Мәсләһәтләри неҹә верирсән?

Сәнә нә вахтса мәсләһәт алмаг үчүн мүраҹиәт едибләрми? Мәсәлән, сәнә: «Мән нә едим? Филан шәнлијә ҝедим? Карјера гурум? Аилә гурмаг мәгсәдилә филанкәслә ҝөрүшмәјим мүнасибдир?» — кими суаллар верибләрми?

Сәмими-гәлбли инсанлар сәндән хаһиш едә биләрләр ки, достлары, аилә үзвләри вә һәтта Јеһова илә мүнасибәтләринә тәсир ҝөстәрә биләҹәк мәсәләләрлә әлагәдар гәрар гәбул етмәјә онлара көмәк едәсән. Вердијин ҹаваб нәјә әсасланаҹаг? Адәтән, башгаларына мәсләһәт верәркән буну неҹә едирсән? Инсанын вердији суал ҹидди вә ја аз әһәмијјәтли олмасындан асылы олмајараг, Сүлејманын мәсәлләри 15:28 ајәсиндә дејилдији кими, «салеһ инсан ҹаваб вермәздән әввәл гәлбиндә дүшүнәр». Ҝәлин ҝөрәк беш Мүгәддәс Китаб принсипи бизә мәсләһәт вермәкдә неҹә јарарлы ола биләр.

1 Реал вәзијјәти ҝөрмәјә чалыш

«Ешитмәздән габаг ҹаваб вермәк сәфеһлик вә рүсвајчылыгдыр» (СҮЛ. МӘС. 18:13).

Јахшы мәсләһәт вермәк үчүн биз көмәјә еһтијаҹы олан инсанын вәзијјәтини вә нөгтеји-нәзәрини билмәлијик. Туталым, бир нәфәр сәнә зәнҝ едиб сизә ҝәлмәјин ән асан јолуну өјрәнмәк истәјир. Она көмәк етмәк үчүн сән, илк нөвбәдә, нәји билмәлисән? Онун һал-һазырда һарада олдуғуну өјрәнмәдән она көмәк едә биләрсәнми? Әлбәттә ки, јох! Ејнилә, дүзҝүн рәһбәрлик вермәк үчүн мәсләһәт истәјән инсанын «јерини», јәни вәзијјәт вә нөгтеји-нәзәрини мүәјјән етмәк лазымдыр. Бәлкә, ҹавабымыза тәсир едә биләҹәк вәзијјәти јүнҝүлләшдирән бәзи амилләр вар? Вәзијјәт барәдә әтрафлы мәлумат әлдә етмәдән мәсләһәт версәк, инсан һәтта чаш-баш гала биләр (Лука 6:39).

Мәсләһәтә еһтијаҹы олан инсанын нәләри арашдырдығыны өјрән. Һәмин инсана нөвбәти суаллары вермәк мүдриклик оларды: «Сәнҹә, бу мәсәләдә һансы Мүгәддәс Китаб принсипләри тәтбигедиләндир? Гаршында олан сечимләрин мүсбәт вә мәнфи тәрәфләри һансылардыр? Бу мәсәлә илә бағлы һансы ахтарышлар етмисән? Башгалары, мәсәлән, јығынҹаг ағсаггаллары, валидејнләрин вә ја сәнинлә Мүгәддәс Китабы өјрәнән тәблиғчи сәнә һансы мәсләһәти вериб?»

Бу суаллара вердији ҹавабларындан биз һәмин инсанын мәсәләни арашдырмаг үчүн артыг нәләр етдијини мүәјјән едәҹәјик. Һәмчинин, ола билсин, башгалары да она нәсә дејибләр вә бизә һәмин мәсләһәтләри дә нәзәрә алмаг лазымдыр. Ола билсин, һәмин инсан садәҹә олараг «гулагларына хош [ҝәлән]» мәсләһәти верәҹәк инсаны ахтарыр (2 Тим. 4:3).

2 Тез-тәләсик ҹаваб вермәкдән гачын

«Гој һәр бир инсан ешитмәјә һазыр олсун, данышмаға... тәләсмәсин» (ЈАГ. 1:19).

Бәзән јахшы нијјәтдән ирәли ҝәләрәк тез-тәләсик ҹаваб веририк. Бәс неҹә фикирләширсән, әксәр һалларда, хүсусилә дә һәртәрәфли арашдырмадығымыз мөвзу илә бағлы бу ҹүр мәсләһәт вермәјимиз дүзҝүндүр? Сүлејманын мәсәлләри 29:20 ајәсиндә дејилир: «Дүшүнмәдән данышана бахмысанмы? Ахмаға ондан артыг үмид вар».

Мәсләһәт вермәздән өнҹә, онун Аллаһын Кәламындакы мүдриклијә там әсасландығына әмин ол. Өзүндән соруш: «Бу дүнјанын дүшүнҹә тәрзи вә руһу мәним дүшүнҹәләримә тәсир етмәјиб ки?» (1 Кор. 2:12, 13). Јадда сахла ки, мәсләһәт верәркән јалныз јахшы нијјәт кифајәт дејил. Һәвари Петер Исанын чәтин тапшырығы барәдә өјрәнәндә она: «Ја Рәбб, Өзүнә јазығын ҝәлсин! Бу әсла Сәнин башына ҝәлмәјәҹәк!» — дејә мәсләһәт верди. Петерин реаксијасындан нә өјрәнирик? Һәтта сәмими инсан белә, еһтијаты әлдән верәрсә, «Аллаһын јох», инсанын фикирләрини ирәли сүрә биләр (Мат. 16:21—23, Инҹил, 1996). Буна ҝөрә дә данышмаздан өнҹә фикирләшмәк чох ваҹибдир! Мәҝәр бизим тәҹрүбәмиз Аллаһын һикмәти илә мүгајисәдә олдугҹа мәһдуд дејил? (Әјј. 38:1—4; Сүл. мәс. 11:2).

3 Тәвазөкарлыгла Аллаһын Кәламындакылара әмәл ет

«Өзүмдән һеч бир шеј етмәдијими биләҹәксиниз. Ата мәни неҹә өјрәдибсә, мән дә елә данышырам» (ЈӘҺ. 8:28).

Мәсләһәт верәндә: «Сәнин јериндә олсајдым... едәрдим», — дејәҹәксәнми? Һәтта мәсләһәт истәјән инсанын суалынын ҹавабы асан олса да, һәмин вахт Иса кими тәвазөкарлыг ҝөстәрсән, мүдрик давранмыш оларсан. О, дүнјада јашајан һәр бир инсандан гат-гат мүдрик вә тәҹрүбәли олмасына бахмајараг, демишди: «Мән өзүмдән данышмамышам, мәни ҝөндәрән Ата мәнә нә һагда данышмағы әмр едиб» (Јәһ. 12:49, 50). Исанын тәлим вә мәсләһәтләри һәмишә Атасынын ирадәсинә ујғун иди.

Мәсәлән, издиһам Исаны һәбс етмәјә ҝәләндә шаҝирдләр ондан сорушдулар ки, онун уғрунда вурушсунлар, јохса јох. Бу барәдә Лука 22:49 ајәсиндә охујуруг. Онлардан бири гылынҹа әл атды. Бу һадисәләр һагда Матта 26:52—54 ајәләриндә дә јазылыб. Лакин орада әлавә олараг гејд олунур ки, Иса һәтта белә бир ҝәрҝин вәзијјәтдә һәмин шаҝирди илә Јеһованын ирадәси барәдә мүлаһизә јүрүтмәјә вахт тапды. Јарадылыш 9:6 ајәсиндәки принсипдән, еләҹә дә 22-ҹи мәзмурда вә «Јешаја» китабынын 53-ҹү фәслиндә јазылан пејғәмбәрликләрдән Исанын хәбәри вар иди, буна ҝөрә дә о, бу вәзијјәтдә һәјатлары хилас едән вә Јеһоваја мәгбул олан мүдрик рәһбәрлик верә билмишди.

4 Теократик китабханандан истифадә ет

«Евиндәки гуллугчулара вахтлы-вахтында јемәк пајларыны вермәк үчүн ағанын онларын үзәриндә гојдуғу садиг вә ағыллы нөкәр ҝөрәсән, кимдир?» (МАТ. 24:45).

Иса зәрури руһани гида пајламаг иши илә мәшғул олан етибарлы нөкәр синфи тәјин едиб. Ваҹиб мәсәлә илә әлагәдар кимәсә мәсләһәт вә ја рәһбәрлик вермәздән өнҹә, Мүгәддәс Китаба әсасланан нәшрләрин көмәјилә һәртәрәфли арашдырма апармаға вахт ајырырсанмы?

«Ҝөзәтчи Гүлләси нәшрләринин индекси» вә «Ҝөзәтчи Гүлләсинин китабханасы»a зәнҝин вә ајдын мәлуматлар хәзинәсинин ачарыдыр. Бу ачардан истифадә етмәмәк неҹә дә бөјүк сәһв оларды! Бурада мәсләһәт ахтаран инсанлар үчүн фајдалы олаҹаг минләрлә мөвзуларын вә мәгаләләрин сијаһысы ҝәтирилир. Башгаларына Мүгәддәс Китаб принсипләрини арашдырмаға вә Аллаһын Кәламы әсасында мүлаһизә јүрүтмәјә көмәк етмәкдә нә дәрәҹәдә мәһарәтлисән? GPS (Јерләшмә јерини мүәјјән едилмәси үзрә глобал пејк системи) инсана һарада олдуғуну мүәјјән етмәјә вә дүзҝүн истигамәти сечмәјә көмәк етдији кими, ахтарыш апармаг үчүн нәзәрдә тутулан бу аләтләрин сајәсиндә биз јолумузу ајдын ҝөрүр вә һәјата апаран бу јолда неҹә мөһкәм дурмағы дәгиг билирик.

Бир чох ағсаггаллар тәблиғчиләри «Индекс»дән вә «Ҝөзәтчи Гүлләсинин китабханасы»ндан истифадә едәрәк нәшрләримиздә ахтарышлар апармағы өјрәдирләр ки, онлар өзләри Мүгәддәс Китаб әсасында мүлаһизә јүрүдә билсинләр. Бунун сајәсиндә тәблиғчиләр нәинки ҹари проблемләрини һәлл едир, һәм дә ахтарышлар апармаг вә Јеһованын тәгдим етдији руһани гидаја етибар етмәк вәрдишини инкишаф етдирирләр. Бунунла онлар «гаврајыш[лар]ыны даима ишләтмәклә ону јахшыны писдән ајырмаға» өјрәшдирирләр (Ибр. 5:14).

5 Башгаларынын јеринә гәрар вермә

«Һәр кәс өз мәсулијјәт јүкүнү дашыјаҹаг» (ГАЛАТ. 6:5).

Сонда һәр бир инсан һансы мәсләһәтә риајәт етмәји өзү сечмәлидир. Јеһова Онун принсипләринә риајәт едиб-етмәјәҹәјимизә даир бизә сечим азадлығы верир (Ганун. т. 30:19, 20). Елә вәзијјәтләр дә вар ки, бир нечә Мүгәддәс Китаб принсипләрини әһатә едир вә белә һалларда мәсләһәт ахтаран инсан гәрары өзү вермәлидир. Биздән мәсләһәт истәјән инсанын вәзијјәтини вә јашыны нәзәрә алараг, өзүмүздән сорушмалыјыг: «Үмумијјәтлә, бу мәсәлә илә бағлы мәсләһәт вермәјә ихтијарым вармы?» Јахшы оларды ки, бәзи мәсәләләри јығынҹаг ағсаггаллары һәлл етсин вә әҝәр биздән мәсләһәт истәјән кәс ҝәнҹ вә ја ушагдырса, валидејнләринә мүраҹиәт етсин.

[Һашијә]

[8–ҹи сәһифәдәки шәкил/чәрчивә]

Аиләви ибадәт үчүн мөвзулар

Бу јахынларда сәнә верилән суалларын ҹавабыны нәјә ҝөрә өјрәнмә заманы арашдырмајасан? Көмәк үчүн сәнә јахынлашан инсанын суалына ҹаваб олаҹаг һансы мәгаләләри вә Мүгәддәс Китаб принсипләрини тапа биләрсән? Туталым, баҹы вә ја гардаш евләнмәк мәгсәдилә киминләсә ҝөрүшмәк барәдә сәндән мәсләһәт истәјир. «Индекс» вә ја «Ҝөзәтчи Гүлләсинин китабханасы»нын көмәјилә бу суалла бирбаша бағлылығы олан мөвзулара бах. Мәсәлән, «Индекс»дә «Ҝөрүш» вә ја «Никаһ» адлы башлыглара нәзәр јетирмәк олар. Сонра исә һәмин инсанын вәзијјәтинә мүнасиб олан мөвзулара бах. Әсас башлығын алтында олан «Һәмчинин бах» јарымбашлығындакы мөвзулара да диггәт јетир, чүнки орада сәни марагландыран конкрет вәзијјәтлә бағлы даһа чох мәлуматын һарада јерләшдијини тапмаг олар.

[9–ҹу сәһифәдәки чәрчивә]

Јеһованын тәшкилаты васитәсилә тәгдим етдији аләтләрдән истифадә едәрәк биз һәм ән јахшы мәсләһәтләри тапа, һәм дә верә биләрик. Ваиз 12:11 ајәсиндә гејд олунур: «Һикмәтлиләрин сөзләри чобан чубуғу кими, топладыглары сөзләри бәрк вурулмуш мыхлар кимидир; о сөзләр бир Чобан тәрәфиндән верилир». «Чобан чубуғу» һејвана истигамәт вермәк үчүн истифадә едилдији кими, мәһәббәтдән ирәли ҝәләрәк верилән етибарлы мәсләһәтләр дә сәмими инсанлара дүзҝүн јолла ҝетмәјә көмәк едир. «Бәрк вурулмуш мыхлар» тикилини дајаныглы едир. Буна бәнзәр шәкилдә, јахшы мәсләһәтләр јахшы нәтиҹә верә биләр. Мүдрик инсанлар «Чобан»ымыз олан Јеһованын «сөзләри»нә, јәни мүдрик мәсләһәтләринә риајәт етмәкдән севинҹ дујурлар.

Мәсләһәт вермәкдә Чобанымыздан нүмунә ҝөтүр. Биз мәсләһәт үчүн бизә үз тутан һәмиманлыларымызы мәмнунијјәтлә динләјир вә имканымыз оланда онлара көмәк едирик. Мәсләһәтләримиз, һәгигәтән дә, Мүгәддәс Китаб принсипләринә әсасланарса, башгаларына фајда ҝәтирә вә әбәди һәјата наил олмаға онлара көмәк едә биләр.