Јеһова ән үстүн гүдрәти верир
1 Исанын бүтүн шаҝирдләринә надир үстүнлүк олан мүгәддәс хидмәт — мәсиһчи хидмәти — һәвалә едилиб (Мат. 24:14; 28:19, 20). Анҹаг гејри-камиллик вә дүнјанын ҝөстәрдији тәзјиг уҹбатындан һәрдән өзүмүзү бу иш үчүн јарарсыз һесаб едә биләрик.
2 Белә һаллар баш верәндә һәвари Павелин Коринфдәки мәсһ олунмуш мәсиһчиләрә јаздығы мәктуб бизә тәскинлик ҝәтирә биләр. О јазырды: «Бу сәрвәти сахсы габларда сахлајырыг» (2 Кор. 4:7). Павел әминликлә дејирди: «Бу ҹүр хидмәтә малик олдуғумуз үчүн руһдан дүшмүрүк» (2 Кор. 4:1). Дүздүр, мәсһ олунмуш, јахуд ‘башга гојунлардан’ олмағымыздан асылы олмајараг, һәр биримиз үчүн хош хәбәри тәблиғ етмәк, еләҹә дә ‘руһдан дүшмәмәк’ чәтиндир. ‘Ән үстүн гүдрәти’ верән Аллаһын ҝүҹүнә еһтијаҹымыз вар (Јәһ. 10:16; 2 Кор. 4:7б).
3 Чох руһландырыҹыдыр ки, бир чох Шаһидләр шиддәтли мүгавимәтләрә, сәһһәтләри илә бағлы ҹидди проблемләрә, јахуд мадди ҹәһәтдән корлуг чәкмәләринә бахмајараг, сәјлә тәблиғ едирләр. Һәр биримиз баша дүшмәлијик ки, тәблиғ етмәк тапшырығына Јеһова Өзү дајаг дурур. Руһ дүшкүнлүјүнүн вә ја тәлашын тәблиғ етмәк гәтијјәтимизи зәифләтмәсинә јол вермәк әвәзинә, ҝәлин ‘Рәббдә вә Онун үстүн гүдрәтиндә гүввәтләнәк’ (Ефес. 6:10; Сүл. мәс. 24:10).
4 Ән үстүн гүдрәти неҹә алмаг олар? Дуада мәтанәтли олараг, Аллаһдан көмәк вә ҝүҹ истә (Ром. 12:12; Филип. 4:6, 7). Сонра Јеһованын ән үстүн гүдрәти верәҹәјинә бүтүн гәлбинлә етибар ет (Сүл. мәс. 3:5). Журналларымыздан мүасир һәмиманлыларымызын тәрҹүмеји-һалыны оху, чүнки онлар Јеһованын бу ҝүн дә Өз хидмәтчиләринә сынаглара таб ҝәтирмәјә көмәк етдијинә сүбутдур. Јығынҹагдакы баҹы-гардашларла јахын ол, јығынҹаг ҝөрүшләрини бурахма (Ром. 1:11, 12; Ибр. 10:24, 25).
5 Ҝәлин әлимиздән ҝәлән һәр шеји едәк ки, Јеһова ән үстүн гүдрәт олан вә ән ваҹиб ишдә — Падшаһлығын тәблиғи ишиндә руһдан дүшмәмәјә көмәк едәҹәк ҝүҹү бизә версин.