Ағыр хәстәлијә тутуланда

«Ағ ҹијәримдә вә јоғун бағырсағымда хәрчәнҝ олдуғуну өјрәнәндә елә билдим ки, мәнә өлүм һөкмү кәсдиләр. Амма һәкимдән гајыданда өз-өзүмә фикирләшдим ки, дүздүр, вәзијјәт үрәкачан дејил, амма өзүмү әлә алмалыјам» (Линда, 71 јаш).

«Үзүмүн сол тәрәфиндә кәскин синир ағрыларындан әзијјәт чәкирәм. Бәзән ағры елә шиддәтли олур ки, депрессијаја дүшүрәм. Дәфәләрлә олуб ки, тәнһалыг һисси мәни, аз гала, интиһара сүрүкләсин» (Елис, 49 јаш).

Әлил арабасында отуран хәстә киши доғмаларынын әһатәсиндә

ӨЗҮ, јахуд јахын адамы өлүмҹүл хәстәлијә тутулан инсан јахшы билир ки, бу, неҹә ағыр вәзијјәтдир. Хәстәлик азмыш кими, бир дә онун вердији мәнәви ишҝәнҹә инсаны дахилән јејиб-парчалајыр. Белә вәзијјәтдә инсан онсуз да горху, һәјәҹан кечирир, үстәлик, мүајинәләр, мүалиҹә ахтарышлары, мүалиҹә пулу, дәрманларын әлавә тәсирләри инсанын әсәбләрини лап тарыма чәкир. Ағыр хәстәлијин вердији мәнәви изтираб дөзүлмәз ола биләр.

Көмәк үчүн һара үз тута биләрик? Аллаһа дуа етмәк, Мүгәддәс Китабдан тәсәлливериҹи ајәләр охумаг бир чохларына тәскинлик вериб. Аилә үзвләринин вә достларын севҝиси, гајғысы да инсан үчүн бөјүк көмәкдир.

ОНЛАР НЕҸӘ ТАБ ҜӘТИРДИЛӘР?

«Хәстәлик вахты иманынызы горујун, Јеһова Аллаһ сизә таб ҝәтирмәјә көмәк едәҹәк. Дуа един. Һиссләринизи Аллаһа данышын. Ондан мүгәддәс руһ истәјин. Аллаһдан ҝүҹ истәјин ки, аиләниз наминә мөһкәм оласыныз вә хәстәлијә мәрдликлә синә ҝәрәсиниз», — дејә 58 јашлы Роберт дејир.

О әлавә едир: «Аилә үзвләринин адама дајаг олмасы чох бөјүк көмәкдир. Һәр ҝүн зәнҝ едиб һалымы сорушурлар. Һәр јандан достларым мәнә үрәк-дирәк верир. Онлар мәни ајагда сахлајыр, мәнә таб ҝәтирмәјә көмәк едирләр».

Бәлкә дә, сизин достунуз һансыса хәстәликдән әзијјәт чәкир. О заман Линданын сөзләри сизә көмәк едә биләр: «Тәбии ки, хәстә адамлар да нормал һәјат сүрмәк истәјир. Ола билсин, онлар отуруб-дуруб хәстәликләри барәдә данышмаг истәмирләр. Одур ки, әввәлләр достунузла нәләрдән данышырдынызса, инди дә о мөвзулардан данышын».

Аллаһын вердији ҝүҹ, Мүгәддәс Китабдан алдығыныз тәсәлли, доғмаларын, достларын көмәји сиздә әминлик јарадаҹаг ки, ағыр хәстәлијә бахмајараг, јашамаға дәјәр.

Мүгәддәс Китабын көмәји

Аллаһа ҝүвәнин.

«Јеһоваја үз тутдум, мәнә һај верди, мәни бүтүн горхулардан азад етди... Бу мәзлум чағырды, Јеһова ешитди» (Зәбур 34:4, 6).

Линда дејир: «Мән һеч вахт Аллаһа демирәм ки, мәни сағалт. Һәмишә дуа едирәм ки, ај Аллаһ, мәнә ҝүҹ вер, гој хәстәлијә дөзә билим».

Аллаһын Кәламындан ҝүҹ алын.

«Һеч бир сакин “хәстәјәм” демәјәҹәк» (Әшија 33:24).

Аллаһын ҝәләҹәклә бағлы вәдләри барәдә дүшүнүн. Бу сизә үмид верәҹәк, үмид исә дөзмәјә ҝүҹ верәҹәк.

Доғмаларыныздан, достларыныздан көмәк истәјин.

«Әсл дост һәр заман севәр, о, дар ҝүн үчүн доғулмуш гардашдыр» (Мәсәлләр 17:17).

«Тәклијә чәкилмәјин. Достларынызын көмәјиндән үз чевирмәјин. Бәзән өзүнүзү тәк һисс едәҹәксиниз, сизә елә ҝәләҹәк ки, һеч Аллаһ да сизи ешитмир. Амма буна бахмајараг, тәклијә чәкилмәјин», — дејә мәгаләнин әввәлиндә сөзләри ҝәтирилән Елис мәсләһәт ҝөрүр.