Нәјә ҝөрә Аллаһ Ибраһим пејғәмбәрдән оғлуну гурбан ҝәтирмәји хаһиш етди?

▪ Мүгәддәс Јазыларын «Јарадылыш» китабында дејилдији кими, Јеһова Аллаһ Ибраһимдән оғлу Исһагы гурбан ҝәтирмәји хаһиш едир (Јарадылыш 22:2). Мүгәддәс Китабы охујанларын бәзиләри бу һиссәни баша дүшмәкдә чәтинлик чәкир. «Ушаглыгда биринҹи дәфә бу һекајәни ешидәндә һиддәт ичиндәјдим. Ахы Аллаһ белә шеји неҹә бујура биләр?» — дејә профессор Керол Деланеј етираф едир. Белә һиссләри баша дүшмәк олар. Бу һекајәјә ајдынлыг ҝәтирмәк үчүн ҝәлин бир нечә амили нәзәрдән кечирәк.

Биринҹиси, Јеһованын нәји етмәдијини нәзәрдән кечирәк. Ибраһим оғлуну гурбан ҝәтирмәјә һазыр олса да, Аллаһ буна јол вермәди вә буну бир даһа һеч кимдән хаһиш етмәди. Јеһова истәјир ки, Онун бүтүн хидмәтчиләри, еләҹә дә ушаглар узунөмүрлү олуб хошбәхт һәјатдан зөвг алсынлар.

Икинҹиси, Мүгәддәс Китабда јазыланлара әсасән, Јеһованын Ибраһимдән оғлуну гурбан ҝәтирмәсини хаһиш етмәсинин хүсуси сәбәби вар иди. Аллаһ әсрләр сонра Өз Оғлуa Исаны гурбан вермәк нијјәтиндә иди (Матта 20:28). Бунунла Јеһова садәҹә бу гурбанын Она нәјин баһасына баша ҝәләҹәјини ҝөстәрмәк истәјирди. Ибраһимдән оғлуну гурбан ҝәтирмәји хаһиш етмәклә Јеһова ҝәләҹәкдә Өзүнүн ҝәтирәҹәји гурбаны мөһтәшәм шәкилдә нүмајиш етдирди. Нәјә ҝөрә буну белә демәк олар?

Јеһованын Ибраһимә дедији сөзләрә диггәт јетирәк: «Севдијин јеҝанә оғлуну — Исһагы ҝөтүрүб... јандырма гурбаны олараг тәгдим ет» (Јарадылыш 22:2). Фикир верин: Јеһова бурада Исһагы Ибраһимин севимли оғлу адландырыр. О, Исһагын Ибраһимә нә гәдәр әзиз олдуғуну билирди. Аллаһ да Өз Оғлу Исаја ејни һиссләри бәсләјирди. Јеһова Исаны о дәрәҹәдә севирди ки, ҝөјләрдән ики дәфә ону «Мәним севимли Оғлум» дејә адландырмышды (Марк 1:11; 9:7).

Бир шеји дә нәзәрә алаг ки, Јеһова Ибраһимдән тәләб јох, хаһиш едирди. Бир Мүгәддәс Китаб алиминин фикринҹә, орижинал мәтндә һәмин ајәдә хаһиш мәнасыны билдирән сөз она ишарә едир ки, «Аллаһ Онун хаһишинин Ибраһим үчүн неҹә бөјүк итки олдуғуну баша дүшүрдү». Тәсәввүр едә биләрсиниз, бу хаһиш Ибраһими неҹә дә бөјүк кәдәрә гәрг етмишди? Ејнилә, Јеһованын севимли Оғлунун әзабыны вә өлүмүнү ҝөзләрилә ҝөрмәсинин Она неҹә үрәкағрысы вердијини, чәтин ки, сонадәк баша дүшәк. Шүбһә јохдур ки, Јеһова һәлә белә үрәкағрысы кечирмәмишди вә кечирмәјәҹәк дә.

Јеһованын Ибраһимдән етдији хаһиши бизә нә гәдәр мүәммалы ҝөрүнсә дә, бир шеји унутмајаг: Јеһова садиг тајфа башчысынын бу гурбаны ҝәтирмәсинә јол вермәди. О, Исһагын өлүмүнүн гаршысыны алараг өвлад иткисинин ағрысыны Ибраһимә чәкдирмәди. Лакин Јеһова Өз «Оғлуну әсирҝәмәјиб һамымызын уғрунда гурбан» верди (Ромалылара 8:32). Бәс нәјә ҝөрә Јеһованын Өзү бу әзабы чәкмәјә разы олду? О, буну бизим һәјата говушмағымыз үчүн етди (1 Јәһја 4:9). Бу, Аллаһын бизә олан мәһәббәтинин мөһтәшәм тәзаһүрүдүр! Бу, бизи Аллаһы севмәјә тәшвиг етмирми?b

[Һашијәләр]