Аилә үзвләрин иманына шәрик олмасалар да, хошбәхт олмаг мүмкүндүр

«Нә билирсән, бәлкә,.. [һәјат јолдашыны] хилас етдин?» (1 КОР. 7:16).

НӨВБӘТИ СУАЛЛАРЫН ҸАВАБЫНЫ ТАПА БИЛӘРСӘН?

Аилә үзвләри иманына шәрик олмајан мәсиһчи евдә неҹә сүлһ јарада биләр?

Мәсиһчи доғмаларына һәгигәти гәбул етмәјә неҹә көмәк едә биләр?

Јығынҹаг үзвләри һәгигәтдә олмајан гоһумлары илә бир евдә јашајан мәсиһчијә неҹә дәстәк ола биләрләр?

1. Инсанын Падшаһлыг һаггында хош хәбәри гәбул етмәси онун аиләсинә неҹә тәсир едә биләр?

БИР ДӘФӘ Иса һәвариләрини тәблиғ етмәјә ҝөндәрәндә онлара тапшырмышды: «Ҝетдијиниз јерләрдә: “Сәмави падшаһлыг јахынлашыб”, — дејәрәк тәблиғ един» (Мат. 10:1, 7). Бу хош хәбәр ону үрәкдән вә миннәтдарлыгла гәбул едән инсанлара сүлһ вә хошбәхтлик ҝәтирәҹәкди. Лакин Иса һәвариләрини хәбәрдар етмишди ки, бир чохлары Падшаһлығын тәблиғ ишинә дүшмән кәсиләҹәкләр (Мат. 10:16—23). Падшаһлыг һагда хош хәбәри рәдд едән аилә үзвләринин ҝөстәрдији мүгавимәт исә хүсусилә ағырдыр. (Матта 10:34—36 ајәләрини оху.)

2. Һарадан билирик ки, аилә үзвләри һәгигәтдә олмајан инсанлар үчүн хошбәхтлик әлчатмаз дејил?

² Бәс әҝәр һәгигәти гәбул едән инсанын аилә үзвләри онун иманына шәрик дејилләрсә, бу о демәкдирми ки, хошбәхтлик онун үчүн бир хәјалдыр? Әлбәттә, јох! Бәзиләри аиләләриндә шиддәтли мүгавимәтләрлә үзләшсәләр дә, бу һеч дә һәгигәти гәбул едән инсанларын һамысы илә баш вермир. Үстәлик, бәзи һалларда бу мүгавимәтләр гысамүддәтли олур. Чох шеј инсанын мүгавимәтә вә ја лагејдлијә мүнасибәтиндән асылыдыр. Бундан әлавә, Јеһова Она садиг галан инсанлара хејир-дуа верир — О, әлверишсиз шәраитдә онларын гәлбини севинҹлә долдурур. Һәгигәти гәбул едән инсан 1) евдә сүлһ јаратмаға вә 2) аилә үзвләринин сәмими-гәлбдән һәгиги ибадәти гәбул етмәләринә көмәк етмәјә чалышмагла хошбәхтлијини артыра биләр.

АИЛӘДӘ СҮЛҺӘ ҸАН АТ

3. Мәсиһчи нәјә ҝөрә аиләсиндә сүлһ јаратмаға чалышмалыдыр?

³ Аиләдә сүлһүн олмасы салеһлик тохумунун бәһрә ҝәтирмәси үчүн ваҹиб шәртдир. (Јагуб 3:18 ајәсини оху.) Һәтта әҝәр мәсиһчинин аилә үзвләри һәлә дә һәгиги ибадәтдә бирләшмәјибләрсә, о, евдә сүлһ јаратмаг үчүн сәјлә чалышмалыдыр. Буну неҹә етмәк олар?

4. Мәсиһчи гәлб раһатлығыны неҹә горуја биләр?

⁴ Мәсиһчи гәлб раһатлығыны горумалыдыр. Бунун үчүн о, үрәкдән дуа етмәлидир, чүнки дуа гәлбимизи тајы-бәрабәри олмајан «Аллаһын вердији» раһатлыгла, јәни сүлһлә долдура биләр (Филип. 4:6, 7). Хошбәхтлик вә сүлһ Јеһова һаггында билик әлдә етмәјин вә Мүгәддәс Китаб принсипләрини тәтбиг етмәјин нәтиҹәсидир (Јешаја 54:13). Әмин-аманлыг вә хошбәхтлик ичиндә јашамаг үчүн јығынҹаг ҝөрүшләриндә вә тәблиғ фәалијјәтиндә сәјлә иштирак етмәјимиз дә ваҹибдир. Аилә үзвләри һәгигәтдә олмајан һәмиманлыларымыз үчүн, адәтән, мәсиһчи фәалијјәтинин мүәјјән саһәләриндә иштирак етмәк мүмкүндүр. Ҝәлин әри тәрәфиндән амансыз тәгибләрә мәруз галан Ензаa адлы бир баҹымызын нүмунәсинә диггәт јетирәк. О, ев ишләрини ҝөрдүкдән сонра хидмәтә чыхыр. Енза дејир: «Һәр дәфә хош хәбәри башгалары илә бөлүшмәк үчүн сәј ҝөстәрәндә Јеһова мүсбәт нәтиҹәләрлә мәни бол-бол хејир-дуаландырыр». Шүбһәсиз ки, бу ҹүр хејир-дуалар сүлһ, мәмнунлуг вә хошбәхтлик ҝәтирир.

5. Аилә үзвләри иманларына шәрик олмајан мәсиһчиләр чох вахт һансы чәтинликлә үзләширләр вә онлар һарадан көмәк ала биләрләр?

⁵ Иманымыза шәрик олмајан доғмаларымызла сүлһ мүнасибәти јаратмаг үчүн бөјүк сәј ҝөстәрмәк лазымдыр. Анҹаг онлар биздән Мүгәддәс Китаб принсипләринә зидд олан бир шеј етмәјимизи истәјәндә бу, мүшкүл мәсәләјә чеврилә биләр. Дүзҝүн принсипләрә сәдагәтлә риајәт етмәјимиз доғмаларымызын бәзиләрини мәјус етсә дә, тутдуғумуз бу мөвге ҝеҹ-тез аиләмиздә сүлһ јарадаҹаг. Лакин Мүгәддәс Китаб принсипләринә зидд олмајан мәсәләләрдә инадкарлыг ҝөстәрмәк лазымсыз чәкишмәләрә ҝәтириб чыхарда биләр. (Сүлејманын мәсәлләри 16:7 ајәсини оху.) Чәтинликләр јарананда Мүгәддәс Китаб мәсләһәтләри үчүн садиг вә ағыллы нөкәр синфинин нәшрләринә вә ағсаггаллара мүраҹиәт етмәк ваҹибдир (Сүл. мәс. 11:14).

6, 7. а) Нәјә ҝөрә Јеһованын Шаһидләри илә Мүгәддәс Китабы өјрәнмәјә башлајан инсана аилә үзвләри бәзән гаршы чыхыр? б) Мүгәддәс Китабы өјрәнмәјә башлајан вә ја артыг мәсиһчи олан кәс мүгавимәтлә үзләшдикдә неҹә давранмалыдыр?

⁶ Евдә сүлһ јаратмаг үчүн Јеһоваја етибар етмәли вә иманымыза шәрик олмајан аилә үзвләримизин һиссләрини баша дүшмәјә чалышмалыјыг (Сүл. мәс. 8:9а). Һәтта Мүгәддәс Китабы тәзәҹә өјрәнмәјә башлајан инсанлар да анлајыш ҝөстәрә биләрләр. Бәзи киши вә гадынлар өз һәјат јолдашларынын Мүгәддәс Китабы өјрәнмәләринә етираз етмирләр. Онлар һәтта бунун аиләјә јахшы тәсир ҝөстәрмәси илә разылаша биләрләр. Амма әдавәтли мүнасибәт ҝөстәрәнләр дә вар. Артыг Јеһованын хидмәтчиси олан Естер етираф едир ки, әри Мүгәддәс Китабы өјрәнмәјә башлајанда «јаман гәзәбли» иди. О дејир: «Мән онун китаб-журналларыны ја туллајыр, ја да јандырырдым». Арвады тәзә-тәзә Мүгәддәс Китабы өјрәнмәјә башлајанда она мүгавимәт ҝөстәрән Һовард исә гејд едир: «Бир чох кишиләр горхурлар ки, бирдән һәјат јолдашларыны товлајыб тәригәтә ҹәлб едәрләр. Ҝөзүндә тәһлүкәли ҝөрүнән бу вәзијјәтдә нә етмәли олдуғуну билмәјән әр әдавәтли мүнасибәт ҝөстәрмәјә башлаја биләр».

⁷ Мүгәддәс Китабы өјрәтдијимиз инсан һәјат јолдашынын мүгавимәти илә үзләшәндә она изаһ етмәлијик ки, буна ҝөрә өјрәнмәни дајандырмаг лазым дејил. Әксәр һалларда о, проблемләри мүлајимлик тәзаһүр етдирмәклә вә иманына шәрик олмајан һәјат јолдашына һөрмәтҹил мүнасибәт ҝөстәрмәклә һәлл едә биләр (1 Пет. 3:15). Һовард дејир: «Һәјат јолдашыма неҹә дә миннәтдарам ки, о, һәмишә өзүнү тәмкинли апарырды вә һеч нәји үрәјинә салмырды». Онун јолдашы изаһ едир: «Һовард мәндән Мүгәддәс Китабы өјрәнмәји дајандырмағы тәләб едирди. О дүшүнүрдү ки, онлар бејними јаланларла долдурурлар. Онунла мүбаһисә етмәк әвәзинә, дедим ки, ола билсин, о, һаглыдыр, амма мән онларын буну неҹә етдијини ҝөрмүрәм. Буна ҝөрә ондан хаһиш етдим ки, өјрәндијим китабы охусун. О, белә дә етди вә орада јазыланларла разылашды. Бу, она дәрин тәсир бағышлады». Биз јадда сахламалыјыг ки, мәсиһчи хидмәтә чыханда вә ја јығынҹаг ҝөрүшләринә ҝедәндә иманына шәрик олмајан һәјат јолдашы өзүнү атылмыш вә ја тәһлүкәдә һисс едә биләр. Лакин мәсиһчи сөздә вә әмәлдә һәјат јолдашыны севдијини ҝөстәрсә, о, бу кими нараһатчылыглардан азад ола биләр.

ОНЛАРА ҺӘГИГӘТИ ГӘБУЛ ЕТМӘЈӘ КӨМӘК ЕТ

8. Һәјат јолдашлары иманда олмајан мәсиһчиләрә Павел нә мәсләһәт ҝөрүрдү?

⁸ Һәвари Павел мәсиһчиләрә мәсләһәт ҝөрүрдү ки, һәјат јолдашлары садәҹә иманда олмадыгларына ҝөрә аиләләрини дағытмасынларb. (1 Коринфлиләрә 7:12—16 ајәләрини оху.) Еһтимал вар ки, мәсиһчинин һәјат јолдашы һәгигәти гәбул етсин вә буну јадда сахламаг мәсиһчијә хошбәхтлијини горумаға көмәк едә биләр. Лакин мәсиһчи һәјат јолдашына һәгигәти чатдырмаға чалышаркән бир шеји нәзәрә алмалыдыр. Ҝәлин бәзи нүмунәләрә бахаг.

9. Иманымыза шәрик олмајан аилә үзвләримизә Мүгәддәс Китаб һәгигәтләрини тәгдим едәркән нәдән гачынмалыјыг?

⁹ Ҹејсон Мүгәддәс Китаб һәгигәтләрини өјрәнмәјә башлајанда севинҹиндән јерә-ҝөјә сығмырды. О, бу һагда хатырлајараг дејир: «Мән бу барәдә һамыја данышмаг истәјирдим!» Инсан Мүгәддәс Китабдан өјрәндикләринин һәгигәт олдуғуну дәрк едәндә севинҹиндән бу һагда дурмадан даныша биләр. О үмид едә биләр ки, аилә үзвләри дә хош хәбәрә дәрһал һај верәҹәкләр, анҹаг бу, онларда әкс мүнасибәт јарада биләр. Бәс Ҹејсон һәгигәти өјрәнәндә ондакы шөвг јолдашына неҹә тәсир етмишди? Онун јолдашы хатырлајыр: «О, мәни боғаза јығмышды». Әриндән 18 ил сонра һәгигәти гәбул едән бир гадын исә дејир: «Мән һәгигәти јаваш-јаваш мәнимсәјәнләрдәнәм». Әҝәр сән һал-һазырда һәјат јолдашы һәгиги ибадәтә гошулмаг истәмәјән инсанла Мүгәддәс Китабы өјрәнирсәнсә, бу мәсәләјә нәзакәтлә јанашмағын үсулларыны нәјә ҝөрә она өјрәтмәјәсән? Муса демишди: «Гој тәлимим јағыш кими төкүлсүн, сөзүм шеһ кими дүшсүн, чәмән үзәринә дүшән нарын јағыш тәк олсун» (Ганун. т. 32:2). Руһани лејсандан фәргли олараг, јериндә дејилән һәгигәт дамҹылары, адәтән, даһа тәсирли олур.

10-12. а) Һәвари Петер һәјат јолдашлары иманларына шәрик олмајан мәсиһчиләрә һансы мәсләһәти вермишди? б) Мүгәддәс Китабы өјрәнән бир гадын 1 Петер 3:1, 2 ајәләриндәки мәсләһәти тәтбиг етмәји неҹә өјрәнди?

¹⁰ Һәвари Петер Аллаһдан илһам алараг әрләри иманда олмајан мәсиһчи гадынлара јазмышды: «Әрләринизә табе олун ки, Аллаһын сөзүнә итаәт етмәјән әрләриниз сизин исмәтли јашајышынызы вә дәрин һөрмәтинизи ҝөрүб, давранышынызла сөзсүз фәтһ едилсинләр» (1 Пет. 3:1, 2). Әринин кобуд рәфтарына бахмајараг, она итаәт едән вә һөрмәтини сахлајан мәсиһчи гадын ону фәтһ едә, јәни һәгиги ибадәтә ҝәлмәјә көмәк едә биләр. Мәсиһчи әрләр дә иманда олмајан һәјат јолдашлары тәрәфиндән мүгавимәтләрлә үзләшәндә өзләрини Аллаһа мәгбул тәрздә апармалы вә гајғыкеш аилә башчысы олмалыдырлар (1 Пет. 3:7—9).

¹¹ Бир чох мүасир нүмунәләр һәвари Петерин мәсләһәтинин нә гәдәр дәјәрли олдуғуну ҝөстәрир. Ҝәлин Селманын нүмунәсинә бахаг. О, Јеһованын Шаһидләри илә Мүгәддәс Китабы өјрәнмәјә башлајанда әри Стив наразы иди. Стив етираф едир: «Мән аҹыглы, гысганҹ, егоист олдум вә ҹаныма горху дүшмүшдү». Селма дејир: «Мәнә һәгигәтә ҝәлмәздән әввәл дә Стивлә јашамаг әзабдан башга бир шеј дејилди. О, түндхасијјәт вә тез өзүндән чыхан иди. Мән Мүгәддәс Китабы өјрәнмәјә башлајанда исә о, даһа бетәр олду». Бәс бу баҹыја нә көмәк етди?

¹² Селма она Мүгәддәс Китабы өјрәдән баҹынын вердији бир мәсләһәти хатырлајыр. О данышыр: «Бир дәфә Мүгәддәс Китабы өјрәнмәјә һеч һәвәсим јох иди. Бундан габагкы ахшам арамызда мүбаһисә дүшмүшдү вә Стив мәни вурмушду. Өзүмү чох пис вә бәдбәхт һисс едирдим. Һадисәни вә һиссләрими баҹыја данышанда о, мәндән 1 Коринфлиләрә 13:4—7 ајәләрини охумағы хаһиш етди. Охудугдан сонра мән Стивин бу ҝөзәл шејләрин һеч бирини мәним үчүн етмәдијиндән ҝилејләндим. Лакин баҹы мәни башга ҹүр дүшүнмәјә тәшвиг етди. О, мәндән сорушду: “Бәс мәһәббәтә хас олан бу хүсусијјәтләрин һансыны сән әринә гаршы тәзаһүр етдирмисән?” Мән: “Һеч бирини, чүнки онунла јашамаг чох чәтиндир”, — дејә ҹаваб вердим. Баҹы мүлајимҹәсинә сөзүнә давам етди: “Селма, икиниздән һансыныз мәсиһчи олмаға чалышыр? Сән, јохса Стив?” Мән баша дүшдүм ки, дүшүнҹә тәрзими дәјишмәлијәм. Стивә даһа чох мәһәббәт ҝөстәрмәк үчүн дуада Јеһовадан көмәк диләдим. Јаваш-јаваш һәр шеј дәјишмәјә башлады». 17 илдән сонра Стив һәгигәти гәбул етди.

БАШГАЛАРЫ НЕҸӘ КӨМӘК ЕДӘ БИЛӘР?

13, 14. Доғмалары һәгигәтдә олмајан һәмиманлыларына јығынҹаг үзвләри неҹә көмәк едә биләрләр?

¹³ Јерин дәрин гатларына нүфуз едәрәк биткиләрин бөјүмәсинә тәкан верән нарын јағыш дамҹылары кими, јығынҹағын бир чох үзвләри доғмалары иманларына шәрик олмајан мәсиһчиләрә хошбәхтликләрини горумагда јардымчы олурлар. Бразилијада јашајан Елвина дејир: «Мәнә һәгигәтдә мөһкәм дурмаға көмәк едән мәһз баҹы-гардашларымын мәһәббәти олмушдур».

¹⁴ Јығынҹаг үзвләри тәрәфиндән ҝөстәрилән хејирхаһлыг вә сәмими мараг мәсиһчинин һәгигәтдә олмајан доғмаларына бөјүк тәсир ҝөстәрә биләр. Арвадындан 13 ил сонра һәгигәтә ҝәлән ниҝеријалы бир киши дејир: «Ҝүнләрин бир ҝүнү бир Шаһидлә јол ҝедәркән онун машыны хараб олду. О, гоншу кәнддә һәмиманлыларыны тапды вә онлар бизә ҝеҹәләмәк үчүн јер вердиләр. Онлар бизи, санки, ушаглыгдан таныјырлармыш кими гејдимизә галдылар. Мәһз һәмин ан арвадымын һәмишә һаггында данышдығы мәсиһчи мәһәббәтини һисс етдим». Әриндән 18 ил сонра һәгигәти гәбул едән инҝилтәрәли бир гадын хатырлајыр: «Јеһованын Шаһидләри һәр икимизи дә гонаг чағырырдылар. Онларын евиндә һеч вахт өзүмү артыг һисс етмәмишәм»c. Һәмин өлкәдә јашајан вә бир мүддәт сонра һәгигәтә ҝәлән бир киши исә дејир: «Баҹы-гардашлар бизә тез-тез баш чәкир вә ја евләринә дәвәт едирдиләр. Онларын чох гајғыкеш олдуглары диггәтимдән јајынмады. Бу ҹәһәт мән хәстәханада јатаркән чохларынын мәнә баш чәкдији заман өзүнү хүсусилә бүрузә верди». Бәс сән неҹә, баҹы-гардашларымызын иманына шәрик олмајан аилә үзвләринә сәмими мараг ҝөстәрә биләрсәнми?

15, 16. Мәсиһчинин бүтүн сәјләринә бахмајараг, аилә үзвләри һәлә дә һәгигәти гәбул етмирләрсә, она хошбәхтлијини горумаға нә көмәк едә биләр?

¹⁵ Лакин етираф етмәк лазымдыр ки, илләр боју һәр шеји дүз едиб нәзакәтлә тәблиғ етсәк дә, гоһумларымызын һамысы һәгигәти гәбул етмир. Бәзиләри лагејд галыр, јахуд мүгавимәт ҝөстәрмәјә давам едирләр (Мат. 10:35—37). Анҹаг мәсиһчи Аллаһын бәјәндији хүсусијјәтләри тәзаһүр етдирәндә бу, чох јахшы бәһрә верә биләр. Әввәлләр һәјат јолдашынын иманына шәрик олмајан бир киши дејир: «Мәсиһчи бу ҝөзәл хүсусијјәтләрин онда шәфәг сачмасына јол верәндә һәјат јолдашынын зеһниндә вә үрәјиндә нәләрин баш вердијини билмир. Буна ҝөрә дә һеч вахт үмидинизи үзмәјин».

¹⁶ Аилә үзвләри һәгигәти гәбул етмәјән мәсиһчиләр үчүн хошбәхт олмаг мүмкүндүр. 21 ил сәј ҝөстәрмәсинә бахмајараг, әри һәгигәти гәбул етмәјән бир баҹы дејир: «Мән Јеһоваја садиг галмагла, еләҹә дә Ону разы салмаға вә руһанилијими мөһкәмләндирмәјә ҹан атмагла севинҹими горуја билирәм. Шәхси өјрәнмә кечирмәк, јығынҹаг ҝөрүшләриндә иштирак етмәк, хидмәтә чыхмаг вә јығынҹагда башгаларына әл тутмаг — бир сөзлә, фәал шәкилдә руһани ишләрлә мәшғул олмаг мәни Јеһоваја даһа јахын едир вә үрәјими горујур» (Сүл. мәс. 4:23).

ТӘСЛИМ ОЛМА!

17, 18. Аилә үзвләри иманына шәрик олмајан мәсиһчијә үмидини үзмәмәјә нә көмәк едә биләр?

¹⁷ Әҝәр аилә үзвләрин һәлә дә иманына шәрик дејилләрсә, тәслим олма! Унутма ки, «Рәбб халгыны Өз бөјүк исми наминә атмајаҹаг» (1 Шам. 12:22). Нә гәдәр ки Она бағлысан, О, сәни тәрк етмәјәҹәк. (2 Салнамәләр 15:2 ајәсини оху.) Буна ҝөрә дә «Рәбдән зөвг ал». «Јолуну Рәббә вер, Она ҝүвән» (Мәз. 37:4, 5). Даима дуа ет вә әмин ол ки, гајғыкеш сәмави Атамыз Јеһова һәр ҹүр чәтинлијин өһдәсиндән ҝәлмәјин үчүн сәнә көмәк етмәјә гадирдир (Ром. 12:12).

¹⁸ Јеһовадан дуада хаһиш ет ки, аиләндә сүлһә наил олмаг үчүн сәнә мүгәддәс руһундан версин (Ибр. 12:14). Бәли, әввәл-ахыр һәгигәтдә олмајан аилә үзвләринин үрәкләринә јол тапа биләҹәк сүлһ шәраити јаратмаг мүмкүндүр. Һәр шеји Аллаһын шәрәфләнмәси наминә етсән, өзүнү хошбәхт һисс едәҹәксән вә гәлб раһатлығы дујаҹагсан (1 Кор. 10:31). Һәмчинин унутма ки, јығынҹагдакы баҹы-гардашлар да мәһәббәтлә сәнә дајаг олмаға һазырдырлар. Буну билмәк үрәјимизи, һәгигәтән дә, риггәтә ҝәтирир!

[Һашијәләр]

[28-ҹи сәһифәдәки шәкил]

Етигадыны изаһ етмәк үчүн мүнасиб вахт сеч

[29-ҹу сәһифәдәки шәкил]

Иманына шәрик олмајан һәјат јолдашына гајғы ҝөстәр