Нәјә ҝөрә коррупсија һәлә дә мејдан сулајыр?
«Бир адамын башга адама ағалыг етмәси башына бәла олур» (ВАИЗ 8:9).
БУ АЈӘ инсан рәһбәрлијинин кечдији тарих јолунун дәгиг тәсвиридир. Инсан рәһбәрлији мисли ҝөрүнмәмиш әзаб-әзијјәтләрә вә бәдбәхтликләрә ҝөрә мәсулијјәт дашыјыр. Әсирләр бојунҹа даһа әдаләтли ҹәмијјәт гурмаг истәјиндә олан хошнијјәтли инсанларын планларыны һәмишә аҹҝөзлүк вә рүшвәтхорлуг алт-үст едиб. Бунун сәбәби нәдир? Нәјә ҝөрә коррупсија һәлә дә мөвҹуддур? Әсас етибарилә, сәбәб ашағыда ҝәтирилән үч зәрәрли тәсирдир.
1. Ҝүнаһын тәсири
Мүгәддәс Китабда ачыг-ајдын дејилир ки, биз «ҝүнаһын әсарәти алтында[јыг]» (Ромалылара 3:9). Сағалмаз ирси хәстәлик кими, ҝүнаһ дахилимиздә јашајыр. Мин илләрдир ки, о, бәшәријјәт үзәриндә ағалыг едир. Ҝүнаһ гануну даима бизә өз тәсирини ҝөстәрир. Ҝүнаһлы мејилләр чохларыны өз марагларыны өн плана чәкмәјә, јахуд да башгаларынын һесабына вар-дөвләт вә ја һакимијјәт әлдә етмәјә сөвг едир (Ромалылара 5:21; 7:17, 20, 23, 25).
2. Јашадығымыз пис дүнјанын тәсири
Тамаһкарлыг вә егоизм бу дүнјанын сәҹијјәви ҹәһәтләриндәндир. Белә бир мүһитдә бәзиләринә башгаларындан сечилмәк чох чәтин ҝәлир. Онлар өз егоист арзуларынын једәјиндә ҝедәрәк һакимијјәтпәрәст олурлар. Һәмчинин онларын үрәјиндә даһа чох — лазымындан да артыг — пул вә мал-мүлк әлдә етмәк кими ҝүҹлү истәк баш галдырыр. Әфсуслар олсун ки, бу ҹүр инсанлар мәгсәдләринә наил олмаг үчүн әјри јоллара белә әл атмагдан чәкинмирләр. Онлар пис тәсирә мүгавимәт ҝөстәрмәк әвәзинә, «шәр иш ҝөрән издиһама» гошулурлар (Чыхыш 23:2).
3. Шејтан Иблисин тәсири
Үсјанкар руһани варлыг олан Шејтан «бүтүн дүнјаны алда[дыр]» (Вәһј 12:9). О, инсанлары истәдији кими идарә етмәкдән һәзз алыр. Шејтан елә фәндләр ишләдир ки, инсанлар раһат һәјат вә мадди фираванлыг кими тәбии истәкләрини тәмин етмәк үчүн надүрүстлүјә әл атсынлар.
Бу о демәкдирми ки, биз Шејтанын әлиндә садәҹә бир куклајыг, јәни о, ипи тәрпәдәндә она мәҹбурән итаәт етмәлијик? Бу суалын ҹавабыны нөвбәти мәгаләдә өјрәнәҹәјик.