Тәмизлик Аллаһы иззәтләндирир
1 Мусанын ганунунда тәмизлијин горунмасы үчүн ҹидди тәләбләр вар иди. Бу тәләбләр өзләрини физики вә руһани ҹәһәтдән тәмиз сахламалы олан Исраил халгыны башга халглардан фәргләндирирди (Лев. 11:35, 36; 15:1-11; Јешаја 52:11). Белә тәмизлик Аллаһа иззәт ҝәтирир вә халгын сағлам галмасына көмәк едирди.
2 Бу ҝүн дә тәмизлик Јеһованын халгынын фәргләндириҹи ҹәһәтидир. Бу, Јеһованын халгынын бир груп кими фәргләндириҹи ҹәһәти олдуғу һалда, ајры-ајрылыгда һәр биримиз һаггында да буну демәк олармы? Сәлигә-саһмана вә шәхси тәмизлијимизә нә гәдәр риајәт етмәјимиз Јеһованын тәләбләрини нә дәрәҹәдә гијмәтләндирдијимизи ҝөстәрир.
3 Евимизин вәзијјәти һаггында нә демәк олар? О, тәблиғ етдијимиз Падшаһлыг хәбәрини дәјәрдән салмыр ки? Евимиз сәлигәсиз олдуғу, һәјәтимизи исә от-алаф басдығы һалда, јер үзүнүн Ҹәннәтә чевриләҹәјиндән данышырыгса, ола биләрми ки, кимсә бизим сәмимијјәтимизи шүбһә алтына алсын? Әҝәр евимиздә сәлигәсизлик һөкм сүрүрсә, јахуд натәмизлик уҹбатындан хошаҝәлмәз ијләр ҝәлирсә, демәк олармы ки, биз Аллаһын Падшаһлығы алтында олаҹаг јени дүнјаја ујғун тәмизлијә јијәләнмишик? (од с. 136-138, рус.).
4 Хидмәтә ҝетдијимиз автомобил һаггында нә демәк олар? Онун ичи вә бајыры кифајәт гәдәр тәмиздирми ки, ҝөрдүјүмүз иши һөрмәтдән салмасын? Бәс ҝејимимиз, чантамыз вә макијажымыз неҹә? Онлар тәмиз вә хошаҝәләндирми, инсанларда мәнфи фикир ојатмыр ки? Јахшы оларды ки, вахтлы-вахтында јујунараг вә палтарларымызы јујараг өзүмүзү вә үст-башымызы тәмиз сахлајаг (w89 1.11. с. 16-19, рус.).
5 Бәс әҝәр биҝанәлији уҹбатындан мәсиһчинин шәхси ҝиҝијенасы, јахуд јашадығы шәраит јығынҹаға ләкә ҝәтирирсә, онда неҹә? Ола биләр, јашы чох олдуғуна вә ја сәһһәтинин зәифлијинә ҝөрә онун көмәјә еһтијаҹы вар. Әҝәр беләдирсә, онда она јардым ҝөстәрмәк хејирхаһлыг оларды. Анҹаг киминсә, бу саһәдә проблеми олдуғундан хәбәри олмаја биләр. Хејирхаһлыгла верилән мәсләһәт ону вәзијјәти дүзәлтмәјә тәшвиг едә биләр. Бу саһәдә һәмишә пис нүмунә верән адамлар јығынҹагда хүсуси мәсулијјәт ала билмәзләр. Әлбәттә, ағсаггаллар еһтијатлы олмалыдырлар ки, шәхси нормаларыны вә ја сечимләрини ирәли сүрмәсинләр.
6 Биз адәтән јени марагланан шәхсләри Падшаһлыг Залына руһани зијафәтә дәвәт едирик. Залымыз ҝөзәл вә сәлигәли олдуғундан буну севинҹлә едирик. Анҹаг залы белә сахламаг үчүн сәј тәләб олунур. Өз залыныза диггәтлә бах. Отураҹаглар, дөшәмә, диварлар тәмиздирми? Ајагјолу мүнтәзәм тәмизләнирми? Дөшәмәни һәмишә зибилли, диварлары да ҹызылмыш ҝөрәндә бу бизим үчүн тезликлә адиләшә биләр. Анҹаг илк дәфә ҝәләнләр бурадан пис тәәссүратла ҝедә биләрләр. Залын јығышдырылмасы вә ја тәмири вахты өһдәмизә дүшән иши јеринә јетирмәклә онун ҝөзәл вә ҹәлбедиҹи галмасында әлимиздән ҝәләни етмәлијик.
7 Биз һеч бир сөз сөјләмәдән хариҹи ҝөрүнүшүмүзлә вә евимизин, автомобилимизин, Падшаһлыг Залларынын тәмизлији илә Аллаһы иззәтләндирә биләрик. Јахшы нүмунәмиз сајәсиндә һеч кими бүдрәтмәјәҹәк, әксинә, ибадәтимизин тәмиз вә пак олдуғуна шаһидлик едәҹәјик (1 Кор. 10:31, 32; Јаг. 1:27).