Охуҹуларын суаллары
Мүгәддәс Китабда охудугларымла әлагәдар суалларым јарананда вә ја шәхси проблемләрә даир мәсләһәтә еһтијаҹым оланда нә етмәлијәм?
Сүлејманын мәсәлләри 2:1—5 ајәләри һәр биримизи «ҝизли хәзинә» кими идрак вә дәрракәни ахтармаға тәшвиг едир. Јәни Мүгәддәс Китабы охујаркән суалларымыза ҹаваб тапмаг вә проблемләримизи һәлл етмәк үчүн сәј ҝөстәрмәли вә арашдырма апармалыјыг. Буну етмәјин һансы үсуллары вар?
«Теократик Хидмәт Мәктәбиндә тәлим алырыг» китабынын 33—38 сәһифәләриндә «Арашдырманы неҹә апармаг олар?» адлы башлыг алтында изаһ олунур ки, бунун үчүн биз «садиг вә ағыллы нөкәр»ин тәгдим етдији аләтләрдән истифадә едә биләрик (Мат. 24:45). 36-ҹы сәһифәдә «Ҝөзәтчи Гүлләси нәшрләринин индекси»нин (рус.) истифадә етмә гајдалары изаһ олунур. Бу нәшр мөвзу вә ајә индексиндән ибарәтдир. Сәни марагландыран мөвзу вә ја Мүгәддәс Китаб ајәсинә даир индексдә нәшрләр сијаһысы тапа биләрсән. Конкрет ҹаваб вә ја рәһбәрлик ахтарырсанса, сәнә сәбир лазым олаҹаг. Унутма, ахы сән «ҝизли хәзинә» ахтарырсан, бунун үчүн исә вахт вә сәј ҝәрәкдир.
Лакин елә мөвзулар вә ајәләр вар ки, бизим нәшрләрдә онлар мүзакирә олунмајыб. Һансыса Мүгәддәс Китаб ајәсинә нәшрләримиздә шәрһ верилсә дә, ола билсин, бу, сәнин суалларына там ҹаваб вермир. Һәмчинин Мүгәддәс Китабдакы бәзи һадисәләрин бүтүн тәфсилатлары гејд олунмадығы үчүн бу, биздә суаллар доғура биләр. Буна ҝөрә дә биз дәрһал бүтүн суалларымыза ҹаваб тапаҹағымызы ҝөзләмәмәлијик. Нәшрләримиздә суалымыза ҹаваб јохдурса, өзүмүздән еһтимал ирәли сүрмәмәлијик. Әкс һалда, Аллаһын иманла бағлы ҝөрдүјү тәдбирләри јајмаг әвәзинә, башымыз бош јерә вахт апаран суаллара вә мүбаһисәләрә гарышаҹаг (1 Тим. 1:4; 2 Тим. 2:23; Тит. 3:9). Филиалларда, еләҹә дә мәркәзи идарәдә хидмәт едән гардашлар нәшрләримиздә изаһ олунмајан мөвзуларла әлагәдар һәр бир суала ҹаваб верә билмәзләр. Биз әмин ола биләрик ки, һәјат јолунда бизә бәләдчилик етмәси үчүн Мүгәддәс Китабдакы мәлумат кифајәт гәдәрдир. Бурахылан тәфсилатлар исә бу китабын Мүәллифинә олан мөһкәм иманымызы ҝөстәрмәјә имкан верир («Јеһоваја јахынлаш» китабынын 185—187 сәһифәләринә бах (рус.)).
Шәхси мәсәлә илә әлагәдар рәһбәрлик вә чыхыш јолу тапмаг үчүн арашдырма апардыгдан сонра мәсәлә һәлл олунмурса, нә етмәк олар? Јеткин мәсиһчиләрә вә ја јерли ағсаггалларын биринә јахынлаш. Онларын зәнҝин Мүгәддәс Китаб биликләри вә мәсиһчи кими бөјүк тәҹрүбәләри вар. Әҝәр шәхси проблемлә әлагәдар мәсләһәтә еһтијаҹ дујурсанса, онларын көмәји сәнә хүсусилә дәјә биләр. Чүнки онлар сәни таныјыр вә вәзијјәтинә бәләддирләр. Ән ваҹиби исә нараһатчылыгларын барәдә Јеһоваја дуа етмәји һеч вахт унутма. Ондан хаһиш ет ки, мүгәддәс руһу васитәсилә сәнин дүшүнҹәләрини јөнәлтсин. Чүнки Јеһова һикмәт вә дәрракә верән Аллаһдыр (Сүл. мәс. 2:6; Лука 11:13).