3 Мүбаризә апармаға көмәк едир
Бәзи проблемләр гачылмаз вә һәллолунмаздыр. Мисал үчүн, доғмаларыны итирән вә ја хәстәликлә мүбаризә апаран инсанын дәрдә дөзмәкдән башга чарәси јохдур. Бәс Мүгәддәс Китаб белә чәтин вәзијјәтләрлә үзләшән инсанлара көмәк едә биләр?
ХРОНИКИ ХӘСТӘЛИК
Роза адлы бир гыз дејир: «Ирси хәстәлијим уҹбатындан ҝүҹлү вә сәнҝимәјән ағрыларым олур. Хәстәлијим әл-голуму бағлајырды». Онун ән бөјүк нараһатчылығы Мүгәддәс Китабы мүталиә едәндә вә ибадәтлә бағлы диҝәр саһәләрдә бәзән диггәтини ҹәмләјә билмәмәси иди. Һәрдән шиддәтли ағрылар уҹбатындан һеч нә охуја билмирди. Мәтта 19:26 ајәсиндә јазылмыш сөзләрин она бөјүк көмәји дәјди. Орада дејилир: «Аллаһ үчүн һәр шеј мүмкүндүр». Роза өјрәнир ки, мүталиә етмәк үчүн башга үсуллар да вар. О, Мүгәддәс Китабын вә она әсасланан нәшрләрин сәсјазмасыны динләмәк гәрарына ҝәлирa. Роза дејир: «Мүталиә етмәјин башга үсуллары олмасајды, һеч билмирәм, Аллаһла мүнасибәтләрими неҹә мөһкәм сахлаја биләрдим».
Роза әввәлләр етдији шејләри инди едә билмәдијинә ҝөрә үзүләндә 2 Коринфлиләрә 8:12 ајәсиндәки сөзләрдән тәсәлли тапыр: «Үрәкдән верилән бәхшиш Аллаһа хүсусилә хошдур, чүнки О, инсандан ҝүҹү чатаны ҝөзләјир, ҝүҹү чатмајаны јох». Бу сөзләр Розаја хатырладыр ки, Аллаһ ондан разыдыр, чүнки о, имканы дахилиндә әлиндән ҝәлән һәр шеји едир.
КӘДӘР
Һаггында данышдығымыз Софија хатырлајыр: «18 јашлы гызымы итирәндә кечирдијим изтираб о гәдәр шиддәтли иди ки, елә билирдим, даһа јашаја билмәјәҹәјәм. Артыг һеч нә әввәлки кими олмајаҹагды». Лакин Зәбур 94:19 ајәсиндәки сөзләр она гәлб раһатлығы верди. Һәмин ајәдә јазар Аллаһа үз тутуб дејир: «Фикирләр мәни чулғајанда мәнә тәсәлли вериб овутдун». Софија дејир: «Аллаһа јалварырдым ки, мәнә тохтаглыг тапмаг үчүн бир чыхыш јолу ҝөстәрсин».
Софија өзүнү көнүллү ишләрә һәср едир. Бир мүддәтдән сонра өзү һагда мараглы бир гәнаәтә ҝәлир. Рәнҝли карандашы сынандан сонра да истифадә етмәк мүмкүн олдуғу кими, о да һәјатдан алдығы зәрбәләрә бахмајараг, башгаларына көмәк едә биләр. О хатырлајыр: «Бир ҝүн дәрк етдим ки, дәрс кечдијим инсанлара Мүгәддәс Китаб тәлимләрини ачыглајараг тәсәлли верәндә өзүм дә гәлб раһатлығы тапырдым. Јеһова мәнә тәсәллини бу јолла верирмиш». Софија Мүгәддәс Китабдакы ағыр сыхынтылар јашамыш инсанларын сијаһысыны тутур вә ҝөрүр ки, онларын һамысы дуа әһли олуб. О һәмчинин «Аллаһын Кәламыны охумадан дуалара ҹаваб тапмағын мүмкүн олмадығынын» фәргинә варыр.
Аллаһын Кәламыны мүталиә етмәјин сајәсиндә Софија диггәтини кечмишә јох, ҝәләҹәјә јөнәлтмәји өјрәнди. Она Һәвариләрин ишләри 24:15 ајәсиндә «Аллаһын һәм салеһләри, һәм дә гејри-салеһләри дирилдәҹәјинә үмид едирәм» сөзләри тәсәлли верир. О, Јеһованын онун гызыны дирилдәҹәјинә нә дәрәҹәдә әминдир? Софија ҹаваб верир: «Гызымы мүтләг ҝөрәҹәјәм. Јеһова бизим ҝөрүшәҹәјимиз ҝүнү артыг тәгвимә салыб. Гызым дириләндән сонра онунла бирҝә бағда отураҹағымыз ҝүнүн хәјалы, ону доғуланда гуҹағымда тутдуғум ҝүнүн хатирәси гәдәр реалдыр».
a Мүгәддәс Китаба әсасланан бир чох нәшрләрин сәсјазмаларыны динләмәк үчүн jw.org сајтыны зијарәт един.
Мүгәддәс Китаб сизә һәтта сыхынтылы вахтларынызда да тәсәлли верә биләр