Јеһованын вә Исанын сәбриндән өјрән
«Рәббин сәбрини хилас үчүн бир фүрсәт һесаб един» (2 ПЕТ. 3:15).
НЕҸӘ ҸАВАБ ВЕРӘРДИН?
Јеһова сәбирли олдуғуну неҹә ҝөстәрир?
Нәјә ҝөрә Исаја узун мүддәт әрзиндә сәбир тәзаһүр етдирмәк лазым иди?
Аллаһ кими сәбир етмәк гәтијјәтимизи мөһкәмләндирмәк үчүн һансы аддымлары ата биләрик?
1. Аллаһын бәзи садиг хидмәтчиләрини һансы суал нараһат едир?
БИР ЧОХ чәтинликләрә бахмајараг, Јеһоваја онилликләр әрзиндә сәдагәтлә хидмәт едән бир баҹы тәвазөкарлыгла сорушмушду: «Ҝөрәсән, бу системин сонуну ҝөрмәк мәнә нәсиб олаҹаг?» Бу суал Јеһоваја узун мүддәт хидмәт едән башга һәмиманлыларымызы да нараһат едир. Биз Аллаһын һәр шеји јениләшдирәҹәји вә һал-һазырда үзләшдијимиз проблемләри арадан галдыраҹағы ҝүнү бөјүк һәсрәтлә ҝөзләјирик (Вәһј 21:5). Шејтан дүнјасынын сонунун чох јахын олдуғуна инанмағымыз үчүн чохлу сәбәбләримиз олса да, һәмин ҝүнү сәбирлә ҝөзләмәк чәтин ола биләр.
2. Аллаһа мәгбул сәбирлә әлагәдар биз һансы суаллары нәзәрдән кечирәҹәјик?
2 Буна бахмајараг, Мүгәддәс Китаб бизи сәбирли олмаға сәсләјир. Биздән әввәл јашајан Аллаһын хидмәтчиләри кими, биз дә ҝүҹлү иман тәзаһүр етдирсәк вә Аллаһын вәдләрини јеринә јетирмәк үчүн тәјин етдији вахты сәбирлә ҝөзләсәк, Онун бизим үчүн вәд етдикләрини ала биләҹәјик. (Ибраниләрә 6:11, 12 ајәләрини оху.) Јеһованын Өзү сәбир тәзаһүр етдирир. О, пислијин көкүнү истәнилән вахт кәсә биләрди, анҹаг мүнасиб вахты ҝөзләјир (Ром. 9:20—24). Јеһованын бу дәрәҹәдә сәбирли олмасынын сәбәби нәдир? Иса Атасынын сәбирлилик хүсусијјәтини неҹә тәглид едирди вә бизә бу саһәдә һансы нүмунәни гојуб? Әҝәр биз дә Аллаһ кими сәбирли олмағы өјрәнсәк, һансы хејир-дуалары алаҹағыг? Бу суалларын ҹавабы — һәтта Јеһованын ҝеҹикдијини дүшүндүкдә белә — бизә сәбир вә мөһкәм иман инкишаф етдирмәјә көмәк едәҹәк.
ЈЕҺОВА НӘЈӘ ҜӨРӘ СӘБИР ЕДИР?
3, 4. а) Јеһова Јер күрәсинә даир нијјәтини һәјата кечирмәк үчүн нәјә ҝөрә сәбир ҝөстәрир? б) Еден бағында үсјан галханда Јеһова неҹә давранды?
3 Јеһованын сәбир етмәси үчүн әсаслы сәбәбләри вар. Јеһова бүтүн Каинатын Али Һөкмдары олса да, Еден бағында Онун бу мөвгејини суал алтына гојан бир мәсәлә ортаја чыхмышды. Јеһова сәбирлә давранды, чүнки билирди ки, бу мәсәләнин мүкәммәл шәкилдә һәлл олунмасы үчүн вахт тәләб олунур. Шүбһәсиз, О, ҝөјдә вә јердә јашајан варлыгларын дүшүнҹә вә әмәлләриндән там аҝаһ олдуғундан онларын рифаһыны дүшүнәрәк һәрәкәт едир (Ибр. 4:13).
4 Јеһованын нијјәти о иди ки, Адәмлә Һәвванын нәсли јер үзүнү долдурсун. Һәвваны јолдан чыхардан Шејтан онун васитәсилә Адәми итаәтсизлијә тәһрик едәндә Аллаһ Өз нијјәтиндән әл чәкмәди. Јарадан тәшвишә дүшмәди вә тез-тәләсик гәрар чыхармады, јәни бәшәр аиләсиндән имтина едәрәк кәскин реаксија ҝөстәрмәди. Әксинә, О, бәшәријјәт вә Јер күрәси илә бағлы нијјәтини там һәјата кечирмәк үчүн чыхыш јолу тапды (Јешаја 55:11). Нијјәтинин мүәјјән ҹәһәтләрини ән јахшы шәкилдә јеринә јетирмәк вә һөкмранлығына бәраәт газандырмаг үчүн Јеһова минилликләр әрзиндә ҝөзләмәклә бөјүк сәбир вә тәмкин тәзаһүр етдирди.
5. Јеһованын сәбир етмәсинин һансы фајдасы вар?
5 Јеһованын сәбир етмәсинә башга бир сәбәб исә Онун даһа чох инсанын әбәди јашамасыны истәмәсидир. Һал-һазырда О, бөјүк издиһамы хилас етмәк үчүн тәдбир ҝөрүр (Вәһј 7:9, 14; 14:6). Бунун үчүн Јеһова тәблиғимиз васитәсилә инсанлары Падшаһлығы вә салеһ ганунлары һагда өјрәнмәјә дәвәт едир. Падшаһлыг һаггында хәбәр бәшәријјәтин ешидә биләҹәји ән јахшы хәбәрдир — бәли, бу, һәгигәтән дә, «хош хәбәр»дир (Мат. 24:14). Јеһованын Өзүнә ҹәлб етдији һәр бир инсан салеһлији севән әсил достлардан ибарәт олан үмумдүнја јығынҹағын үзвү олур (Јәһ. 6:44—47). Бизим мәһәббәтли Аллаһымыз белә инсанлара Онун рәғбәтини газанмаға көмәк едир. О һәмчинин инсанлар арасындан сәмави һакимијјәтин үзвләрини сечиб. Бу садиг инсанлар ҝөјләрдә өз вәзифәләрини иҹра етмәјә башлајанда итаәткар бәшәријјәтә камиллијә јетишмәјә вә әбәди һәјаты газанмаға көмәк едәҹәкләр. Демәли, Јеһова сәбирлә ҝөзләдији мүддәтдә белә Өз вәдини јеринә јетирмәк үчүн чалышыр. Бүтүн бунлары О, бизим рифаһымыз үчүн едир.
6. а) Нуһун ҝүнләриндә Аллаһ һансы мәнада сәбир едирди? б) Бизим ҝүнләрдә Јеһованын сәбир етмәси нәдән ҝөрүнүр?
6 Јеһованын Дашгындан габаг писләрлә неҹә рәфтар етмәсиндән ҝөрүрүк ки, бу инсанларын тәһгирамиз һәрәкәтләринә бахмајараг, О јенә дә сәбир едирди. Јер үзүндә әхлагсызлығын вә зоракылығын баш алыб ҝетмәси вә инсанларын позғунлашмасы Јеһованын үрәјини кәдәрләндирирди (Јар. 6:2—8). Онун әбәди олараг бу вәзијјәтә дөзмәк фикри јох иди. Елә буна ҝөрә дә итаәтсиз бәшәријјәти мәһв етмәк үчүн дашгын ҝөндәрмәк гәрарына ҝәлди. «Нуһун ҝүнләриндә» Јеһова сәбирлә ҝөзләдији мүддәтдә Нуһ вә аиләсинин хилас олмасы үчүн тәдбир ҝөрдү (1 Пет. 3:20). Тәјин етдији вахтда Јеһова Нуһа гәрарыны билдирди вә она ҝәми тикмәји тапшырды (Јар. 6:14—22). Үстәлик, Нуһ «салеһлик тәблиғчиси» иди вә гоншуларыны гаршыдан ҝәлән мәһв һагда хәбәрдар едирди (2 Пет. 2:5). Иса бизим ҝүнләрин Нуһун ҝүнләри илә охшар олдуғуну демишди. Јеһова бу пис системә нә заман сон гојаҹағыны гәрарлашдырыб. Һеч бир инсан «о ҝүнү вә о сааты» билмир (Мат. 24:36). Аллаһдан алдығымыз тапшырыға әсасән, галан вахт әрзиндә биз дә инсанлары хәбәрдар едир вә гаршыдан ҝәлән фәлакәтдән неҹә хилас ола биләҹәкләрини онлара билдиририк.
7. Јеһова Өз вәдини јеринә јетирмәкдә ҝеҹикирми? Изаһ ет.
7 Ајдындыр ки, Јеһованын сәбир етмәси садәҹә олараг һәмин вахтын ҝәлиб кечмәсини ҝөзләмәси демәк дејил. Онун сәбрини етинасызлыг вә ја лагејдликлә сәһв салмамалыјыг! Лакин јаша долдугҹа вә ја бу пис системдә әзијјәтләрлә үзләшәндә ағлымызда асанлыгла белә фикирләр баш галдыра биләр. Биз руһдан дүшә, јахуд да Аллаһын Өз вәдини јеринә јетирмәкдә ҝеҹикдијини дүшүнә биләрик (Ибр. 10:36). Һеч вахт унутма ки, Онун сәбир етмәсинин әсаслы сәбәбләри вар вә О, бу вахтдан садиг хидмәтчиләринин хејри үчүн истифадә едир (2 Пет. 2:3; 3:9). Ҝәлин инди дә Исанын Аллаһа мәгбул сәбир ҝөстәрмәкдә һансы нүмунәни гојдуғуна бахаг.
ИСА СӘБИР ЕТМӘКДӘ БИЗӘ ҺАНСЫ ҜӨЗӘЛ НҮМУНӘНИ ГОЈУБ?
8. Һансы вәзијјәтләрдә Иса сәбир ҝөстәрди?
8 Һал-һазырда да Аллаһын ирадәсини јеринә јетирән Иса милјон илләр әрзиндә буну үрәкдән едирди. Шејтанын үсјан галдырмасындан сонра Јеһова јеҝанә Оғлунун Мәсиһ кими јер үзүнә ҝәлмәсинә гәрар верди. Бир анлыг бунун Иса үчүн нә демәк олдуғу үзәриндә дүшүн: о, минилликләр әрзиндә һәмин вахтын јетишәҹәји ҝүнү сәбирлә ҝөзләјирди. (Галатијалылара 4:4 ајәсини оху.) Бу мүддәт әрзиндә Иса әлини әлинин үстүнә гојуб бош отурмурду. О, Атасындан алдығы тапшырыглары јеринә јетирмәклә мәшғул олурду. Јер үзүнә ҝәләндә исә о, габагҹадан пејғәмбәрликдә дејилдији кими, Шејтанын әли илә өлдүрүләҹәјини билирди (Јар. 3:15; Мат. 16:21). Иса сәбирлә Аллаһын ирадәсинә бојун әјди, бахмајараг ки, бу, онун үчүн шиддәтли ишҝәнҹәләрә дөзмәк демәк иди. Иса садиглијин ән бариз нүмунәсидир. О, диггәтини өзүнә вә мөвгејинә јөнәлтмәди. Биз дә ону тәглид едә биләрик (Ибр. 5:8, 9).
9, 10. а) Јеһовадан ҝөстәриш алана гәдәр Иса нә едирди? б) Јеһованын ҹәдвәлинә бахышымыз неҹә олмалыдыр?
9 Дирилдикдән сонра Иса ҝөј вә јер үзәриндә һакимијјәт алды (Мат. 28:18). О, бу сәлаһијјәтдән Јеһованын ирадәсини јеринә јетирмәк үчүн истифадә едир вә Онун гојдуғу ҹәдвәлә риајәт едир. Иса 1914-ҹү илә гәдәр Аллаһын сағында отуруб дүшмәнләринин ајаглары алтына атылаҹағы вахты сәбирлә ҝөзләјирди (Мәз. 110:1, 2; Ибр. 10:12, 13). О, тезликлә Шејтанын системини мәһв етмәк үчүн һәрәкәтә кечәҹәк. Бу арада Иса сәбирлә инсанлара көмәк едир вә онлары «һәјат сују булагларына» апарыр (Вәһј 7:17).
10 Исанын нүмунәсиндән Јеһованын ҹәдвәлинә даир бахышларымызын неҹә олмалы олдуғуну ҝөрүрсәнми? Шүбһәсиз, Иса Атасынын һәр бир хаһишини аһ-зар етмәдән ҹанла-башла јеринә јетирмәјә һазыр иди. Бунунла белә, о, Аллаһын тәјин етдији вахты ҝөзләјирди. Шејтан системинин сонуну ҝөзләдијимиз мүддәтдә һамымыза Аллаһа хас олан сәбир лазымдыр; биз нә Аллаһы габагламалы, нә дә ки мәјус оланда тәслим олмалыјыг. Бу ҹүр сәбирә неҹә саһиб олмаг олар?
МӘН НЕҸӘ СӘБИРЛИ ОЛА БИЛӘРӘМ?
11. а) Иманла сәбир арасында һансы бағлылыг вар? б) Мөһкәм имана саһиб олмағымыз үчүн һансы сәбәбләримиз вар?
11 Иса јер үзүнә ҝәлмәздән габаг, һәтта гејри-камил инсанлар олан пејғәмбәрләр вә Аллаһын диҝәр садиг бәндәләри белә тәһәммүл вә сәбир ҝөстәрмәкдә ҝөзәл нүмунә гојмушдулар. Онларын иманы илә сәбирләри арасында сых бағлылыг вар иди. (Јагуб 5:10, 11 ајәләрини оху.) Әҝәр онлар Јеһованын вәдләринә инанмасајдылар, башга сөзлә, иманлары олмасајды, сәнҹә, бу вәдләрин јеринә јетмәсини сәбирлә ҝөзләјәрдиләрми? Хејр! Онлар Аллаһын нә вахтса Өз вәдләрини јеринә јетирәҹәјинә иман ҝәтирдикләринә ҝөрә тез-тез үзләшдикләри олдугҹа чәтин вә горхулу сынаглара таб ҝәтирдиләр (Ибр. 11:13, 35—40). Бизим мөһкәм имана саһиб олмағымыз үчүн даһа чох сәбәбләримиз вар, чүнки Иса һал-һазырда иманымызын камилләшдириҹиси кими хидмәт едир (Ибр. 12:2). О, бир чох пејғәмбәрликләри јеринә јетирди вә имана саһиб олмағымыз үчүн Аллаһын нијјәтләрини бизә ачды.
12. Иманымызы мөһкәмләндирмәк үчүн биз нә етмәлијик?
12 Иманымызы мөһкәмләндирмәк вә даһа сәбирли олмаг үчүн һансы аддымлар ата биләрик? Ән әсасы Аллаһын ҝөстәришләринә әмәл етмәкдир. Мәсәлән, Падшаһлығы һәјатында биринҹи јерә гојмағын үчүн һансы сәбәбләрин олдуғу үзәриндә фикирләш. Матта 6:33 ајәсиндәки мәсләһәти тәтбиг етмәк үчүн даһа чох сәј ҝөстәрә биләрсәнми? Ола билсин, бунун үчүн сәнә хидмәтә даһа чох вахт ајырмаг вә ја һәјат тәрзиндә мүәјјән дәјишикликләр етмәк лазым ҝәлди. Јеһованын индијәдәк сәнин ҹәһдләринә неҹә хејир-дуа вердијини унутма. Ола билсин, Аллаһын көмәји сајәсиндә сән јени инсана Мүгәддәс Китабы өјрәтмәјә башламысан, јахуд да бүтүн инсан фикирләрини үстәләјән Онун вердији гәлб раһатлығына саһиб олмусан. (Филипилиләрә 4:7 ајәсини оху.) Әҝәр Јеһованын ҝөстәришләринә риајәт етмәјинин сәнә ҝәтирдији хејир-дуалар һагда фикирләшсән, онда Онун сәбрини даһа чох гијмәтләндирәҹәксән (Мәз. 34:8).
13. Иман вә сәбрин неҹә инкишаф етдијини һансы нүмунә әсасында ҝөстәрмәк олар?
13 Ҝәлин бир нүмунәјә нәзәр салаг вә ҝөрәк иманымыз бизә даһа сәбирли олмаға неҹә көмәк едә биләр. Әкинчи әкир, беҹәрир вә бичир. О, һәр дәфә бол мәһсул ҝөтүрәндә нөвбәти мөвсүм үчүн даһа һәвәслә әкир. Дүздүр, о, мәһсул јығымына гәдәр сәбирлә ҝөзләмәли олаҹаг, анҹаг бу, әкин ишиндән онун әлини сојутмајаҹаг вә һәтта, ола билсин ки, о, өтән иллә мүгајисәдә даһа бөјүк әразијә тохум сәпәҹәк. О инаныр ки, әкдијини бичәҹәк. Ејнилә, һәр дәфә Јеһованын әмрләрини өјрәнәндә, онлара әмәл едәндә вә бунун фајдасыны ҝөрәндә Аллаһа олан етибарымыз артыр. Онда иманымыз мөһкәмләнәр вә бизә алаҹағымыз хејир-дуалары сәбирлә ҝөзләмәк даһа асан олар. (Јагуб 5:7, 8 ајәләрини оху.)
14, 15. Инсанларын чәкдији әзаблара мүнасибәтимиз неҹә олмалыдыр?
14 Сәбир инкишаф етдирмәјин диҝәр үсулу исә дүнјаја вә шәхси вәзијјәтимизә олан мүнасибәтимизи ҝөздән кечирмәкдир. Һәр шејә Јеһованын ҝөзү илә бахмаға чалыш. Мисал үчүн, Онун бәшәријјәтин әзабларына неҹә јанашдығы үзәриндә дүшүн. О, инсанларын тарих боју чәкдији изтираблары ҝөрәндә үрәји ағрыјырды. Бунунла белә, бу, Ону јахшылыг етмәкдән чәкиндирмирди. Аллаһ Өз јеҝанә Оғлуну «Иблисин ишләрини [дағытмаға]» вә Шејтанын инсанлара вурдуғу бүтүн зәрәри арадан галдырмаға ҝөндәрди (1 Јәһ. 3:8). Инсанларын чәкдији изтираблар мүвәггәти, Аллаһын бизә верәҹәји изтирабсыз һәјат исә әбәдидир. Шејтанын һөкмранлығы уҹбатындан дүнјада баш алыб ҝедән писликләрә ҝөрә һәддән артыг нараһат вә ја һөвсәләсиз олмаг әвәзинә, ҝәлин әбәдијјән давам едәҹәк ҝөзлә ҝөрүнмәјән шејләрә иман ҝәтирәк. Јеһова писликләрә нә заман сон гојаҹағына гәти гәрар вериб вә буну тәјин етдији вахтда едәҹәк (Јешаја 46:13; Наһ. 1:9).
15 Бу системин сон дәрәҹә чәтин ахыр ҝүнләриндә иманымыз хүсуси шәкилдә сынаға чәкилә биләр. Биз зоракылығын гурбаны оланда вә ја бизә әзиз олан инсан әзаб чәкәндә гәзәбләнмәк әвәзинә, тамамилә Јеһоваја ҝүвәнмәјә гәтијјәтли олмалыјыг. Гејри-камил олдуғумуздан буну етмәк асан дејил. Амма ҝәлин Исанын Матта 26:39 ајәсиндәки дедији сөзләри јадымыза салаг. (Ајәни оху.)
16. Сонун ҝәлишини ҝөзләдијимиз мүддәтдә нәји етмәкдән гачынмалыјыг?
16 Бәзән Аллаһ кими сәбир ҝөстәрмәјә бизә ҝөзләмә мөвгеји мане ола биләр. Бу, нә демәкдир? Сонун јахын олдуғуна шүбһә едән инсан һәр еһтимала гаршы (јәни бирдән һәр шеј Јеһованын дедији кими ҝетмәсә) еһтијат тәдбири ҝөрмәјә башлајыр. Башга сөзләрлә десәк, о фикирләшә биләр: «Бир аз ҝөзләјим вә бахым ҝөрүм Јеһова Өз вәдинә садиг чыхаҹаг, јохса јох». Һәмин мүддәт әрзиндә о, бу дүнјада өзүнә ад газанмаг үчүн чалыша, Падшаһлығы биринҹи јерә гојмаг әвәзинә, мадди фираванлыға ҹан ата вә ја раһат һәјат сүрмәк үчүн али тәһсилә үстүнлүк верә биләр. Диҝәр тәрәфдән бахсаг, мәҝәр бу, онун имансыз олдуғундан хәбәр вермир? Јадына сал ки, Павел бизи «иман вә сәбирлә» давранан инсанларын нүмунәсини тәглид етмәјә тәшвиг едир, чүнки онлар Јеһованын вәд етдији хејир-дуалары алаҹаглар (Ибр. 6:12). Јеһова јол вермәјәҹәк ки, бу пис систем нијјәти үчүн лазым оландан чох чәксин (Һаб. 2:3). Бу вахт әрзиндә биз садәҹә биздән тәләб олунан минимуму етмәмәлијик. Әксинә, биз ајыг-сајыг галмалы вә хош хәбәрин тәблиғи ишиндә ҹанла-башла чалышмалыјыг. Бу, индидән бизә тајы-бәрабәри олмајан севинҹ ҝәтирир (Лука 21:36).
СӘБИР ҺАНСЫ ХЕЈИР-ДУАЛАРЫ ҜӘТИРИР?
17, 18. а) Сәбирлә ҝөзләмәк бизә һансы имканы верир? б) Сәбир етмәк сајәсиндә һансы хејир-дуалары алаҹағыг?
17 Аллаһа бир нечә ај вә ја онилликләр әрзиндә хидмәт етмәјимиздән асылы олмајараг, истәјимиз Она әбәдијјәт боју хидмәт етмәкдир. Бу системин сонуна һәр нә гәдәр галса да, сәбир бизә гуртулушу газанмаға көмәк едир. Јеһова индидән бизә имкан верир ки, Онун гәрарларына тамамилә ҝүвәндијимизи, еләҹә дә, әҝәр лазым ҝәләрсә, әзаблара гатлашараг Она садиг галмаға әзмли олдуғумузу ҝөстәрәк (1 Пет. 4:13, 14). Хиласа јетишмәк үчүн бизә сәбир ҝәрәкдир. Вә Аллаһын вердији тәлим дә бизә бу сәбирә јијәләнмәјә көмәк едир (1 Пет. 5:10).
18 Иса ҝөјдә вә јердә бүтүн һакимијјәтә саһибдир вә сәнин өзүндән башга, һеч ким вә һеч нә сәни онун мүдафиә вә гајғысындан мәһрум етмәјә гадир дејил (Јәһ. 10:28, 29). Ҝәләҹәкдән вә һәтта өлүмдән горхмаг үчүн һеч бир сәбәб јохдур. Јалныз сәбирлә сону ҝөзләјәнләр хилас олаҹаглар. Беләликлә, биз әлимиздән ҝәләни етмәлијик ки, бу дүнја бизи аздырмасын вә Јеһоваја олан етибарымызы сарсытмасын. Әксинә, гәтијјәтлә иманымызы артырмалы вә Аллаһын сәбир етдији вахты мүдрикликлә истифадә етмәлијик (Мат. 24:13; 2 Петер 3:17, 18 ајәләрини оху).
[21–ҹи сәһифәдәки шәкилләр]
Аллаһа мәгбул олан сәбир сәнә Падшаһлығын марагларыны биринҹи јерә гојмаға вә бол-бол хејир-дуалар бичмәјә көмәк едәҹәк!