Мүгәддәс Китаб ҝәләҹәкдән хәбәр верирми?

Бу мәгалә сизи марагландыран суаллара тохунур вә онларын ҹавабыны Мүгәддәс Китабынызда тапмаға көмәк едәҹәк. Јеһованын Шаһидләри сизинлә бу суаллары мәмнунијјәтлә мүзакирә едәҹәкләр.

1. Мүгәддәс Китаб пејғәмбәрликләри нә дәрәҹәдә дәгигдир?

Ҝәләҹәји бүтүн тәфәррүаты илә јалныз Күлли-Ихтијар Аллаһ ҝөрә биләр (Амос 3:7). Мәсәлән, О, Мәсиһ адландырылан бир нәфәрин дүнјаја ҝәләҹәјини һәлә гәдим заманларда демишди. Мәсиһ садиг инсан Ибраһим пејғәмбәрин нәслиндән ҝәләҹәкди. О, итаәткар бәшәријјәтә ағры-аҹысы олмајан ҝөзәл һәјат бәхш едәҹәк бир һөкмдар олаҹагды (Јарадылыш 22:18; Јешаја 53:4, 5). Вәд едилмиш бу адам Бетлеһемдә [Бет-Лехем] анадан олмалы иди. (Микеја 5:2 ајәсини оху.)

Иса пејғәмбәр һәмин вәд олунмуш Мәсиһ олду. Тәхминән 700 ил өнҹә Мүгәддәс Китабда дејилмишдир ки, Мәсиһ бакирә гыздан доғулаҹаг вә ону һәгарәтлә гаршылајаҹаглар. О, чохларынын ҝүнаһы үчүн һәјатыны гурбан верәҹәк вә дөвләтли адамын јанында дәфн олунаҹаг (Јешаја 7:14; 53:3, 9, 12). Еләҹә дә Аллаһын Кәламында тәхминән беш әср әввәл пејғәмбәрлик едилмишдир ки, о, бир сыпанын үстүндә Јерусәлимә дахил олаҹаг вә 30 ҝүмүш пула әлә вериләҹәк. Бүтүн бу дејиләнләр хырдалығына гәдәр јеринә јетди. (Зәкәријјә 9:9; 11:12 ајәләрини оху.)

2. Аллаһ һадисәләрин тарихини дә габагҹадан дејирми?

Мүгәддәс Јазыларда Мәсиһин ҝәлишинин дәгиг или тәхминән беш әср әввәл пејғәмбәрлик едилмишдир. Даниел 9:25 ајәсиндә дејилир: «Јерусәлими әввәлки һалына гојмаг вә бина етмәк үчүн әмрин чыхмасындан мәсһ олунан һөкмдара гәдәр једди һәфтә вә алтмыш ики һәфтә олаҹаг» (Китабы Мукаддес). Мәсиһин ҝәлишинә гәдәр олан вахт иллик һәфтәләрлә өлчүлүрдү. 7 һәфтә илә 62 һәфтәнин ҹәми 69 иллик һәфтәјә, јәни 483 илә бәрабәрдир. Бу иллик һәфтәләр нә заман башлајыб? Мүгәддәс Китаба әсасән, Аллаһын хидмәтчиси Неһемја Јерусәлимә ҝәлиб шәһәри бәрпа етмәјә башлајанда һәмин дөвр башламышдыр. Фарс тарихи бунун б. е. ә. 455-ҹи илдә олдуғуну ҝөстәрир (Неһемја 2:1—5). Иса, 483 ил сонра, ерамызын 29-ҹу илиндә Мәсиһ кими вәфтиз олунду.

3. Мүгәддәс Китаб пејғәмбәрликләри бизим ҝүнләрдә дә јеринә јетирми?

Иса бизим ҝүнләрдә мүһүм һадисәләрин баш верәҹәјини пејғәмбәрлик етмишди. Онун пејғәмбәрлијиндә бүтүн дүнјада салеһләрә раһатлыг ҝәтирәҹәк Аллаһын Падшаһлығы һаггында хош хәбәр хатырланыр. Бу Падшаһлыг јашадығымыз индики пис системи тамамилә мәһв едәҹәк. (Матта 24:14, 21, 22 ајәләрини оху.)

Мүгәддәс Китабда һал-һазыркы системин сонунда баш верәҹәк һадисәләр тәфәррүаты илә габагҹадан сөјләнилмишдир. Пејғәмбәрлијә әсасән, инкишаф әсриндә һәр шејин јахшылашмасы әвәзинә, инсанлар јер күрәсини ҝетдикҹә тәләф едәҹәкләр. Мүһарибәләрин, гытлығын, зәлзәләләрин вә епидемијаларын ҝәтирдији әзаб-әзијјәтләр ҝет-ҝедә чохалаҹаг (Лука 21:11; Вәһј 11:18). Әхлаг нормалары дәјәрдән дүшәҹәк. Бу чәтин зәманәдә Исанын давамчылары бүтүн халглара Аллаһын Падшаһлығы һаггында хош хәбәри тәблиғ едәҹәкләр. (Матта 24:3, 7, 8; 2 Тимотејә 3:1—5 ајәләрини оху.)

4. Бәшәријјәти ҝәләҹәкдә нә ҝөзләјир?

Гадир Аллаһын салеһ инсанларын ҝәләҹәјинә даир јахшы нијјәти вар. Иса Мәсиһ сечдији инсанларла бәрабәр ҝөјдән јери идарә едәҹәк. Онлар бирликдә мин ил һөкмранлыг едәҹәк Падшаһлыг һөкумәтини тәшкил едирләр. Өлүләр дирилдиләҹәк вә онлара әбәди һәјаты газанмаға имкан вериләҹәк. Бундан әлавә, бу һөкумәт онун һөкмранлығы алтында јашајаҹаг бүтүн инсанларын сағламлығыны бәрпа едәҹәк. Артыг хәстәлик вә өлүм олмајаҹаг. (Вәһј 5:10; 20:6, 12; 21:4, 5 ајәләрини оху.)

Әлавә мәлумат үчүн «Мүгәддәс Китаб әслиндә нә өјрәдир?» китабынын 23—25 вә 197—201-ҹи сәһифәләринә бахын.