Һәјат јолдашы хәјанәт едәндә

«Јолдашым ҹаван бир гадына ҝөрә мәни атыб ҝедәндә өлмәк истәјирдим. Бу, һагсызлыг иди. Хүсусән дә, онун үчүн етдијим фәдакарлыглары јадыма саланда јаныб-төкүлүрдүм» (Марија, Испанија).

«Арвадым бирдән-бирә мәни атыб ҝедәндә, санки ичимдә нәсә өлдү. Арзуларымыз, үмидләримиз, планларымыз алт-үст олду. Елә ҝүнләр олурду ки, сакитләширдим, амма сонра јенидән ичимдә ҝүҹлү мәјуслуг баш галдырырды» (Билл, Испанија).

ҺӘЈАТ ЈОЛДАШЫНЫН хәјанәти чох ағыр зәрбәдир. Дүздүр, бәзиләри өзләриндә ҝүҹ тапыб пешман олан тәрәфи бағышлајыр вә мүнасибәтләрини бәрпа етмәјә чалышырa. Буна бахмајараг, аилә дағылса да, дағылмаса да, һәјат јолдашынын хәјанәти илә үзләшән һәр кәс ејни ҹүр әзаб чәкир. Буна неҹә дөзмәк олар?

МҮГӘДДӘС КИТАБЫН КӨМӘЈИ

Белә дәһшәтли изтираблара бахмајараг, хәјанәтә уғрајан бир чох инсанлар Мүгәддәс Китабдан тәсәлли тапыблар. Онлар өјрәнибләр ки, Аллаһ онларын ҝөз јашларыны ҝөрүр, онларын дәрдини баша дүшүр (Мәлаки 2:13—16).

«Фикирләр мәни чулғајанда мәнә тәсәлли вериб овутдун» (Зәбур 94:19).

«Бу ајәни охујанда елә тәсәввүр етдим ки, Јеһова шәфгәтли ата кими, јарама мәлһәм гојур», — дејә Билл јада салыр.

«Садиг адамла садигсән» (Зәбур 18:25).

«Јолдашым мәнә хәјанәт етсә дә, мән Јеһованын сәдагәтли олдуғуна әмин идим. Билирдим ки, О, һеч вахт мәни атмаз». Бу сөзләр һәјат јолдашы ајларла она хәјанәт едән Карменин сөзләридир.

«Һеч нәјә ҝөрә нараһат олмајын. Һәр мәсәлә барәдә диләјинизи дуа вә јалварышла... Аллаһа билдирин. Онда Аллаһын һәр бир ағылдан үстүн олан сүлһү үрәјинизи вә фикирләринизи... горујаҹаг» (Филиппилиләрә 4:6, 7).

«Бу ајәни дөнә-дөнә охујурдум. Дурмадан дуа етдикҹә Аллаһ һәјатыма сүлһ бәхш едирди», — дејә Саша бөлүшүр.

Бу адамларын һамысында елә анлар олуб ки, һәјатдан әлләрини үзүбләр. Амма онлар Јеһова Аллаһа ҝүвәнибләр, Онун Кәламындан ҝүҹ тапыблар. Билл дејир: «Һәјатымда һәр шеј алт-үст оланда иманым мәнә јашамаға ҝүҹ верди. О вахт мәнә елә ҝәлирди ки, “гаранлыг дәрәдән кечирәм”, амма һәмин анларда Аллаһ һәмишә мәнимлә олуб» (Зәбур 23:4).

a Бағышлајыб-бағышламамаг барәдә «Һәјат јолдашы хәјанәт едәндә» адлы «Ојанын!» журналынын 1999-ҹу ил 22 апрел (рус.) сајындакы мәгаләләрдән охуја биләрсиниз.

Онлар неҹә таб ҝәтирдиләр?

Тәсәлливериҹи ајәләри дүшүнүн.

Билл дејир: «Мән “Әјјуб” вә “Зәбур” китабыны охујурдум, өз вәзијјәтимә ујғун ҝәлән ајәләри ишарәләјирдим. Баша дүшүрдүм ки, бу китаблары јазан адамлар да мәним кечирдијим ағры-аҹыны, әзаблары дујублар».

Мусиги динләјин.

Кармен јадына салыр: «Ҝеҹә ҝөзүмә јуху ҝетмәјәндә мусигијә гулаг асырдым. Бу мәни хејли сакитләшдирирди». Даниел исә дејир: «Мән ҝитара чалмағы өјрәндим. Ҝөрдүм ки, мусиги мәнә гәлб раһатлығы тапмаға, дахили һармонијаны бәрпа етмәјә көмәк едир».

Һиссләринизи бөлүшүн.

Даниел дејир: «Мән, адәтән, өз һиссләрими бөлүшән дејилдим. Амма бир нечә јахшы достум вар иди, һәр ҝүн онларла дәрдләширдим. Һәм мәктуб јазараг, һәм дә данышараг үрәјими онлара бошалдырдым. Бунун бөјүк көмәји дәјирди». Саша да бөлүшүр: «Аиләмин көмәји олмасајды, һеч билмирәм нә оларды. Анам һәмишә јанымда олурду. Мәнә гулаг асырды. Атамын севҝисини, гајғысыны һәмишә һисс едирдим. О көмәк етди ки, мән јаваш-јаваш өзүмә ҝәлим».

Даима дуа един.

«Мән һәмишә дуа едирдим. Һисс едирдим ки, Аллаһ мәнимләдир, мәнә гулаг асыр, көмәк едир. Бу тәлатүмлү ҝүнләрдә Аллаһа даһа да јахын олдум», — дејә Кармен хатырлајыр.