Әр-арвад кими руһән бирҝә инкишаф един

Фирузa: «Тәзә евләнәндә тәкид етдим ки, Мүгәддәс Китабы арвадымла бирҝә охујуб арашдыраг. Чалышырдым ки, бунун үчүн ајырдығымыз вахтда һәјат јолдашымын диггәти јајынмасын. Амма сән демә, Елнарә арашдырманын гуртармасыны сәбирсизликлә ҝөзләјирмиш. Вердијим суаллара онун ҹавабы јалныз “һә” вә “јох” олурду. Бизим бирҝә арашдырмамызы мән һеч белә тәсәввүр етмирдим».

Елнарә: «Фирузла аилә гуранда 18 јашым варды. Биз мүнтәзәм олараг Мүгәддәс Китабы арашдырырдыг, лакин Фируз һәр дәфә мәним бир гадын кими һансы саһәләрдә дүзәлмәли олдуғуму ҝөстәрмәјә чалышырды. Она ҝөрә мәјус вә пәрт олурдум!»

СИЗҸӘ, Фирузла Елнарәнин мүнасибәтиндәки проблем нәдә иди? Онларын нијјәтләри јахшы иди вә һәр икиси Аллаһы севир вә Онун Кәламыны бирҝә охујуб арашдырмағы ваҹиб санырды. Лакин онлары бир-бирләринә даһа јахын етмәли олан амил әкс тәсир ҝөстәрирди. Мүгәддәс Китабы бирҝә арашдырсалар да, бир ҹүтлүк кими руһән инкишаф етмирдиләр.

Руһани инсан олмаг нә демәкдир? Әрлә арвад нәјә ҝөрә бу саһәдә инкишаф етмәлидирләр? Бу заман һансы чәтинликләр јарана биләр вә онлары неҹә арадан галдырмаг олар?

Руһани инсан олмаг нә демәкдир?

Мүгәддәс Китаба әсасән, «руһани» олмаг дедикдә инсанын һәјата бахышы вә ја мүнасибәти нәзәрдә тутулур (1 Коринфлиләрә 2:15). Мәсәлән, һәвари Павел руһани вә ҹисмани инсанын һәјата бахышларынын неҹә мүхтәлиф олдуғуну вурғулајыр. Онун сөзләринә ҝөрә, ҹисмани дүшүнҹәли инсанлар ән чох өзләрини дүшүнүрләр. Белә адамлар, Аллаһын нормаларына ујғун јашамаға сәј ҝөстәрмәк әвәзинә, өзләринин дүзҝүн сандыглары кими давранырлар (1 Коринфлиләрә 2:14; Галатијалылара 5:19, 20).

Бунун әксинә олараг, руһани дүшүнҹәли инсанлар Аллаһын нормаларына бөјүк өнәм верирләр. Онлар Јеһова Аллаһы өз Достлары саныр вә Онун хүсусијјәтләрини тәглид етмәјә чалышырлар (Ефеслиләрә 5:1). Буна ҝөрә дә башгалары илә мүнасибәтләриндә мәһәббәт, хејирхаһлыг вә нәҹиблик тәзаһүр етдирирләр (Чыхыш 34:6). Һәтта онлар үчүн раһат олмаса белә, јенә дә Аллаһа табе олмаға чалышырлар (Мәзмур 15:1, 4). Канадада јашајан вә 35 илдир ки евли олан Даррен дејир: «Дүшүнүрәм ки, руһани инсан өз давраныш вә нитгинин Аллаһла достлуғуна неҹә тәсир едәҹәјини һәмишә нәзәрә алмалыдыр». Онун һәјат јолдашы Ҹејн исә әлавә едир: «Мәнҹә, Аллаһын мүгәддәс руһунун бәһрәсини тәшкил едән хүсусијјәтләри тәзаһүр етдирмәк үчүн һәр ҝүн ҹанла-башла чалышан гадыны руһани гадын адландырмаг олар» (Галатијалылара 5:22, 23).

Әлбәттә, руһани дүшүнҹәли инсан олмаг үчүн евли олмаг шәрт дејил. Мүгәддәс Китаб өјрәдир ки, һәр бир инсан Аллаһ һаггында өјрәнмәјә вә Ону тәглид етмәјә борҹлудур (Һәвариләрин ишләри 17:26, 27).

Нәјә ҝөрә әр-арвад бирликдә руһән инкишаф етмәлидир?

Бәс нәјә ҝөрә евли оланлар руһән бирликдә инкишаф етмәлидирләр? Ҝәлин бир нүмунәјә нәзәр салаг. Туталым, ики бостанчынын бир торпаг саһәси вар вә онлар орада тәрәвәз беҹәрмәк истәјирләр. Бири фикирләшир ки, тохуму илин мүәјјән мөвсүмүндә сәпмәк лазымдыр, диҝәри исә бу иши сонраја сахламаг нијјәтиндәдир. Бири торпағы ҝүбрәләмәк истәјир, диҝәри исә гәти шәкилдә буна еһтијаҹ олмадығыны дүшүнүр. Бири бостанда һәр ҝүн ишләјир, диҝәри исә әлини ағдан гараја вурмајараг отуруб ҝөзләјир. Ајдындыр ки, бостанда әввәл-ахыр нә исә битәҹәк, лакин әҝәр онлар һәр шеји бирликдә ҝөтүр-гој едиб чалышсајдылар, бостан даһа бол мәһсул верәрди.

Әрлә арвады бу ики бостанчы илә мүгајисә етмәк олар. Әҝәр онлардан јалныз бири руһани ҹәһәтдән инкишаф едәрсә, мүнасибәтләри мүәјјән мәнада јахшы ола биләр (1 Петер 3:1, 2). Лакин онларын һәр икиси дә Аллаһын нормалары әсасында јашамаға ҹан атса вә Аллаһа хидмәтдә бир-бирләринә дәстәк олса, мүнасибәтләри даһа јахшы олмаздымы?! Мүдрик падшаһ Сүлејман демишди: «Ики адам бир адамдан јахшыдыр». Нәјә ҝөрә? «Чүнки зәһмәтләри үчүн јахшы музд алаҹаглар. Әҝәр бири јыхылса, о бири јолдашыны галдырар» (Ваиз 4:9, 10).

Тәбии ки, һәјат јолдашынла бирликдә руһән инкишаф етмәк истәјәрдин. Лакин бостан мәсәлиндә олдуғу кими, тәк истәклә иш битмир. Ҝәлин гаршылаша биләҹәјиниз ики проблеми вә онлары неҹә һәлл етмәји нәзәрдән кечирәк.

ПРОБЛЕМ 1: вахт тапа билмирик. «Әрим мәни ахшам саат 7-дә ишдән евә ҝәтирир, — дејә бу јахынларда аилә гуран Сју дејир. — Евә ҝәләндә ишдән башымыз ајылмыр. Одла су арасында галырсан. Бир тәрәфдән баша дүшүрсән ки, бирликдә Аллаһ һаггында өјрәнмәк үчүн вахт ајырмаг лазымдыр, диҝәр тәрәфдән исә, адам јорғунлуғуну алмаг истәјир».

Мүмкүн чыхыш јолу. Вәзијјәтә ујғунлашын вә әмәкдашлыг един. Сју дејир: «Әримлә бәрабәр белә гәрара ҝәлдик ки, сәһәр бир аз тез ојанаг вә ишә ҝетмәздән өнҹә, Мүгәддәс Китабдан мүәјјән бир һиссәни бирликдә охујуб мүзакирә едәк. Һәмчинин ев ишләриндә әримин мәнә көмәк етмәси сајәсиндә бирҝә кечирмәјә вахтымыз олур». Бу, онлара һансы фајданы ҝәтирир? Сјунун әри Ед дејир: «Фикир вермишәм ки, мүнтәзәм олараг Мүгәддәс Китабдан мүәјјән мәсәләләри арвадымла бирҝә мүзакирә едәндә проблем вә нараһатчылыгларын өһдәсиндән ҝәлмәк бизә даһа асан олур».

Үнсијјәтдән әлавә, һәр ҝүн бирҝә дуа етмәк үчүн вахт ајырмаг да чох ваҹибдир. Бу, неҹә көмәк едә биләр? «Арвадымла бу јахынларда мүнасибәтимиздә чох ағыр анлар јашамышдыг, —16 илдир ки евли олан Рајан дејир. — Лакин һәр ахшам вахт ајырыб бу һагда Аллаһа дуа едирдик. Ҝөрдүм ки, бунун сајәсиндә проблемләримиз һәлл олунур вә никаһымызда јенидән хошбәхтлијә наил олуруг».

МӘСЛӘҺӘТ. Сизинлә баш верән бүтүн јахшы шејләри вә һансы сәбәбә ҝөрә Аллаһа миннәтдар олдуғунузу мүзакирә етмәк үчүн һәр ҝүнүн сонунда бир нечә дәгигә вахт ајырын. Һәмчинин гаршылашдығыныз вә Аллаһын көмәји олмадан һәлл едә билмәдијиниз проблемләр барәдә данышын. Еһтијатлы олун: белә анлардан һәјат јолдашынызын сәһвләрини үзүнә вурмаг үчүн фүрсәт кими истифадә етмәјин! Јахшы оларды ки, бир јердә дуа едәркән јалныз әр-арвад кими үзәриндә чалышмалы олдуғунуз мәгамлары хатырладын. Нөвбәти ҝүн исә дуаныза ујғун давранмаға чалышын.

ПРОБЛЕМ 2: вәрдишимиз бир дејил. «Һеч вахт отуруб китаб охумағы хошламамышам», — дејә Тони етираф едир. Онун һәјат јолдашы Натали исә дејир: «Мән охумағы вә өјрәндикләрим һагда данышмағы севирәм. Һәрдән мәнә елә ҝәлир ки, әрим Мүгәддәс Китабдан һансыса суаллары мәнимлә мүзакирә етмәјә үрәк етмир».

Мүмкүн чыхыш јолу. Тәнгид едиб рәгабәт апармаг әвәзинә, бир-биринизә дәстәк олун вә јахшы ҹәһәтләринә ҝөрә һәјат јолдашынызы тәрифләјин. Тони дејир: «Арвадымын Мүгәддәс Китабдан һансыса суаллары шөвглә мүзакирә етмәси бәзән мәни руһдан салырды вә әввәлләр онунла мүзакирәләри һәвәссиз едирдим. Лакин Натали мәнә һәмишә дајаг олурду. Артыг биз мүнтәзәм олараг руһани фикирләри мүзакирә едирик вә әмин олдум ки, бунда горхулу бир шеј јох имиш. Һәтта бу, мәним хошума ҝәлир. Белә мүзакирәләр сајәсиндә аиләмиздә вәзијјәт әввәлки кими ҝәрҝин дејил вә әмин-аманлыг һөкм сүрүр».

Бир чох әр-арвад фикир вермишдир ки, һәр һәфтә мүнтәзәм олараг Мүгәддәс Китабы бирҝә охујуб арашдырмаг сајәсиндә никаһлары мөһкәмләнир. Амма бир шеји јадда сахлајын: Аллаһын Кәламындан олан һәр бир мәсләһәти һәјат јолдашыныза јох, илк нөвбәдә өзүнүзә тәтбиг един (Галатијалылара 6:4). Мүбаһисәли мәсәләләри аиләви ибадәт заманы дејил, башга вахт һәлл един. Нәјә ҝөрә?

Бир дүшүн: аиләликҹә отуруб јемәк јејән вахт чирк верән јараны ачыб бағлајардынмы? Тәбии ки, јох. Белә етмәклә һамынын иштаһасыны күсдүрәрдин. Иса Аллаһын ирадәсини өјрәниб јеринә јетирмәји јемәклә мүгајисә едирди (Матта 4:4; Јәһја 4:34). Һәр дәфә Мүгәддәс Китабы ачанда емосионал јаралара тохунсан, онда һәјат јолдашынын руһани иштаһасыны күсдүрәҹәксән. Әлбәттә, һеч ким демир ки, проблемләри мүзакирә етмәк лазым дејил. Амма бунун үчүн башга вахт ајырмаг мәсләһәт ҝөрүлүр (Сүлејманын мәсәлләри 10:19; 15:23).

МӘСЛӘҺӘТ. Һәјат јолдашында ән чох хошуна ҝәлән ики-үч хүсусијјәти гејд ет. Әҝәр нөвбәти аиләви ибадәт заманы бу хүсусијјәтләр мүзакирә едиләрсә, һәјат јолдашында олан һәмин хүсусијјәтләри гијмәтләндирдијини де.

Әкдијинизи бичәҹәксиниз

Әҝәр бирҝә руһән бөјүмәјә чалышырсынызса, никаһыныз мөһкәм вә хошбәхт олаҹаг. Чүнки Аллаһын Кәламында дејилир: «Инсан нә әкәрсә, ону да бичәҹәк» (Галатијалылара 6:7).

Мәгаләнин әввәлиндә сөзләри ҝәтирилән Фируз вә Елнарә Мүгәддәс Китабын бу принсипинин доғрулуғуна әмин олдулар. Онлар артыг 45 илдир ки евлидирләр вә ҹүтлүк кими руһани ҹәһәтдән инкишаф етмәјин фајдалы олдуғуну дадмышлар. Фируз етираф едир: «Әввәлләр һәјат јолдашым үнсијјәтҹил олмадығы үчүн дејинирдим. Амма вахт кечдикҹә баша дүшдүм ки, мән дә өз үзәримдә ишләмәлијәм». Елнарә исә гејд едир: «Чәтин анлара синә ҝәрмәјимизә Јеһова Аллаһа олан мәһәббәтимиз көмәк етди. Бу илләр әрзиндә мүнтәзәм шәкилдә бирҝә охујуб арашдырыр вә дуа едирдик. Фирузун Аллаһа хош ҝәлән хүсусијјәтләри тәзаһүр етдирмәк үчүн чалышдығыны ҝөрәндә она мәһәббәтим артырды».

[Һашијә]

ӨЗҮНҮЗДӘН СОРУШУН...

▪ Бир әр-арвад кими сонунҹу дәфә нә вахт отуруб бирҝә дуа етмишик?

▪ Нә едә биләрәм ки, һәјат јолдашыма мәнимлә руһани фикирләри мүзакирә етмәк асан олсун?