Аиләдә үзләшдијиниз мүгавимәтләрә мүдриклик вә анлајышла таб ҝәтирин
1 Истеһзалар, зоракылыг, һәбс ҹәзасы, тәблиғ хидмәтинин, мәсиһчи ҝөрүшләринин, һәмчинин һәмиманлыларла үнсијјәтин гадаған олунмасы, Мүгәддәс Китабын вә она әсасланан әдәбијјатларын мүсадирәси — бу кими хәбәрләри ешидәркән, адәтән баҹы-гардашларымызын сыхышдырылдығы өлкәләри хатырлајырыг. Бәс сиз һеч дүшүнмүсүнүзмү ки, јығынҹагда даим үнсијјәтдә олдуғумуз бир чох баҹы-гардашларымыз һал-һазырда, иманларына шәрик олмајан һәјат јолдашлары тәрәфиндән буна охшар тәзјигләрә мә’руз галырлар?
2 Әлбәттә, һәјат јолдашлары мәсиһчи олмајанларын һамысы бу ҹүр шиддәтли мүгавимәтләрлә үзләшмир. Лакин буна бахмајараг, онларын иманы ҹидди сынаглара мә’руз галыр (Јәһ. 15:20; 1 Кор. 7:12-26). Чәтинликләрә таб ҝәтирә билмәләри үчүн бизим көмәјимизә вә руһландырмағымыза еһтијаҹлары вардыр (Ибр. 10:24, 25). Хүсусилә ағсаггаллар онлар үчүн тәравәт вә рәһбәрлик мәнбәји олмалыдырлар (Јешаја 32:1, 2).
Мүгавимәтләрин сәбәби нәдир вә онларын гаршысыны алмаг үчүн нә етмәк олар.
3 Һәтта мәсиһчи олмајан һәјат јолдашынын мүгавимәти сәртләшдикдә белә, үмидсизлијә гапылмаға дәјмәз (1 Кор. 13:7). Мәсәлән, әввәлләр һәјат јолдашына мүгавимәт ҝөстәрән бир чохлары инди Јеһоваја хидмәт едирләр. Дахили мә’јуслуг вә горху һисси өзүнү чох вахт мүгавимәт, гәзәб, һәтта зоракылыг васитәсилә бүрузә верир. Әрин мүгавимәт ҝөстәрмәсинин сәбәби садәҹә олараг һәгигәти хошламамасы дејил, мәсиһчи фәалијјәтинин арвадынын даһа чох диггәтини вә вахтыны алыб ондан узаглашдыраҹағындан, онларын мүнасибәтләринә зәрәр ҝәтирәҹәјиндән вә аиләнин дағылмасындан горхмасы ола биләр. Вә ја һәјат јолдашынын она әввәлки гәдәр диггәт јетирмәјәҹәји фикри ону һиддәтләндирир, јахуд о, башгаларынын гаршысында пәрт олмагдан горхур. Мүгавимәтләрин сәбәбини баша дүшмәјә чалышмагдан әлавә, иманлы бир гадын кими, мүдрик давранмаг үчүн нә едә биләрсән?
4 Мүгавимәтләрин сәбәбини баша дүшдүкдә, мүгәддәс руһун сәмәрәсини тәзаһүр етдирмәк асан олаҹаг (Галат. 5:22). Јолдашынла өз иманыны бөлүшмәјә мүнасиб вахт сечәркән јадда сахла ки, чох вахт һөрмәтҹил сүкут вә мәсиһчијә лајиг давраныш даһа јахшы нәтиҹә верир. Беләликлә, мүдрик гадын һеч вахт мәсиһчи олмајан һәјат јолдашыны, Мүгәддәс Китабдан јерли-јерсиз сөз салмагла әсәбиләшдирмәјәҹәк (1 Пет. 3:1-6). Сән һәјат јолдашынла вахт кечирдикдә, мәсиһчи нормалары чәрчивәсиндә она көмәк етдикдә вә әмәксевәрлик ҝөстәрдикдә она ајдын олаҹаг ки, мәсиһчи олмаг аиләјә вә евә лагејд јанашмаға ҝәтириб чыхармыр, әксинә, әрә вә ја гадына өз вәзифәсини даһа јахшы јеринә јетирмәкдә көмәк едир вә евдә долғун, исти аилә атмосфери јарадыр.
5 Әҝәр мүнасибдирсә, имкан јарандыгда мәсиһчи олмајан һәјат јолдашыны бә’зи баҹы-гардашларла таныш ет. Бә’зән башгалары иманлы аилә үзвүндән даһа чох шеј едир, һәтта онунла Мүгәддәс Китаб өјрәнмәсини белә башлаја билирләр. Әввәлләр һәгигәтә мүгавимәт ҝөстәрәнләрин бир чоху, мәһз јығынҹағын диҝәр үзвләри илә таныш олуб, онларын һәјат тәрзинә һөрмәт етдикләри үчүн Мүгәддәс Китабы өјрәнмәјә башламышлар.
6 Биз мәсиһчиләр, аилә үзвләриндән вә ја һәјат јолдашындан артыг Аллаһа итаәт етмәлијик. Лакин бунунла јанашы мүгавимәтләрлә үзләшән һәр кәс сөзүндә вә давранышында ҝөзәл нүмунә верәрәк хошбәхт, исти аилә атмосфери јаратмаг үчүн әлиндән ҝәләни етмәлидир. Бунунла о, Аллаһы иззәтләндирир (Һәв. иш. 5:29; 1 Кор. 7:16).