Мүгәддәс Китаб һәјатлары дәјишир

УШАГЛЫҒЫ фаҹиәли кечән бир ҝәнҹ гадын һәјатын мәнасыны неҹә тапды? Гаты сијаси үсјанкары сүлһсевәр инсан олмаға нә тәшвиг етди? Ҝәлин бу суалларын ҹавабыны өјрәнәк.

«Мәһәббәт вә меһрибанлыг ахтармагдан әлими үзмүшдүм» (ИННА ЛЕЖНИНА).

АНАДАН ОЛДУҒУ ИЛ: 1981

ӨЛКӘ: РУСИЈА

КЕЧМИШДӘ: УШАГЛЫҒЫ ФАҸИӘЛИ КЕЧИБ

АВТОБИОГРАФИЈА. Анадан кар доғулмушам; валидејнләрим дә кар иди. Һәјатымын илк алты или чох ҝөзәл кечиб. Сонра валидејнләрим бошандылар. Ушаг олсам да, бошанманын нә олдуғуну јахшы баша дүшүрдүм вә бу, мәни сарсыдырды. Валидејнләрим бошандыгдан сонра атам бөјүк гардашымла Троитск шәһәриндә галдылар, анам исә мәни ҝөтүрүб Челјабинскә көчдү. Бир мүддәт сонра анам јенидән аилә гурду. Өҝеј атам әјјаш иди вә анамы да, мәни дә тез-тез дөјүрдү.

1993-ҹү илдә севимли бөјүк гардашым суда боғулуб өлдү. Бу һадисә аиләмиз үчүн бөјүк сарсынты иди. Анам ичкијә гуршанды вә өҝеј атам кими, мәнимлә пис давранмаға башлады. Даһа јахшы һәјатын сорағында идим. Мәһәббәт вә меһрибанлыг ахтармагдан әлими үзмүшдүм. Тәсәлли алмаг үчүн мүхтәлиф килсәләрә үз тутдум, амма үмидләрим пуч олду.

МҮГӘДДӘС КИТАБ ҺӘЈАТЫМЫ ДӘЈИШДИ. Мәним 13 јашым оланда Јеһованын Шаһиди олан синиф јолдашым Мүгәддәс Китабдан мәнә бәзи һекајәләр данышырды. Мүхтәлиф чәтинликләрә бахмајараг, Аллаһа хидмәт едән Нуһ вә Әјјуб кими Мүгәддәс Китаб персонажлары һагда өјрәнмәји хошлајырдым. Тезликлә Јеһованын Шаһидләри илә Мүгәддәс Китабы өјрәнмәјә вә онларын јығынҹаг ҝөрүшүнә ҝетмәјә башладым.

Мүгәддәс Китабы өјрәндикҹә бир чох һәгигәтләрә ҝөзүм ачылырды. Аллаһын адыны билмәјим исә мәнә бөјүк тәсир бағышлады (Јешаја 42:8, Китабы Мукаддес). Мүгәддәс Китабын јашадығымыз ахыр ҝүнләрин неҹә олаҹағыны габагҹадан дәгигликлә тәсвир етмәси мәни валеһ етди (2 Тимотејә 3:1—5). Дирилмә үмиди исә үрәјими риггәтә ҝәтирди. Тәсәввүр един: гардашымы јенидән ҝөрәҹәјәм! (Јәһја 5:28, 29).

Лакин мәним севинҹимә һеч дә һамы шәрик олмурду. Анам вә өҝеј атам Јеһованын Шаһидләринә дүшмән кәсилмишди. Онлар мәнә тәзјиг ҝөстәрмәјә чалышырдылар ки, Мүгәддәс Китабы өјрәнмәјә сон гојум. Амма өјрәндикләрими чох севирдим вә буну давам етмәјә гәти гәрарлы идим.

Аиләмин тәгибләринә синә ҝәрмәк асан дејилди. Јашадығымыз диҝәр фаҹиә мәнимлә бәрабәр Јеһованын Шаһидләринин јығынҹаг ҝөрүшүнә ҝедән кичик гардашымын да суда боғулуб өлмәси олду. Лакин Јеһованын Шаһидләри һәмишә јанымда идиләр. Һәјатым боју һәсрәтиндә олдуғум мәһәббәт вә меһрибанлығы онларын арасында тапдым. Һәгигәти тапдығыма әмин идим. 1996-ҹы илдә вәфтиз олараг Јеһованын Шаһиди олдум.

МӘНӘ ФАЈДАСЫ. Артыг алты илдир ки, Дмитри адлы ҝөзәл инсанла аилә гурмушам. Биз Јеһованын Шаһидләринин Санкт-Петербургдакы филиалында хидмәт едирик. Валидејнләрим мәним әгидәмә әввәлки кими сәрт јанашмырлар.

Јеһова Аллаһы таныдығыма ҝөрә Она чох миннәтдарам! Она хидмәт һәјатымы мәналы едир.

«Бир чох суал мәнә раһатлыг вермирди» (РАУДЕЛ РОДРИГЕС РОДРИГЕС).

АНАДАН ОЛДУҒУ ИЛ: 1959

ӨЛКӘ: КУБА

КЕЧМИШДӘ: ГАТЫ СИЈАСИ ҮСЈАНКАР

АВТОБИОГРАФИЈА. Мән Һавана (Куба) шәһәриндә анадан олмушам вә сәс-күјлү күчәдә боја-баша чатмышам. Бөјүјәндә ҹүдо вә идманын башга дөјүш нөвләри илә марагланырдым.

Мәктәбдә јахшы охујурдум вә валидејнләрим мәни университетә дахил олмаға тәшвиг етдиләр. Орада охујаркән һисс едирдим ки, өлкәмин сијаси системи дәјишилмәлидир. Үсјан етмәк гәрарына ҝәлдим. Груп јолдашымла бәрабәр бир полисә һүҹум едиб силаһыны әлиндән алмаг истәдик. Нәтиҹәдә онун башы ҹидди зәдәләнди. Бизи һәбс етдиләр вә ҝүлләләнмә һөкмү кәсдиләр. Ҹәми 20 јашым варды, амма өлүмлә үз-үзә дурмушдум!

Һәбсхана камерасында тәк отураркән мәнә кәсилән һөкмү иҹра едәҹәк дәстәнин гаршысында өзүмү неҹә апараҹағымы дүшүнүрдүм. Мән горхуму ҝөстәрмәк истәмирдим. Бунунла јанашы, мәни бир чох суал нараһат едирди. Дүшүнүрдүм: «Нәјә ҝөрә дүнјада бу гәдәр һагсызлыг вар? Һәјатын мәнасы елә будурму?»

МҮГӘДДӘС КИТАБ ҺӘЈАТЫМЫ ДӘЈИШДИ. Бизә кәсилән өлүм һөкмү нәтиҹәдә 30 иллик һәбс ҹәзасы илә әвәз олунду. Елә һәмин вахт һәбсханада дини етигадларына ҝөрә ҹәза чәкән Јеһованын Шаһидләри илә таныш олдум. Онларын ҹәсарәти вә ејни заманда мүлајимлији мәни валеһ етди. Һагсыз олараг һәбс олундугларына бахмајараг, онларда нифрәт вә кин-күдурәт дејилән шеј јох иди.

Јеһованын Шаһидләри мәнә Аллаһын бәшәријјәтә даир нијјәтини чатдырдылар. Онлар мәнә Мүгәддәс Китабдан ҝөстәрдиләр ки, Аллаһ јери ҹинајәт вә һагсызлығын олмајаҹағы бир ҹәннәтә чевирәҹәк. Һәмчинин јер үзүндә јахшы инсанларын ҝөзәл шәраитдә әбәди сакин олаҹагларыны да сөјләдиләр (Мәзмур 37:29).

Јеһованын Шаһидләриндән өјрәндикләрим чох хошума ҝәлирди, амма хасијјәтҹә онлар кими ола билмәздим. Фикирләширдим ки, сијаси ишләрдә битәрәф олмаг вә ја гисас алмамаг мәним үчүн гејри-мүмкүндүр. Буна ҝөрә дә Мүгәддәс Китабы тәкбашына охумаг гәрарына ҝәлдим. Охујуб гуртардыгда анладым ки, биринҹи әсрдәки мәсиһчиләр кими давранан јалныз Јеһованын Шаһидләридир.

Мүгәддәс Китабы өјрәндикҹә баша дүшүрдүм ки, һәјатымы көкүндән дәјишмәлијәм. Мәсәлән, сөјүш сөјмәк вәрдишими тәрҝитмәлијдим, һәмчинин сигарети атмалы вә сијаси мәсәләләрдә битәрәф олмалыјдым. Бу дәјишикликләри етмәк һеч дә асан дејилди, лакин Јеһованын көмәјилә тәдриҹән буна наил олдум.

Ән чәтини исә өзүмә һаким олмағы өјрәнмәк иди. Һәлә дә бу барәдә Аллаһдан көмәк диләјирәм. Мүгәддәс Китабын мәнә көмәк едән ајәләриндән бири дә Сүлејманын мәсәлләри 16:32 ајәсидир. Орада дејилир: «Иҝид олмагдан сәбирли олмаг јахшыдыр, нәфсә һаким олмаг шәһәри алмагдан үстүндүр».

1991-ҹи илдә Јеһованын Шаһиди кими вәфтиз олундум. Мәни һәбсханада чәндә вәфтиз етдиләр. Нөвбәти ил биздән бәзиләрини азад едиб Испанијаја гоһумларымызын јанына ҝөндәрдиләр. Ораја чатан кими Јеһованын Шаһидләринин јығынҹаг ҝөрүшләринә ҝетмәјә башладым. Онлар мәни елә гаршыладылар ки, санки мәни чохдан таныјырдылар. Һәјатымы јенидән башламаға да онлар көмәк етдиләр.

МӘНӘ ФАЈДАСЫ. Мән чох хошбәхтәм, чүнки һәјат јолдашым вә ики гызымла Аллаһа хидмәт едирик. Вахтымын чох һиссәсини башгаларына Мүгәддәс Китабы өјрәтмәјә сәрф етмәјимлә фәхр едирәм. Бәзән ҝәнҹлијимдә өлүмлә үз-үзә дурдуғуму хатырлајырам вә индијәдәк наил олдуғум шејләрә ҝөрә чох миннәтдарам. Нәинки һәјатымы, һәтта ҝәләҹәјә үмид газанмышам! Әдаләтин һөкм сүрәҹәји вә өлүмүн олмајаҹағы вәд олунмуш Ҹәннәти сәбирсизликлә ҝөзләјирәм (Вәһј 21:3, 4).

[23-ҹү сәһифәдәки јазы]

«Аллаһын адыны билмәјим исә мәнә бөјүк тәсир бағышлады»

[24-ҹү сәһифәдәки шәкил]

Һәјат јолдашымла кар инсанлара жест дилиндә тәблиғ етмәкдән севинҹ дујуруг