Коррупсијанын сону ҝәләҹәк!

«Рәбби ҝөзлә, Онун јолуну тут... Писләрин кәсилиб атылаҹағы заманы ҝөрәҹәксән» (МӘЗМУР 37:34).

СИЗ дә, бир чох инсанлар кими, коррупсијанын гачылмаз вә гаршысыалынмаз олдуғунуму дүшүнүрсүнүз? Белә дүшүнмәјинизә һагг вермәк олар. Тарих боју инсанлар мүмкүн олан бүтүн һакимијјәт формаларыны сынагдан кечирибләр. Анҹаг онлар коррупсијаны там арадан галдырмаға мүвәффәг олмајыблар. Бәс нә вахтса бүтүн инсанларын бир-бирилә дүрүст давранаҹагларына үмид етмәк олармы?

Мүгәддәс Китабын бунунла бағлы хош хәбәри вар! Орада дејилир ки, Аллаһ тезликлә јер күрәсини рүшвәтхорлуғун пәнҹәсиндән азад едәҹәк. Неҹә? Јер үзүндәки вәзијјәти тамамилә дәјишәҹәк сәмави һөкумәтинин — Падшаһлығынын васитәсилә. Иса пејғәмбәр өз шаҝирдләринә мәһз бу Падшаһлыг барәдә дуа етмәји өјрәтмишди. О, дуасында демишди: «Гој падшаһлығын ҝәлсин... Сәнин ирадән... јердә дә јеринә јетсин» (Матта 6:10).

Аллаһын Падшаһлыға Падшаһ тәјин етдији Мәсиһ Иса һагда Мүгәддәс Китабда габагҹадан дејилмишди: «Јохсула, фәгирә рәһм едир, фәгирләрин ҹанларыны азад едир. Онлары һәдә-горхудан, зоракылыгдан гуртарыр» (Мәзмур 72:12—14). Ајәләрдә дә дејилдији кими, Иса Мәсиһ һагсызлығын гурбаны олан инсанларын һалына аҹыјыр вә онлары зүлмүн әлиндән мүтләг азад едәҹәк! Буну билмәјин өзү елә тәсәллидир!

Бир һалда ки Аллаһын Падшаһлығынын башында шәфгәтли вә гүдрәтли Падшаһ дурур, бу һөкумәт Јер күрәсини коррупсијадан азад едәҹәк. Неҹә? Коррупсијанын көкүндә дуран үч сәбәби арадан галдырмагла.

Ҝүнаһын тәсири

Бу ҝүн һамымыз бизи худбинҹәсинә давранмаға сөвг едән ҝүнаһлы мејилләримизлә мүбаризә апармалы олуруг (Ромалылара 7:21—23). Һәлә дә доғру оланы етмәк истәјән јахшы инсанлар вар. Онлар Исанын төкүлән ганынын ҝүнаһдан азад едән фидјә олдуғуна инанырлар вә ҝүнаһларынын әфвинә маликдирләрa (1 Јәһја 1:7, 9). Белә инсанлар Аллаһын мәһәббәтинин ән бөјүк тәзаһүрүндән јарарланаҹаглар. Бу һагда Јәһја 3:16 ајәсиндә јазылыб: «Аллаһ дүнјаны о гәдәр севир ки, јеҝанә Оғлуну онун уғрунда гурбан верди; буну она ҝөрә етди ки, она иман едәнләрин һеч бири мәһв олмасын, һамысы әбәди јашасын».

Әмәлисалеһ инсанлар үчүн Аллаһ, һәгигәтән дә, мөһтәшәм ишләр ҝөрәҹәк. О, јени дүнјада садиг инсанларын тәдриҹән камиллијә вә салеһлијә јетишмәсинә көмәк етмәклә ҝүнаһын бүтүн нәтиҹәләрини арадан галдыраҹаг (Јешаја 26:9; 2 Петер 3:13). Даһа һеч вахт ҝүнаһ инсанлары нанәҹиб һәрәкәтләрә тәшвиг етмәјәҹәк. Аллаһын Падшаһлығынын рәһбәрлији алтында садиг инсанлар «чүрүклүк әсарәтиндән [гуртулаҹаг]» (Ромалылара 8:20—22).

Јашадығымыз пис дүнјанын тәсири

Әфсуслар олсун ки, бу ҝүн чохлары гәсдән башгаларына гаршы һагсызлыг едирләр. Онлар ашағы тәбәгәли вә касыб инсанлары истисмар едир вә башгаларыны да бу ҹүр давранмаға тәһрик едирләр. Мүгәддәс Китаб белә инсанлара сәсләнир: «Гој пис адам өз јолуну, шәр адам өз фикирләрини атсын». Мүгәддәс Китабда вәд олунур ки, белә инсанлар төвбә едәндә әфви бол олан Аллаһ онлары бағышлајыр (Јешаја 55:7).

Дикбаш, дәјишилмәк истәмәјән инсанлары исә Аллаһ мәһв етмәк мәҹбуријјәтиндә галаҹаг. Онун Падшаһлығы Мүгәддәс Китабдакы бу вәди һәјата кечирәҹәк: «Рәбби [Јеһованы] ҝөзлә, Онун јолуну тут... Писләрин кәсилиб атылаҹағы заманы ҝөрәҹәксән»b (Мәзмур 37:34). Ислаһолунмаз пис инсанлар јер үзүндән силиниб атыланда Аллаһын садиг хидмәтчиләри артыг һеч вахт коррупсијанын гурбаны олмајаҹаглар.

Шејтан Иблисин тәсири

Ән гаты ҝүнаһкар Шејтан Иблисдир. Шүкүрләр олсун ки, Јеһова Аллаһ тезликлә Шејтанын инсанлара ҝөстәрдији пис тәсирин гаршысыны алаҹаг, сонда исә ону тамамилә мәһв едәҹәк. Даһа һеч вахт бу бәдһејбәт варлыг инсанлары надүрүст һәрәкәтләр етмәјә тәһрик едә билмәјәҹәк.

Бәлкә дә, Аллаһын коррупсијанын көкүндә дуран бүтүн бу сәбәбләри арадан галдыраҹағы фикри сизә хүлја кими ҝәлир. «Доғруданмы, Аллаһ бу дәјишикликләри етмәјә гадирдир? Әҝәр гадирдирсә, нә үчүн индијәдәк буну етмәјиб?» — дејә дүшүнә биләрсиниз. Мүгәддәс Китаб бу суаллара ганеедиҹи ҹаваб верирc. Биз сизи Аллаһын Кәламында јахын ҝәләҹәк — писликләрдән азад олаҹаг ҝөзәл һәјат һагда дејиләнләри арашдырмаға дәвәт едирик.

[Һашијәләр]