«Мән кимдән ваһимәләним?»
«Мәнимлә дөјүшсәләр дә, архајынам» (МӘЗ. 27:3).
АШАҒЫДА ҜӘТИРИЛӘН АЈӘЛӘРӘ ӘСАСӘН, БИЗӘ ҸӘСАРӘТ ИНКИШАФ ЕТДИРМӘЈӘ НӘ КӨМӘК ЕДӘҸӘК?
1. Биз 27-ҹи мәзмурун көмәјилә һансы суалларын ҹавабыны тапаҹағыг?
ДҮНЈАДА вәзијјәтин писләшдији бир вахтда биз тәблиғ фәалијјәтимизи нәјә ҝөрә ҝенишләндиририк? Бүтүн дүнјада ҹидди игтисади проблемләрин түғјан етмәсинә бахмајараг, нә үчүн биз бөјүк севинҹлә вахтымызын вә ҝүҹүмүзүн чох һиссәсини тәблиғ ишинә сәрф едирик? Чохлары ҝәләҹәкдән горхдуғу бир һалда, биз неҹә ҹәсур гала билирик? Давуд падшаһын Аллаһдан илһам алараг јаздығы 27-ҹи мәзмур бу суаллара ҹаваб верир.
2. Ваһимә һисси инсана неҹә тәсир едир, бәс биз нәјә әминик?
2 Давуд мәзмуруну бу сөзләрлә ачыр: «Рәбдир нурум, гуртулушум! Мән кимдән горхум? Рәбдир өмрүмүн галасы, мән кимдән ваһимәләним?» (Мәз. 27:1). Горху һисси инсаны зәифләдә, ваһимә исә даһа ҹидди фәсадлар төрәдә биләр. Анҹаг Јеһовадан горхан инсан ваһимәјә дүшмәмәлидир (1 Пет. 3:14). Әҝәр Јеһованы галамыз һесаб едириксә, «әмин-аманлыгда јашајаҹаг, раһатлыг тапаҹаг, писликдән [горхмајаҹағыг]» (Сүл. мәс. 1:33; 3:25). Нәјә ҝөрә?
«РӘБДИР НУРУМ, ГУРТУЛУШУМ!»
3. Һансы мәнада Јеһова бизим нурумуздур, лакин биздән нә тәләб олунур?
3 «Рәбдир нурум» метафорасы Јеһованын бизи ҹаһилликдән вә руһани зүлмәтдән азад едән Аллаһ олдуғуна ишарә едир (Мәз. 27:1). Һәгиги ишыг бизә јолумуздакы тәһлүкәләри, јахуд манеәләри ҝөрмәјә көмәк едир, лакин онлары арадан галдырмыр. Биз ҝөрдүкләримизи нәзәрә алараг мүдрик давранмалыјыг. Ејнилә, Јеһова бизә дүнјада баш верән һадисәләрин мәғзини ачыглајыр, үстәлик, бу системдәки тәһлүкәләрдән хәбәрдар едир. Онун бизә өјрәтдији Мүгәддәс Китаб принсипләри һәр заман ишә јарајыр, биздән исә садәҹә олараг өјрәндикләримизи тәтбиг етмәк тәләб олунур. Биз белә едәндә һәм дүшмәнләримиздән, һәм дә мүәллимләримиздән даһа мүдрик давранырыг (Мәз. 119:98, 99, 130).
4. а) Давудун әминликлә: «Рәбдир... гуртулушум», — демәсинә сәбәб нә иди? б) Јеһова хүсусилә нә вахт бизим гуртулушумуз олаҹаг?
4 Давудун Мәзмур 27:1 ајәсиндәки сөзләри ҝөстәрир ки, о, Јеһованын кечмишдә ону неҹә гуртардығыны, јәни хилас етдијини унутмурду. Мисал үчүн, Јеһова ону аслан вә ајы пәнҹәсиндән хилас етмишди. Јеһованын көмәји илә Давуд һәм дә нәһәнҝ Голјатын үзәриндә гәләбә чалмышды. Даһа сонра Шаул падшаһ бир нечә дәфә Давуду низә илә дивара јапышдырмаға ҹәһд ҝөстәрәндә Јеһова һәр дәфә онун дадына чатырды (1 Шам. 17:37, 49, 50; 18:11, 12; 19:10). Буна ҝөрә дә Давудун әминликлә: «Рәбдир... гуртулушум», — демәси һеч дә тәәҹҹүблү дејил. Јеһова Давудун гуртулушу олдуғу кими, мүасир хидмәтчиләринин дә гуртулушу олаҹаг. Неҹә? Онлары гаршыдан ҝәлән «бөјүк мүсибәтдән» хилас етмәклә (Вәһј 7:14; 2 Пет. 2:9).
ЈЕҺОВАНЫН ҺӘР ДӘФӘ СӘНӘ НЕҸӘ КӨМӘК ЕТДИЈИНИ УНУТМА
5, 6. а) Хатирәләр ҹәсарәт инкишаф етдирмәкдә һансы ролу ојнајыр? б) Јеһованын кечмишдә Өз халгыны неҹә хилас етдијини хатырламаг сәнә ҹәсарәтли олмаға неҹә көмәк едир?
5 Бизә ҹәсарәт инкишаф етдирмәјә көмәк едәҹәк ваҹиб амил барәдә Мәзмур 27:2, 3 ајәләриндә јазылыб. (Ајәләри оху.) Давуд кечмишдә Јеһованын ону неҹә хилас етдијини хатырлајырды (1 Шам. 17:34—37). Бу хатирәләр она ән ағыр сынаглар гаршысында әминлик верирди. Сән дә башына ҝәлән һадисәләрдән ејни нәтиҹә чыхарырсанмы? Мисал үчүн, сәни нараһат едән проблем барәдә усанмадан дуа етдикдән сонра Јеһованын сәнә тәгибләрин өһдәсиндән ҝәлмәк үчүн неҹә мүдриклик вә ҝүҹ вердијини һисс етмисәнми? Јахуд да сәнә севинҹлә хидмәт етмәјинә әнҝәл төрәдән манеәнин неҹә арадан галдырылдығыны вә ја гаршында ҝениш фәалијјәт гапысынын неҹә ачылдығыны хатырлајырсанмы? (1 Кор. 16:9). Инди бунлар јадына дүшәндә һансы һиссләри кечирирсән? Мәҝәр бу хатирәләр Јеһованын көмәјилә даһа ҹидди манеәләрин вә бәдбәхтликләрин өһдәсиндән ҝәләҹәјинә даир әминлијини мөһкәмләндирмир? (Ром. 5:3—5).
6 Бәс әҝәр һансыса гүдрәтли бир дөвләт Јеһованын Шаһидләринин тәшкилатынын көкүнү кәсмәк фикринә дүшсәјди, биз нә едәрдик? Бир чох мүасир һөкмдарлар буна ҹәһд ҝөстәрмишләр, лакин онлар мүвәффәгијјәтсизлијә уғрамышлар. Әҝәр биз Јеһованын кечмишдә Өз халгыны неҹә хилас етдијини јадымызда сахласаг, бу, бизә ҝәләҹәјә әминликлә бахмаға көмәк едәҹәк (Дан. 3:28).
ТӘМИЗ ИБАДӘТИ ГИЈМӘТЛӘНДИР
7, 8. а) Мәзмур 27:4 ајәсинә әсасән, Давуд Јеһовадан нә диләјирди? б) Јеһованын бөјүк руһани мәбәди нәдир вә биз орада неҹә ибадәт едирик?
7 Бизә ҹәсарәтли олмаға көмәк едән диҝәр ваҹиб амил һәгиги ибадәти севмәјимиздир. (Мәзмур 27:4 ајәсини оху.) Давудун ҝүнләриндә «Рәббин еви» дејилдикдә, мүгәддәс мәскән нәзәрдә тутулурду. Давуд оғлу Сүлејманын ҝөзәл мәбәд тикмәси үчүн габагҹадан тәдарүк ҝөрмүшдү. Әсрләр сонра Иса гејд етмишди ки, Јеһоваја мәгбул тәрздә ибадәт етмәк үчүн бу мөһтәшәм мәбәдә ҝетмәјә артыг һеч бир еһтијаҹ олмајаҹаг (Јәһ. 4:21—23). Һәвари Павел ибраниләрә үнванладығы мәктубунун 8-дән 10-дәк фәсилләриндә изаһ етмишди ки, артыг бөјүк руһани мәбәд фәалијјәт ҝөстәрмәјә башлајыб. Бу, ерамызын 29-ҹу илиндә Иса вәфтиз олунаркән өзүнү Јеһованын ирадәсини јеринә јетирмәјә тәгдим етдији заман баш вериб (Ибр. 10:10). Бу бөјүк руһани мәбәд Исанын фидјә гурбанлығы васитәсилә Аллаһа мүнасиб тәрздә јахынлашмаға көмәк едән гурулушу тәмсил едир. Биз бу руһани мәбәддә неҹә ибадәт едирик? Јеһоваја «сидги-үрәкдән вә имандан доған там гәтијјәтлә» дуа етмәклә, үмидимиз барәдә ҹәсарәтлә тәблиғ етмәклә, еләҹә дә јығынҹаг ҝөрүшләриндә вә аиләви ибадәт заманы бирҝә топлашараг һәмиманлыларымызы руһландырмагла (Ибр. 10:22—25). Һәгиги ибадәти гијмәтләндирмәјимиз бу кешмәкешли сон ҝүнләрдә бизи мөһкәмләндирир.
8 Бүтүн дүнјада Јеһованын садиг хидмәтчиләри фәалијјәт даирәләрини ҝенишләндирирләр: јени дилләр өјрәнир вә Падшаһлығын тәблиғчиләринә даһа чох еһтијаҹ олан әразиләрә көчүрләр. Аллаһын бу хидмәтчиләринин әмәлләриндән бәлли олур ки, мәзмурчу кими, онларын да Јеһовадан бир истәкләри, бир арзулары вар. Онлар һәр нә олурса-олсун, Јеһованын ҹалалына бахмаг вә мүгәддәс хидмәтдә иштирак етмәк истәјирләр. (Мәзмур 27:6 ајәсини оху.)
АЛЛАҺЫН КӨМӘЈИНӘ ҜҮВӘН
9, 10. Мәзмур 27:10 ајәси бизи нәјә әмин едир?
9 Давуд Јеһованын көмәјинә там ҝүвәндијини нөвбәти сөзләрлә билдирир: «Ата-анам мәни атса белә, Рәбб мәни гәбул едәр» (Мәз. 27:10). «Биринҹи Шамуел» китабынын 22-ҹи фәслиндән белә бир нәтиҹәјә ҝәлирик ки, Давудун валидејнләри һеч вахт ону тәрк етмәмишдиләр. Лакин һал-һазыркы дөврдә чохларынын аиләләри онлардан рәһмсизҹәсинә үз дөндәриб. Бу инсанларын чоху көмәк вә мүдафиәни гајғыкеш мәсиһчи јығынҹағында тапмышлар.
10 Әҝәр Јеһова Өз хидмәтчиләринә башгалары онлары атдығы заман дајаг олмаға һазырдырса, мәҝәр диҝәр сынагларла үзләшәндә онлара көмәк етмәјәҹәк? Мәсәлән, әҝәр биз аиләмизи мадди ҹәһәтдән тәмин етмәклә бағлы нараһатчылыг кечиририксә, мәҝәр Јеһованын бизә көмәк едәҹәјинә әмин олмалы дејилик? (Ибр. 13:5, 6). О, бүтүн садиг хидмәтчиләринин шәраитләринә вә тәләбатларына бәләддир.
11. Јеһоваја ҝүвәнмәјимиз башгаларына неҹә тәсир ҝөстәрә биләр? Нүмунә чәкин.
11 Ҝәлин Либеријада јашајан вә Мүгәддәс Китабы өјрәнән Викторија адлы бир гадынын нүмунәсинә бахаг. Онунла јашајан киши ону вә үч ушағыны атыб ҝетди. Евсиз-ешиксиз вә ишсиз галмасына бахмајараг, о, руһән инкишаф едиб вәфтиз олду. Викторија вәфтиз оландан сонра онун 13 јашлы гызы ичи пулла долу олан бир пул кисәси тапды. Пула тамаһлары дүшмәсин дејә ону сајмамаг гәрарына ҝәлдиләр. Онлар дәрһал пул кисәсинин саһиби олан әсҝәрлә әлагә сахладылар. Әсҝәр онлара деди ки, әҝәр бүтүн инсанлар Јеһованын Шаһидләри кими дүрүст олсајдылар, дүнја даһа јахшы, даһа тәһлүкәсиз оларды. Викторија Мүгәддәс Китабдан она Јеһованын јени дүнја һаггындакы вәдини ҝөстәрди. Баҹынын дүрүстлүјүндән тәсирләнән әсҝәр һәмин пул габындан она мүкафат олараг бөјүк мәбләғдә пул верди. Һәгигәтән дә, Јеһованын Шаһидләринин Аллаһын онларын гајғысына галмаға гадир олдуғуна даир әминлији онлара бүтүн дүнјада дүрүст инсанлар кими ад газандырыб.
12. Мадди чәтинликләрә бахмајараг, Јеһоваја хидмәти давам етдирмәклә биз нәји ҝөстәрмиш олуруг? Нүмунә чәкин.
12 Инди исә Сјерра–Леонедән олан Томас адлы бир вәфтиз олунмамыш тәблиғчинин нүмунәсинә нәзәр салаг вә онун кечирдији һиссләри тәсәввүр етмәјә чалышаг. Томас мәктәбдә мүәллим ишләмәјә башламышды, лакин сәнәдләшмә илә бағлы иш баша чатмамыш о, тәхминән бир ил маашыны ала билмирди. Иллик мәваҹибини алмаздан өнҹә Томасы мәктәбин директору илә — кешишлә сөһбәт ҝөзләјирди. Кешиш она изаһ етди ки, Јеһованын Шаһидләринин етигадлары онларынкы илә үст-үстә дүшмүр. О тәкид едирди ки, Томас өз әгидәси илә иш арасында сечим етсин. Томас ишдән чыхмағы вә иллик мәваҹибиндән имтина етмәји сечди. Сонрадан о, радио вә мобил телефонларын тәмири илә бағлы јени иш тапды. Бу вә буна бәнзәр диҝәр нүмунәләр ҝөстәрир ки, пулсуз-парасыз галмаг горхусу чохларыны ваһимәјә сала биләр, анҹаг биз әминик ки, һәр шеји јарадан вә һәр заман халгынын гајғысына галан Јеһова һеч вахт бизи тәрк етмәјәҹәк.
13. Мадди ҹәһәтдән әзијјәт чәкән өлкәләрдә Падшаһлыг иши неҹә инкишаф едир?
13 Һәјат шәраитинин чәтин олдуғу бир чох өлкәләрдә тәблиғчиләр, адәтән, нәзәрәчарпаҹаг дәрәҹәдә активдирләр. Буна сәбәб нәдир? Бир филиалдан белә бир мәктуб ҝәлиб: «Мүгәддәс Китабы өјрәнмәјә разылыг верән инсанларын чоху ишсиздир, буна ҝөрә дә Аллаһын Кәламыны арашдырмаг үчүн онларын вахты чох олур. Гардашларын да тәблиғә ҝетмәјә вахтлары чохдур. Инсанлара, хүсусилә дә ән пис шәраитдә јашајанлара бизим сон ҝүнләрдә јашадығымызы демәјә еһтијаҹ јохдур, һәр шеј онларын ҝөзү габағындадыр». Һәр тәблиғчинин, орта һесабла, үчдән чох инсана Мүгәддәс Китабы өјрәтдији бир өлкәдә 12 илдән чох хүсуси тәјинатлы мүждәчи кими хидмәт едән бир гардаш јазыр: «Бир чох тәблиғчиләр садә һәјат тәрзи сүрүрләр вә онларын диггәтини јајындыран шејләр аздыр, буна ҝөрә дә үмумиликдә онларын саһә хидмәтинә вә инсанларла Мүгәддәс Китаб өјрәнмәси кечирмәјә даһа чох вахтлары вар».
14. Бөјүк издиһам Јеһованын мүдафиәсиндән неҹә јарарлана биләр?
14 Јеһова сөз вериб ки, халгыны, бир груп шәклиндә, һәм физики, һәм дә руһани зәрәрдән горујаҹаг, хилас едәҹәк вә јардым ҝөстәрәҹәк. Биз Онун вәдинә етибар едирик (Мәз. 37:28; 91:1—3). «Бөјүк мүсибәтдән» сағ чыхаҹаг издиһам, һәгигәтән дә, бөјүк олмалыдыр (Вәһј 7:9, 14). Буна ҝөрә дә Јеһова һеч вахт јол вермәјәҹәк ки, кимсә бу ахыр ҝүнләрдә һәмин издиһамы груп шәклиндә мәһв етсин. Онлар тәгибләрә дөзмәк вә Јеһова илә мүнасибәтләрини горујуб сахламаг үчүн лазым олан һәр шејлә тәмин олунаҹаглар. Вә бөјүк мүсибәтин сон мәрһәләсиндә Јеһова Өз халгыны мүдафиә едәҹәк.
«ЈА РӘББ, ЈОЛУНУ МӘНӘ ӨЈРӘТ»
15, 16. Аллаһын ҝөстәришләринә риајәт етмәк һансы фајданы ҝәтирир? Нүмунә чәкин.
15 Ҹәсарәтли галмаг үчүн бизим даима Јеһованын тәлимләринә еһтијаҹымыз вар. Бу, Давудун јалварыш дуасындан ҝөрүнүр: «Ја Рәбб, јолуну мәнә өјрәт, дүшмәнләримдән өтрү мәнә дүз јолда рәһбәрлик ет» (Мәз. 27:11). Бу дуаја ујғун давранмаг Јеһованын тәшкилаты васитәсилә алдығымыз һәр бир Мүгәддәс Китаб ҝөстәришинә диггәт јетирмәк вә онлары дәрһал тәтбиг етмәк демәкдир. Лазымсыз борҹлардан азад олан бир чох баҹы-гардашлар тәсдиг едирләр ки, һәјаты садәләшдирмәјә даир верилән мүдрик мәсләһәтләри тәтбиг етмәк игтисади бөһранын түғјан етдији бу дөврдә онлара чох көмәк етмишдир. Сахлаја билмәдикләри әшјалары өзләринә јүк етмәк әвәзинә, бу баҹы-гардашлар онлардан азад олуб хидмәтләрини ҝенишләндирмишләр. Һәр биримиз өзүмүздән сорушмалыјыг: «Мүгәддәс Китабда, еләҹә дә садиг вә ағыллы нөкәрин нәшрләриндә охудуғум һәр шеји — һәтта бунун үчүн нәдәнсә кечмәк лазым ҝәлсә белә — тәтбиг едирәмми?» (Мат. 24:45).
16 Әҝәр Јеһованын бизә ҝөстәришләр вермәсинә вә салеһлик јолу илә апармасына јол версәк, горхмағымыза һеч бир сәбәб олмајаҹаг. Бирләшмиш Штатлардан олан даими пионер она вә бүтүн аиләсинә таммүддәтли хидмәтдә галмаға көмәк едәҹәк бир ишә әризә верәндә мүдири она деди ки, дипломсуз о, бу иши һеч ҹүр ала билмәз. Әҝәр бу, сәнинлә баш версәјди, таммүддәтли хидмәтдә олмаг үчүн али тәһсилдән имтина етдијинә ҝөрә һејфсләнәрдинми? Ики һәфтәдән сонра һәмин мүдир ишдән чыхарылды вә орада ишләјән башга бир мүдир исә гардашымыздан мәгсәдләри барәдә сорушду. Гардаш мүдирә онун вә һәјат јолдашынын Јеһованын Шаһидләри олдугларыны, таммүддәтли хидмәт етдикләрини вә бу хидмәти давам етдирмәк истәдикләрини сөјләди. Анҹаг гардаш сөзүнү давам етдирмәк истәјәндә мүдир деди: «Мән сизин башгаларындан фәргләндијинизә фикир вермишәм! Мәним атам өлүм ајағында оланда сизин ики һәмиманлыныз һәр ҝүн онун јанына ҝәлиб Мүгәддәс Китабы охујурду. Мән дә о вахтдан өзүмә сөз вермишдим ки, әҝәр әлимә нә вахтса Јеһованын Шаһидләриндән биринә көмәк етмәк фүрсәти дүшсә, мүтләг ондан истифадә едәҹәјәм». Сәһәриси ҝүн гардаш о бири мүдирин она вермәк истәмәдији иши алды. Јеһова бизи әмин едир ки, Падшаһлыг ишини һәјатымызда биринҹи јерә гојанда О да бизим мадди еһтијаҹларымызын гајғысына галаҹаг (Мат. 6:33).
ИМАН ВӘ ҮМИД ВАҸИБДИР
17. Нәјин сајәсиндә биз ҝәләҹәјә әминликлә баха биләрик?
17 Даһа сонра Давуд иман вә үмидин ваҹиблији һагда данышыр: «Рәббин хејирхаһлығыны дириләр арасында ҝөрәҹәјәм, буна шүбһәм јохдур» (Мәз. 27:13). Һәгигәтән дә, Аллаһын вердији үмид олмасајды вә 27-ҹи мәзмурдакы фикирләри баша дүшмәсәјдик, инди һәјатымыз неҹә оларды? Буна ҝөрә дә ҝәлин дурмадан Јеһовадан ҝүҹ диләјәк вә Ондан хаһиш едәк ки, Һар-Маҝедонда бизи хилас етсин. (Мәзмур 27:14 ајәсини оху.)
[23–ҹү сәһифәдәки шәкил]
Давуд Јеһованын онун һәјатыны неҹә гуртардығыны хатырлајырды. Бу хатирәләр она ҝүҹ верирди
[25–ҹи сәһифәдәки шәкил]
Игтисади чәтинликләрә хидмәтимизи ҝенишләндирмәк үчүн бир фүрсәт кими бахырыгмы?