Падшаһлығы һаггында ‘әтрафлы шәһадәт верин’», сәһ. 108—114 (рус.)).