Јеһованын сәбрини тәглид един
«Рәбб... Өз вә’дини јеринә јетирмәкдә ҝеҹикмир. О... сәбир едир» (2 ПЕТЕР 3:9).
1. Јеһова инсанлара һансы мүгајисә едилмәз ән’амы тәклиф едир?
ЈЕҺОВА бизә һеч кимин тәклиф едә билмәјәҹәји чох ҹәлбедиҹи вә дәјәрли бир шеј тәклиф едир. Ону нә пулла алмаг, нә дә ки газанмаг олар. Јеһованын тәклиф етдији шеј — әбәди һәјат ән’амыдыр. Бу, әксәријјәтимиз үчүн јер үзүндә олаҹаг Ҹәннәтдә сонсуз һәјат сүрмәк демәкдир (Јәһја 3:16). Неҹә дә хош вә севиндириҹи ҝәләҹәкдир! Инсанлары бу ҝүн кәдәрә бүрүјән мүнагишәләр, зоракылыг, јохсуллуг, ҹинајәткарлыг, хәстәликләр вә һәтта өлүм јох олаҹаг. Аллаһын Падшаһлығынын мәһәббәт долу рәһбәрлији алтында инсанлар там әмин-аманлыг вә вәһдәт ичиндә јашајаҹаглар. Биз бу Ҹәннәти неҹә дә бөјүк сәбирсизликлә ҝөзләјирик! (Јешаја 9:6, 7; Вәһј 21:4, 5).
2. Јеһова нәјә ҝөрә Шејтан дүнјасыны һәлә арадан галдырмајыб?
2 Јер үзүндә Ҹәннәти бәрпа едәҹәји вахты Јеһованын Өзү дә бөјүк сәбирсизликлә ҝөзләјир. Ахы О, салеһлији вә әдаләти севән Аллаһдыр (Мәзмур 33:5). Јеһова ҝөјдән Јер күрәсинә баханда нә ҝөрүр? Инсанлар Онун салеһ принсипләринә е’тинасызлыг ҝөстәрир вә ја әдавәт бәсләјир, һакимијјәтинә хор бахыр вә халгыны тә’гиб едирләр. Бүтүн бунлары мүшаһидә етмәк Онун һеч дә хошуна ҝәлмир. Бәс онда нә үчүн Јеһова Шејтан дүнјасыны һәлә арадан галдырмајыб? Бунун үчүн Онун әсаслы сәбәбләри вардыр. Һәмин сәбәбләр өзүнә Јеһованын һөкмранлыг һүгугу илә бағлы мә’нәви суаллары дахил едир. Онларын һәлл едилмәсиндә Јеһова, бир чохларында бу ҝүн чатышмајан вә хүсусилә ҹәлбедиҹи бир хүсусијјәти тәзаһүр етдирир. Бу хүсусијјәт сәбирдир.
3. а) Мүгәддәс Китабда «сәбир» кими тәрҹүмә олунан ибрани вә јунан сөзләри һансы мә’наны верир? б) Биз бу мәгаләдә һансы суаллары арашдыраҹағыг?
3 «Сәбир» кими тәрҹүмә олунан гәдим јунан сөзү һәрфи мә’нада «руһун узунлуғу» демәкдир. «Инҹил» китабында бу сөз «сәбир» вә «тәһәммүл» сөзләри кими тәрҹүмә олунуб. Һәм ибрани, һәм дә јунан дилиндә «сәбир» мә’насыны верән сөз дөзмәк, таб ҝәтирмәк вә ҝеҹ гәзәбләнмәк мә’насыны дашыјыр. Јеһованын сәбирли олмасы бизә һансы фајданы ҝәтирир вә бундан биз нә өјрәнә биләрик? Аллаһын садиг хидмәтчиләринин сәбир вә тәһәммүлүндән биз һансы ибрәт дәрсләри алырыг? Јеһованын сәбринин һүдудсуз олмадығыны һарадан билирик? Ҝәлин бу суаллары арашдыраг.
Јеһованын сәбри
4. Јеһованын сәбри һаггында һәвари Петер нә јазмышды?
4 Јеһованын сәбри һаггында һәвари Петер јазмышды: «Севимлиләрим, бу бир шеји унутмајын ки, Рәббин ҝөзүндә бир ҝүн мин ил, мин ил дә бир ҝүн кимидир. Рәбб бә’зиләринин зәнн етдији кими Өз вә’дини јеринә јетирмәкдә ҝеҹикмир. Әксинә, О бизә сәбир едир вә истәјир ки, һамы төвбәјә ҝәлсин вә кимсә һәлак олмасын» (2 Петер 3:8, 9). Диггәт јетирдинизсә, бу ајәләрдә Аллаһын сәбир етмәсинин ики сәбәби ҝөстәрилир. Ҝәлин онлары бирликдә мүзакирә едәк.
5. Јеһованын вахта олан нөгтеји-нәзәри нијјәтләрини һәјата кечирмәсинә неҹә тә’сир ҝөстәрир?
5 Биринҹи сәбәб ондан ибарәтдир ки, Јеһованын вахта олан нөгтеји-нәзәри бизимкиндән олдугҹа фәргләнир. Әбәди јашајан Јеһованын ҝөзүндә мин ил бир ҝүн кимидир. Онун үчүн вахт мәһдудијјәти јохдур, вахт Онун үзәриндә һөкмранлыг етмир. Лакин бу о демәк дејил ки, Аллаһ чәтинликләри арадан галдырмаға јубаныр. Мисилсиз һикмәт саһиби олан Јеһова, даһа чох инсанлара хејир ҝәтирсин дејә, нијјәтләрини һәјата кечирмәк үчүн мүнасиб вахт сечир вә һәмин вахты сәбирлә ҝөзләјир. Лакин биз белә бир нәтиҹәјә ҝәлмәли дејилик ки, Јеһова, хидмәтчиләринин бу мүддәт әрзиндә чәкә биләҹәји һәр һансы бир әзаба лагејдликлә јанашыр. Онун «үрәји мәрһәмәтлидир», О, мәһәббәтин тәҹәссүмүдүр (Лука 1:78; 1 Јәһја 4:8). Аллаһ, бу мүддәт әрзиндә вурулан һәр бир зәрәри тамамилә вә һәмишәлик арадан галдырмаға гадирдир (Мәзмур 37:10).
6. Јеһова һаггында биз нә фикирләшмәли дејилик вә нәјә ҝөрә?
6 Әлбәттә, чох арзуладығымыз шеји ҝөзләмәк елә дә асан дејил (Сүлејманын мәсәлләри 13:12). Буна ҝөрә, кимсә өз вә’дини тез бир заманда јеринә јетирмәјәндә, диҝәрләри елә нәтиҹәјә ҝәлә биләрләр ки, о, буну етмәк фикриндә дејил. Аллаһ һаггында белә дүшүнмәк неҹә дә мүдриклик дејил! Әҝәр биз Аллаһын сәбрини ләнҝлик һесаб едириксә, онда вахт кечдикҹә биздә асанлыгла шүбһәләр јарана биләр вә биз руһдан дүшә биләрик. Белә вәзијјәт чох тәһлүкәлидир, чүнки руһани јухуја гәрг олунмаг еһтималы јарадыр. Даһа дәһшәтлиси исә одур ки, иманлары олмајан ришхәндчиләрин тә’сири алтына дүшә вә јолумузу аза биләрик. Белә инсанларын олаҹағыны Петер габагҹадан хәбәрдарлыг етмишди. Беләләри истеһза илә дејирләр: «Бәс Онун вә’д едилмиш зүһуру һаны? Чүнки әҹдадымыз ҝөзләрини һәјата јумандан бәри һәр шеј илк јаранан заман олдуғу кими галыр» (2 Петер 3:4).
7. Јеһованын сәбриндән неҹә ҝөрүнүр ки, О, инсанларын төвбә етмәсини арзулајыр?
7 Јеһова истәјир ки, «һамы төвбәјә ҝәлсин вә кимсә һәлак олмасын». Бу, Онун сәбир етмәсинин икинҹи сәбәбидир. Пис јолларыны тәрк етмәкдән инадла имтина едәнләрин үзәринә Јеһованын әдаләтли гәзәби ҝәләҹәкдир. Амма Аллаһ пис инсанлары мәһв етмәкдән һәзз алмыр, әксинә, онлар төвбә едиб өз әмәлләриндән әл чәкәндә О, чох севинир, чүнки јалныз белә олдугда бу инсанлар јашамаға давам едә биләрләр (Језекел 33:11). Демәли, инсанлар хилас олсунлар дејә, О сәбир едир вә хидмәтчиләрини хош хәбәри бүтүн дүнјада тәблиғ етмәјә ҝөндәрир.
8. Исраил халгы илә рәфтарындан Аллаһын сәбри неҹә ҝөрүнүр?
8 Јеһованын сәбрини гәдим Исраил халгы илә неҹә рәфтар етмәсиндән дә ҝөрә биләрик. Аллаһ әсрләр боју онларын итаәтсизлијинә дөзүрдү. Дәфәләрлә пејғәмбәрләринин васитәсилә «пис јолунуздан дөнүн. Аталарыныза бујурдуғум вә гулларым пејғәмбәрләрин васитәсилә сизә өјрәтдијим Ганунда олан бүтүн әмрләримә вә ганунларыма әмәл един» дејә, исраиллиләри јолларындан дөнмәјә тәшвиг едирди. Бунун нәтиҹәси нә олду? Әфсуслар олсун ки, ‘онлар бу сөзләрә гулаг асмадылар’ (2 Падшаһлар 17:13, 14).
9. Иса Атасынын сәбрини неҹә әкс етдирирди?
9 Сонда Јеһова јер үзүнә Өз Оғлуну ҝөндәрди. Иса јорулмадан јәһудиләри Аллаһла барышмаға чағырырды. О, Аллаһын сәбрини мүкәммәл әкс етдирирди. Иса, өләҹәјини биләрәк тәәссүфлә демишди: «Еј Јерусәлим! Пејғәмбәрләри өлдүрән вә она ҝөндәриләнләри даша басан Јерусәлим! Тојуг өз ҹүҹәләрини ганадлары алтына топладығы кими, Мән дә сәнин өвладларыны нечә дәфә топламаг истәдим, амма сиз истәмәдиниз!» (Матта 23:37). Бу тә’сирли сөзләр инсаны мүһакимә етмәјә ҹан атан мәрһәмәтсиз, дашүрәкли һакимин сөзләри дејил. Бу сөзләр инсанларла сәбирлә давранан мәһәббәт долу достун сөзләридир. Сәмави Атасы кими, Иса да инсанларын төвбә едиб һөкмдән гачынмаларыны арзулајырды. Бә’зи адамлар онун бу хәбәрдарлыг сөзләринә гулаг асдылар вә ерамызын 70-ҹи илиндә Јерусәлимин үзәринә ҝәлән һөкм ҝүнүндән сағ чыхдылар (Лука 21:20-22).
10. Јеһованын сәбри бизә һансы фајданы ҝәтирир?
10 Мәҝәр Аллаһын сәбирли олмасы валеһедиҹи дејилми? Инсанларын Она бу гәдәр итаәтсизлик ҝөстәрмәләринә бахмајараг, Јеһова милјонларла инсанла јанашы бизә дә Ону танымаг имканыны вә хилас олмаг үмидини вериб. Һәвари Петер һәмиманлыларына јазмышды: «Рәббимизин сәбрини... гуртулуш һесаб един» (2 Петер 3:15). Мәҝәр Јеһованын сәбирли олмасына вә бунунла да бизим үчүн хилас олмаг имканы јаратдығына ҝөрә Она миннәтдар дејиликми? Бәс Јеһоваја ҝүнбәҝүн хидмәт етдикҹә бизимлә сәбирли олмасы барәдә дуа едирикми? (Матта 6:12).
11. Јеһованын нәјә ҝөрә бу гәдәр сәбир етмәсини баша дүшмәјимиз бизи нәјә тәшвиг едир?
11 Јеһованын нәјә ҝөрә бу гәдәр сәбирли олдуғуну дәрк етдикҹә Аллаһын хиласыны даһа бөјүк сәбирлә ҝөзләјәҹәјик. Биз һеч вахт Јеһованын вә’дләрини јеринә јетирмәкдә ҝеҹикдијини дүшүнмәјәҹәјик (Мәрсијәләр 3:26). Һәләлик исә биз Аллаһын Падшаһлығынын ҝәлмәси барәдә дурмадан дуа едир вә Јеһованын бу дуамыза ҹаваб вермәк үчүн ән мүнасиб вахты билдијинә е’тибар едирик. Бундан савајы, баҹы-гардашларымыз вә тәблиғ етдијимиз адамларла сәбирлә давранмагла Јеһованы тәглид едирик. Инсанларын һәлак олмаларыны биз дә истәмирик, әксинә, арзумуз одур ки, онлар төвбә едиб әбәди һәјат үмидимизә шәрик олсунлар (1 Тимотејә 2:3, 4).
Пејғәмбәрләрин сәбри
12, 13. Јагуб 5:10 ајәсинә әсасән, Јешаја пејғәмбәр сәбри неҹә тәзаһүр етдирирди?
12 Јеһованын сәбрини нәзәрдән кечирәрәк, биз Онун бу хүсусијјәтини гијмәтләндирмәкдә вә ону инкишаф етдирмәкдә көмәк әлдә етдик. Гејри-камил инсанлар үчүн сәбир инкишаф етдирмәк асан дејил, амма бу мүмкүндүр. Гаршымызда Аллаһын гәдим хидмәтчиләринин нүмунәләри вар. Шаҝирд Јагуб јазмышды: «Гардашлар, Рәббин ады илә данышмыш пејғәмбәрләри, мәшәггәтә дөзмә вә сәбир нүмунәси олараг алын» (Јагуб 5:10). Бизим һал-һазырда растлашдығымыз чәтинликләрин өһдәсиндән башгаларынын мүвәффәгијјәтлә ҝәлдијини билмәк неҹә дә тәсәлливериҹидир вә бу бизи онлар кими һәрәкәт етмәјә тәшвиг едир.
13 Мәсәлән, Аллаһын тапшырығыны јеринә јетирмәк үчүн Јешаја пејғәмбәрдән сәбир тәләб олунурду. Буна ишарә едәрәк, Јеһова демишди: «Ҝет бу халга буну чатдыр: “Ешитдикҹә ешидәҹәксиниз, амма анламајаҹагсыныз, ҝөрдүкҹә ҝөрәҹәксиниз, амма ганмајаҹагсыныз. Бу халгын үрәјини күтләшдир, гулагларыны кар елә, ҝөзләрини јум ки, ҝөзләри илә ҝөрмәсинләр, гулаглары илә ешитмәсинләр, үрәкләри илә анламасынлар вә Мәнә сары дөнүб шәфа тапмасынлар”» (Јешаја 6:9, 10). Халгын онун сөзләринә гулаг асмадығына бахмајараг, Јешаја ән азы 46 ил Јеһованын хәбәрдарлығыны сәбирлә бәјан едирди! Бу пејғәмбәрин ҝүнләриндә олдуғу кими, бизим дөврдә дә инсанларын әксәријјәти бәјан етдијимиз хәбәрә гулаг асмыр, лакин сәбир тәблиғ ишимизи мәтанәтлә давам етдирмәкдә бизә көмәк едәҹәк.
14, 15. Истеһзаларын вә руһ дүшкүнлүјүнүн өһдәсиндән ҝәлмәкдә Јеремјаја нә көмәк етди?
14 Пејғәмбәрләр инсанларын е’тинасызлыглары илә јанашы хидмәтләриндә мүгавимәтләрлә дә үзләширдиләр. Јеремја ‘күндәјә салынмышды’, ‘һәбсханаја’ сонра исә ‘гујуја атылмышды’ (Јеремја 20:2; 37:15; 38:6). Пејғәмбәрә бу әзаблары верән онун көмәк етмәк истәдији инсанлар иди. Лакин бүтүн бунлара бахмајараг, Јеремја нә кин сахлады, нә дә онлардан гисас алды, онилликләр бојунҹа чәтинликләрә тәһәммүл етди.
15 Тә’гибләр вә истеһзалар Јеремјаны сусдура билмәдији кими, бизи дә сусдура билмәјәҹәк. Дүздүр, һәрдән елә олур ки, биз руһдан дүшүрүк. Јеремја илә дә белә бир шеј баш вермишди. Пејғәмбәр јазыр: «Рәббин сөзүндән өтрү мән бүтүн ҝүн рүсвај олдум, тәһгир едилдим. Мән фикирләшдим: “Даһа Ону јада салмајаҹағам, Онун ады илә данышмајаҹағам”». Бәс сонра нә баш верди? Јеремја тәблиғ етмәји дајандырдымы? О давам едир: «Онда Онун сөзү сүмүкләримдә һәбс едилән, үрәјимдә јанан бир од олду. Ону ичимдә сахламагдан јорулдум, артыг буну едә билмирәм» (Јеремја 20:8, 9). Фикир верин, Јеремја диггәтини инсанларын истеһзаларына ҹәмләшдирәндә севинҹини итирди. Амма диггәтини тәблиғ етдији хәбәрин ҝөзәллијинә вә ваҹиблијинә јөнәлдәндә, онун севинҹи гајытды. Бундан башга, кәламыны сә’јлә вә ҹәсарәтлә тәблиғ етмәкдә Јеремјаны гүввәтләндирмәк үчүн Јеһованын Өзү «иҝид бир дөјүшчү кими» онунла иди (Јеремја 20:11).
16. Хош хәбәри тәблиғ едәркән, севинҹимизи неҹә горуја биләрик?
16 Јеремјаја хидмәти севинҹ ҝәтирирдими? Буна шүбһә јохдур! О, Јеһоваја демишди: «Сөзләрини тапыб једим, сөзләрин мәнә севинҹ вә үрәјимә шадлыг ҝәтирди. Чүнки Сәнә мәхсусам, еј Ордулар Аллаһы Рәбб!» (Јеремја 15:16). Јеремја, һәгиги Аллаһын тәмсилчиси олмаг вә Онун нијјәтләрини бәјан етмәк шәрәфиндән севинҹ дујурду. Јеһованын ишиндә биз дә севинҹ тапа биләрик. Бу гәдәр чох инсанын Падшаһлыг һаггында хош хәбәри гәбул етдији, Аллаһа мәгбул олмајан әмәлләрдән әл чәкиб, әбәди һәјата апаран јолда дурдуглары үчүн ҝөјләрдә севинән мәләкләрин севинҹинә биз дә шәрикик (Лука 15:10).
«Әјјубун тәһәммүлү»
17, 18. Әјјуб нәјә тәһәммүл етмишди вә онун әһвалаты нә илә гуртарды?
17 Гәдимдә јашамыш пејғәмбәрләр һаггында данышдыгдан сонра шаҝирд Јагуб јазмышды: «Әјјубун тәһәммүлү барәсиндә ешитмисиниз вә Рәббин ахырда нә етдијини дә ҝөрдүнүз; чүнки Рәбб чох шәфгәтли вә мәрһәмәтлидир» (Јагуб 5:11). Бурада «тәһәммүл» кими тәрҹүмә едилән јунан сөзүнүн мә’насы, Јагубун әввәлки ајәдә ишләтдији «сәбир» сөзүнүн мә’насына јахындыр. Лакин бу ики сөзүн арасында олан фәрг барәдә бир Мүгәддәс Китаб алими јазмышдыр: «Онунҹу ајәдәки “сәбир” сөзү инсанларын бизимлә пис рәфтар етмәси заманы, он биринҹи ајәдәки “тәһәммүл” сөзү исә чәтин шәраитә дүшәркән ҝөстәрдијимиз хүсусијјәтә аиддир».
18 Әјјуб бир чох әзаблара таб ҝәтирмәли олмушду. О, әмлакыны вә ушагларыны итирмиш, өзү исә үзүҹү хәстәлијә тутулмушду. «Тәсәлливериҹиләри» баш верәнләрин Јеһованын ҹәзасы олдуғуну иддиа етдијиндән, Әјјуб бу ҹүр јанлыш фикирлә дә мүбаризә апармалы олурду. О, чәкдији изтираблара сәссизлик ичиндә дөзмүрдү, вәзијјәтинә ҝөрә шикајәтләнир, һәтта өзүнү Аллаһдан һаглы сајырды (Әјјуб 35:2). Лакин бунлара бахмајараг о, нә иманыны инкар етди, нә дә нөгсансызлығындан дөндү. Иблис иддиа едирди ки, Әјјуб Аллаһа лә’нәт охујаҹаг, лакин о буну да етмәди (Әјјуб 1:11, 21). Бәс онун әһвалаты нә илә гуртарды? Јеһова «Әјјубун ахыр ҝүнләрини әввәлки ҝүнләриндән даһа чох бәрәкәтли етди» (Әјјуб 42:12). Аллаһ Әјјуба шәфа верди, онун әмлакыны икигат артырды вә хошбәхт, долғун аилә һәјаты илә мүкафатландырды. Сынагларда садиг галмасы вә онлара тәһәммүл етмәси, она Јеһованын неҹә Аллаһ олдуғуну даһа дәриндән баша дүшмәјә көмәк етди.
19. Әјјубун сынаглара тәһәммүл етмәсиндән биз нә өјрәнирик?
19 Әјјубун сынаглара тәһәммүл етмәсиндән һансы ибрәт дәрсини алырыг? Әјјуб кими биз дә һансыса үзүҹү бир хәстәлијә тутула вә ја диҝәр чәтинликләрлә гаршылаша биләрик. Ола билсин, Јеһованын белә әзаблара нәјә ҝөрә јол вердијини там баша дүшмүрүк. Лакин бир шејдә биз там әмин ола биләрик: әҝәр садиг галсаг, Јеһова бизи хејир-дуаландыраҹаг. Јеһова Ону сә’јлә ахтаранлары һәмишә мүкафатландырыр (Ибраниләрә 11:6). Иса Мәсиһ демишди: «Ахыра гәдәр сәбр едән хилас олаҹагдыр» (Матта 10:22; 24:13).
«Рәббин Ҝүнү... ҝәләҹәкдир»
20. Биз нәјә ҝөрә әмин ола биләрик ки, Јеһованын ҝүнү мүтләг ҝәләҹәкдир?
20 Јеһова сәбирли олмагла јанашы, һәм дә салеһ Аллаһдыр вә буна ҝөрә О, пислијә әбәдијјән дөзмәк нијјәтиндә дејил. Онун сәбринин һәдди вар. Петер јазмышды: «[Аллаһ], гәдим дүнјаја да рәһм етмәди». Јер үзүнә дашгын ҝәләндә, Нуһ вә онун аиләси сағ галдылар, аллаһсыз инсанлары исә су апарды. Јеһова, һәмчинин Содом вә Һоморра шәһәрләрини дә јерлә јексан етди. Бу ҹәзалар ‘аллаһсызларын башына ҝәләҹәк шејләри ҝөстәрән’ бир нүмунәдир. Бәли, биз там әмин ола биләрик, ки «Рәббин Ҝүнү... ҝәләҹәкдир» (2 Петер 2:5, 6; 3:10).
21. Сәбри вә тәһәммүлү неҹә тәзаһүр етдирә биләрик вә ҝәлән мәгаләдә биз нәји мүзакирә едәҹәјик?
21 Бунлары нәзәрә алараг, ҝәлин биз, башгалары да хилас олсун дејә онлара төвбәјә ҝәлмәјә көмәк едәрәк Јеһованын сәбрини тәглид едәк. Һәмчинин, инсанларын әксәријјәтинин бизә гулаг асмамасына бахмајараг, ҝәлин пејғәмбәрләр кими, тәблиғ ишимизи сәбирлә давам етдирәк. Бундан әлавә, ҝәлин унутмајаг ки, әҝәр биз дә Әјјуб кими әзаблар чәкириксә вә садигликлә нөгсансызлығымызы горујуругса, Јеһова бизи бол-бол хејир-дуаландыраҹаг. Јеһова бүтүн дүнјада тәблиғ фәалијјәтимизи дә хејир-дуаландырыр. Онун буну неҹә етмәсини нәзәрдән кечирсәк ҝөрәрик ки, севинҹимизи итирмәјә һеч бир әсасымыз јохдур. Бу мөвзуну биз ҝәлән мәгаләдә мүзакирә едәҹәјик.
Хатырлајырсынызмы?
• Һансы сәбәбләрә ҝөрә Јеһова бу вахтадәк сәбир едир?
• Пејғәмбәрләрин сәбир тәзаһүр етдирмәләриндән биз нә өјрәнирик?
• Әјјуб тәһәммүлү неҹә тәзаһүр етдирди вә Јеһова ону неҹә мүкафатландырды?
• Һарадан билирик ки, Јеһованын сәбри һүдудсуз дејил?
[22-ҹү сәһифәдәки шәкилләр]
Јеһова Јеремјанын сәбрини неҹә мүкафатландырды?